صرف پولیس نہیں ساری قوم دی سوچ بدلن دی لوڑ اے
سیالکوٹ وچ ایہہ دُجا واقعہ رونما ہویا اے کہ جس نے انسانیت نوں شرمسار کر کے رکھ دتا اے
عتیق انور راجہ
اک گل ہمیشہ توں کہی جا رہی اے کہ لڑائی مار کٹائی ہو رہی ہوئے خاندانی دشمنی وچ لوک اپنے پیاریاں دی زندگیاں گنوا رہے ہون،یا ڈکیتی وچ ملزمان اہل خانہ نوں یرغمال بنائے بیٹھے ہون۔ کہیا جاندا اے تے بوہت حد تیکر حقیقت وی ایہو اے کہ ساڈی پولیس دیر نال اپڑدی اے۔ ایس صورت وچ اسیں ہمیشہ پولیس دے سارے محکمے نوں مندا بول کے اپنے دل دی بھڑاس کڈن دی کوشش کرنے آں پر پولیس دے فرائض، ذمہ داریاں تے مجبوریاں دے بارے جانن دی بلکل وی کوشش نہیں کردے۔ پولیس دا اصل کم اپنے شہریاں دی جان و مال تے عزتاں دی حفاظت کرنا اے۔ پولیس دا اصل کم کسے وی مشکل ویلے وچ اپنے لوکاں نوں تحفظ دا احساس دلوانا اے پر حقیقت وچ انج ہوندا کیوں نظر نہیں آ رہیا۔ جے پنجاب پولیس دی ای گل کیتی جائے تے چودہ پندرہ کروڑ عوام دے صوبے وچ پولیس دی اینی تعداد نہیں جیہڑی ہر ویلے ہر پاسے بر وقت اپڑ سکے۔ اج توں کجھ سال پہلے جدوں گوجرانوالہ وچ سلطان اعظم تیموری صاحب آر پی او دے فرائض نبھا رہے سن (موجودہ آر پی او نے سنیا اے شاعراں، ادیباں تے صحافیاں دا اپنے دفتر داخلہ بند کیتا ہویا اے) تے اسیں ایہناں دے کہن اُتے شہر دے کجھ تھانیاں دا دورہ کیتا۔ تھانیداراں، تفتیشیاں تے حوالاتیاں نال گل بات کیتی تے جتھے سانوں بوہت سارے مسائل بارے جانکاری ملی اوتھے ایہہ خبر وی ملی کہ تھانیاں وچ پولیس دے جواناں دی تعداد بوہت گھٹ اے تے اوہناں نے ای سویرے عدالتاں وچ دوپہر تے شام نوں ناکیاں وچ ڈیوٹی دینی ہوندی اے تے ایہناں ای وچوں کجھ اک نے سینکڑے دی تعداد وچ آن والی درخواستاں اُتے عمل کرن دی کوشش کرنی ہوندی اے جیہڑا ناممکن نہیں تے مشکل ترین ضرور اے۔
ہن آنے آں اپنے اصل موضوع ول کہ ساڈی پولیس دے جوان بروقت کارروائی کیوں نہیں کردے۔ میں پہلے وی کئی وار لکھیا اے کہ فوج یا پولیس دے جوان اک ای ماں دے پتر نیں۔ جے ساڈی فوج دشمناں لئی دہشت دی علامت اے تے ساڈی پولیس دے ڈر توں مجرم کنبدے نیں۔ مسئلہ کتھے پیدا ہوندا اے ایس بارے سوچن دی لوڑ اے تے مسئلہ ایہہ وے کہ فوج دے جواناں نوں قوم پوری تیاری ، بہترین ہتھیاراں تے دعاواں نال محاذ جنگ اُتے گھلدی اے جد کہ پولیس دے جواناں دے کول ہتھیار وی اینے چنگے نہیں ہویا کردے تے پولیس نوں سماج ولوں دعاواں اک پاسے اوہ ستائش وی نہیں ملدی جس دے اوہ حقدار ہوندے نیں۔ اسلام آباد پولیس دے جواناں اُتے حملے ہون، تھانیاں توں اپنے حمایتیاں نوں بزور طاقت آزاد کروا لینا ہوئے یا مذہبی جماعت ولوں پولیس دے جواناں نوں زخمی تے شہید کر دتا جانا ہوئے کوئی پولیس دے دکھاں اُتے مرہم رکھن دی کوشش نہیں کردا۔
