عادتاں بدلن دا مشورہ

ملک دی 72 فیصد آبادی قدرتی گیس دی نعمت توں محروم تے ملک دی محض 28 فیصد آبادی نوں ای ایہہ سہولت میسر اے

تحریر حمیداللہ بھٹی

اک نجی ٹی وی دے پروگرام وچ تنظیم سازی دے حوالے نال عالمی شہرت یافتہ طلال چوہدری نال فواد چوہدری نے سی پیک اُتے ایس بنا اُتے گل بات کرن توں انکار کر دتا کہ سی پیک نال کیہ بن دا اے؟ طلال چوہدری نوں ایہہ وی پتہ نہیں ایس لئی لاعلم بندے نال بحث کرن دا کوئی فائدہ نہیں طلال چوہدری نے سی پیک نال بنن والے الفاظ دسن دی کوشش کیتی پر ناکام رہے انج گل ہنسی مذاق وچ ختم ہو گئی پر پورے ملک نوں ای طلال چوہدری دی طرح ذہنی لحاظ نال پسماندہ سمجھنا کسے طور مناسب نہیں اُنج تے ہر حکمران عقلِ کُل دے خبط وچ مبتلا رہندا اے پر موجودہ حکومت نے ایس حوالے نال ماضی دے سارے حکمراناں نوں مات دے دتی اے تے ہر خرابی دی وجہ جے سابق حکمراناں نوں کہیا جاندا اے تے عوام عدم تعاون اُتے وی اکثر و زراشکوہ کناں نیں۔
حکومتاں مقبولیت بحال رکھن لئی عام طور تے عوامی بہتری دے منصوبیاں دا اعلان کردیاں نیں پر ساڈی موجودہ منفرد حکومت عملی طور تے کجھ کرن دی بجائے نت نویں اعلان کرن تے عوامی خامیاں دی نشاندہی کرن تیکر محدود اے حکمران جماعت دا خیال اے کہ ماضی وچ ملک نوں چنگے حکمران نہیں ملے ہن ملک نوں چنگے حکمران تے مل گئے نیں پر چنگے حکمراناں نوں عوام چنگی نہیں ملی ایسے بنا اُتے مسائل حل نہیں ہو رہے جے عوام چنگی ہوندی تے حکومت نال تعاون کردی تے اج ملک خوشحال تے ترقی یافتہ ہوندا مزید ستم ایہہ کہ سابق حکمراناں نے لُٹے ہوئے دو سو ارب ڈالر وی واپس نہیں کیتے انج مجبوراً آئی ایم ایف سنے دیگر عالمی اداریاں توں قرضے لین اُتے مجبور اے جے سابق حکمراناں دے غیر ملکی بینکاں وچ رکھے دو سو ارب ڈالر مل جاندے تے حکومت قرضے لین توں بچن جاندی۔
اصل گل ایہہ وے کہ جدوں ہر پاسے خرابی نظر آن لگے تے سارے غلط وکھائی دین لگن تے بندے نوں اپنا جائزہ لینا چاہیدا اے انج کرن نال خرابی دا پتہ چل سکدا اے فواد چوہدری نے ہر سال نو فیصد قدرتی گیس دے ذخائر ختم ہون دا انکشاف کردے ہوئے عوام نوں مفت مشورہ دتا اے کہ شہراں دے لوک جیہڑے سستی گیس استعمال کر رہے نیں اوہ اپنی عادات بدلن ایہہ درست اے کہ ملک دی بہتر فیصد آبادی قدرتی گیس دی نعمت توں محروم تے ملک دی محض 28 فیصد آبادی نوں ای ایہہ سہولت میسر اے پر ملک دا ارباں کھرباں روپیہ جیہڑا پائپ لائناں تے میٹراں دی صورت وچ خرچ کیتا جا چکیا اے کیہ لکھاں لگے میٹر اک اعلان کرن نال ضائع تے پائپ لائناں دفن کر دتیاں جان گیاں؟ ایس مشورے توں پہلاں عوام نامی مخلوق نوں کئی لائق وفائق وزیر چینی گھٹ استعمال کرن سنے روٹی گھٹ کھان، جہے فکر انگیز مشوریاں نال نواز چکے نیں ہن پتہ نہیں عوام اپنے دیگر لائق وفائق وزیراں دے فرمودات اُتے عمل کردی اے یا نہیں البتہ عوام نوں چاہیدا اے کہ فواد چوہدری دے عادات بدلن دے مشورے نوں سنجیدہ لین کیوں جے اوہ اطلاعات دے وزیر نیں ایس لئی ایہناں دی اطلاعات اُتے شک دی کوئی گنجائش ای نہیں خیر کوئی شک کرے گا تے ممکن اے سمیع ابراہیم دی طرح گوشمالی کرا لوے ملک نوں پہلی وار خوش قسمتی نال چنگے حکمران ملے نیں پر ستم ظریفی ایہہ وے کہ عوام ای چنگی نہیں جے چنگی ہوندی تے چینی دا استعمال چھڈ دیندی تاکہ شوگر ملاں چینی برآمد نال ارباں روپئے منافع حاصل کردیاں ایسے طرح روٹی گھٹ کھائی جاندی تے حکومت ارباں روپئے دی گندم درآمد کرن اُتے مجبور نہ ہوندی ہن ایہہ تے فواد چوہدری دی مہربانی اے کہ اوہناں نے عوام نوں بروقت دس دتا اے کہ قدرتی گیس دے ذخائر ختم ہون دے نیڑے نیں تاں عادت بدلو انج دی بروقت خبراں حکومت دی عوام اُتے خصوصی شفقت اے پر مینوں یقین نہیں کہ چنگی حکومت دے چنگے مشورے عوام قبول کر لوے گی بلکہ چینی، روٹی جہے مشوریاں جہیا ای قدرتی گیس دے بارے عادات بدلن دے مشورے وی کھوہ کھاتے ای ٹُر جائے گا۔
