’’ہم قدم‘‘ خصوصی بندیاں دی فلاح دا نویکلا پروگرام

جاوید یونس

جدوں توں موجودہ حکومت دی آئینی مدت دا چوتھا سال شروع ہویا اے تے کورونا سنے مختلف مسائل اُتے کسے حد تیکر قابو پا لیا گیا اے۔ پنجاب وچ وزیراعلیٰ پنجاب سردار عثمان بزدار تے ایہناں دی انتظامی ٹیم نے معاشرے وچ اصلاح، خدمت تے ترقی دے مختلف پراجیکٹاں اُتے کم دی رفتار تیز کر دتی اے۔ زراعت، صنعت، سیاحت، صحت، تعلیم تے ادب و ثقافت دے میدان وچ اہم پیش رفت تے صوبے وچ اسلامی کلچر نوں مستحکم بنیاداں اُتے فروغ دین لئی متعدد فیصلے کر کے عوام دے دل جت لئے نیں۔ صوبے دے عوام دی فلاح و بہبود لئی ارباں روپئے دے منصوبے شروع کرن دے بعد ہن خصوصی بندیاں نوں معاشرے دا مفید حصہ بنان لئی اک بھرپور پروگرام ’’ہم قدم‘‘ نوں عملی شکل دے دتی اے۔ ایہہ پروگرام بنیادی طور تے احساس پروگرام دا حصہ اے۔ پروگرام نوں ٹھوس بنیاداں اُتے اگے ودھان لئی وزیراعلیٰ آفس وچ احساس پروگرام دے تحت ہم قدم پراجیکٹ دی افتتاحی تقریب منعقد ہوئی جس وچ پہلے مرحلے لئی مالی معاونت دے اہل خصوصی بندیاں وچ رجسٹریشن سرٹیفکیٹ تقسیم کیتے گئے۔ ایس موقعے اُتے وزیراعلیٰ پنجاب نے ہمقدم پروگرام دے حوالے نال بہت ساری گلاں کیتیاں ایہناں دا کہنا سی کہ خصوصی بندے وی معاشرے دا اہم حصہ نیں جنہاں نوں فعال بنانا ایہناں خصوصی بندیاں دے نال ایہناں دے خانداناں نوں پیراں اُتے کھڑا کرن دے مترادف اے۔ ایہناں دا کہنا سی کہ خصوصی بندیاں لئی ساڑھے تن ارب روپئے انتہائی شفافیت دے نال استعمال وچ لیائے جان گے۔ پروگرام دی چنگی گل ایہہ وے کہ ایس نوں دو حصیاں وچ تقسیم کیتا گیا اے۔ اک حصہ خصوصی بندیاں نوں معاشی طور اُتے تے روزگار دے حوالے نال خود کفیل بنانا اے۔ ایس مقصد لئی پہلے مرحلے وچ خصوصی بندیاں نوں 27 کروڑ روپئے دے بلاسود قرضے دتے جا رہے نیں۔ خصوصی بندے ایہناں قرضیاں نال اپنی اپنی صلاحیتاں دے مطابق کاروبار دا سلسلہ شروع کرن گے تے صرف اصل رقم قسطاں وچ واپس کرن گے۔ ہمقدم پروگرام دا اک پہلو خصوصی بندیاں دی جسمانی کمی نوں پورا کرن لئی معاون شیواں دی فراہمی اے۔ چنانچہ حکومت 10 کروڑ روپئے نال خصوصی بندیاں نوں وہیل چیئر، آلات سماعت تے دُوجا ضروری سامان فراہم کرے گی ایس طرح ایہناں بندیاں دی عملی زندگی آسان بنان وچ مدد ملے گی۔ ہن تیکر جمع کیتے گئے اعداد و شمار دی روشنی وچ کہیا جا سکدا اے کہ گھٹ توں گھٹ 63 ہزار بندے ہمقدم پروگرام توں فائدہ چکن گے۔
مہذب ملکاں وچ خصوصی بندیاں لئی ہمیشہ محبت، ایثار تے تعاون دے جذبے نال کم لیا جاندا اے۔ بدقسمتی نال ماضی وچ انفرادی طور تے کجھ حلقیاں نے جزوی طور تے کجھ کم کیتا ہوئے گا پر سرکاری سطح اُتے ہمقدم پروگرام جہی کوئی منصوبہ بندی نہیں کیتی گئی۔ وزیراعلیٰ سردار عثمان بزدار نے اپنی پارٹی دی قیادت دی پالیسی دے مطابق جس طرح صوبے دے پسماندہ علاقیاں نوں ترقی یافتہ ضلعیاں دے برابر لیان لئی متعدد اقدامات کیتے نیں ایس طرح ہن معاشرے وچ عدم توجہ دا شکار خصوصی بندیاں نوں عام لوکاں وانگوں قومی دھارے وچ لیان لئی خطیر رقم نال قابل عمل پراجیکٹ دا آغاز کر کے صحیح معنیاں وچ اوہناں نے عوام دوست وزیراعلیٰ ہون دا ثبوت دتا اے۔
