رحمتہ اللعالمین ﷺ

آپ ﷺ سراپا رشد و ہدایت تے قیامت تیکر آن والے لوکاں لئی کامل نمونہ نیں تے
آپ ﷺ دے اسوئہ حسنہ وچ دنیا و آخرت دی فلاح و کامیابی نوں مضمر کر دتا گیا اے

مولانا مجیب الرحمن انقلابی

اللہ تعالیٰ نے حضور اقدس ﷺ نوں سارے جہان لئی رحمت بنا کے گھلیا ’’رحمتہ اللعالمین ‘‘ ﷺ دی آمد توں پہلاں پوری دنیا شرک و بدعت، ضلالت و گمراہی تے معصیت و نافرمانی دے عمیق گڑہے وچ ڈگی ہوئی سی، انسانیت ناں دی کوئی شے نہیں سی، کُڑیاں نوں زندہ درگور کیتا جاندا سی ، عورتاں تے غلاماں دے نال جانوراں توں وی بدتر سلوک کیتا جاندا،مرد عورت بیت اللہ دا برہنہ طواف کردے، اک خدا نوں چھڈ کے اپنے ہتھاں نال تراشیدہ بتاں دی پرستش کیتی جاندی حتیٰ کہ خانہ کعبہ وچ ایس مقصد لئی 360 بت رکھے ہوئے سن۔ فسق و فجور تے بدکاریاں اُتے ندامت و شرمندگی دے بجائے ایس اُتے فخر کیتا جاندا سی۔ شراب نوشی تے قمار بازی ایہناں دا پسندیدہ و محبوب مشغلہ سی۔ حسب و نسب اُتے تفاخر کیتا جاندا، انتقام و کینہ وری نوں وصف و خوبی سمجھیا جاندا، بغض و عدات وچ کوئی عار نہ ہوندی، بتاں دے ناں اُتے جانور ذبح کیتے جاندے تے چڑھاوے چڑھائے جاندے، زندہ جانور دا گوشت کٹ کے کھاہدا جاندا، ہر قبیلہ دُجے قبیلے نوں کمتر تے ذلیل سمجھدا، گھوڑ دوڑ اُتے بازی لائی جاندی، سودی لین دین عام سی، معمولی معمولی گلاں اُتے لڑائی جھگڑے صدیاں چلدے، گویا کہ دنیا تباہی دے دہانے اُتے اپڑ چکی سی۔ ایہناں حالات وچ جد کہ ہر پاسے انسانیت سسکدی تے دم توڑدی وکھائی دے رہی سی حضور اقدس ﷺدنیا وچ رحمتہ اللعالمین، بن کے تشریف لیاندے نیں تے عبداللہ دے گھر توں طلوع ہون والے ایس آفتاب و ماہتاب دی روشنی نال پوری دنیا فیضیاب ہون لگی، آپ ﷺ دی آمد و تشریف آوری انج دی نعمت عظمیٰ اے کہ جس نوں خدا تعالیٰ نے قرآن مجید وچ مسلمان اُتے احسان عظیم نال تعبیر فرمایا اے۔ آپ ﷺ سراپا رشد و ہدایت تے قیامت تیکر آن والے لوکاں لئی کامل نمونہ نیں تے آپ ﷺ دے اسوئہ حسنہ وچ دنیا و آخرت دی فلاح و کامیابی نوں مضمر کر دتا گیا اے۔ آپ ’’ابر رحمت‘‘ بن کے انسانیت اُتے برسے تے ایہناں نوں کفر و شرک تے ضلالت و گمراہی دے گھٹا ٹوپ ہنیریاں توں کڈ کے توحید و رسالت دی روشنی نال منور کیتا۔
