شیخ اصغر حیدر دے ایصالِ ثواب دی تقریب

مرحوم شیخ جواد اصغر تے شیخ بلال اصغر دے والد تے میونسل کارپوریشن سیالکوٹ دے سابق میئر سن

رپورٹ: محمد ارشاد

معروف کاروباری و سیاسی شخصیت، سابق میئر میونسپل کارپوریشن سیالکوٹ تے چیف ایگزیکٹو لانگ و یو پرائیویٹ لمیٹڈ شیخ اصغر وحید دی وفات دی خبر سیالکوٹ دے شہریاں لئی کسے صدمے توں گھٹ نہیں سی۔ اوہ ہر خاص و عام وچ گھل مل جاندے، ایہناں دی شخصیت وچ اک انج دی کشش سی کہ جیہڑا اک وار ایہناں نال ملاقات کر لیندا اوہ ایہناں دی شخصیت دا گرویدہ ہو جاندا۔ اگلے دن شیخ اصغر وحید دے ایصال ثواب لئی قرآن خوانی دا اہتمام کیتا گیا جس وچ ہر طبقہ فکر دے نمائندیاں دی کثیر تعداد نے شرکت کیتی تے ایہناں دے صاحب زادیاں شیخ جواد اصغر تے شیخ بلال اصغر نال اظہار تعزیت کیتا، ایہناں دے دونویں صاحب زادے کاروباری حلقیاں وچ نہ صرف اپنی قابلیت بلکہ اپنے مرحوم والد دی بے داغ ساکھ پاروں اپنا منفرد مقام بنا چکے نیں۔ مرحوم شیخ اشرف حیدر، ڈاکٹر شیخ محمد عارف تے شیخ منور اقبال دے بھرا سن جیہڑے سیالکوٹ وچ کسے تعارف دے محتاج نہیں۔

قرآن خوانی تے دعائے مغفرت دا اہتمام مرحوم دی رہائش گاہ حیدر پارک سیالکوٹ وچ کیتا گیا جس وچ سیالکوٹ دے ہر مکتبہ فکر نال تعلق رکھن والی نمایاں شخصیات، صحافی، سیاسی و سماجی رہنماواں، مقامی چیمبر آف کامرس دی قیادت تے کاروباری شخصیات دے علاوہ اہل علاقہ نے کثیر تعداد وچ شرکت کیتی تے مرحوم لئی قرآن خوانی تے دعائے مغفرت کیتی۔ سب دی متفقہ طور تے ایہہ رائے سی کہ مرحوم دی وفات نال سیالکوٹ دے سماجی حلقے وچ اک انج دا خلا پیدا ہویا اے جنہوں کسے طور تے پُر نہیں کیتا جا سکے گا۔
ثنا خوانِ رسولﷺ نے بارگاہِ رسالتﷺ وچ گلدستہ ہائے عقیدت پیش کیتا تے ہر اَکھ اشکبار ہو گئی کیوں جے آقائے دو جہاں ﷺ دا ذکر اک انج دی عبادت اے جس دا کوئی متبادل نہیں۔ تقریب دے شرکا تے انڈسٹری دے رہنماواں نے مرحوم نوں خراج تحسین پیش کردے ہوئے کہیا کہ اوہناں نے ساری زندگی سماج تےدکھی انسانیت دی خدمت وچ بسر کیتی تے بے شمار رفاعی اداریاں دی سرپرستی دے نال نال شہر تے انڈسٹری دی ترقی لئی گراں قدر خدمات سرانجام دتیاں۔
شرکاء نے کہیا کہ مرحوم اک خدا ترس تے محب وطن شہری سن تے اوہناں نے اسلامی تعلیمات دے تحت لوکاں دی خدمت نوں ہمیشہ اپنا نصب العین بنائے رکھیا تے ایہناں دا پورا خاندان ایہناں دی ایس بے مثل جدوجہد وچ ایہناں دے ہم قدم سی۔
علمائے اکرام نے مرحوم دے ایثال ثواب لئی دعا کروائی تے ایہناں دی دین لئی خدمات اُتے ایہناں نوں خراج عقیدت پیش کیتا۔ تقریب وچ شہر دی قریباً ساری معتبر شخصیات نے شرکت کیتی تے ایہناں لئی مغفرت دی دعا کیتی۔
ایس تقریب وچ انج تے لوکاں دی کثیر تعداد شریک ہوئی جنہاں وچ پنجاب دھرتی دا مان تے چیئر مین پنجابی میڈیا گروپ مدثر اقبال بٹ، بلال مدثر بٹ، علی بابربٹ ، شیخ احسان اِلٰہی ، شیخ نعمان اِلٰہی ، نوید افتخار مکرم ، حاجی محمد فاروق تے سعید افتخارمکرم نمایاں نیں۔
تقریب دے اختتام اُتے مرحوم شیخ اصغر حیدر دی مغفرت لئی دعا کیتی گئی جد کہ لنگر دا وسیع اہتمام وی کیتا گیا سی۔
قارئین روزنامہ بھلیکھا لئی قرآن خوانی دی ایس روح پرور تقریب دی تصویری جھلکیاں پیش کیتیاں جا رہیاں نیں۔