انصاف ہُندا نظر آنا چاہیدا اے

مینار پاکستان اُتے یوم آزادی دا واقعہ ہوئے، سیالکوٹ وچ تشدد کر کے سری لنکن شہری نوں قتل دی گل ہوئے یا فیصل آباد وچ خواتین دے نال سلوک، اک ای گل ساہمنے آندی اے کہ اسیں بحثیت قوم اخلاقی پستی دی اتھاہ گہرائیاں دا شکار ہو چکے آں

عتیق انور راجا

پنجاب حکومت سیالکوٹ واقعے دے ملزمان نوں جلدی توں جلدی سزا دلوان لئی متحرک نظر آ رہی اے۔ وزیر قانون پنجاب راجہ بشارت معاملہ فہم تے دور اندیش سیاست دان نیں جنہاں نوں عوامی مزاج دی سمجھ اے تے اوہ قانون دی باریکیاں توں وی چنگی طرح جانو نیں۔ ایہناں ولوں سیالکوٹ واقعے دے ملزمان دا روزانہ دی بنیاد اُتے ٹرائل تے ملزمان دا چالان 14 دن وچ پیش کرن دا حکم ایہہ امید دلواندا اے کہ صوبے وچ انصاف ہُندا نظر آئے گا۔ ہن امید اے تے دعا وی کہ ایس واقعے وچ ملوث مجرماں نوں جلدی توں جلدی انج دی سزا سنائی جائے کہ جنہوں ویکھدے ہوئے مستقبل وچ کوئی شہری کسے بہکاوے وچ آ کے کسے دُوجے انسان نوں قتل کرن توں پہلے ہزار وار سوچے۔ پنجاب سرکار فیصل آباد واقعے وچ ملوث ذمہ داراں دے خلاف سخت کارروائی کرن دا اعلان کر چکی اے پر سوشل میڈیا اُتے زیر گردش کجھ ویڈیوز دسدیاں نیں کہ فیصل آباد وچ دو خواتین آپ کپڑے اتار رہیاں نیں۔ بازاراں وچ خواتین دی چوری دے واقعات عام ہو چکے نیں جتھے کچرا چکن والیاں اکثر انج دے کارنامے سرانجام دیندے پھڑی جاندیاں نیں تے آئے روز شاپنگ مالز وچ پڑھی لکھی تے سجی سنوری خواتین وی مہنگی شیواں چوری کردے خفیہ کیمریاں دے ذریعے پھڑی جا رہیاں نیں۔ جنہاں نوں شاپنگ مالز والے اکثر پچھ گچھ دے بعد چھڈ دیندے نیں جد کہ بار بار انج دی حرکتاں کرن والی خواتین نوں پولیس دے حوالے وی کر دیندے نیں۔ قصہ کجھ وی ہوئے پراک گل طے اے کہ اسیں بحیثیت قوم اخلاقیات دا مفہوم بھُل چکے آں۔ ایہہ کنہی بدقسمتی اے کہ فیصل آباد وچ خواتین دے کپڑے پھٹے ہوئے سن ایہناں اُتے تشدد کیتا جا رہیا سی تے لوک ایہناں نوں چھڑان دی بجائے موبائل کیمریاں نال سوشل میڈیا اُتے شیئر کرن لئی ویڈیوز بنا رہے سن۔ ایس ویلے ہونا تے ایہہ چاہیدا کہ کجھ مرد اگے ودھدے تشدد کرن والیاں دے ہتھ روکدے، خواتین دے برہنہ جسماں اُتے چادراں پاندے تے فیر بہہ کے واقعے دی تفصیل جانن دی کوشش کردے پر کسے نے وی ساہمنے آ کے ظالماں دے ہتھ روکن دی کوشش نہ کیتی ہاں بوہت سارے لوک موبائل نال ویڈیو ضرور بناندے رہے۔ ایس دا مطلب تے ایہہ ای اے کہ اسیں کمزور ترین ایمان دے درجے توں وی تھلے آں۔ ایہہ ویلا اے کہ اسیں اپنے سماجی رویاں اُتے نظر ثانی کریئے۔ مینار پاکستان اُتے یوم آزادی دا واقعہ ہوئے، سیالکوٹ وچ تشدد کر کے سری لنکن شہری نوں قتل دی گل ہوئے یا فیصل آباد وچ خواتین دے نال سلوک، اک ای گل ساہمنے آندی اے کہ اسیں بحثیت قوم اخلاقی پستی دی اتھاہ گہرائیاں دا شکار ہو چکے آں۔
اج اک خدا اک قرآن اک نبی ؐ نوں منن والے مسلمان مختلف عقائد وچ بٹ کے آپس وچ ای دست وگریباں نیں۔ ساڈے زیادہ تر مبلغین دین دی نہیں بلکہ اپنے مسلک تے فرقے دی تبلیغ کردے ہوئے اپنے پیرو کاراں نوں انج دے متاثر کردے نیں کہ ایہناں لئی دُوجے مسلک دے لوکاں نوں حق اُتے جاننا مشکل ہو چکیا اے۔ کاش اسیں سارے جس نبیﷺ دا کلمہ پڑھدے آں اوس نبی ؐ دے ناں اُتے سب دین دی تبلیغ دا عمل اپنا لئے۔ علما دا فرض اے کہ لوکاں نوں سمجھان کہ دُوجیاں دی گل سنن ، سمجھن دی کوشش کرنا تے اختلاف رائے نوں خندہ پیشانی نال برداشت کرنا کنہا ضروری اے۔
سجنو! ساڈے سوچن دا انداز مختلف ہو سکدا اے، ساڈی پسند ضروری نہیں کہ سب لئی قابل قبول ہوئے پر ایس دا ایہہ مطلب کتھوں ہو گیا کہ دُوجیاں اُتے فتوے لانا شروع کر دیئے۔ اپنے ای لوکاں دے گلے وَڈ دیویئے۔ اللہ پاک نے سانوں اشرف المخلوق بنایا اے۔ سانوں سمجھ دتی اے عقل دتی اے۔ سوچن سمجھن دی صلاحیت دتی اے۔ گل بات وچ بہتر رویہ اختیار کرن دا حکم دتا اے تے فیر کیوں اسیں دلیل دی بجائے غلیل نال گل کرن دے فلسفے اُتے چل پئے آں۔ ایہہ دنیا بوہت خوبصورت اے تے انسان نوں اللہ پاک نے سب توں زیادہ خوبصورت تخلیق کیتا اے۔ سخت توں سخت تے بے ہودہ مخالفت دے جواب وچ وی آپ حدود اللہ توں تجاوز نہیں کر سکدے ۔ آپ دے مخالفین کیہ کردے نیں۔ ایہناں دا معاملہ اللہ اُتے چھڈ دتا کرو۔ سوشل میڈیا دا دور اے بلکہ زور اے۔ صبح توں لے کے رات گئے تیکر قرآن و حدیث تے دُوجے اکابرین دے اقوال گھلے جاندے نیں۔ ساڈے آقاؐ نے فرمایا سی کہ کسے دے جھوٹا ہون لئی ایہو کافی اے کہ اوہ سنی سنائی گل نوں اگے اپڑا دیوے۔ میسج فاروڈ کرنا چھڈ دیو جے تہانوں تبلیغ دا شوق اے تے کتاباں دے مطالعے دی عادت اپنائو۔ ملکی قوانین دا احترام کرو اپنے لوکاں نال صلح جوئی ، خندہ پیشانی تے درگزر نال پیش آنا شروع ہو جائو تے اپنے بالاں دی تربیت وچ اخلاقیات، رویات تے اپنی ثقافت نال محبت نوں شامل کرو۔