’’آرزوئوں کا ہجوم اور یہ ڈھلتی ہوئی عمر‘‘

ایتھے مسئلہ ایہہ ہے کہ رپورٹ دتی جاندی اے کہ سب چنگا اے تاں ای وزیراعظم کہندے نیں کہ پاکستانی اُتے جا رہے
نیں تے ملک ترقی دی شاہراہ اُتے گامزن اے پر کدوں تیکر؟ ایہہ ایواناں توں ڈھابیاں تیکر دا فاصلہ جلدی ختم ہو جائے گا

رقیہ غزل

کہندے نیں کہ سردی دا موسم بوہت رومان پرور ہوندا اے ایس وچ سورج دی شدت تے اگ دی گرمی وی مزہ دیندی اے پر ہن کہ انج دا موسم اتریا اے کہ ایہہ دونویں شدتاں اپنا اثر زائل کر چکیاں نیں کیوں جے اک پاسے تے لہور دی فضاواں وچ اسموگ دا راج اے تے دوجے پاسے منہ زور مہنگائی ناکافی ضروریات زندگی دستیاب ہون دی وجہ نال ہر کوئی پریشان، بیمار تے بدحال اے تے حالات ایہہ نیں کہ ’’جب چلی ٹھنڈی ہوا بچہ ٹھٹھر کر رہ گیا ۔۔ماں نے اپنے لعل کی تختی جلا دی رات کو ‘‘۔کجھ پاکستانیاں دے نصیب وی انج دے نیں کہ ’’سردی میں دن سرد ملا ۔۔ہر موسم بے درد ملا ‘‘کہ گرمیاں وچ بجلی نہیں ہوندی تے سردیاں وچ گیس نہیں ہوندی ایس لئی پنکھا تے ہیٹر وی ڈیکوریشن پیس بن کے رہ گئے نیں جیہڑا وی برسر اقتدار آیا ایس دی ناقص منصوبہ بندیاں، مفاد پرستیاں تے نااہل ساتھیاں نے پہلے توں موجود عوامی مشکلات وچ اضافہ ای کیتا تے پنج ورھے طفل تسلیاں تے لفاظیاں وچ لنگھا دتے۔ تحریک انصاف دا معاملہ تھوڑا مختلف اے کیوں جے عمران خان روایتی سیاست دا بت توڑن دا وعدہ کر کے آئے سن تے انج انٹری لئی کہ وکھائی دِتے انج کہ بے خود کیتے تے فیر انج کیہ کہ ساریاں دی خودی تے خوداری کھوہ لئی کہ جویں ای اقتدار ایہناں دی زندگی دا جزو لاینفک بنیا تے ایہو بہتر سمجھیا کہ ہر چنگے بُرے کم اُتے کہیا جائے کہ سب چلدا اے کیوں جے بازار سیاست دا کاروبار انج ای چلدا اے اودوں تے ٹرانسپیرنسی انٹرنیشنل رپورٹس دے مطابق جنہی کرپشن حالیہ دور حکومت وچ ہوئی اے اینی چوہتر ورھیاں وچ نہیں ہوئی ’’ہوئے رشوت کے آگے سرنگوں سب ۔۔مثالیں دے رہے تھے کربلا کی ‘‘۔
پر ہن تے وزیراعظم نے اوہ آخری شمع وی بجھا دتی اے جس دی ضیا چار ورھیاں دی تلخ نوائیاں تے پریشانیاں دے بعد وی چنگے دی امید دلواندی سی بقول شاعر ’’تم نے لہجہ بھی سرد کر ڈالا ۔۔سردیوں کے عذاب کم تھے کیا ؟‘‘جناب کہندے نیں کہ ساڈے کول اینے پیسے نہیں کہ ملک چلائیے حالانکہ اوہ ایس تقریب نال خطاب کر رہے سن جس وچ اوہ ٹریک اینڈ ٹریس سسٹم وچ وڈی کامیابی حاصل ہون اُتے ایف بی آر تے وفاقی مشیر خزانہ نوں خراج تحسین پیش کر رہے سن کہ ایہناں دی حکومت وچ ٹیکساں دی ریکارڈ وصولی ہوئی اے ۔ پر پرانی روایت نوں برقرار رکھدے ہوئے گل جدوں عوامی ریلیف دی آئی تے اوہ ای رونا دھونا تے ماضی دے حکمراناں دی غلطیاں، چوریاں تے نااہلیاں گنوا دتیاں گئیاں بلکہ ایہہ وی کہہ دتا کہ ساڈے کول ٹیکس کلچر بنیا ای نہیں تاں ای ملک نہیں چل سکدا۔ عوام حیران نیں کہ ریکارڈ ٹیکس وصولی تے مختلف ملکاں توں ملن والی امدادی رقماں کتھے گئیاں تے کتھے جاندیاں نیں؟ ایہہ کنج دا پاکستانی حکومتی خزانہ اے کہ ایس وچ جنہا مرضی پائو ایہہ خالی ای رہندا اے؟ حالانکہ نہ تے کوئی ڈیم بنیا اے تے نہ ای کوئی انفراسٹرکچر پروگرام تیار کیتے گئے نیں بلکہ جو بنیا ہویا سی اوہ وی ٹُٹ کے برباد ہو رہیا اے کہ کدھرے کسے وی قسم دی تبدیلی نظر نہیں آندی بلکہ حالات ایہہ نیں کہ کرونا توں تھوڑا سکون ہویا تے ڈینگی لوکاں دیاں جاناں لے رہیا اے پر وزیراں تے مشیراں نوں بیانات داغن تے مبینہ آڈیوز تے ویڈیوز دی فرانزک کرن توں فرصت نہیں ملدی۔ عجیب دور حکومت اے کہ ہن تے بچہ بچہ کہندا اے کہ ’’کیا سنائیں تمھیں حکایت دل ۔۔ہمیں دھوکا دیا گیا جاناں ‘‘۔ساڈے وزیراعظم نوں لفاظی وچ یدطولیٰ حاصل اے پر جدوں گل عوامی ریلیف تے وسیع عوامی مفادات وچ اصلاحات دے نفاذ دی آندی اے تے ہر وار ثابت ہویا اے کہ ’’علاج یہ ہے کہ مجبور کر دیا جائوں ۔۔وگرنہ یوں تو کسی کی نہیں سنی میں نے ‘‘۔واقعی ہر فریاد ایواناں نال ٹکرا کے لوٹ آندی اے البتہ طاقتور نوں سب مل جاندا اے جد کہ کمزور لئی سب چنگا اے ۔۔۔!
پرانے ویلیاں دی گل اے کہ اک بادشاہ نے رات نوں گِدڑاں دیاں اوازاں سنیاں تے صبح اپنے وزیراں توں پچھیا کہ اج کل گِدڑ بوہت شور کردے نیں جس نال نیند خراب ہوندی اے ، کیہ وجہ اے؟ وزیر نے کہیا: جناب ! کھان پین دی کمی ہوئے گی ایس لئی فریاد کر رہے نیں تے بادشاہ نے حکم دتا کہ بہترین بندوبست کیتا جائے تے سارا سامان تے پیسے وزیراں تے درباریاں نے آپس وچ ونڈ لئے پر رات فیر اوازاں آئیاں تے بادشاہ نے صبح فیر استفسار کیتا کہ کیہ سامان نہیں بھجوایا گیا؟ تے وزیر نے کہیا: جناب! سردی دی وجہ نال شور کر رہے نیں۔ بادشاہ نے حکم دتا کہ بستریاں تے دیگر ضروری شیواں دا انتظام کیتا جائے تے صبح فیر وزیراں تے درباریاں دی موجاں لگ گئیاں پر رات ہوئی تے فیر اوہ ای آوازاں آنا شروع ہو گئیاں تے بادشاہ نے فوری طور تے وزیر نوں طلب کیتا تے کہیا کہ تسیں بندوبست کیوں نہیں کیتا؟ وزیر نے کہیا کہ میں ہجے پتہ کر کے آنا واں تے کجھ دیر بعد آ کے کہیا: بادشاہ سلامت! اوہ شور نہیں کر رہے بلکہ آپ دا شکریہ ادا کر رہے نیں تے ہن کردے ای رہن گے کیوں جے ایہناں نوں ایہناں دی اوقات توں زیادہ مل گیا اے۔ایہہ سب دے بعد بادشاہ بوہت خوش ہویا تے وزیر نوں انعام و کرام دے کے رخصت کیتا۔۔۔ ایتھے وی ایہو مسئلہ اے کہ ایہو رپورٹ دتی جاندی اے کہ سب چنگا اے تاں ای وزیراعظم کہندے نیں کہ پاکستانی اُتے جا رہے نیں تے ملک ترقی دی شاہراہ اُتے گامزن اے پر کدوں تیکر ایہہ ایواناں توں ڈھابیاں تیکر دا فاصلہ جلدی ختم ہو جائے گا تے میں تے جدوں ایہناں سیاستداناں دیاں عمراں ویکھنی آں تے کارنامے سُندی آں تے مینوں افتخار عارف یاد آ جاندے نیں ’’آرزوئوں کا ہجوم اور یہ ڈھلتی ہوئی عمر ۔۔ سانس اکھڑتی ہے نہ زنجیرِ ہوس ٹوٹتی ہے ‘‘۔