رہائش گاہ توں آخری آرام گاہ تیکر۔۔۔مرزا محبوب عالم بیگ
مرزا محبوب عالم بیگ اکثر کہیا کردے سن کہ اللہ تعالیٰ نے میری
ذمہ داری لائی اے کہ میں اپنے علاقے دے بالاں نوں چنگی توں چنگی تعلیم دے سکاں
لکھت: مرزا عثمان بیگ
ویسے تو سبھی رہتے ہیں موت کے منتظر
اچانک تیری جُدائی نے سب کو رلا دیا
ایس دنیا وچ ہر شے فانی اے۔ ختم ہون والی اے ہر انسان نوں اک نہ اک دن ایس دنیا توں جانا اے۔ موت برحق اے موت دا ویلا مقرر اے۔ کوئی وی ایس توں فرار حاصل نہیں کر سکدا۔ پر جدوں کجھ اپنے وقت توں پہلے چلے جان تے دنیا ویران ہو جاندی اے۔
حسرت برس رہی ہے ہمارے مزار پر
کہتے ہیں سب یہ قبر کسی نوجوان کی ہے
میں اکثر رہائش گاہ سے آرام گاہ تک دے عنوان توں کالم لکھدا رہنا واں پر اج میرے الفاظ میرے جذبات تے میرا قلم میرا ساتھ نہیں دے رہے سمجھ نہیں آ رہیا کتھوں شروع کراں تے کیہ لکھاں۔ اج جس شخصیت اُتے لکھن لگا واں اوہ نہ صرف میرے بلکہ ہزاراں طالب علماں دے استاد نیں۔ میرے روحانی باپ نیں ایہناں دی درسگاہ توں تعلیم حاصل کرن والے ہزاراں ڈاکٹرز، انجینئرز، آرمی آفیسرز تے دنیا دے مختلف شعبہ جات وچ کامیاب زندگی لنگھا رہے نیں کسے وی معاشرے دی ترقی وچ استاد دا کردار بوہت اہم ہوندا اے انسان دی اولین درسگاہ ماں دی گود نوں قرار دتا جاندا اے پر میرا خیال اے کہ انسان دی اولین درسگاہ سکول ای ہوندا اے جتھے انسان سکھن دا عمل شروع کردا اے۔ اللہ تعالیٰ نے انسان نوں علم ای دی بنیاد اُتے فرشتیاں توں افضل قرار دتا اے۔
میرے سکول دے پرنسپل تے اج دی شخصیت شالیمار ٹائون دی مشہور ترین شخصیت مرزا محبوب عالم بیگ نیں۔ آپ 18 اگست 1973 نوں اک مذہبی گھرانے وچ حاجی محمد شریف صابری تے مخدوم بی بی دے گھر لہور وچ پیدا ہوئے۔ آپ پنج بھین بھرا سن دو بھائی تے تن بھیناں آپ نے ابتدائی تعلیم اپنے والد محترم توں حاصل کیتی۔ فیر علی گڑھ سکول مانگا منڈی توں مڈل تے لہور دے اک سکول توں میٹرک دا امتحان پاس کیتا۔ انٹر اسلامیہ کالج سول لائنز توں کیتا۔گریجویشن پنجاب یونیورسٹی توں مکمل کیتی۔ ایس دے علاوہ بے شمار کورس کر رکھے سن ایہہ سلسلہ زندگی دے آخری حصے تیکر جاری رہیا آپ دے گھر دا ماحول بچپن توں ای مذہبی سی۔ آپ دے دادا حاجی دین محمد سلسلہ چشتیہ فریدیہ دے بزرگاں دے منن والے سن تے ایسے خاندان دے ہتھاں اُتے بیعت سن تے اپنے پیر و مرشد توں باقدہ خلافت ملی ہوئی سی۔ آپ دے دادا تے والد دا مزار گڑھی شاہو ریلوے گرائونڈ دے کول اے۔ والد دی وفات دے بعد ایہہ ذمہ داری وی مرزا محبوب عالم بیگ دے موہڈھیاں اُتے آ گئی۔
