نسلہ ٹاور یاں نزلہ ٹاور؟

مطلوب وڑائچ

کراچی وی روشنیاں تے رونقاں دا شہر ہوندا سی۔ ایس شہر وچ دن وانگوں راتاں وی جاگدیاں سن۔ دن تے رات دا فرق نہیں سی۔ فیر ایہ شہر انج یرغمال بنیا کہ دہشت گردی دا جن ہر پاسے کھلا پھردا نظر آیا تے ایس شہر نوں دشمناں دی نظر لگ گئی۔ لاقانونیت دے سائے چھا گئے۔ کاروباری لوک شہر چھڈ کے جتھے ٹر گئے۔ رات تے رات دن وی انھیریاں وچ ڈبن لگ پئے پر قوم ایس گھمبیرتا چوں چھیتی نکل آئی پر جو نقصان ہو چکیا سی اوہدا مداوا ممکن نہیں۔ کاروبار فیر چل سکدے نیں پر بوریاں وچ پائیاں گئیاں لاشاں نوں زندہ نہیں کیتاجا سکدا۔ بہرحال اج حالات بڑے بہتر ہو چکے نیں تے ہور وی بہتر ہو رہے نیں۔ جو سرمایہ کار کراچی توں جا کے دوجے شہراں وچ وسے سن دوجے ملکاں وچ جا وسے سن اوہ واپس آ رہے نیں۔ کراچی دیاں رونقاں بحال ہو رہیاں نیں۔ لگدا اے فیر توں راتاں جاگن گئیاں۔ بیرونی سرمایہ کار وی پاکستان خاص طور تے کاروباری ہب کراچی آنا چاہندے نیں جتھے قنون دی عملداری دی لوڑ اے۔ کاروباری لوکاں تے سرمایہ کاراں نوں تحفظ دا یقین دوانا ضروری اے۔
کراچی وچ حالات بہتر ضرور ہو رہے نیں پر ہن وی مافیا موجود نیں۔ قبضہ گروپ موجود نیں جو پاکستان وچ سرمایہ کاری دی راہ وچ رکاوٹ ہو سکدے نیں۔ پہلے تے سرکار دا قبلہ ٹھیک ہونا چاہیدا اے جنہے ارباں روپیے دی زمین اک پراپرٹی ٹائیکون نوں کوڈیاں دے بھاء ویچ دتی۔ سپریم کورٹ وچ معاملہ گیا تے 460 ارب دی ادائیگی دا حکم دتا گیا۔ اج نسلہ ٹاور ڈھایا جا رہیا اے ایہ حکم وی سپریم کورٹ نے دتا اے۔ آخر ایہ نسلہ ٹاور بن کیویں گیا۔ سپریم کورٹ دے حکم نال ڈھایا جا رہیا اے تے یقینا ایہدی تعمیر غیرقنونی اے۔ کنے انسان ٹاور ڈھان نال متاثر ہون گے جہڑے لوکاں نے ایہ ٹاور بنایا تے اک اک مکان تے دکان نوں ویچیا اوہ رقم جیب وچ پا کے ٹر گئے۔ متاثرین اوہو عام لوک نیں‘ جو مظاہرے کر رہے نیں۔ ایہناں نوں کیویں اکاموڈیٹ کرنا اے۔ حکومت ایس حوالے نال شاید اقدامات کرے۔ لوگ پائی پائی جوڑ کے جائیداداں خریدے نیں تھوڑا غور کرن دی لوڑ اے کہ اوہ جو وی خرید رہے نیں اوہدی قیمت کیہ اے کجھ غیرقنونی تے نہیں۔