ایس دریتیم نے سانوں دسیا کہ ساڈے ساریاں دا پروردگار اک اللہ اے ایس دا کوئی شریک نہیں تے اوہ ماں باپ تے اولاد توں پاک اے اوہ اللہ ہمیشہ توں اے تے ہمیشہ رہے گا اوہ ای سب دا خالق و مالک تے رازق اے نفع و نقصان ایس دے ہتھ وچ اے ایہہ بت کسے شے دے مالک نہیں اک اللہ تعالیٰ دی ذات ای سب دی حاجت روا تے مشکل کشا اے۔ رحمتہ اللعالمین ﷺ اعلان نبوت توں پہلاں ای صادق تے امین دے لقب توں سدے جاندے سن لوک آپ ﷺ دے کول امانتاں رکھواندے تے معاملات دے فیصلے کرواندے پر جدوں رحمتہ اللعالمینﷺ نے اللہ تعالیٰ دے حکم نال اعلان نبوت کردے ہوئے ایہناں نوں بتاں دی پرستش ترک کر کے اک خدا دی عبادت کرن، تے آپ ﷺ دی رسالت دی گمراہی دین دے بارے وچ کہیا تے ایہو قوم جیہڑی آپ ﷺ دی پاک دامنی تے صدق و امانت دی قسماں کھان والی سی اوہ ای آپ ﷺ دے خلاف ہو گئی فیر آپ ﷺ دے رستے وچ کنڈے وچھائے جان لگے۔ آپ ﷺ نوں ہر طرح تنگ کردے ہوئے ستایا جاندا طائف دے میداناں وچ آپ ﷺ نوں توحید دی دعوت دین دی پاداش وچ پتھر مار مار کے لہولہان کر دتا جاندا اے۔ آپ ﷺ اُتے ایمان لیان دی وجہ نال صحابہ کرام رضی اللہ عنہم نوں ظلم و تشدد دا نشانہ بنا دتا جاندا اے۔ شعب ابی طالب، وچ آپ ﷺ تے آپ دے جانثار صحابہ کرام رضی اللہ عنہم نوں تن سال تیکر قید و محصور کر دتا جاندا اے۔ آپ ﷺ دے نال ایس قید وچ ام المومنین حضرت سیدہ خدیجۃ الکبریٰ رضی اللہ تعالیٰ عنہما سنے عورتاں بچے تے بڈھے تیکر سن۔ آپ ﷺ دا مکمل مقاطعہ تے سوشل بائیکاٹ کر دتا جاندا اے کھان پین دی کوئی شے وی آپ تیکر تے آپ دے ساتھیاں تیکر نہ اپڑن دتی جاندی سی تاکہ ایہہ بھُک و پیاس توں تنگ آ کے حضور ﷺ دا ساتھ چھڈ دین۔ دُدھ پیندے بچے بھُک نال روندے بلکدے تے کفار خوش ہوندے، ایہناں مشکل ترین حالات وچ وی آپ ﷺ دے جانثار صحابہ کرام رضی اللہ عنہم نے جانثاری وفد کاری دی اعلیٰ تے بے نظیر مثال قائم کردے ہوئے درختاں دے پتے چبا کے تے خشک چمڑے نوں پانی وچ بھگو کے نگل لیندے پر حضور ﷺ دا ساتھ تے ایمان نوں نہیں چھڈیا۔ مکہ دے لوکاں نے جدوں ظلم و تشدد دی انتہا کر دتی تے آپ ﷺ خدا تعالیٰ دے حکم نال مکہ توں مدینہ ول ہجرت کر جاندے نیں مدینہ وچ انصار نے حضور ﷺ تے ہجرت کر کے آن والے صحابہ کرام رضی اللہ عنہم دے نال اخوت و محبت دا اوہ بے مثال مظاہرہ کیتا کہ تاریخ انسانی ایس دی نظیر و مثال پیش کرن توں عاجز اے۔ تے فیر چشم فلک نے اوہ منظر و ی ویکھیا کہ جدوں رحمتہ اللعالمین ﷺ اپنے 10 ہزار جانثار صحابہ کرام رضی اللہ عنہم دے لشکر دے نال ایسے مکہ وچ فاتح دی حیثیت نال داخل ہوندے نیں جتھے آپ ﷺ تے صحابہ کرام ؓ نوں 10 سال پہلاں ظلم و تشدد کر کے کڈیا جاندا اے۔ حضور ﷺ دے سر مبارک دی قیمت سو سرخ اونٹ مقرر کیتی گئی سی پر ایہہ کنج دا فاتح اے تے کنج دا انقلاب اے نہ تے قتل عام کیتا جا رہیا اے تے نہ ای فتح دا جشن منایا جا رہیا اے اج انتقام، فتح دا نشہ تے تکبر و غرور ناں دی کوئی شے نظر نہیں آندی۔
