جگت پنجابی سبھا دے پربندھ ہیٹھ کینیڈا وچ ورلڈپنجابی کانفرنس 2021
شمع روشن کرن دی رسم ہریندر براڑ، گورپریت سنگھ ڈھلوں رینجل کونسلر اتے جگیندر سنگھ باجوہ ہوراں کیتی
رپورٹ: ڈاکٹر صائمہ بتول
جگت پنجابی سبھا کینیڈا ولوں یاراں تے باراں دسمبر 2021 نوں بریمپٹن کینیڈا وچ ورلڈ پنجابی کانفرنس کرائی گئی۔ کانفرنس دی شروعات 11 دسمبر 2021 توں سردار شبیگ سنگھ کتھوریا ہوراں رِبن کٹ کے کیتی۔
شمع روشن کرن دی رسم ہریندر براڑ، گورپریت سنگھ ڈھلوں رینجل کونسلر اتے جگیندر سنگھ باجوہ ہوراں کیتی۔ مُڈھلے سیشن دی نظامت سردار سردول سنگھ تھیہاڑا ہوراں کیتی جد کہ سردار دلبیر سنگھ کتھوریا پردھان جگت پنجابی سبھا ہوراں پنڈال دے حاضرین نوں جی آیاں نوں آکھیا۔ سونیا سدھوایم پی اے نے ورلڈ پنجابی کانفرنس دا سُچجا پربندھ کرن لئی ودھائیاں دِتیاں۔
پہلے سیشن دے سٹیج انچارج سردار سنتو کھ سنگھ سندھو سن۔ ایس سیشن وچ قائدہ نور اکیسویں صدی پڑھن لئی پریریا گیا دُوجے سیشن دے سٹیج سیکرٹری ڈاکٹر رمنی بترا سن۔ ایس سیشن وچ جگجیت کور ڈھنڈیسا، ریکی گوگنا، پیارا سنگھ کو دووال اتے اہندریال مٹھاڑوے بلارے سن۔ تیجے سیشن دی نظامت امر جیت سنگھ سنگھا ہوراں کیتی۔ ایس سیشن وچ پنجابی زبان دے پوکھ(مستقل) بارے پیپر پڑھے گئے۔ چوتھے سیشن دی میزبانی تل وہندر سنگھ منڈھ کینیڈین ساہت سبھا نے کیتی ایس سیشن وچ ڈاکٹر گربخش سنگھ پنڈھال، کرن عجائب سنگھ سنگھا، ڈاکٹر رام سنگھ، ملوک سنگھ کاہلوں، بلراج سنگھ چیمہ تے ڈاکٹر جگ موہن سنگھ سنگھا بُلارے سن کانفرنس وچ انڈیا توں آئیاں ڈاکٹر ام ایمن ہوراں دی کتاب دی مکھ وکھالی وی کروائی گئی۔
ایس سمے 2009 توں لے کے 2019 تک ہوئیاں 5 ورلڈ پنجابی کانفرنساں دیاں کارروائیاں دی ڈاکیو منٹری چلائی گئی۔ ڈاکٹر عجائب سنگھ چٹھہ ولوں تیار کیتی گئی نکی فلم ’’ باپو جی ‘‘ چلائی گئی نالے بالاں ولوں سبھاچارک پروگرام پیش کیتے گئے ۔کانفرنس دے اَنت وچ کانفرنس وچ پیپر پڑھن والیاں نوں سرٹیفکیٹ وی دتے گئے۔
جگت پنجابی سبھا دے چیئر مین ڈاکٹر عجائب سنگھ چٹھہ تے اوہناں دی ساری ٹیم پنجابی زبان دے ودھا تے کھلار لئی ایس کامیاب کانفرنس دے پربندھ کرن تے ودھائی دی حق دار اے۔