آپ دا گھرانہ دیندار ہون دے نال نال کاروباری وی سی آپ دے بزرگ سلائی مشیناں دے مختلف پرزہ جات بناندے سن پر آپ نوں اپنے خاندانی کم وچ زیادہ دلچسپی نہیں سی شروع شروع وچ مختلف کورسز دا آغاز کیتا فیر 2 جولائی 1993 نوں سٹم فورڈ گرائمر سکول دی بنیاد رکھی آپ دا مقصد اپنے علاقے دے لوکاں نوں بہترین تعلیم دینا سی۔ تاکہ لوک زیادہ تون زیادہ چنگی تعلیم حاصل کر سکن۔ سٹم فورڈ گرائمر سکول علاقے دے کجھ سکولاں وچوں سی جس دا سارے دا سارا نصاب انگلش وچ سی۔سٹم فورڈ گرائمر سکول دا شمار اپنے علاقے دے وڈے اسکولاں وچ ہوندا اے۔ تعلیم دا مقصد بندے دی فطری صلاحیتاں دی نشوونما کرنا اے۔ جے فرد نوں ایس دی فطری صلاحیتاں دے مطابق حیثیت دا مقام مل جائے تے اوہ اپنا کارمنصب انجام دے سکدا اے ایس لئی مملکت دی فلاح و بہبود لئی تعلیم بوہت ضروری اے۔
مرزا محبوب عالم بیگ اکثر کہیا کردے سن کہ اللہ تعالیٰ نے میری ذمہ داری لائی اے کہ میں اپنے علاقے دے بالاں نوں چنگی توں چنگی تعلیم دے سکاں اوہ علامہ اقبال دے نظریات دے منن والے سن اوہ بالاں نوں اکثر علامہ اقبال دے فلسفہ خودی اُتے لیکچر وی دتا کردے سن۔
کسے وی معاشرے وچ استاد دے بغیر ترقی ممکن نہیں استاد دی عظمت و توقیر بوہت زیادہ اے قرآن پاک وچ ارشاد ہوندا اے۔
ترجمہ’’کہہ دیو کیہ جانن والا تے نہ جانن والا برابر ہو سکدے نیں‘‘
ارشادِ نبوی اے
’’بے شک مینوں معلم بنا کے گھلیا گیا‘‘
استاد دی عظمت دا اندازہ قرآن مجید تے حدیث پاک دی مختلف آیتاں توں کیتا جا سکدا اے۔ استاد دے بغیر انسان دنیا دے صحیح معنیاں توں روشناس نہیں ہو سکدا انسان دا اولین رول ماڈل ایس دا استاد ہوندا اے۔
دیکھا نہ کوہ کن کوئی فرہاد کے بغیر
آتا نہیں ہے فن کوئی استاد کے بغیر
انسان دنیا دا کوئی وی کم کر لوے جدوں تیکر ایس دا راہنما ایس دا استاد ایہنوں سدھے رستے اُتے نہیں چلائے گا انسان اپنی منزل مقصود اُتے نہیں اپڑ سکدا۔ استاد دے بغیر انسان نامکمل اے۔
میں میٹرک تیکر تعلیم ایسے سکول توں حاصل کیتی فیر ایسے سکول وچ پڑھان دا موقع وی ملیا میری زندگی دے بوہت سارے اہم واقعات و معاملات وچ مرزا محبوب عالم بیگ دا بوہت اہم کردار رہیا میں اج جس مقام اُتے وی واں اوہ اپنے استاد ای دی بدولت واں۔ مرزا محبوب عالم بیگ اک شفیق تے محبت کرن والے استاد سن ایہناں دے دروازے اپنے شاگرداں لئی ہمیشہ کھلے رہندے سن۔ا ٓپ دی شخصیت دے مختلف پہلوئواں اُتے لکھن لگاں تے شاید مہینے لگ جان۔ آپ نوں جنوری 2021 وچ اچانک چیسٹ انفیکشن ہویا جیہڑا بعد وچ اپریل وچ چیسٹ کینسر دی شکل وچ ساہمنے آیا تے ساڈے شفیق استاد ایس موذی مرض نال 19 جون 2021 نوں ایس دنیا توں رخصت ہو گئے۔ آپ نے سوگواران وچ اک بیوہ تے تن دھیاں تے اک پتر چھڈیا اے۔ آپ دی تدفین کروان ہال دے ساہمنے والے قبرستان حافظ پورہ وچ اپنے ماموں دے پیراں وچ اے قبر ہجے کچی اے۔
جسم کی موت کوئی موت نہیں ہوتی
جسم مرجانے سے انسان نہیں مرتے
اوہ جسمانی طور تے تاں ساڈے وچ ہن موجود نہیں پر اپنے شاگرداں دے دلاں وچ ہمیشہ زندہ رہن گے۔ اللہ تعالیٰ آپ دے درجات بلند فرمائے۔ آمین
