نیا پاکستان صحت کارڈ،بزدار حکومت دا انقلابی قدم

صوبے وچ کوئی بندا علاج معالجے توں محروم نہیں ہوئے گا تن کروڑ خانداناں لئی جدید سہولتاں دستیاب

جاوید یونس

ملک دے سب توں وڈے صوبہ پنجاب وچ صحت دے مسائل ہمیشہ توں گھمبیر رہے نیں۔ بدقسمتی نال ماضی وچ مختلف حکومتاں دے ادوار وچ صحت دے مسائل نوں ترجیحی بنیاداں اُتے حل کرن لئی ٹھوس منصوبہ بندی نہ ہو سکی۔ ڈنگ ٹپائو پالیسیاں دی باعث عوام نوں درپیش مسائل وچ مسلسل وادھا ہویا۔ آبادی دے مسلسل ودھن نال صورت حال ہور وی خراب ہوئی چنانچہ جدوں تحریک انصاف نوں حکومت ملی تے دوجے شعبیاں وانگوں صحت دا شعبہ وی بُری طرح درہم برہم ہو چکیا سی۔ وزیراعظم عمران خان دے وژن دے تحت وزیراعلیٰ عثمان بزدار نے شعبہ صحت نوں ہنگامی بنیاداں اُتے متحرک کرن تے شہراں توں پنڈاں تیکر تے ترقی یافتہ مراکز نال جنوبی پنجاب سنے پنجاب دے دور دراز دے علاقیاں تیکر عوام نوں صحت دی زیادہ توں زیادہ سہولتاں اپڑان دا چیلنج قبول کیتا۔پچھلے تن ورھیاں دے دوران صوبہ پنجاب وچ صحت دے شعبہ وچ جس جانفشانی نال کم کیتا گیا ایس دے نتائج وی سب دے ساہمنے نیں۔ نیشنل ہیلتھ سروسز دے تحت سرکاری ہسپتالاں وچ بوہت ساری بیماریاں دے علاج نوں ممکن بنان اُتے خاص توجہ دتی گئی چنانچہ ہیپاٹائٹس،ایڈز،ٹی بی،ملیریا،انفلوئنزا،انفیکشن کنٹرول،ایمونائزیشن دی توسیع،تولیدی صحت،زچہ بچہ،چائلڈہیلتھ ،پولیو،غذائیت پروگرام،ڈینگی دے حوالے نال شعبہ صحت دی ٹیماں ڈاکٹر،نرساں تے معاون طبی عملے نوں ہر سطح اُتے کارکردگی بہتر بنان دے اہداف دتے گئے۔ ایہناں شعبیاں دی کارکردگی نوں بہتر بنان دے علاوہ صحت دے میدان وچ کسے نویں امکانی خطرے دا ساہمنا کرنا وی اہم سی۔ وزیراعلیٰ پنجاب سردار عثمان بزدار دی ہدایات اُتے محکمہ صحت نے عوام دی صحت دے ضامن سارے کرداراں نوں ودھ توں ودھ فعال بنان دا فیصلہ کیتا۔ لوکاں دی ضرورت نوں ساہمنے رکھ کے صحت دے بجٹ وچ مسلسل وادھا کیتا گیا ۔ نویں ہسپتالاں دی تعمیر نوں ترجیح وچ سر فہرست رکھیا گیا۔
پوری دنیا دی طرح جدوں پاکستان تے صوبہ پنجاب وچ کرونا دی وبا نے سر چُکیا تے وزیراعلیٰ عثمان بزدار نے کامیاب حکمت عملی توں ایس وبا نال عوام نوں بچان دے اقدامات کیتے۔ ہسپتالاں وچ خصوصی انتظامات دے نال نال ایکسپو سنٹر لہور تے دوجے مقامات اُتے ساری سہولتاں دے نال نال خصوصی سنٹرز بنوان تے مریضاں دے علاج دے نال نال لاک ڈائون دی منصوبہ بندی دے حوالے نال وفاقی حکومت دی پالیسی اُتے سو فیصد عمل کر کے وکھایا جس نال پہلی، دوجی، تیجی تے چوتھی لہر دے دوران صوبہ پنجاب دے عوام دی جان دا تحفظ کیتا گیا تے معمولات زندگی وی زیادہ متاثر نہیں کیتے گئے۔ ایسے طرح کرونا ویکسی نیشن دے حوالے نال وی پنجاب صوبہ پاکستان دی نیک نامی دا باعث بنیا۔
