جامعہ گجرات تے کرپٹ عناصر

گجرات یونیورسٹی چوہدری پرویز الٰہی تے چوہدری وجاہت حسین دا اک انج دا منصوبہ اے جس نے گجرات دے عام لوکاں لئی اعلیٰ تعلیم دے موقعے پیدا کیتے نیں،پر جس جامعہ وچ شیخ عبدالرشید جہے ناسور تعلیم دین گے اوتھے ڈگریاں تے مل سکدیاں نیں پر کردار سازی نہیں ہو سکدی

تحریر حمیداللہ بھٹی

استاد دا ناں نہایت احترام دے قابل اے کیوں جے معاشرے نوں سنوارن تے چنگے اوصاف پیدا کرن وچ اساتذہ دا کردار بہت اہم ہوندا اے جتھے استاد دی عزت و تکریم نہ ہوئے اوہ قوماں زوال دا شکار ہو جاندیاں نیں زوال دی وجہ ایہہ وے کہ معلم دی دتی چنگی تعلیم تے کردار سازی ای نویں نسل نوں بلندی وَل لے جاندی اے پر ہن مادیت پرستی دا زمانہ اے لوک دولت یا عزت وچ انتخاب کردے ہوئے دولت نوں ترجیح دیندے نیں۔ استاد معلومات دین دے نال جے کردار سازی دے فریضے توں چشم پوشی کرے تے معاشرہ انحطاط دا شکار ہو جاندا اے پر جس استاد دا اپنا کردار شرمناک ہوئے اوہ طالب علماں نوں اچھائی دی تلقین نہیں کر سکدا جیہڑا آپ بدعنوانی، اخلاقی گراوٹ تے دھوکہ دہی وچ ملوث ہوئے اوہ دیانتداری، اخلاق تے ایمانداری دا درس نہیں دے سکدا۔ استاد دے علم و کردار دا طالب علم بوہت اثر لیندے نیں جامعہ گجرات وچ شیخ عبدالرشید نوں وی عزت تے دولت وچوں کسے اک دے انتخاب دا موقع ملیا تے اوہناں نے عزت دی ملازمت دے دوران مادیت پرستی دا شکار ہو کے عزت اُتے دولت نوں ترجیح دتی حالانکہ عزت نال دولت وی کمائی جا سکدی اے پر ایس وچ کجھ ویلا لگدا اے پر انتظار دا ایہہ ویلا ہوس زر دے شکار لوکاں نوں ناپسند اے بدعنوانی دے ذریعے کمائی دولت نال عزت نہیں مل سکدی پتہ نہیں شیخ عبدالرشید دے سازشی تے گھنائونے کردار نال کنہے طالب علم متاثر ہو کے زمانے وچ چھینا جھپٹی وچ مصروف تے معاشرے وچ بدعنوانی دے فروغ وچ اہم کردار ادا کردے پھر رہے ہون گے جامعات نوں اساتذہ دا انتخاب کردے ویلے تعلیم دے نال کردار نوں وی پیش نظر رکھنا چاہیدا اے تاکہ طالب علم جدوں حصولِ علم دے بعد عملی زندگی ول آن تے اساتذہ دے پاکیزہ کردار توں متاثر ہو کے معاشرے وچ تعمیری تے مثبت کردار ادا کرن۔
گجرات یونیورسٹی چوہدری پرویز الٰہی تے چوہدری وجاہت حسین دا اک انج دا منصوبہ اے جس نے گجرات دے عام لوکاں لئی اعلیٰ تعلیم دے موقعے پیدا کیتے نیں ایس توں پہلاں چنگے کھاندے پیندے لوک وی اپنی دھیاں نوں لہور یا راولپنڈی حصول تعلیم لئی روانہ کردے ہوئے کئی قسم دے وسوسیاں دا شکار رہندے ماں باپ نوں ہر ویلے ایہو دھڑکا لگیا رہندا کہ اللہ کرے کوئی بدنامی دا داغ نہ لگ جائے ہن صبح بھیناں دھیاں گھر توں پڑھن جاندیاں تے شام نوں والدین دے کول ہوندیاں نیں ایس لئی منڈیاں دے نال گجرات وچ کُڑیاں دی بھاری تعداد وی اعلیٰ تعلیم حاصل کر رہی اے ایسے وجہ نال گجرات دے لوک چوہدری پرویز لٰہی تے چوہدری وجاہت حسین لئی دل دی گہرائیاں نال دعا گو نیں پر جس جامعہ وچ شیخ عبدالرشید جہے ناسور تعلیم دین گے اوتھے ڈگریاں تے مل سکدیاں نیں پر کردار سازی نہیں ہو سکدی، نااہل، نکمے تے جعلسازاں دی صحبت توں فارغ التحصیل ہون والے منڈے تے کُڑیاں چنگی روایات قائم کرن نہیں تے دولت دی ہوس دا سبق لے کے ای میدان وچ اترن گے۔