2018ء وچ ایم این ایم موٹرسائیکل سکینڈل سامنے آیا۔ ایہدے وچ 11ارب لٹے گئے۔ سٹاکسٹاں نے سستی موٹرسائیکلاں دی وکری دی تشہیر کیتی لوک نسدے آئے۔ اج کئی سٹاکسٹ احتساب عدالت وچ کیس بھگت رہے نیں پر موٹرسائیکل کسے نوں نہیں ملی۔ دیکھا دیکھی لوگ سستی چیز لئی اپنی جمع پونجی گنوا دیندے نیں۔ لوک پچھدے نیں فراڈ توں کیویں بچیا جا سکدا اے فراڈ توں بچیا سکدا اے تھوڑی تحقیق کر لوو۔ کراچی وچ سرکلر ریلوے سی اوہدی پٹڑی تے گھر بنا کے ویچے گئے۔ جتھے خریدار کیہ بالکل انھے سن جہناں نے ایہ گھر خریدے ہن اوہ ڈھائے گئے نیں تے رولا پے رہیا اے۔ کراچی وچ غیرقنونی تعمیر کیتے اک نہیں کئی ٹاور گرن گے۔ اوہناں دا گرنا ای بہتر اے جو کراچی دیاں روشنیاں دی بحالی وچ بہتر معاون ثابت ہون گے۔
دوستو! اج دے ایس عوامی موضوع نوں اسیں دو حصیاں وچ ونڈ کے گل کرنے آں۔ پہلی گل تے ایہہ وے کہ صرف نسلہ ٹاور ای نہیں کراچی وچ بنن والیاں غیرقنونی عمارتاں دی گنتی ہزاراں وچ اے۔ جدوں ایم کیو ایم دا طوطی کراچی وچ بولدا سی تے ایم کیو ایم دی قیادت نے اپنے سپورٹراں نوں سیاسی رشوت دے طور تے چائنہ کٹنگ تے پارکاں وچ میرج ہال بنوا دتے۔ فیر ایہدے بعد پچھلے پندراں ورھیاں توں پیپلزپارٹی نوں اک وڈے وقفے دے بعد اقتدار ملیا تے ہوس دے شکاریاں نے اندرون سندھ توں بھیڑیے لیا کے چھڈ دتے جہناںنے اخلاقیات دے سارے دامن چھڈ کے اجہی لٹ مار مچائی کہ کراچی دے نقشے وچ جتھے کوئی خالی تھاں نظر آئی اوہناں لوکاں نے اوہدے تے قبضہ کرکے اوہنوں ویچ دتا۔ فش ہاربر توں لے کے اچیاں اچیاں عمارتاں دا جال وچھا دتا گیا۔ کلفٹن تے جڑے ساحل دی پٹی تے قبضا جما کے اچیاں اچیاں عمارتاں تعمیر کیتیاں گئیاں جد کہ ایس سانحے دا دوجا پہلو ایہہ وے کہ کیہ اوہ لوک جہناں نے مارکیٹنگ کمپنیاں دی ایڈورٹائزنگ توں متاثر ہو کے اجہی رہائشی کالونیاں تے بلڈنگز وچ اپارٹمنٹس بک کروائے کیہ اوہناں نے ایگریمنٹ کرن توں پہلاں یاں فائل خریدن توں پہلاں تھوڑی جنی وی تحقیق کیتی کہ ایہ ایس پراپرٹی دی تھاں نوں سرکاری این او سی وی ملیا اے کہ نہیں؟ تریجا نقطہ ایہہ وے کہ کالے دھندے دی بھرمار نے ذہناں نوں ماقوف کر دتا تے لوکاں نے اپنا کالادھن چھپان لئی دھڑادھڑ رئیل اسٹیٹ بزنس وچ بھرویں سرمایہ کاری کیتی جہدے نتیجے اج تہاڈے سامنے نیں۔ یقینا پنج توں دس فیصد اجہے عام لوک وی شامل ہون گے جہناں نے اپنی زندگی دی حلال کمائی خون پسینے نال جمع کرکے پلاٹ یاں اپارٹمنٹ خریدیا ہووے گا پر زیادہ تر گنتی کالادھن نوں چھپان والے انویسٹرز دی لگدی اے۔ بہرحال کراچی دا نسلہ ٹاور متاثرین لئی نزلہ ٹاور بن گیا اے۔ حکومت نوں چاہیدا اے کہ اپوزیشن تے پی ڈی ایم تے الزام تراشیاں دی تھاں پاکستان وچ اک مکمل تے جامع زمین دی ملکیت دا ڈیجیٹل نظام متعارف کروائے جیویں یورپ تے دنیا بھر وچ ایس ویلے لاگو اے۔