جھوٹ تے کھڑی انقلابی سیاست

اشرف شریف

انسان سکھن دی بڑی صلاحیت رکھدا اے پر اوہ سکھی ہوئی ہر گل نوں اپنے طریقے نال کرن دی خاہش پاروں اکثر ٹوئے وچ جا پیندا اے۔ معاملہ قنونی اے پر کیوں جے سیاست داناں بارے اے ایس لئی سیاسی سمجھیا جا رہیا اے۔ خیر انج پہلی واری نہیں ہویا۔ ڈھائی ورھے پہلاں چین وچ کرونا دی وباء آئی تے اک ڈاکٹر نے نویں وباء بارے چتاونی دتی۔ حکومت نے اوہنوں افراتفری پھیلان دا قصوروار ٹھہرا کے گرفتار کر لیا۔ آڈیو ویڈیو دا حالیہ فساد اصل وچ قنونی جرماں نوں بہت سارے الزامات دے ڈھیر وچ دبان دی کوشش اے۔ کافی دن ہو گئے نیں چینلاں تے ہن تک تبصرے جاری نیں۔ ستم ایہہ وے کہ گل سمجھان لئی کہانی بنانی پیندی اے۔ چھوٹیاں چھوٹیاں کہانیاں منتخب کیتیاں نیں۔
1950ء دی گل اے اٹلی دی حکومت نے پہاڑی علاقے وچ پن بجلی منصوبے لئی ڈیم دی تعمیر شروع کیتی۔ وے جنٹ دے علاقے وچ ڈیم لئی تھاں لبھی گئی۔ تن پاسیوں مین پہاڑ‘ ایتھے گہری وادی سی ایس لئی ایس لوکیشن نوں بہتر سمجھیا گیا۔ 1957ء توں 1959ء تک تعمیر جاری رہی۔ ڈیم دا ڈیزائن امریکہ دے ہوفر ڈیم ورگا رکھیا گیا پر اوہدا جناں چوڑا نہیں سی۔ کنکریٹ نال بنیا ڈیم لماں بنایا گیا۔ تعمیر دے بعد جدوں ڈیم پانی نال بھر دتا گیا تے مسئلے سامنے آنا شروع ہو گئے جیویں کہ زمین کھسکنا اک ماہر ارضیات نے چتاونی دتی کہ وادی محفوظ نہیں۔ حکومت لئی ایہ ڈیم سیاسی مفادات دا ذریعہ وی سی ایس لئی ماہر ارضیات نوں دھمکی دتی گئی کہ چپ رہوے۔ ڈیم چار ورھے تک کم کردا رہیا۔ 9اکتوبر 1963ء نوں بارشی پانی نال علاقے وچ سیلاب آ گیا۔ ڈیم توں ابلن والے پانی وچ کئی نیڑے پنڈ رڑھ گئے۔ آبادیاں دا نام و نشان مٹ گیا۔ 2000 لوک مارے گئے۔ پہلے لگا کہ ڈیم ٹُٹیا‘ تفصیلی معائنے دے بعد پتہ لگا کہ ڈیم تے ٹھیک اے پر ایہدی وی شکل والی جھیل پانی دی تھاں چٹاناں‘ مٹی تے اکھڑے ہوئے رُکھاں نال بھری ہوئی سی۔ ڈیم دی جھیل وچ 45سیکنڈ دے اندر اندر 260 ملین کیوبک میٹر ملبہ آل دوالے دے پہاڑاں توں کھسک کے آن ڈگا ایہدے نال پنجاہ ملین کیوبک میٹر پانی ڈیم توں باہر جا پیا۔ بھاری سرمائے نال تیار ڈیم ہن بند پیا اے۔ بجلی تے پیدا نہیں ہوندی ایتھے سیاح آئوندے نیں۔ مرن والیاں دی یادگار تے پھُل چڑھاندے نیں تے فوٹواں بناندے نیں۔
صدام حسین نوں مارنا افغانستان تے حملہ وغیرہ وی مہنگی پین والی ریاستی غلطی شمار ہوندی اے پر وڈے مالی نقصان والیاں غلطیاں صرف حکومتاں نہیں کردیاں‘ بندے وی انج کردے نیں۔ گولف دے شہرئہ آفاق کھڈاری ٹائیگر ووڈز نوں کون نہیں جان دا۔ ٹائیگر ووڈز نے اپنی بیوی نال بے وفائی کیتی۔ جھگڑا ہویا‘ دوہاں لئی اکٹھے رہنا اوکھا ہو گیا۔ طلاق دا معاملہ 750ملین ڈالر وچ طے پایا۔ کیپٹن ایڈورڈ سمتھ ٹائی ٹینک نوں آئس برگ ول لے گیا تے قیمتی جاناں دے نال 7.5 ملین ڈالر دا جہاز ڈوب دتا۔ اوہ انج نہ کردا تے ٹائی ٹینک نہ ڈبدا۔
