انقلاب برپا کرن والی مہم
پی پی ایس سی دے پیپرز 10 سال توں فروخت ہو رہے نیں تے وزیر اعلیٰ پنجاب عثمان بزدار نے پیپر لیک اسکینڈل دی تحقیقات لئی انکوائری کمیٹی وی تشکیل دے رکھی اے
رقیہ غزل
1970 وچ امریکی ریاست کیلیفورنیا وچ اک ہسپانوی Spanish بولن والی بچی دا سکول داخلہ دے ویلے انگریزی زبان وچ ذہانت دا ٹیسٹ لیا گیا۔ ایس ٹیسٹ وچ خراب نتیجے دی بدولت بچی نوں ذہنی معذور بالاں دی کلاس وچ داخل کر دتا گیا۔ والدین نے مدد لئی ایس فیصلے دے خلاف عدالت نال رجوع کیتا تے عدالت نے فیصلے نوں کالعدم قرار دیندے ہوئے حکم دتا کہ بچی دا ٹیسٹ ایس دی اپنی ہسپانوی زبان وچ لیا جائے۔ دوبارہ ٹیسٹ وچ ایہہ گل واضح ہو گئی کہ مذکورہ بچی دیگر بالاں توں زیادہ ذہن و فطین سی جو کہ والدین دے بروقت ایکشن دی وجہ نال ماہرین دے تعصب دا شکار ہون توں بچ گئی۔ یکے بعد دیگر ایسے قسم دے واقعے رپورٹ ہون دے بعد تعلیمی ماہرین نے ذہانت پتہ کرن دے طریقہ کار دا تجزیہ کیتا تے ایہہ نتیجہ اخذ کیتا کہ محض آئی کیو ٹیسٹ اُتے انحصار کافی نہیں ایس لئی بچے دی ذہانت دا تعین کرن لئی آئی کیو لیول دے نال نال بچے دی تخلیقی صلاحیتاں دا جائزہ لینا وی لازمی قرار دتا گیا۔ ماہرین دے مطابق بوہت سارے بچے انج دے ہوندے نیں جیہڑے معاشرتی اقدار وچ ذہانت ظاہر کردے نیں پر ذہانت دے ٹیسٹ وچ ایہناں دی ایس ذہانت نوں نہیں جانچیا جا سکدا۔ انج ای کجھ بچے نصابی علوم وچ اوہ کارکردگی نہیں وکھاندے جیہڑی غیر نصابی سرگرمیاں وچ ساہمنے آندی اے تے کجھ پوزیشن ہولڈر اپنے مسائل نوں حل کرن وچ ناکام رہندے نیں تاں ذہانت جانچن لئی جیہڑے پیمانے تیار کیتے گئے نیں اوہ سب بالاں لئی درست نہیں ہو سکدے بلکہ ماحول تے معاشرتی اقدار و حالات دے مطابق تھوڑی بوہت تبدیلی ناگزیر ہوندی اے مزید انج دے ماہرین نوں سلیکشن دی ذمہ داری دینی چاہیدی اے جو کسے وی قسم دے تعصب دا شکار نہ ہون تاکہ بچے دا مستقبل دا اُتے نہ لگے کیوں جے حکومتاں نوکریاں دے اہداف پورے کرن دی اہلیتاں نہیں رکھدیاں ایس پاروں خود سوزیاں دا رحجان ودھ جاندا اے۔
مندرجہ بالا تمہید ایس لئی بنھی اے کہ کجھ دن پہلاں پنجاب پی پی ایس سی (ایجوکیشن، اسلامیات) دے انٹرویو لئی گئے تے کجھ طالبات نے دسیا کہ کمرے وچ داخل ہوندے ای انٹرویو لین والے ماہرین دے پینل نے سانوں سختی نال تنبیہ کیتی سی کہ تسیں صرف انگلش بولو گیاں تے جواب وی انگلش وچ دیو گی مزید سوالات وی انج دے کیتے گئے جیہڑے Subject Oriented نہیں سن۔ پہلے وی سائنس سبجیکٹس دے جیہڑے انٹرویو لئے گئے سن ایہناں وچ بالاں دے نال جو سلوک ہویا اوہ میڈیا وچ وی زیر بحث رہیا کہ بالاں نال غیر تعلیمی تے غیر نصابی سوال کیتے گئے، پوزیشن ہولڈر ہون تے ٹیسٹ پاس کرن دے باوجود انٹرویو وچ فیل کر کے بالاں دے حوصلیاں نوں انج توڑیا گیا کہ اوہ دوبارہ کدی کوشش نہ کرن۔ مینوں کہن دیو کہ ’’ ذاغوں کے تصرف میں ہیں عقابوں کے نشیمن ‘‘ میرٹ بس سیاسی نعرہ اے سیٹاں تقریباً طے ہوندیاں نیں جنہاں دا حصول رشوت و سفارش دے بغیر ناممکن اے، متاثر ہ بچہ خود سوزی نہیں کرے گا تے کیہ کرے گا؟ ایہہ انکشافات وی ایسے ورھے ہوئے نیں کہ پی پی ایس سی دے پیپرز 10 سال توں فروخت ہو رہے نیں تے وزیر اعلیٰ پنجاب عثمان بزدار نے پیپر لیک اسکینڈل دی تحقیقات لئی انکوائری کمیٹی وی تشکیل دے رکھی اے۔ ہن آپ اندازہ کر لوئو کہ جتھے پیپرز لیک ہو جان اوتھے انٹرویو لین والے کنج مخلص ہو سکدے نیںتاں ای تے انٹرویو لین والے ماہرین دی ذاتی زندگیاں دا جائزہ لیے تے اکثریت دے 40 فیصد خاندانی بندے سرکاری سیٹاں اُتے مزے لُٹدے نظر آندے نیں جد کہ گولڈ میڈلسٹ بچی جیہڑی انٹرویو وی کلیئر کر لوے ایہنوں اک نمبر گھٹ ہون دی وجہ نال Sorry کہہ دتا جاندا اے جے انج ای کرنا ہوندا اے تے جویں وزارتاں، عہدیاں تے منصباں دی بندر بانٹ ہوندی اے اُنج ای ایہہ سیٹاں وی ونڈ دتا کرن کیوں جے ایتھے کہن والا کوئی نہیں ’’ساڈا حق ایتھے رکھ‘‘ بلکہ ایہہ دیس اے انھے لوکاں دا تے جو ویکھن یا سوچن دی کوشش کردا اے ایہنوں غدار وطن دے نشتر مار مار کے انھا کر دتا جاندا اے۔المختصر اج سارے من دے آں کہ کوئی شعبہ زندگی انج دا نہیں جتھے مافیاز دا راج نہ ہوئے پر گھٹ توں گھٹ شعبہ تعلیم نوں تے بخش دیندے۔ کنہی بڈھی اکھاں دے خواب ایہناں سیٹاں نال جڑے ہوندے نیں پر تسیں ذہانت جانچن دا انج دا پیمانہ بنا لیا اے جیہڑا ذہین بچے نوں نفسیاتی مریض بنا کے قبر وچ اپڑا دیندا اے۔ کسے حکومت نے اج تیکر کیوں نہیں سوچیا کہ اک یا دو نمبر توں رہ جان والے بالاں دا مستقبل کیہ ہوئے گا جد کہ اعداد و شمار دسدے نیں کہ کجھ مضبوط حوصلہ مند ای ایتھے ٹھہردے نیں کہ مایوسی دے ہنیریاں وچ ڈُبن دی بجائے کوئی ہور راہ لبھدے نیں۔ پی پی ایس سی دے تحریری امتحان دین والے جنہے بالاں نال گل ہوئی اوہ موجودہ نظام تعلیم تے نوکریاں دے حصول نال جڑی شرطاں توں پریشان تے ناامید سن بلکہ ایہناں نوں یقین سی کہ ایہہ نوکریاں رشوت تے سفارش دے بغیر کسے نوں نہیں ملدیاں۔ ’’کیسی چلی ہے اب کے ہوا تیرے شہر میں ۔۔بندے بھی ہوگئے ہیں، خدا تیرے شہر میں ‘‘۔
تسیں جو کر رہے او اوہ امریکی تے یورپی ریاستاں وچ سیاہ فام بالاں دے نال کیتا جاندا سی کہ ایہناں دے ٹیسٹ نوں گھر تے معاشرے دے ماحول نوں پیش نظر رکھدے ہوئے غیر مناسب آئی کیو لیول دی بنیاد اُتے داخلہ نہیں دتا جاندا سی کیوں جے اوہ لوک تعصب دا شکار سن جے تسیں نہیں تے طے کر لوئو کہ وطن عزیز وچ ذہانت دا معیار کیہڑی زبان تے ٹیسٹ دا پیمانہ کیہ ہوئے گا نہیں تے یاد رہوے کہ ہن اوہ ویلا نیڑے آ چکیا اے جدوں جوڈیشری دی طرح سلیکشن تے انٹرویو دے ناں اُتے حقداراں تے اہل داراں دا احتساب کرن والے سینئرز پروفیسر تے ذمہ داران دے خلاف وی اک انتہا درجہ دی نفرت دا انقلاب لیائے گا۔ حاکم پاکستان تحریری امتحان دے بعد انٹرویو کرن والیاں نوں وی کسے جائز تے ہلال طریقہ کار دا پابند بنان دا قانون بنان اُتے مجبور ہوئے گا تاکہ اہل امیدواراں نال ناانصافی تے بددیانتی اُتے مبنی حرام کاری دا طریقہ کار بند ہو سکے۔ایہہ دکھ دی گل اے کہ ایہہ سینئر اساتذہ بدنیت تے بددیانت بن کے طے شدہ لسٹاں نوں منظور کردے نیں تے اپنے فرائض نوں کما حقہ سرانجام نہیں دیندے کہ امیدواران نال انٹرویو سلیکشن صرف دھوکا تے فراڈ بن کے رہ گیا اے جس دی صفاں درست کروان لئی سب نوں سوچنا ہوئے گا۔ میڈیا تے سارے عوامی حلقیاں دے عوامی نمائندگان دا مذہبی، اخلاقی تے سماجی فریضہ اے کہ کارخیر جان کے ایس مہم دا حصہ بنو تے ایس پیغام نوں پیغام حق جان کے اپنے حصے دا دیوا بالو۔
