ڈی سی دی گرفتاری تے سفارشی کلچر

موجودہ صوبائی حکومت تجربہ کار تے باصلاحیت دی بجائے انج دے جونیئر افسراں
نوں اہم عہدیاں اُتے لا رہی اے جو کم دی بجائے خوشامد دے کلچر وچ طاق نیں

تحریر حمیداللہ بھٹی

انتظامی حوالے نال ڈی سی اک اہم تے بااختیار عہدہ اے۔ ایس عہدے اُتے تعیناتی افسر جے چاہے تے اختیارات دی بدولت عوامی مسائل حل کرن وچ کلیدی کردار ادا کر سکدا اے۔ چنگے افسراں نوں حکومتی تے عوامی حلقیاں وچ عزت و تکریم ملدی اے سارے افسر جے چنگے نہیں ہُندے تے سارے بھیڑے وی نہیں ہُندے پر قابلیت و اہلیت تے تجربے دی بنیاد اُتے اگے آن والے نامساعد حالات وچ اِنج دے فیصلے کردے نیں جنہاں نال نہ صرف ایہناں دی صلاحیتاں دا پتہ چلدا اے۔ تجربہ کار افسر ہنگامی حالات وچ ناخوشگوار صورتحال پیدا نہیں ہون دیندے، منڈی بہائوالدین دے ڈی سی طارق علی بسرا دی گرفتاری کیوں ہوئی ایہہ اجیہا سوال اے جس دا جواب بہت آسان اے۔ جدوں اہلیت دی بجائے سفارشی کلچر اُتے انحصار کیتا جائے تے انج ہونا حیران کن نہیں اج کل افسر شاہی انحطاط دا شکار اے تے زوال دی وڈی وجہ سفارشی کلچر اے۔ پچھلے کجھ عرصے توں اہلیت و صلاحیت دی بجائے کجھ دے دوا کے سفارشی تعیناتیاں دا رحجان ودھ گیا اے جس نال اک تے تجربہ کار لوکاں دی حق تلفی تے حوصلہ شکنی ہو رہی اے دوجا ایہہ کہ اہم عہدیاں اُتے نااہل تے ناتجربہ کار اگے آندے جا رہے نیں ۔ڈی سی دی اپنے ای ضلعے وچ گرفتاری تے سزا پنجاب دی تاریخ دا شاید پہلا انج دا انوکھا واقعہ اے کہ اک ڈی سی نوں اپنے ای ضلعے وچ نہ صرف سزا سنائی گئی بلکہ گرفتار کر کے جیل گھلن دا حکم وی سنایا گیا۔ پنجاب دی تاریخ وچ پہلے انج دی کوئی مثال موجود نہیں۔
صارف عدالت دے جج دی ذمہ داری صارفین دے حقوق دی نگہبانی اے پر ہر ضلعے وچ اک کنزیومر پروٹیکشن کونسل وی ہوندی اے جس دا چیئر مین ڈی سی ہُندا اے فیر کیوں کنزیومر کورٹ دے جج نے کنزیومر پروٹیکشن کونسل دے چیئر مین نوں توہین عدالت دی سزا سنائی؟ کیہ سرکاری رہائش خالی کران دا کیس سنن تے سزا سنان دا کنزیومر کورٹ دے جج نوں اختیار ہے یا نہیں؟ عدالتی اختیارات اُتے گل کرن دی بجائے توہین عدالت دا باعث بنن والے واقعے دا پس منظر جاننا زیادہ اہم اے ۔محکمہ آبپاشی دے کلرک توں زبردستی رہائش خالی کرانا ظاہر اے سفارشی ڈی سی دی کوئی سیاسی مجبوری ہوئے گی کیوں جے جو لوک تعیناتی کراندے نیں اوہ فیر کم وی خوب لیندے نیں پر کم کرن والا تجربے تے قابلیت دی بجائے صرف سفارش اُتے ای تکیہ کرن لگے تے کم سنوردے نہیں وِگڑدے نیں ۔