رحمتہ اللعالمین ﷺ اللہ تعالیٰ دی حمد و ثنا کردے ہوئے عاجزی تے انکساری دے نال سواری اُتے ایس قدر جھکے ہوئے نیں کہ آپ ﷺ دا چہرہ انور سواری دی پشت دے نال ملیا ہویا نظر آندا اے مکہ توں کڈن والے خوف زدہ نیں کہ حضور ﷺ ایہنا دے نال کیہ سلوک کردے نیں تے انتقام دا کیہڑا رستہ اختیار کردے نیں ایہناں وچ اوہ وی نیں جنہاں نے آپ ﷺ دے رستے وچ کنڈے وچھائے سن اوہ سی سن جیہڑے آپ ﷺ دے خون دے پیاسے سن اوہ وی سن جنہاں نے پتھر مار کے آپ ﷺ دے جسم اطہر نوں لہولہان کیتا سی۔ اج ایہہ سارے بارگاہ رسالت ﷺ وچ مجرم دی حیثیت نال کھڑے نیں۔ رحمتہ اللعالمین نے ایہناں سب نوں ویکھدے ہوئے پچھیا کہ جان دے او اج میں تہاڈے نال کیہ معاملہ کرن والا واں؟ بے بسی تے ندامت دے عالم وچ ہر پاسے توں اک رحم طلب صدا گونجی کہ آپ ﷺ عالی ظرف تے شریف بھائی دے پتر نیں۔ رحمتہ اللعالمین ﷺ نے سب لئی معافی دا اعلان کردے ہوئے فرمایا کہ اج تہاڈے اُتے کوئی گرفت نہیں جائو تسیں سارے آزاد او۔ حضور ﷺ نے عام اعلان فرما دتا کہ جیہڑا بندا بیت اللہ وچ داخل ہوئے گا ایس نوں وی امان اے تے جیہڑا بندا حضرت ابوسفیان دے گھر، داخل ہوگیا ایس نوں وی امن دتا جائے گا۔ جیہڑا بندا اپنے گھر دا دروازہ بند کر رکھے گا ایس دی وی جان بخشی تے امان اے تے جیہڑا بندا بغیر ہتھیار دے ملے گا ایس لئی وی امن اے۔ ایس موقعے اُتے ابوجہل دا پتر عکرمہ تے آپ ﷺ دے چچا سید الشھداء، سید نا حضرت حمزہ رضی اللہ عنہ نوں شہید کرن والے وحشی وی آپ ﷺ دی بارگاہ وچ حاضر ہو کے آپ ﷺ دے ہتھ اُتے ایمان لیاندے ہوئے صحابیت دے اعلیٰ عہدہ اُتے فائز ہو کے حضرت عکرمہؓ تے حضرت وحشی رضی اللہ عنہ اکھوائے تے فیر رحمتہ اللعالمین ﷺ بیت اللہ وچ داخل ہو کے 360 بتاں نوں توڑدے ہوئے اللہ تعالیٰ دی وحدانیت دا کلمہ بلند کر کے حق دے آ جان تے باطل دے مٹ جان دا اعلان کردے ہوئے نظر آندے نیں۔ چشم فلک نے فیر ایہہ منظر وی ویکھیا کہ جدوں مکہ دی گلیاں وچ ایمان لیان دی پاداش وچ ظلم و تشدد دا نشانہ بنن والے سید حضرت بلال رضی اللہ عنہ، حضور ﷺ دے حکم نال خانہ کعبہ دی چھت اُتے چڑھ کے اذان دیندے ہوئے اللہ تعالیٰ دی وحدانیت و کبریائی تے حضور ﷺ دی رسالت دا اعلان کردے نیں۔ اللہ رب العز ت سانوں حضور ﷺ دی سیرت و صورت نوں اپنان تے اسوئہ حسنہ اُتے عمل پیرا ہون دی توفیق عطا فرمائے۔ آمین