اُنج خراب عوام وی اپنے چنگے تے مخلص حکمراناں نوں مشورے دے سکدی اے کہ ووٹ دین دی غلطی تے سرزد ہو چکی ہن اینی کڑی سزا تے نہ دیو صحت کارڈ، احساس تے کامیاب جوان پروگرام جہے بے شک مزید اعلانات دا سلسلہ روک کے پہلے اعلان کیتے پروگراماں نوں عملی جامہ پہنان ول دھیان دین حکومتی رٹ بہتر بنان، ریاست مدینہ دا نعرہ لان دی بجائے ملک وچ انصاف دی فراہمی یقینی بنائو پولیس اصلاحات دا وعدہ پورا کرو کالعدم تحریک طالبان پاکستان نے سینکڑے شہری مار دتے ارباں دی املاک تباہ کر دتی انسانی جاناں دے خون تے تباہی نوں بالائے طاق رکھدے ہوئے جے گل بات ہو رہی اے تے عوام دی رائے وی شامل کر لوئو ووٹ دین دا ایہہ مطلب تے نہیں کہ ووٹ دین دے بعد عوام عضو معطل دی مانند ہو گئی اے ایسے طرح کالعدم تحریک لبیک نے دھرنیاں نال معیشت نوں نقصان اپڑایا ریاستی رٹ دے محافظ پولیس ملازماں دی دن دیہاڑے سڑکاں اُتے جاناں لے لیاں جس اُتے ایکشن لین دی بجائے نہ صرف کالعدم تنظیم نوں بطور سیاسی جماعت تسلیم کر لیا جاندا اے بلکہ گرفتار بندے وی رہا کر دتے جاندے نیں ایہناں حالات وچ آئندہ بھلا کون ریاستی رٹ دی بحالی لئی جان نوں خطرے وچ پان اُتے تیار ہوئے گا؟ عوام تے ایہہ وی مشورہ دے سکدی اے کہ حکومت جے شہریاں نوں انصاف نہیں دلوا سکدی تے اپنے اہلکاراں نوں تے انصاف دلا دیوے۔
حکومتی جماعت دا خیال اے کہ چنگی عوام ملی ہوندی تے مطالبات دی بجائے مسائل حل کرن وچ معاونت کردی، بُری عوام وی تے اپنے چنگے تے مخلص حکمراناں توں دریافت کر سکدی اے کہ چینی، روٹی گھٹ کھان تے قدرتی گیس ختم ہون اُتے عادات بدلن دے مشوریاں اُتے حکمراناں نے وی اپنے رہن سہن وچ تبدیلیاں کیتیاں نیں یا نہیں؟ اوہ انتخاب وچ سائیکل اُتے دفتر آن دا وعدہ جت دے بعد ہیلی کاپٹر دے استعمال وچ کنج تبدیل ہو گیا؟ مودی تے جوبائیڈن جے ٹیلی فون اُتے گل نہیں کرنا چاہندے تے جواب وچ اپوزیشن رہنماواں نال تعلقی دا کیہ جواز اے؟ ساڈے وزیراعظم عالمی پسندیدگی وچ دنیا بھر وچ 17 نمبر اُتے آ چکے نیں تے اوہ اپنی عوام نوں پسند کیوں نہیں کردے؟ خفگی دی وجوہات نال عوام نوں کیوں آگاہ نہیں کیتا جاندا۔
فواد چوہدری دی ذہانت دی ایس بنا اُتے وی نفی نہیں کیتی جا سکدی کیوں جے ق لیگ توں لے کے موجودہ حکمران جماعت وچ تھاں بنان لئی اوہناں نے تاک تاک کے درست نشانے لائے نیں ایس لئی ایہناں توں زیادہ جہاندیدہ ہور کوئی بندا نہیں ہو سکدا اوہناں نے عوام نوں عادتاں بدلن دا مشورہ وی مستند اطلاعات اُتے ای دتا ہوئے گا پر الیکشن کمیشن اُتے تنقید دے نشتر چلان نال ملک تے عوام دا جے فائدہ سی تے غیر مشروط معافی منگن نال ہن جیہڑا عوامی مفاد نوں نقصان ہوئے گا ایس دی تلافی کون کرے گا؟ چنگے حکمران اپنی بُری عوام نوں عادتاں بدلن دے مشوریاں نال نوازدے ہوئے جے کجھ اک مشوریاں دا اطلاق اپنے اُتے وی کر لین مثلاً سابقہ حکومتاں نے ایران تے وسطی ایشیائی ریاستاں توں گیس دی درآمد دے جیہڑے سمجھوتے کیتے ایس توں علاوہ روس نال وی حال ای وچ جیہڑ ااک اہم معاہدہ کیتا گیا اے ایس اُتے عمل کرن نال عوامی خیال وچ زیادہ نہیں تے کجھ بہتری دی امید اے کاش گلاں کرن دی عادت چھڈ کے حکمران اپنی بُری عوام دا کجھ بھلا کر دین تے مینوں یقین اے عادتاںبدلن دے مشوریاں دی لوڑ ای نہیں رہوے گی تسیں کیہ فرماندے او ، ایس مسئلے بارے؟