کھان پین دے لالے
حناپرویزبٹ
پچھلے ساڑھے تن ورھیاں توں مسلط کدہ دے مکیناں دیاں لمیاں زباناں توں 20کروڑ 73لکھ پنج ہزار چھ سو اجہے چھپر پھاڑ جھوٹ نکلے نیں کہ سفید جھوٹ وی شرما کے نکرے لگ گیا اے۔ اک جعلی بیان دی سیاہی اجے خشک نہیں ہوندی کہ دوجے عظیم المرتبت جھوٹے بیان دے بعد ضد کردے نیں کہ ایہو صحیفہ اے ایہنوں سچ منو‘ اوہ ویلا دور نہیں جدوں ایہناں نوں جبل فراڈ دا ایوارڈ دتا جاوے گا۔ لوک مصیبتاں دے بھنور وچ اینے بری طرح پھس چکے نیں کہ دو ویلے ڈھڈ بھرن لئی ایمان تے عزت دوویں داء تے لانے پے رہے نیں کوئی دن اجیہا نہیں گزردا جدوں بھکھ مٹان لئی حوا دی اولاد عزت توں محروم ہون تے مجبور نہیں ہو رہی یقین کامل اے کہ ایہناں مسلط زادیاں وچ ضمیر ناں دی کوئی شے نہیں اک پاسے دورآشوب وچ توبہ استغفار دی تھاں کرونا فنڈ وچوں 40 ارب روپیے اڑا لئے گئے تے دوجے پاسے ذرائع ابلاغ توں کرپشن دے خلاف بھاشن جاری اے۔ غضب خدا دا مہنگے پٹرول نال لوکاں دے ارمان سڑ کے سواہ ہو گئے پر کہندے نیں کتھے اے مہنگائی‘ ڈالر 71فیصد‘ قرضے 80فیصد‘ آٹا‘ کھاد سو فیصد‘ گھیو 112 فیصد‘ کھنڈ 127فیصد‘ بجلی دا یونٹ 162فیصد‘ سونا 180فیصد ودھ گیا۔ سٹاک مارکیٹ کریش ہو گئی۔ کاروباری حلقیاں دے دِلاں تے چھریاں چل رہیاں نیں پر ایتھے چین دی بانسری وجائی جا رہی اے۔ سفید پوشاں دی اجہی واٹ لائی گئی کہ اوہ پہلے آٹے دی فیر کھنڈ دیاں لائناں وچ خوار ہوئے‘ ایہدے بعد پٹرول دے حصول لئی در بدر ہوئے اوہناں تے ہن بجلی بمب چل چکیا اے۔ ظالماں نے تے کساناں نوں وی نہیں چھڈیا ڈیزل دیاں قیمتاں اسمان تے چڑھا کے کھاد ای اوہناں دی پہنچ توں دور کر دتی اُتوں جہلم توں لے کے پنڈی تک دے سارے بھونپویہ راگ الاپدے پائے جا رہے نیں کہ ایہ سب نوازشریف دا کیتا دھریا اے۔
دو کروڑ لوکاں دے کاروبار بند تے کئی کروڑ بے بیروزگار کرن والے گانے چلوا رہے نیں کہ اچھے دن آئے ہیں‘ فرماندے نیں کہ پاکستان توں سستا کوئی ملک نہیں ذرا کسے دن بناں سکیورٹی حصار باہر نکل کے تے ویکھو لوکاں دا کیہ حال کردے نیں تہاڈا تے تہاڈی مقبولیت دا۔ بیگانے تخت تے بہہ کے پہلے دن توں اک ای گردان دا ریکارڈ وج رہیا اے‘ میں ایہ میں اوہ‘ میں فلاں فلاں کردا رہیا واں‘ میرے توں وڈا ماہر معیشت کوئی نہیں‘ میرے توں ودھ کوئی ہار نوں نہیں سمجھدا‘ فلاں چیز نوں تے میں انج ٹھیک کراں گا کہ تسیں یاد رکھو گے۔ میں میں دی گردان توں تنگ لوکاں دیاں چیکاں اسمان تک اپڑنا شروع ہو گئیاں نیں اوہ دن زیادہ دور نہیں جدوں مقامی تے عام انتخابات وچ سارے جھوٹے وعدے‘ ساریاں وعدہ خلافیاں‘ سارے لارے سود سنے جھوٹیاں دے منہ تے مار دتے جان گے۔ باراں روپیے دی روٹی تے 20 روپیے دا نان خریدن والے لوک ہن چھٹکارے دے نال نال بددعاواں دین تے آ گئے نیں۔٭٭