سیالکوٹ وچ ایہہ دُجا واقعہ رونما ہویا اے کہ جس نے انسانیت نوں شرمسار کر کے رکھ دتا اے۔ ایہہ کیہ گل اے کہ جیہڑے دنیا وچ محبت دا سبب نیں ایہناں ای دے ناں اُتے اسیں بنا کسے ثبوت لوکاں دے سر قلم کرن نکل پئے آں۔ انج جے پولیس ایہناں تشدد کرن والیاں نوں روکدی اے تے ایہہ مشتعل جتھے پولیس دے نہتے جواناں دی زندگیاں اُتے حملہ آور ہو جاندے نیں تے جے پولیس ولوں کوئی سخت رویہ اختیار کیتا جاندا اے تے پولیس نوں سرکار ولوں محکمہ ولوں عدالتاں ولوں تے میڈیا ولوں انج انج دے سوال تے سزاواں دا ساہمنا کرنا پیندا اے کہ ایہنوں ویکھ کے ایہناں دے ساتھی جوان کسے ہنگامے دی صورت ہر ممکن حد تیکر پچھے ہٹن نوں ترجیح دیندے نظر آندے نیں۔ اسیں جاننے آں کہ اج توں 20 ورہے پہلے جدوں کوئی بندہ سڑک اُتے کسے حادثے دا شکار ہو کے زخمی یا فوت ہو جایا کردا سی تے ایہنوں اوتھے چُکن تے ہسپتال لے جان دی کوئی شہری کوشش نہ کردا سی تے جدوں کوئی بندہ خوف خدا پاروں کسے زخمی نوں ہسپتال لے جاندا تے ایہنوں بوہت سارے سوالاں لئی اوتھے روک لیا جاندا پر جدوں چوہدری پرویز الٰہی نے 1122 سروس مہیا کیتی اے سارے پنجاب وچ جتھے کوئی حادثہ ہوندا اے ساڈے جانباز لوک فوری اوتھے اپڑ جاندے نیں۔ رنگ و نسل تے مذہب دا امتیاز کیتے بغیر زخمی نوں صرف انسان سمجھ کے ابتدائی طبی مدد دتی جاندی اے تے بغیر کسے فارم بھرن تے فیس لین دے مریض نوں ضرورت پین اُتے ہسپتال منتقل کر دتا جاندا اے۔ ہن جس طرح اک دے بعد اک اشتعال انگیز واقعے رونما ہو رہے نیں تے پولیس اپنی جان تے نوکری بچان دے ڈر توں یا احتیاط نال ایہناں ہنگامیاں نوں روکن وچ ناکام رہی اے تے ایس دے چلدے 1122 طرز دا کوئی ہور کوئیک رسپانس محکمہ بنا دتا جانا چاہیدا اے جنہاں دی چنگی تربیت ہوئے جنہاں دے کول چنگے ہتھیار ہون تے جیہڑے جتھے بندیاں نال نمبڑن ویلے اپنی جان تے نوکری دی پرواہ کیتے بغیر بروقت تے موثر کارروائی نال حالات اُتے قابو پان دی صلاحیت رکھدے ہون۔ تے جلائو گھیرائو کرن والے دے خلاف ایہناں دے ایکشن اُتے ایہناں نوں کسے سزا دا ساہمنا نہ کرنا پئے کیوں جے جدوں تیکر لوکاں دے دل وچ قانون نافذ کرن والے اداریاں دا ڈر نہیں ہوئے گا لوک ایہناں دا احترا م نہیں کرن گے۔ پولیس دے وڈے وڈے افسراں نوں لوک سخت گلاں کہہ جاندے نیں راتوں رات حکومتاں ایہناں نوں معزول، تبدیل کر دیندیاں نیں پر فوج دے نال انج نہیں۔ فوج دے اک سپاہی نوں وی شہری سخت لفظ نہیں کہہ سکدے تبدیلی تے دور دی گل فوج دے جواناں توں ایہناں دا ناں وی پچھن دی کوئی ہمت نہیں کر سکداایہہ احترام وی اے تے ڈر وی تے قانون دا ڈر ہونا بوہت ضروری اے۔
مذہبی تشدد دنیا دے ہر خطے تے ہر مذہب دے منن والیاں ولوں ہوندا رہندا اے پر پاکستان بھارت دے علاوہ لوک متشدد سوچ رکھن والیاں دے نال کھڑے کدھرے نہیں ہوندے۔ نیوزی لینڈ دی مسجد وچ نمازیاں نوں شہید کرن والے بدبخت نوں اوتھے دے لوکاں نے اپنا ہیرو نہیں بنا لیا تے دنیا دے کئی ملکاں وچ کجھ لوکاں ولوںانج دے واقعیات دا ہونا عام اے پر کدھرے انج نہیں ہوندا کہ اک بنداہ نعرہ مارے تے باقی بنا کسے تفتیش و تحقیق ایس دے نال کسے نوں زندہ درگور کرن نکل پین۔ کسے واقعے دے بعد ساڈی قوم ولوں اکثر و بیشتر پرتشدد رد عمل ساہمنے آندا اے جد کہ یورپ وچ کسے انج دے واقعے دے بعد لوک اظہار افسوس کردے نیں۔ ایسے طرز عمل نوں ویکھن دے بعد اوہ ساڈے جنونیاں نوں دہشت گرد قرار دے کے ساڈی ریاست اُتے پابندیاں لائے چلے جا رہے نیں جد کہ دُجے پاسے چونکہ ایہناں دی عوام جنونیاں دے نال کھڑی نہیں ہوندی ایس لئی اوہ اپنے والیاں نوں نفسیاتی مریض دا ناں دے کے جان چھڑا لیندے نیں۔ ایتھے ایہہ ذکر اے کہ غازی علم دین شہید نے جدوں ملعون راج پال نوں قتل کیتا سی اوس ویلے ایتھے غیر مسلماں دی حکومت سی جنہاں دے نیڑے ناموس رسالت ﷺاُتے حملہ کوئی وڈی گل نہیں سی پر ہن تے ایہہ اک اسلامی ریاست اے ہن تے ایتھے ناموس رسالت ﷺاُتے قانوناً سزاواں تجویز کر دتیاں گئیاں نیں صرف شک دی بنا اُتے یا اپنے کسے ذاتی عناد پاروں کسے شہری نوں آپ قتل کرن دی بجائے قانون دا سہارہ لین دی سوچ عام کرنی ہوئے گی ایس لئی مسیتاں وچ علما کرام تے تعلیمی اداریاں وچ اساتذہ نوں اپنا کردار ادا کرنا ہوئے گا۔
سجنو! اج اسیں سوچنا اے کہ ساڈے ای ملک اُتے دنیا کیوں پابندیاں لا رہی اے اج اسیں سوچنا اے کہ ساڈے توں بعد وچ آزاد ہون والا بنگلہ دیش ترقی وچ ساڈے توں کیوں اگے ہے۔ اج اسیں سوچنا اے کہ دنیاوچ رونما ہون والے کسے وی پرتشدد واقعے دے پچھے ساڈا ای ناں کیوں لیا جاندا اے۔ اج ساڈی معاشی حالت اینی کمزور کیوں اے کہ اسیں قرض در قرض لے کے اپنی خودی گروی رکھن اُتے مجبور ہو چکے آں۔ اسیں کیوں نہیں سمجھ پا رہے کہ معیشت ایہناں ای ملکاں دی اگے جاندی اے جتھے ماحول سازگار ہوئے۔ کاروباری لوک اوتھے اپنا پیسہ لاندے نیں جتھے ایہناں نوں اپنے جان و مال دا تحفظ حاصل ہوئے تے اسیں ایہہ فیصلہ کرنا اے کہ ریاست نوں کجھ لوکاں دے ہتھوں یرغمال بنے رہن دینا اے یا اگے ودھ کے اپنا کم کرنا اے کجھ لوک پچھدے نیں کہ اسیں کیہ کر سکنے آں؟ سانوں سب توں پہلے ایس دہشت دے ماحول توں نکلن لئی مل بیٹھنا ہوئے گا سانوں اپنی بیٹھکاں آباد کرنیاں ہون گیاں سانوں فنون لطیفہ نوں عام کرنا ہوئے گا تے سانوں مذہبی ہم آہنگی دی فضا بنان لئی صوفیا دے اطوار سکھن دی کوشش کرنی ہوئے گی۔
میری کتاب، کاسہء چشم، دی تقریب وچ گل کردے ہوئے جناب طارق بلوچ صحرائی نے دسیا کہ ایہناں توں کسے نے پچھیا سی کہ صاحب ایمان کون ہوندا اے تے جواب وچ اوہناں نے کہیا کہ جدوں کملی والے ؐ دا ذکر ہوئے تے کاسہء چشم بھر جائے اوہ ای صاحب ایمان ہوندا اے۔ ساڈے حکمران تے مذہبی پیشواواں نے اقتدار حاصل کرن لئی تے اقتدار وچ رہن لئی اینی نفرت بو دتی اے کہ ہن اک قاتلاں دی نسل تیار ہو گئی اے جدوں قاتلاں دی نسل تیار ہو جائے تے گورکناں دی نسل آپ ای پروان چڑھن لگ جاندی اے ایس وچ ساڈی ذمے داری کیہ بن دی اے، ساڈے دانشوراں دا شاعراں دا فرض اے کہ اوہ اک تیجی نسل تیار کرن جیہڑی پھُلاں دی گل کرے، جیہڑی محبت دی گل کرے، جیہڑی مثبت رویاں دی گل کرے، جیہڑی امن دی گل کرے، جیہڑی خوف ِ خدا دی گل کرے، جیہڑی رنگاں دی گل کرے، طارق بلوچ صحرائی دے لفظ میرے لئی اعزاز نیں جدوں اوہناں نے میرا ناں لے کے کہیا سی کہ کوئی بندہ تے انج دا ہے جیہڑا رنگاں دی گل کردا اے جیہڑا محبت دی گل کردا اے جیہڑا صوفیا دی گل کردا اے تے جیہڑا لوکاں نوں آپس وچ مل بیٹھن لئی بیٹھکاں آباد کرن دی گل کردا اے۔ پاکستان زندہ باد