کرونا دے بعد حال ای وچ ڈینگی نے سر چکیا تے اک وار فیر وزیراعلیٰ پنجاب سردار عثمان بزدار دی ٹیم دی کارکردگی پاکستان بھر وچ سب توں زیادہ متحرک نظر آئی۔ لہور سنے جنہاں علاقیاں توں ڈینگی دے مریض ساہمنے آئے ایسے علاقے نوں خاص طور تے مچھراں توں پاک کرن دی جدوجہد کیتی گئی۔ ایہنوں بدقسمتی کہنا چاہیدا اے کہ افواہ سازی تے سیاسی پوائنٹ سکورنگ لئی ہر دور وچ اک طبقہ عوام لئی مزید مشکلات پیدا کردا رہندا اے۔ ڈینگی لئی دوائیاں دے حوالے نال ایسے پس منظر وچ افواہ سازی نال کم لیا گیا پر شاید عوام نوں ہن سمجھ آن لگی اے کہ کون کم کر رہیا اے تے کون سیاست کر رہیا اے۔
علاج معالجہ دی بنیادی سہولتاں دی فراہمی حکومت دی ذمہ داری اے۔ بدقسمتی نال ماضی وچ حکومتاں اپنی ایہہ ذمہ داری احسن طریقے نال پوری نہیں کر سکیاں۔ علاج معالجہ دی جدید سہولت صرف اشرافیہ دا حق رہ گیا سی۔ کسے وی مہلک مرض دا علاج عام بندے دی دسترس توں باہر ہوندا جا رہیا اے۔ مہنگائی دے ایس دور وچ علاج دی گل تے دور بندے لئی دو ویلے دی روٹی مشکل ہوندی جا رہی اے۔ جدوں کسے خاندان دا کوئی بندا کینسر، امراض قلب، گردیاں دی بیماری وتھیلیسیمیا جہی موذی مرض وچ مبتلا ہو جاندا اے تے پورے خاندان دی زندگی متاثر ہوندی اے تے علاج معالجے اُتے اینے اخراجات آ جاندے نیں کہ گھر وچ فاقیاں دی نوبت آ جاندی اے۔ وزیراعظم عمران خان دے ویژن اُتے عمل کردے ہوئے وزیراعلیٰ پنجاب سردار عثمان بزدار نے عام بندے دی تکلیف تے پریشانیاں نوں مدنظر رکھدے ہوئے علاج معالجہ دی جدید تے بین الاقوامی معیار دی سہولتاں دی فراہمی لئی اک جامع تے انقلابی کم کیتا اے۔ وزیراعلیٰ پنجاب سردار عثمان بزدار نے ’’نیا پاکستان صحت کارڈ‘‘پروگرام دا آغاز کیتا اے۔ ہن عام بندا پرائیویٹ ہسپتالاں وچ وی اپنی بیماری دا علاج کرا سکے گا۔ ایس سکیم دا جنوری توں 2022 باضابطہ اجراء ہوئے گا۔ اگلے مہینے توں نیا پاکستان صحت کارڈ دا اجراء پہلے مرحلے وچ لہور ڈویژن توں کیتا جائے گا تے لہور ڈویژن دے بعد پنجاب دے دیگر 6 ڈویژن وچ کارڈ دا اجراء کیتا جائے گا۔ 31 مارچ تیکر پنجاب دے ہر خاندان دے کول نیا پاکستان صحت کارڈ ہوئے گا۔ پنجاب دے مستقل رہائشی سارے خانداناں نوں 10 لکھ روپئے تک دا کسے وی منتخب سرکاری و نجی ہسپتال توں مفت علاج کروا سکن گے۔ نیا پاکستان صحت کارڈ 440 ارب روپئے دا تاریخ ساز فلاحی منصوبہ اے جس نال پنجاب دے 3 کروڑ خاندان تے ساڑھے 11 کروڑ عوام ایس پروگرام توں فائدہ مند ہون گے۔ بزدار حکومت دا ایہہ سب توں وڈا انقلابی قدم اے جس دی جنہی ستائش کیتی جائے گھٹ اے۔ ساہیوال تے ڈی جی خان ڈویژن وچ ایس بے مثل پروگرام دا آغاز ہو چکیا اے ایس ضمن وچ حکومت پنجاب نے سٹیٹ لائف انشورنس نال معاہدہ کیتا اے۔