وزیراعظم دے ویژن دے تحت حکومت پنجاب نادار تے محروم معیشت طبقات دی فلاح و بہبود لئی سرگرم عمل اے۔ حساس پروگرام دے تحت پسماندہ طبقات دے معیار زندگی وچ بہترین، عدل مساوات تے بنیادی ضروریات زندگی دی فراہمی یقینی بنائی جا رہی اے۔ حکومت پنجاب ولوں ساڑھے تن ارب روپئے دی وڈی رقم نال خصوصی بندیاں دی مالی معاونت لئی ہمقدم پروگرام دا آغاز کیتا اے جس وچ خصوصی بندیاں نوں ماہانہ 2 ہزار روپئے وظیفہ دتا جائے گا جس نال ایہناں لئی مالی طور تے آسانی ہوئے گی تے اوہ معاشرے وچ اک بہترین زندگی لنگھا سکن گے۔ قومی خوشحالی سروے دے مطابق غربت دے سکورپی ایم ٹی 30 تیکر زندگی بسر کرن والے خصوصی بندے ایس پروگرام دے اہل ہون گے ایس پروگرام توں مستفید ہون لئی قومی خوشحالی سروے وچ ب فارم یا قومی شناختی کارڈ برائے خصوصی بندیاں دا اندراج ہونا لازمی اے۔ خصوصی بندے اپنی اہلیت جانن لئی 13 ہندسیاں اُتے مشتمل قومی شناختی کارڈ نمبر 8123 اُتے ایس ایم ایس کرن۔
وزیر اعلیٰ پنجاب سردار عثمان بزدار نے خصوصی بندیاں دے حقوق دے عالمی دن اُتے اپنے پیغام وچ کہیا اے کہ دین اسلام وچ خصوصی بندیاں دا خیال رکھن دی تلقین کیتی گئی اے۔ خصوصی بندیاں نوں معاشرے وچ باوقار مقام دلوان لئی ہر طبقے نوں اپنا کردار ادا کرنا چاہیدا اے۔ خصوصی بندیاں دی بحالی و نگہداشت لئی اقدامات حکومتی ترجیحات وچ اولین نیں۔ فلاحی ریاست دے ویژن دے تحت حکومت پنجاب خصوصی بندیاں دی فلاح و بہبود لئی سرگرم عمل اے۔ پنجاب سوشل پروٹیکشن اتھارٹی دے تحت خصوصی بندیاں دی فلاح و بہبود لئی مختلف پراجیکٹس شروع کیتے جا چکے نیں۔ خصوصی بندیاں نوں نہ صرف بحالی تے دُوجیاں دے برابر لیاواں گے ، خصوصی بندیاں نوں مساوی ترقیاتی موقعے دینا کسے وی معاشرے دے صحت مند ہون دی دلیل ہوندی اے۔ حکومت پنجاب نے خصوصی بندیاں لئی دیگر کئی اقدامات کیتے نیں۔ زیور تعلیم پروگرام دے تحت سکول ایجوکیشن دے اشتراک نال کلاس 6 توں 9 تیکر منتخب ضلعیاں وچ طالبان نوں ماہانہ ایک ہزار روپئے وظیفہ دتا جا رہیا اے تے ایس پروگرام نال 70 لکھ طالبات فائدہ مند ہون گیاں۔ صلہ فن پروگرام دے تحت نادار فنکاراں نوں ماہانہ 5 ہزار روپئے پیش کیتے جا رہے نیں تے ایس پروگرام نال 1987 بندے مستفید ہو رہے نیں۔ نئی زندگی پروگرام دے تحت تیزاب گردی دا شکار ہون والے بندیاں دی بحالی تے مالی معاونت کیتی جاندی اے تے 28ہزار بندے ایس توں مستفید ہو رہے نیں۔ باہمت بزرگ پروگرام دے تحت 65 سال توں ودھ عمر دی خواتین نوں ماہانہ 2 ہزار روپئے دتے جان گے ایہناں دی وفات دی صورت وچ خاندان دے 65 سالہ مرد رکن نوں ایہہ وظیفہ دتا جائے گا۔ ایس پروگرام نال 78 ہزار بندے مستفید ہو چکے نیں پنجاب ہیومن کیپٹیل انویسٹمنٹ پروگرام دے تحت ہیلتھ، سوشل تے اکنامک سروسز دی بہتری لئی ورلڈ بینک دے اشتراک نال پسماندہ علاقیاں دے عوام دی بحالی لئی 11 ضلعیاں وچ پروگرام شروع کیتا جائے گا۔بہاولپور ، مظفر گڑھ دے 2 ضلعیاں وچ ایہہ پروگرام شروع ہو چکیا اے تے 1820 بندے ایس توں فائدہ اٹھا رہے نیں۔ بیوا تے یتیماں نوں ماہانہ 3 ہزار روپئے وظیفے دی ادائیگی لئی سرپرست پروگرام شروع کیتا گیا اے۔ جس لئی 70کروڑ روپئے مختص کیتے گئے نیں۔ ویمن انکم گروتھ اینڈ سیلف ریلائنس پروگرام دے تحت پنڈاں دی غریب خواتین نوں پروڈیکٹو اثاثے مہیا کیتے جا رہے نیں 2 ضلعیاں وچ پہلے فیز دے دوران پائلٹ پراجیکٹ وچ 25 ہزار خواتین نوں 50 کروڑ روپئے دی لاگت نال اثاثے یعنی مویشی تے مرغیاں وغیرہ مہیا کیتی جا رہیاں نیں اقلیتی برادری لئی سکلڈ بلڈنگ پروگرام لئی 20 کروڑ روپئے مختص کیتے گئے نیں تے پنجاب سوشل پروٹیکشن فنڈ لئی ایس مالی سال وچ 50 کروڑ روپئے رکھے گئے نیں۔ وزیراعلیٰ پنجاب عثمان بزدار نے کہیا اے کہ محروم پسماندہ تے نظر انداز کردہ طبقات نوں نہ صرف بحالی ول لیاواں گے بلکہ دوجیاں دے برابر لیاواں گے۔ ایہہ ساڈے لیڈر عمران خان دا ویژن اے تے ایہہ ساڈا مشن اے۔ خصوصی بندے صلاحیتاں دے حامل بندیاں نوں بااختیار بنان دا ایکٹ 2021 منظوری لئی پیش کیتا گیا اے۔
سرکاری اداریاں وچ خصوصی بندیاں لئی 7555 تے پرائیویٹ اداریاں وچ 7426 ملازمتاں اُتے خصوصی بندیاں دی بھرتیاں کیتیاںگئیاں نیں۔ خصوصی بندیاں دی رجسٹریشن ، معذوری دے تعین تے سرٹیفکیٹ دے اجرا لئی پہلی وار سارے تحصیل ہیڈ کوارٹر ہسپتالاں وچ بورڈز دے قیام دے علاوہ سارے ضلعیاں وچ معذور بندیاں دے مسائل دے حل لئی ڈپٹی کمشنرز دی سربراہی وچ خصوصی کمیٹیاں دا قیام عمل وچ لیایا گیا اے۔ ایسے طرح معذور بندیاں نوں کوٹے دے تحت حکومتی تے پرائیویٹ اداریاں وچ ملازمتاں دے حصول دے علاوہ دیگر متعلقہ امور وچ مکمل رہنمائی لئی محکمہ سوشل ویلفیئر دے ضلع دفاتر وچ سہولت مراکز قائم کیتے گئے نیں۔ 3749 خصوصی بندیاں وچ 3 کروڑ 88 لکھ روپئے نال مالی امداد تے خصوصی آلات دی فراہمی نوں یقینی بنایا گیا اے۔ ڈیرہ غازی خان تے ملتان وچ 16 کروڑ روپئے دی لاگت نال خصوصی بندیاں دے مرکز نشیمن دے قیام دی منظوری دے دتی گئی اے۔ 200 نابینا بندیاں دی ڈیلی ویجز اُتے خصوصی بھرتی عمل وچ لیائی گئی اے۔ 352 نابینا بندیاں نوں مختلف محکمہ جات وچ ریگولر کیتا گیا اے۔ پنجاب بیت المال کونسل توں 3567 خصوصی بندیاں نوں 22 کروڑ 20 لکھ توں ودھ روپئے دی مالی امداد فراہم کیتی جا رہی اے۔
وزیراعلیٰ عثمان بزدار دی ہدایت اُتے ملتان وچ انتظامیہ نے جنرل بس سٹینڈ اُتے احساس بازار، قائم کر دتا اے۔ احساس بازار وچ سردی دے پیش نظر غریب بندیاں نوں گرم کپڑے، جرسیاں، سوئٹر، جیکٹاں تے جُتے دی فراہمی دا باقاعدہ آغاز کر دتا گیا اے۔ احساس بازار وچ مستحق بندیاں دی سہولت لئی میڈیکل کیمپ وی لایا گیا اے۔ وزیراعلیٰ عثمان بزدار نے احساس بازار دے قیام اُتے انتظامیہ دی کاوشاں دی تعریف کیتی۔ وزیراعلیٰ عثمان بزدار نے احساس بازار جہے فلاحی اقدام دا دائرہ کار دیگر شہراں وچ وی ودھان دی ہدایت کردے ہوئے کہیا کہ احساس بازار دا قیام مستحق بندیاں دی مدد لئی احسن اقدام اے۔ غریب بندیاں نوں ریلیف دین لئی احساس بازار دا قیام بہترین کاوش اے۔
بزدار حکومت دا اک ہور انسان دوست اقدام کہ احساس بازار دے بعد دیوار احساس، قائم کر دتی گئی اے۔ مستحق مرد و خواتین تے بالاں نوں دیوار احساس توں گرم کپڑے حاصل کرن دی سہولت فراہم کیتی گئی اے۔ وزیراعلیٰ عثمان بزدار نے کہیا کہ احساس بازار دے بعد دیوار احساس دا قیام اک نیک کم اے۔ دیوار احساس، عام بندے دے احساس دا ناں اے۔ سول سوسائٹی تے مخیر حضرات کار خیر وچ ودھ چڑھ کے حصہ لین تے انج چراغ نال چراغ بالن دا سلسلہ جاری رکھنا ہوئے گا۔