انگلینڈ وچ اک بڈھی خاتون نے 181 ملین یورو دا انعام جتیا پر اوہدے شوہر نے لاٹری ٹکٹ کوڑے وچ سٹ دتا۔ کیلی فورنیا وچ اک شکاری نے شکار بھنن لئی اگ بالی تے اوہنوں بلدا چھڈ کے ٹر گیا۔ ایس اگ نے فوراً نیڑے نیڑے دی گھاہ تے رُکھاں نوں پھڑ لیا۔ اگ اینی پھلی کہ 3لکھ ایکڑ تے کھلرے جنگلات سڑ کے سواہ ہو گئے۔ 23سو توں ودھ گھر سڑ گئے تے 14بندے جانوں ہتھ دھو بیٹھے۔
2015ء وچ اک گمنام ذریعہ نے موزاک فونزکا نامی کارپوریٹ لاء فرم دی 11.5 ملین دستاویزات لیک کر دتیاں۔ ایہناں دستاویزات توں پتہ لگا کہ دنیا بھر وچ اعلیٰ عہدیاں تے موجود سیاستدان غیرقنونی طریقے نال سمندر پار ملاک خرید رہے نیں۔ ایس سارے عمل وچ فراڈ ٹیکس چوری تے بین الاقوامی پابندیاں توں بچن دیاں راہواں کڈھیاں گئیاں۔ ایہ سکینڈل بعد وچ پاناما لیکس کہلایا۔ آف شور کمپنیاں بنا کے مالیاتی تے ٹیکس نظام نوں دھوکھا دتا گیا۔ جدوں ایہ معاملہ پاکستانی سپریم کورٹ وچ گیا تے مریم نوازشریف نے اپنے خاندان دے دفاع وچ دو دستاویزات جمع کرائیاں۔ ایہ دستاویزات 2006ء دی تریخ دی دسیاں گئیاں۔ ایہناں دستاویزات وچ دسیا گیا کہ شریف خاندان دا لندن دی جائیداداں نال کوئی لینا دینا نہیں۔ دستاویزات 2006ء دیاں ظاہر کیتیاں گئیاں پر ایہناں دی تحریر لئی کیلبری دا فونٹ استعمال ہویا۔ حیرت والی گل ایہ وے کہ کیلبری فونٹ سب توں پہلاں کمرشل استعمال لئی 31جنوری 2007ء نوں متعارف کرایا گیا۔ ایس توں پہلاں مائیکرو سوفٹ ورڈ ٹائمز نیورومن فونٹ استعمال کردا سی۔ ایہدے توں پتہ لگا کہ شریف خاندان ولوں جو دستاویزات عدالت وچ جمع کرائیاں گئیاں نیں اوہ نقلی تے جعلسازی نال تیار کیتیاں گئیاں نیں۔ مسلم لیگ ن اپنے طور تے اک وڈی لڑائی لڑ رہی اے۔ عدلیہ نال لڑن لئی وکیلاں دیاں خدمات حاصل کیتیاں جا رہیاں نیں میڈیا دیاں بااثر آوازاں نال ملائیاں جا رہیاں نیں افسرشاہی نال پردے پچھے رابطے نیں۔ حکومت دیاں کمزوریاں لبھیاں جاندیاں نیں تے روز اک پریس کانفرنس وچ اپنا بیانیہ اگل دتا جاندا اے۔بالائی طبقے دا حکومت مخالف حصہ ن لیگ دے نال اے۔ حکمران اشرافیہ پاکستان دی کل آبادی دا پنج فیصد اے۔ 21کروڑ وچوں سب توں ودھ ڈیڑھ لکھ لوک‘ ایہ ڈیڑھ لکھ شہزادے شہزادیاں اپنے اقتدار لئی بھکھے تے بے گھر پاکستانیاں نوں استعمال کر رہے نیں۔ اوہو بھکھے جو ایہناں دے جلسیاں وچ بریانی دی اک پلیٹ لئی کپڑے پڑوا لیندے نیں اک بوٹی کھان لئی کسے وی سطح تے ٹر جاندے نیں۔
سیاستدان جمہوریت چاہندا اے پر ایہ نہیں دسدا کہ کہڑی جمہوریت؟ ساڈے ایتھے اک گمراہ کن نعرہ پھیلایا گیا کہ سیاستدان صرف لوکاں نوں جوابدہ نیں۔ پچھو کہڑے عوام تے اپنے بریانی والیاں دا ناں لین گے۔ ساری جمہوریت بریانی دی پلیٹ تے قیمے والے اک نان تے ٹکی اے۔ غلطی کر رہے نیں‘ بہت وڈی غلطی۔ عام بندا جہڑا تہاڈے جلسیاں وچ نہیں جاندا جو تہاڈی جماعت دا کارکن نہیں‘ جو تہانوں ملن دا خواہش مند نہیں‘ اوہدے لئی تہاڈے کول کیہ اے۔ اوہ غلطیاں‘ الزامات تے جرائم دے کوڑے دان توں دور رہوے گا۔ اوہدی سوچ تہاڈی جناب سرکار دی خود ساختہ خوبیاں نوں رد کر رہی اے۔ اوس عام بندے نے بار کونسلاں دی تقریبات‘ میڈیا پراپیگنڈا تے سیاسی سرگرمیاں نوں اہمیت نہیں دتی‘ اوہنوں تے اجے تک کیلبری فونٹ دا جواب نہیں ملیا۔ ٭٭