نیا پاکستان صحت کارڈ نال مکمل طور تے مستفید ہون لئی 5 ضروری اقدامات کرنے ہون گے۔ نادرا دے ریکارڈ دے مطابق اک شادی شدہ مرد ایس دی بیوی تے ایس دے غیر شادی شدہ بچے اک خاندان نیں۔ بیوہ دی صورت وچ ایہنوں اپنے کوائف دی نادرا ریکارڈ وچ تجدید کروانا لازمی اے۔ شہریاں نوں چاہیدا اے کہ اوہ اپنا تے اپنی زوجہ دی ازدواجی حیثیت دا اندراج نادرا توں کروان تے 18 سال توں گھٹ عمر دے بالاں دا ’’ب‘‘فارم تے 18 سال توں ودھ عمر دے بندے اپنا شناختی کارڈ بنوان۔ نیا پاکستان صحت کارڈ دے ذریعے امراض قلب، ذیابیطس متعلق پیچیدگیاں جنہاں وچ ہسپتال داخل ہونا ضروری ہو ئے، حادثاتی چوٹاں، اعصابی نظام دا علاج، گردیاں دی بیماری دا علاج تے پیوند کاری، سرطان دے امراض، داتمی بیماریاں دا علاج جہے یرقان و کالا یرقان،تھیلسیمیا، حمل وزچگی تے دیگر امراض دا علاج ہوئے گا۔ علاج دے بارے وچ مزید رہنمائی تے اپنے ضلعیاں دے منتخب سرکاری و پرائیویٹ ہسپتالاں دے بارے وچ معلومات لئی ٹول فری نمبر0800-09009اُتے رابطہ کیتا جا سکدا اے۔
وزیراعظم پاکستان نے گورنر ہائوس وچ منعقدہ تقریب وچ نیا پاکستان صحت کارڈ دین دا افتتاح کیتا۔ وزیراعظم پاکستان نے تقریب نال خطاب کردے ہوئے صحت کارڈ دے اجراء اُتے وزیراعلیٰ پنجاب سردار عثمان بزدار تے صوبائی وزیر صحت ڈاکٹر یاسمین راشد نوں مبارکباد دتی۔ اوہناں نے کہیا کہ آئندہ سال مارچ تیکر پنجاب وچ ہر خاندان نوں صحت کارڈ میسر ہوئے گا جس نال سالانہ 10 لکھ روپئے تیکر علاج کروایا جا سکے گا۔ وزیراعظم نے کہیا کہ غریب گھرانے وچ جدوں کوئی بیمار ہوندا اے تے ایس اُتے کیہ گزردی اے تے جدوں کوئی اپنے پیارے دا علاج نہیں کروا سکدا تے ایس خاندان اُتے بے بسی دا عالم کیہ ہوندا اے ایس دا مینوں بخوبی ادراک اے۔ وزیراعظم نے کہیا کہ ایہہ ایس ویلا ہویا جدوں میری والدہ کینسر جہی بیماری وچ مبتلا ہوئیاں تے وسائل ہون دے باوجود علاج نہ ہون اُتے بے بس سن۔ ایس صورتحال دے بعد شوکت خانم ہسپتال بنان دا سوچیا۔ اوہناں نے کہیا فیر میں سوچیا کہ جے اللہ تعالیٰ نے موقع دتا تے غریب لوکاں نوں علاج معالجہ دے سہولت فراہم کرن لئی ہیلتھ انشورنش لیائی جائے گی۔ وزیراعظم نے کہیا کہ اک ہیلتھ سسٹم ہوئے گا جس نال پنڈاں وچ بہتری آئے گی تے پرائیویٹ ہسپتال بنے گا جتھے غریب اپنا علاج کروا سکے گا۔