انج ای کجھ منڈی بہائوالدین وچ ہویا جج ولوں جاری ہون والے طلبی دے نوٹساں نوں ابتدا وچ تے اہمیت ای نہ دتی گئی جدوں سلسلہ ودھن لگیا تے عدالت دی توقیر دی بجائے تحقیر کردے ہوئے محبوب نامی کلرک نوں ڈی سی دا نمائندہ بنا کے گھل دتا۔ ایہہ سراسر طیش دلوان والی حماقت سی ایسے وجہ نال ڈی سی تے اے سی نوں توہین عدالت وچ تن تن مہینے دی سزا سنا کے جیل گھلن دا حکم سنایا گیا ۔کلرک تے اے سی امتیاز بیگ تے جیل چلے گئے جد کہ ریسٹ ہائوس نوں سب جیل دا درجہ دلوا کے ڈی سی نے کجھ دن آرام کر لیا۔ ایہہ واقعہ سراسرمس ہینڈلنگ اے کیوں جے عدالت وچ پیش ہون توں پہلاں ڈپٹی کمشنر نے اک ہور حماقت ایہہ کیتی کہ کنزیومر کورٹ دے جج رائو عبدالجبار نال بذریعہ فون کیس توں وکھرا ہون دا حاکمانہ لہجے وچ مطالبہ کیتا، ہن ڈی سی نے عدالتی فیصلے دے خلاف ہائیکورٹ نال رجوع کر لیا ابتدائی سماعت وچ ہائیکورٹ نے توہین عدالت دی سزا معطل کر دتی اے پر توہین عدالت دی ہائیکورٹ تے سپریم کورٹ سزا ختم نہیں کردی تے اے سی امتیاز بیگ تے ڈی سی طارق علی بسرا دونویں ملازمتاں توں وی محروم ہو سکدے نیں۔ یوسف رضا گیلانی نوں توہین عدالت دے کیس وچ ای اک دن دی سنائی گئی جس اُتے اوہ وزیراعظم دے منصب توں محروم ہوئے ۔سزا دا برقرار رہن نال دونواں افسراں دے بطور بیورو کریٹ مستقبل دا خاتمہ ہو سکدا اے۔
طارق علی بسرا دا تعلق سیالکوٹ نال اے ایہناں دے والد مسلم لیگ ن دے ٹکٹ اُتے کونسلر منتخب ہُندے رہے نیں طارق علی بسرا وزیراعلیٰ دے دفتر 8 کلب وچ بطور ڈپٹی سیکرٹری، ڈیرہ غازی خاں وچ قبائلی علاقیاں دے پولیٹیکل اسسٹنٹ تے ایڈیشنل ڈائریکٹر جنرل پی ایچ اے لہور دے عہدیاں اُتے فرائض سرانجام دے چکے نیں نجانے ایہناں وچ انج دی کیہ خاص خوبی اے کہ حکومت نے خصوصی نوازش کردے ہوئے ڈائریکٹر جنر ل پی ایچ اے دا چارج وی تھما دتا۔ ظاہر اے انج دے اہم تے کلیدی عہدیاں اُتے اک جونیئر افسر دی تعیناتی کسے اہلیت و صلاحیت دی بجائے سفارشی کلچر دی بدولت ای ممکن ہوئی۔ اک جونیئر بیوروکریٹ کیونکہ سینئر عہدیاں اُتے تعینات ہُندا رہیا ایس وچ ٹی کے دا عمل دخل وی ہو سکدا اے۔ خیر اوہ ہن چیف منسٹر دے پرنسپل سیکرٹری نہیں بلکہ نیب دی پیشیاں بھگت رہے نیں پر ہجے تیکر تقرریاں و تبادلیاں وچ ایہناں دی اہمیت برقرار رہے رائو پرویز اختر جہے جونیئر بندے دی بطور ڈپٹی کمشنر جہلم تعیناتی وی طاہر خورشید دی نظر عنایت سی جس نے حماقت کردے ہوئے چیف آفیسر کنٹونمنٹ بورڈ جہلم نوں میٹنگ لئی طلب کیتا نہ آن اُتے سرزنش کردے ہوئے کارروائی دا تحریری عندیہ دتا جس دے تفصیلی جواب وچ چیف آفیسر نے لکھیا کہ میں آپ دے ماتحت نہیں تے آئندہ انج دے حکم نامے جاری کرن توں پہلاں کسے توں اپنے اختیارات دا پتہ کر لیا کرو۔ ڈی سی جہلم وانگوں ڈی سی منڈی بہائوالدین نوں وی اختیارات دی خماری ای لے ڈُبی جے سفارش دی بجائے اہلیت و صلاحیت تے تجربے دی بنا اُتے اگے آئے ہُندے تے گرفتاری دی نوبت توں پہلاں ای فہم وفراست نال معاملہ حل کر لیندے۔
سفارش دے نال کجھ عرصے توں پیسے دے کے بیورو کریٹ اہم تعیناتیاں حاصل کرن لگے نیں جس نال نہ صرف بیورو کریسی دے زوال وچ تیزی آ گئی اے بلکہ سیاستداناں اُتے وی انگلیاں اُٹھن لگیاں نیں اک چنگا بیورو کریٹ مصلحت پسندی دی باریکیاں سمجھدا تے غیر ضروری مزاحمت توں گریز کردا اے پر نااہل تے سفارشی تجربہ نہ ہون دی بنا اُتے آپ شرمندگی چُکن دے نال ساری بیورو کریسی دی بدنامی دا باعث بن رہے نیں ۔چیف منسٹر دے دفتر 8 کلب وچ طارق علی بسرا جدوں ڈپٹی سیکرٹری تعینات سن تے اکثر با رسوخ ملن والیاں نوں چنگی تعیناتی دے بدلے خوش کرن دا وعدہ کردے رہندے سن۔
موجودہ صوبائی حکومت تجربہ کار تے باصلاحیت دی بجائے انج دے جونیئر افسراں نوں اہم عہدیاں اُتے لا رہی اے جو کم دی بجائے خوشامد دے کلچر وچ طاق نیں۔ ممکن اے ایس دی وجہ ایہہ ہوئے کہ جونیئر کم کردے ہوئے قواعد و ضوابط نوں ترجیح دین دی بجائے تعلق نوں اہم سمجھدے نیں ایس لئی تابعداری وچ حدود و قیود توں تجاوز اُتے آمادہ ہون دی وجہ نال ای اعلیٰ انتظامی عہدیاں اُتے 39 ویں تے 40 ویں کامن دے کئی بدنام افسر تعینات نیں جیہڑے اے ڈی سی آر یا اے ڈی سی جی دے عہدیاں اُتے کم کرن دا کوئی خاص تجربہ نہیں رکھدے دور کیوں جائیے لہور جہے صوبائی دارالحکومت وچ 39 ویں کامن دے عمر دے شیر چٹھہ دے کول ڈپٹی کمشنر دا منصب اے حالانکہ اوہ گریڈ 18 دے افسر نیں ہونا تے ایہہ چاہیدا سی کہ صوبائی دارالحکومت وچ چھان پھٹک نال کوئی تجربہ کار بیورو کریٹ لایا جاندا جیہڑا گریڈ 20 نہیں تے گھٹو گھٹ 19 دا تے ہوندا پر انج کرن دی بجائے بچگانہ حرکتاں نال بدنامیاں مول لئیاں جا رہیاں نیں جدوں تیکر تعیناتیاں وچ سفارشی کلچر دی حوصلہ شکنی نہیں ہوئے گی اودوں تیکر رائو پرویز اختر تے طارق علی بسرا جہے لوک بیورو کریسی لئی شرمندگی دا باعث بن دے رہن گے۔