وزیر اعلیٰ پنجاب تے درود شریف

دو دن پہلاں وزیراعلیٰ پنجاب عثمان بزدار نے پنجاب دے سرکاری سکولاں وچ صبح پڑھائی دا آغاز دورد شریف نال کرن دے احکامات جاری کیتے نیں تے محکمہ تعلیم نے فوری طور تے ایس حوالے نال نوٹیفکیشن جاری کر دتا اے

محمد شعیب مرزا

حکومتاں عام طور تے عوام تے میڈیا دی تنقید دا نشانہ بن دیاں رہندیاں نیں۔ اے خاص طور تے جدوں مہنگائی عام بندے دا جینا دوبھر کر دیوے تے سفید پوش لوکاں لئی اپنی سفید پوشی دا بھرم رکھنا مشکل ہو جائے۔ صحافی حکومت دی نالائقیاں، نااہلیاں تے بدعنوانیاں دا پردہ چاک کردے رہندے نیں۔ ایہہ ایس لئی وی ضروری ہوندا اے کہ حکومت دا قبلہ درست رہے تے اوہ گڈ گورننس دی طرف توجہ دے ۔ تنقید اپنی جگہ بجا پر کدی کدی کوئی انج دی خبر وی آ جاندی اے جو خزاں رتاں وچ بہار دے جھونکے دی مانند روح نوں معطر تے سرشار کر دیندی اے کجھ عرصہ پہلاں ای اک چنگی خبر ایہہ آئی سی کہ تعلیمی اداریاں وچ پرائمری دی سطح اُتے ناظرہ قرآن مجید تے میٹرک دی سطح اُتے قرآن مجید باترجمہ پڑھانا لازمی قرار دتا گیا اے۔ ایس وچ اسپیکر پنجاب اسمبلی چودھری پرویز الٰہی دی کاوشاں دا وی عمل دخل سی تے گورنر پنجاب چودھری محمد سر ور وی ایس حوالے نال کافی پُر جوش سن۔ ایس نال یقینا نویں نسل دنیا وی تعلیم دے نال قرآنی تعلیمات توں وی بہرہ مند ہوئے گی تے جے ایس اُتے عمل پیرا وی ہوئی تے معاشرے وچ انقلابی تبدیلی پیدا ہوئے گی۔ وزیراعظم عمران خان ولوں رحمت العالمین ؐ اتھارٹی دا قیام وی خوش آئند اے۔
دو دن پہلاں وزیراعلیٰ پنجاب عثمان بزدار نے پنجاب دے سرکاری سکولاں وچ صبح پڑھائی دا آغاز دورد شریف نال کرن دے احکامات جاری کیتے نیں تے محکمہ تعلیم نے فوری طور تے ایس حوالے نال نوٹیفکیشن جاری کر دتا اے۔ ایہہ اک نہایت احسن فیصلہ اے جس دی جنہی تحسین کیتی جائے گھٹ اے۔ وزیر اعلیٰ پنجاب دی پالیسیاں توں ہزار اختلاف کیتا جائے پر ایہناں دے ایس فیصلے نے دل خوش کر دتا اے۔ درود شریف اک انج دی عبادت اے جیہڑی کدی رد نہیں ہوندی۔ انسان تے فرشتے ای نہیں اللہ تعالیٰ وی اپنے پیارے حبیب ﷺاُتے درود بھیجدے نیں۔ جو انسان درود شریف پڑھدا اے ایس لئی 10نیکیاں لکھیاں جاندیاں نیں تے ایس دے 10 گناہ مٹا دتے جاندے نیں یعنی ایس دے موہڈھیاں اُتے موجود دونویں فرشتے مصروف ہو جاندے نیں۔ سجے پاسے والا فرشتہ نیکیاں لکھدا اے تے کھبے پاسے والا گناہ مٹان لگدااے۔ اوہ کیہ سہانا منظر ہویا کرے گا جدوں تعلیمی اداریاں وچ صبح درود دی صداواں بلند ہون گیاں۔ نویں نسل دے دلاں وچ عشق مصطفی ﷺ پروان چڑھے گا۔ حدیث مبارکہ اے کہ نیکی ترغیب دین والے دے نامہ اعمال وچ ایس دی ترغیب اُتے نیکیاں کرن والے سارے انساناں دے ثواب دے برابر ثواب لکھیا جاندا اے۔ انج وزیراعلیٰ پنجاب نے اپنے نوںآپ اجرِ عظیم دا حقدار بنا لیا اے۔
وزیراعلیٰ پنجاب گرچہ بوہت کم گو نیں۔ ایہناں دے وزیر اعلیٰ بنن تے ایہناں دی کارکردگی اُتے بڑے اعتراضات ہوندے رہے۔ کئی وارسنن وچ آیا کہ ایہناں نوں ہٹایا جا رہیا اے پر ہن تیکر اوہ قائم دائم نیں لگدا اے کہ جدوں وی ایہناں اُتے کوئی مشکل مرحلہ آندا اوہ درود شریف کثرت نال پڑھدے نیں تے فیر :
مجھ کو جھکنے نہیں دیتا ہے سہارا تیراؐ
والا معاملہ ہو جاندا اے تے اوہ فیر توں سرخرو ہو جاندے نیں۔ نویں نسل دی تربیت دے حوالے نال بالاں دے رسائل اہم کردار ادا کر رہے نیں۔ بالاں دی اسلامی، اخلاقی تے تہذیبی تربیت وچ بالاں دے رسائل تے ادیباں دا کردار مثال اے۔ بالاں دی بہتر کردار سازی تے ایہناں وچ فروغ مطالعہ دی عادت ودھان لئی وزیراعلیٰ پنجاب نوں چاہیدا اے کہ اوہ ہر سارکاری تے پرائیویٹ تعلیمی ادارے لئی ہر مہینے گھٹ توں گھٹ پنج بالاں دے رسائل تے 10کتاباں دی خبریداری تے ہفتے وچ لائبریری دا گھٹ توں گھٹ اک پیریڈ لازمی قرار دین۔ ایہہ عمل بالاں نوں پُر امن تے مفید شہری بنان وچ معاون ثابت ہوئے گا ۔ دیگر شعبیاں وانگوں بالاں دے ادب تے رسائل نوں وی سرکاری ایوارڈز دتے جان ایس حوالے نال نہایت فعال لہور وچ قائم اکادمی ادبیات اطفال نال تعاون تے اشتراک کیتا جائے۔ تعلیمی اداریاں وچ صبح اسمبلی تے بزم ادب نوں بحال کیتا جائے تے تلاوت و درود شریف دے نال علامہ اقبال دی دعا:
لب پہ آتی ہے دعا بن کے تمنا میری
پڑھنا لازم قرار دتی جائے تے ایس دے نال حکیم محمد سعید شہید دی لکھی ہوئی دعائے سعید وی شامل کر لئی جائے تے ایس دے دوررس نتائج برآمد ہون گے، اک باکردار نسل پروان چڑھے گی تے وزیراعلیٰ پنجاب دی نیکیاںوچ مزید وادھا ہوئے گا۔