آئی ایم ایف نال سمجھوتا

جمیل احمد پال

آئی ایم ایف نال اِک ارب ڈالر دے سمجھوتے خاطر پاکستانی لوکائی دیاں چیکاں اک واری فیر کڈھوادِتیاں گئیاں نیں۔ ایہدے پاروں 350 ارب ٹیکس دی چھٹ واپس لئی جاوے گی جد کہ پٹرولیم لیوی 4 رپئے ہر مہینے ودھائی جایا کرے گی تے ایہنوں 30 رپئے تیکر لے جایا جاوے گا۔ ایہدے ہور تاریک نکتے مطابق ترقیاتی بجٹ وچ 200 ارب دی کٹوتی ہووے گی سبھے وستاں اتے 17 فیصد جی ٹی ایس لیا جاوے گا کرونا دی آڈٹ رپورٹ دینی ہووے گی تے بجلی مہنگی کرنی پوے گی۔ ایس توں وکھ ساڈھے تن سو ارب رپئے دے نویں ٹیکساں اتے آدھارت منی بجٹ وی آوے گا۔ 200 یونٹ بجلی والی رعایت اتے وی نظر ثانی کر دتی گئی اے تے ہن 200 یونٹ والا اوہنوں گنیا جاوے گا جہڑا چھے مہینے ایس حد دے اندر رہوے گا۔
موئی مکی معیشت تے لگ بھگ دیوالیا ہوئے دیس وچ لوکاں اتے روز نواں بم ڈگایا جا رہیا اے۔ ریاست ماں ورگی دا نعرا ہن ریاست مترئی ماں ورگی وچ تبدیل ہو چکیا اے۔ مترئی ماں تے شاید فیر وی دنیا داری پاروں کجھ نہ کجھ بھرم رکھ لیندی اے پر ریاست دے وڈیار تے انتہائی بے شرمی نال دسدے نیں کہ اجے وی فلانے فلانے دیس نالوں پاکستان وچ قیمتاں گھٹ نیں۔
پٹرول اتے لیوی ہر مہینے ودھان دے نال اٹھ مہینے دے اندر اندردیس اندر پٹرول دا مل پونے دو سو رپئے لیٹر تیکر اپڑ جاوے گا۔ ایہدے نال مہنگائی دا جہڑا سونامی ہر مہینے آیا کرے گا اوہدے پاروں دیس اندر سبھے وستاں دے مل یورپ تے امریکا دے معیار تیکر اپڑ جاون گے تے حکومتی وڈیاراں نوں ایہ آکھن دی لوڑ نہیں رہوے گی کہ اجے وی چیزاں دے مل یورپ نالوں گھٹ نیں۔ البتا یورپ والی مزدوری تے اجرتاں ایتھے آون وچ اجے اک سو سال وی لگ سکدا اے۔
یورپ وچ بے روزگاری الانس توں لے کے حکومت ولوں ہر معاملے وچ راکھی تحفظ تے سبسڈی دے جہڑے قانون ملدے نیں مدینہ دی اجوکی ریاست وچ ایہناں بارے سوچنا وی گناہ اے۔ حکومت مصنوعی طریقیاں نال معیشت نوں بہتر بناون دے جتن کر رہی اے پر حقیقی طریقے ورتن دا سوچدی وی نہیں۔ بجٹ نوں متوازن رکھن لئی عیشی وستاں اتے پابندی لان دی بجائے مہنگائی ودھا کے لوکاں دے ساہ روکن دے جتن کر رہی اے۔ پاکستان اندر فرلانگ لمیاں کاراں توں لے کے سور دے گوشت تیکر کتے دی کھادھ توں لے کے نایاب موتیاں تیکر ہر شے کھلے عام منگوائی جا رہی اے جہدے پاروں بجٹ وچ درآمد برآمد دا تناسب خطرناک حد تیکر خراب اے۔ پن بجلی دی بجائے مہنگی بجلی بناون تے مہنگی گیس منگوان دِیاں حماقتاں عام نیں۔ ایہناں سبھناں عقل مندیاں دی سزا لوکائی بھگت رہی اے۔٭