ووٹ دی عزت بحال ہووے گی!

حناپرویزبٹ

ایہ کہانی اے تریجی دنیا دے عوامی لیڈر دی جنہوں اصولی انکار تے جیل وچ سٹ دتا گیا۔ زمین توں لے کے اوہدی ساکھ تک‘ سب ملیا میٹ کرن دے منصوبے تے عمل کیتا گیا آزادی تے اختیار سنے سب کھوہ لیا گیا پر شاباش اے اوس مرد محق تے‘ نہ سمجھوتہ کیتا تے نہ ای اپنے وقار دے مجروح ہون نوں قبول کیتا۔ انج تے بوٹا بوٹا جان دا سی کہ کیویں اوہدی حکومت ختم ہوئی پر ایس جھوٹ دے پیاز دیاں ساریاں پرتاں اک اک کرکے اتردیاں جا رہیاں نیں لوک جان چکے نیں کہ کیویں ایس رہنما تے ہر بوہا‘ ہر پھاٹک‘ ہر چوکھٹ بند کر دتی گئی۔ اللہ دی عنایت کردہ نعمت آزادی کھوہن لئی کیہ کجھ نہ کیتا گیا۔ ایس بندہ نڈر نوں پارا پارا کرن لئی اوہدیاں اکھاں دی ٹھنڈک‘ پری ورگی دھی نوں وی جیل وچ سٹ دتا گیا خیال سی کہ نازاں نال پلی دھی نوں کنڈے چبھن تے سب کجھ چھڈ چھڈا کے پورا خاندان فرار تے سیاست توں تائب ہو جاوے گا۔
ڈرایا تے باپ نوں گیا سی پر دھی بہادری وچ پیو توں اک قدم اگے نکلی پیش قدمی وچ بنت کلثوم جاتی امرا دی رانی ثابت ہوئی۔ امیداں دے برخلاف جدوں دھی دے قدم بالکل وی نہ ڈگمگائے تے سہارا دین والا ہر تھم دور کر دتا گیا سکون بخش آستانہ کھوہ کے ہر نجات آفریں بوہا بند کر دتا گیا۔ فیر وی گل نہ بنی تے روشنی دی اک اک کرن‘ ٹھنڈی ہوا دے ہر جھونکے تے پانی دی اک اک بوند لئی ترسایا گیا۔ ہر مخالف نے اپنا قد ودھان لئی ذرائع ابلاغ توں اوہناں دے خلاف جھوٹ دی یلغار کر دتی۔ دشنام طرازی دے تیر چلوائے گئے‘ پر فیر وی ایس عوامی لیڈر دے خلاف لوکاں دی برین واشنگ کرن دیاں ساریاں کوششاں نکام ہو گئیاں جبر دے انھیریاں وچ اوہ کیوں نہ کہندے کہ میں معاملہ اللہ تے چھڈنا واں؟۔
لوکاں نے سوال اٹھایا کھان نوں سستا آٹا نہیں‘ بولے دو دی تھاں اک روٹی کر دیو‘ کھنڈ دی قیمت تن گنا ہون تے احتجاج کیتا گیا تے کہیا گیا کہ شوگر ہو جاوے گی‘ گھٹ استعمال کرو‘ گھیو دوگنا توں ودھ مہنگا کرن تے وضاحت آئی چنگا اے تھوڑا استعمال کرن نال اسٹنٹ نہیں پوانے پین گے۔ دوائیاں تن گنا مہنگیاں کرن تے رولا پیا تے کہیا گیا چپ رہوو‘ ملکی سلامتی خطرے وچ اے۔ ملک بھر وچ کوئی تھاں اجہی نہیں ہووے گی جتھوں ملکی حالات دے بارے چنتابھریاں آوازاں نہیں ابھر رہیاں‘ جس طرح پاناما دے ڈرامے دے تانے بانے واضح ہوندے چلے جا رہے نیں چھیتی ددھ دا ددھ تے پانی دا پانی ہو جاوے گا۔ عاصمہ جہانگیر کانفرنس وچ جس طرح انٹرنیٹ بند کرکے میاں نوازشریف دی تقریر روکی گئی تے معاملے کنٹرول کرن دی بونگی کوشش کیتی گئی ایہدے تے عوامی ناپسندیدگی زوراں اُتے اے۔ 2021ء وچ ایہ سوچ رکھن والیاں دی کم عقلی نوں ہزار سلام کہ انٹرنیٹ بند کرکے لوکاں نوں اوہناں دے محبوب لیڈر توں دور کیتا جا سکدا اے اخبار ٹی وی دے بوہے بند کیتے جا سکدے نیں پر سوشل میڈیا نوں کیویں بند کیتا جا سکدا اے؟
سیاسی حلقے کھل ڈلھ کے کہہ رہے نیں کہ سارے انتظامات دے باوجود ق لیگ دی حکومت صرف اک ٹرم بعد ای فشوں ہو گئی تے موجودہ کنگز پارٹی دی کیہ مجال اے انج حد اے نالائقی دی ایہہ تے اپنی واری وی پوری کردی نظر نہیں آ رہی۔ ہوشربا مہنگائی دے ظلم تھلے عوامی غیض و غضب دا طوفان پل رہیا اے بظاہر جذبات دے سندر وچ اجے تلاطم تے نہیں پر ایہ طوفان توں پہلے والی گہری خاموشی اے تے نہ نظر آن والی بے چینی محسوس ہو رہی اے۔ جس طرح ہر کالی رات دا اختتام روشن سویرے تے ہوندا اے بالکل اوسے طرح اوہ ویلا زیادہ دور نہیں لگدا کہ جدوں اپنے محبوب لیڈر دی کال پاندیاں ای لوکاں دا سیلاب جڑواں شہراں ول امڈ آوے گا تے ساریاں کٹھ پتلیاں نوں بہا لے جاوے گا اوس دن فیر خلق خدا دا راج ہووے گا تے بفضل خدا ووٹ دی عزت بحال ہووے گی۔٭٭