پرائی شادی وچ عبداللہ دیوانہ

مطلوب وڑائچ

سیالکوٹ دے حلقہ وچ ہون والے ضمنی الیکشن مسلم لیگ (ن) دی قیادت دے اعصاب تے اک خوف بن کے سوار سی۔ ایس الیکشن وچ تحریک انصاف دے امیدوار نے مسلم لیگ (ن) دے امیدوار نوں ہرا دتا سی۔ ایہ سیٹ مسلم لیگ (ن) دی سی جو خوش اخترسبحانی دے انتقال تے خالی ہوئی سی تحریک انصاف دے احسن سلیم بریار نے الیکشن وچ ایہ سیٹ جت لئی۔ دو تن مہینے پہلاں پرویز ملک دے انتقال تے لہور دے حلقہ 133 دی سیٹ خالی ہوئی تے مسلم لیگ دی قیادت اک واری فیر خوفزدہ نظر آئی۔ ایہدا اظہار اوہدے ولوں پرویز ملک دی بیوی نوں ٹکٹ دین توں ہوندا اے۔ اوہ خصوصی نشست تے ایم این اے سن تے پرویز ملک دی وفات دے بعد اوہ عدت وچ سن۔ شائستہ پرویز ملک دا ایس حلقے نال تعلق نہیں۔ حلقہ این اے 133 وچ شکست دے خطرے پاروں شائستہ پرویز ملک نوں ٹکٹ دتا گیا۔ مقابلے وچ پی ٹی آئی دے جمیداقبال چیمہ سن اوہ اپنی حماقت یاں اپنی لیڈرشپ دی سازش دا شکار ہو کے انتخابی دوڑ توں باہر ہو گئے۔ عمومی خیال ایہہ وے پی ٹی آئی پنجاب دے صدر اعجاز چوہدری اپنے بیٹے واسطے ایس سیٹ دے خواہش مند سن تے اوہ نہیں سن چاہندے کہ ایہ سیٹ کسے ہور نوں ملے ایس لئی ٹیکنیکل بنیاداں تے جمشیداقبال چیمہ نوں ایس گیم توں آئوٹ کر دتا گیا ایس طرح مسلم لیگ (ن) نوں واک آوور مل گیا تے شائستہ پرویز ملک لئی انتخابی میدان صاف ہو گیا جہدے تے ن لیگ نے سکھ دا ساہ لیا۔ ہن مقابلے وچ کوئی قابل ذکر پارٹی نہیں سی۔ پیپلزپارٹی دے اسلم گل نوں ٹکٹ دتا گیا سی یاد رہوے اسلم گل بھٹو شہید دے نظریاتی جیالے نیں تے لہور دی سیاست وچ جہانگیر بدر دی قیادت وچ اوہناں دے کردارتے آزمائش نوں بھلایا نہیں جا سکدا۔ اسلم گل دا شمار میرے ذاتی دوستاں وچ ہوندا اے۔ پی پی پی نے پی ٹی آئی دے میدان چوں نکلن تے اپنے گھوڑے دوڑا دتے۔ ن لیگ لئی تھوڑا جیہا خدشہ پیدا ہویا تے نوٹاں دیاں بوریاں دے منہ کھول دتے گئے۔ پی پی والے پہلے ای انج کر رہے سن۔
پی پی پی د ے ایس حلقے وچ پنج ساڑھے پنج ہزار ووٹ سن جو اوہنوں مل گئے مجموعی فگر 32ہزار سامنے آئی۔ ایہدے تے پی پی دی قیادت بے وجہ آپے توں باہر ہو رہی اے۔ آصف علی زرداری تے بلاول بھٹو ورگے صف اول دے لیڈر ایہنوں پیپلزپارٹی دا نواں جنم قرار دے رہے نیں۔ 32 ہزار ووٹ حاصل کرن تے اینے خوش ہوئے کہ باقاعدہ جشن منایا گیا۔ شکست تے جشن پہلی واری ویکھیا تے سنیا گیا۔ پی پی دی جہڑی اوقات سی اوہنوں اوہدے مطابق ووٹ ملے۔ ایس حلقے وچ طاہر القادری دے 25 ہزار ووٹ نیں۔ علی نواز گنڈاپور پی ٹی آئی دے انتخابی دوڑ توں باہر ہون دے بعد پیپلزپارٹی دے امیدوار دی مہم چلاندے رہے۔ اوہناں نوں پیپلزپارٹی نال زیادہ الفت تے نہیں پر طاہر القادری دے لوکاں نوں ن لیگ نال ضرور عدالت تے مخاصمت اے۔ 25 ہزار وچ پنج ہزار پی پی دے ووٹ جمع کر لیے تے تریہہ ہزار ہو گئے۔ پی ٹی آئی نے اپنے ووٹر نوں لاتعلق رہن نوں کہیا سی۔ فیر وی ڈیڑھ دو ہزار ن لیگ دے خلاف ووٹ دین نکل آئے۔ پیپلزپارٹی اپنی مقبولیت دی جس پستی وچ سی آنا وی اوہدے وچ اے۔ ایس پارٹی دی لیڈرشپ نے حلقہ 133 وچ پانی وانگوں پیسہ روڑھیا پر کوئی خاص فرق نہیں پیا۔ اوہناں نوں ڈینگیاں مارن دا موقع طاہر القادری دے لوکاں دی سپورٹ پاروں ملیا۔ پی پی پی نے جناں پیسہ انتخابی مہم وچ لایا ایس توں ڈھیر ودھ میڈیا وچ اپنے سپورٹر دی خدمت لئی دتا جو ایہ ثابت کرن لئی اڈی چوٹی دا زور لا رہے نیں کہ پی پی پنجاب وچ ابھر کے سامنے آ رہی اے۔ ایہنوں کوئی منن تے تیار نہیں پر ن لیگ ضرور ڈری اے۔
دوستو! اک غیرجانبدار تجزیہ نگار دی حیثیت نال میں چوہدری اسلم گل دی صلاحیت تے قابلیت تے کوئی قدغن نہیں لانا چاہندا۔ اوہناں نے اپنی قیادت دے کہن تے پرفارم کیتا تے دوجے پاسے ڈاکٹر طاہرالقادری صاحب دے جانثاراں دے کول اک موقع سی کہ اوہناں دے پنجی ہزار ووٹر ایس حلقے وچ مسلم لیگ (ن) خلاف اپنے دل دی بھڑاس کڈھ سکن۔ اج ایس ضمنی الیکشن نوں گزرے کئی دن ہو گئے نیں تے پاکستان پیپلزپارٹی دی قیادت نے الیکٹرانک تے پرنٹ میڈیا دے اوہناں صحافیاں نوں جہناں نوں مال کمان دی عادت اے اوہناں تے ایہ پیسہ دل کھول کے لٹایا۔ پچھلے صدر آصف علی زرداری نے کجھ دن پہلاں ایس حلقے دے نتیجے آن دے بعد کہیا سی کہ جے اسیں ووٹراں نوں باہر کڈھن وچ کامیاب ہو جاندے تے اسیں پنجاہ ہزار ووٹ حاصل کر سکدے سی۔ یعنی زرداری صاحب نے اپنی دولت دے سر تے پنجاہ ہزار ووٹراں دا انتظام کر رکھیا سی۔٭