جامعہ گجرات وچ ایڈیشنل رجسٹرار دی آسامی لئی دو امیدواران شیخ عبدالرشید تے حاجی نعیم نے درخواست جمع کرائی مزے دی گل ایہہ کہ دونویں امیدواراں نے نامکمل درخواستاں جمع کرائیاں ایس توں پہلاں زمیندارکالج توں شیخ عبدالرشید نوں میڈیا معاملات ویکھن لئی جامعہ لیایا گیا سی تے مستقل کرن دی خاطر ای ایڈیشنل رجسٹرار دی آسامی تخلیق کیتی گئی چاہیدا تے ایہہ سی کہ نامکمل درخواستاں ہون دی وجہ نال شیخ عبدالرشید تے حاجی نعیم دونواں نوں ای انٹرویو لئی نہ بلایا جاندا پر شیخ نے جانے کیہ جادو چلایا کہ نامکمل درخواست تے نااہل ہون دے باوجود نہ صرف ایہناں نوں انٹرویو لئی بلا لیا گیا بلکہ تعیناتی دے آرڈر وی کر دتے گئے جس دے بعد ہوسِ زر دا مظاہرہ کردے ہوئے شیخ عبدالرشید نے جس جامعہ وچ تعیناتی ہوئی ایہنوں ای نقصان اپڑانا تے مالی طور تے کمزور کرنا شروع کر دتا تے نہ صرف جامعہ دے خرچے اُتے لوکاں دی کتاباں دی پرنٹنگ کران لگے بلکہ جامعہ دے ناں اُتے لوکاں توں پیسے بٹورن دا دھندہ وی شروع کر دتا جے کسے وی وی آئی پی نے جامعہ دا دورہ کیتا تے شیخ عبدالرشید ایتھے وی دامن پھیلا کے پیسے منگنا شروع کر دیندے،گل ایتھے تیکر ای محدود نہیں رہی بلکہ جامعہ دے ہال وغیرہ وی کرائے اُتے چکنے شروع کر دتے انج دے ای غبن تے ہیرا پھیریاں دے کیس دی اینٹی کرپشن وچ انکوائری جاری اے جس دے دوران کرپشن دے واضح شواہد مل چکے نیں پر عیار تے مکار شیخ عبدالرشید ایتھے وی کیس دا فیصلہ ہون وچ رکاوٹ اے ایس دی وجہ کیہ اے سمجھ نہیں آندا کہ شواہد دے باوجود کیوں اک ادارہ فیصلہ کن کارروائی دی بجائے التوا وچ پان اُتے مجبور اے؟
شیخ عبدالرشید جدوں جامعہ توں کڈے گئے تے اوہ گریڈ 20 دی اہم پوسٹ ڈائریکٹر میڈیا دے طور تے کم کر رہے سن ایتھے دسن والی سب توں قابلِ ذکر گل ایہہ وے کہ اوہناں نے جامعہ گجرات وچ دتی جان والی درخواست وچ لکھیا کہ اوہ زمیندارہ کالج وچ بطور سپوکس پرسن کم کردے رہے نیں تے جدوں جامع نے کاغذات دی تصدیق لئی زمیندارہ کالج نال رابطہ کیتا تے کالج ولوں حیران کُن جواب ملیا کہ سارے کاغذات بوگس نیں کیوں جے کالج وچ ماس کمیونیکیشن دا ڈیپارٹمنٹ ای نہیں تے تجربے دا سرٹیفکیٹ کیونکر جاری کیتا جا سکدا اے۔ ایس توں علاوہ سپوکس پرسن دی کالج وچ کوئی آسامی وی نہیں ایس لئی گھلے گئے کاغذات دی تصدیق کرن توں قاصر نیں۔
عیار تے مکار شیخ عبدالرشید نے کینیڈا توں جنگ اخبار نال جڑے جس بندے دے نال کم کرن دا حوالا دیندے ہوئے تجربے دا سرٹیفکیٹ پیش کیتا ایس نے وی جامعہ گجرات نوں لکھ کے دے دتا کہ شیخ عبدالرشید نامی بندے دا میرے نال کم کرنا تے درکنار میں ایس بندے نوں جان دا تیکر نہیں اوہناں نے ایہہ وی لکھیا کہ میں کسے نوں تجربے دا سرٹیفکیٹ جاری نہیں کیتا تاں میرے ولوں جاری کیتا گیا تجربے دا سرٹیفکیٹ جعلی، بوگس، تے خود ساختہ تصور کیتا جائے پر جانے شیخ عبدالرشید دے کول انج دی کیہ جادو دی چھڑی اے کہ ہجے تیکر جامعہ گجرات دی انتظامیہ برخواستگی دے احکامات جاری کرن دا حوصلہ نہیں کر سکی اینی نرمی، رحمدلی تے طرفداری اودوں ہو سکدی اے جدوں غبن، کرپشن تے فراڈ وچ سارے شریک تے ہن پول کھُلن دے ڈر توں ای چپ رہن اُتے مجبور ہون جامعہ گجرات دے موجودہ وائس چانسلر پروفیسر شبیر عتیق ،پرووائس چانسلر ڈاکٹر فہیم اور ڈین ڈاکٹر مشاہد کی شہرت دیانتدار تے فرض شناس جہی اے پر نیک نام لوک جامعہ توں ناسور نوں کڈن دی بجائے پس و پیش نال کم لے رہے نیں سمجھ توں بالا تر اے ۔ہونا تے ایہہ چاہیدا اے کہ اک نااہل بندے نوں اہم آسامی اُتے تعینات کرن دی تحقیقات کیتیاں جان تے جامعہ توں وصول کیتا جان والے ماہانہ لکھاں روپئے واپس لے کے جامعہ وچ جمع کرائے جاندے تے طلبا دی فلاح و بہبود اُتے خرچ کیتے جاندے پر ہر پاسے خاموشی اے جویں سب نوں کسے نادیدہ قوت دا ڈر ہوئے ۔ وصول کیتی گئی رقم واپس لینا تے درکنار ہجے تیکر جامعہ دی انتظامیہ بدنامی دے چلدے پھردے اشتہار نوں ادارے توں کڈن دی ہمت نہیں کر سکی حالانکہ جامعہ گجرات وچ بدعنوانی دے راج دا خاتمہ کرن نال نہ صرف ادارے دی نیک نامی وچ وادھا ہوئے گا بلکہ آئندہ انج دے کسے جعلساز نوں عیاری تے مکاری دے بل بوتے اُتے کرپشن کرن دی جرات نہیں ہوئے گی۔