وزیراعلیٰ پنجاب سردار عثمان بزدار نے کہیا اے کہ عام بندے دی فلاح و بہبود نوں یقینی بنان لئی تعلیم، صحت، سماجی مساوات تے انصاف دی سہولتاں دی منصفانہ فراہمی تحریک انصاف دے منشور وچ اولین اے۔ آئین پاکستان وچ وی ایہناں سہولتاں دی یکساں فراہمی دا کہیا گیا اے۔ اسیں ’’نیا پاکستان سب کے لئے‘‘دے وعدے نوں نبھان قدم اٹھا رہے نیں۔ کورونا وباء دے بعد بے شمار معاشی چیلنجز دا ساہمنا کرنا پیا۔ ڈینگی تے ٹڈی دل دی آزمائش وی آئی۔ اللہ تعالیٰ دے فضل و کرم تے وزیراعظم عمران خان دی ویٹرنری قیادت وچ اسیں ایہناں آزمائشاں وچ سرخرو ہو کے نکلے۔ اوہناں نے کہیا کہ صحت دی سہولتاں نوں بہتر بنان اُتے ساڈی حکومت نے سب توں زیادہ توجہ دتی اے۔ ماضی وچ شعبہ صحت نوں نظر انداز کیتا گیا۔ سابق حکومت وچ شعبہ صحت دا بجٹ 169 ارب روپئے سی۔ ساڈی حکومت نے صحت دے بجٹ نوں ودھا کے 399 ارب روپئے کر دتا اے۔ ’’نیا پاکستان صحت کارڈ‘‘ پنجاب دے ہر شہری نوں ملے گا۔ ایس کارڈ دے ذریعے ہر خاندان نوں 10 لکھ روپئے سالانہ مففت علاج دی سہولت میسر ہوئے گی۔ جنوری توں ایس کارڈ نوں پورے پنجاب وچ لانچ کر دتا جائے گا۔ ڈیرہ غازی خان ڈویژن تے ساہیوال ڈویژن وچ ایہہ کارڈ پہلے ای دتا جا چکیا اے۔ دیگر 7 ڈویژن وچ ’’نیا پاکستان صحت کارڈ‘‘جنوری توں دتا جائے گا۔ پنجاب دے 3 کروڑ خاندان تے ساڑھے 11 کروڑ عوام ایس کارڈ توں فائدہ مند ہون گے۔ پنجاب دی تاریخ وچ شعبہ صحت دی بہتری لئی پہلی وار وڈی رقم مختص کیتی گئی اے۔ پنجاب دی تاریخ وچ پہلی وار لہور سنے پسماندہ اضلاع وچ 8 مدر اینڈ چائلڈ ہسپتال بن رہے نیں۔ ملتان نشتر ٹو، ڈی جی خان وچ کارڈیالوجی انسٹیٹیوٹ، رحیم یار خان وچ شیخ زید ہسپتال ٹو تے راولپنڈی وچ انسٹیٹیوٹ آف یورالوجی بن رہے نیں۔ راولپنڈی تے بہاولپور وچ ڈینٹل کالج بنائے جا رہے نیں۔لہور وچ فیروز پور روڈ اُتے اک ہزار بیڈ دا نواں ہسپتال دے قیام دا منصوبہ بنایا اے۔ لہور وچ 3 ہسپتالاں دی 4 سو بیڈز دی نویں ایمرجنسیز بنے گی۔ اسیں 3 ورہے وچ 25 ہسپتال بنائے نیں۔ 158 مراکز صحت نوں اپ گریڈ کیتا گیا اے۔ چنیوٹ، حافظ آباد تے چکوال وچ نویں ڈسٹرکٹ ہسپتالاں دے نال نال منڈی بہائوالدین دے ڈی ایچ کیو ہسپتال دے نامکمل منصوبے نوں تحریک انصاف نے پایہ تکمیل نوں اپڑایا۔ 3 سال وچ 78 نویں صحت دی سہولتاں قائم کیتیاں۔ ڈسٹرکٹ ڈویلپمنٹ پیکیج وچ ہیلتھ دے 91 نویں ترقیاتی منصوبے شامل کیتے گئے نیں۔ مزدور تے محنت کش طبقے نوں علاج معالجے دی بہترین سہولتاں فراہم کرن لئی نویں ہسپتال بنان اُتے وی توجہ دتی گئی۔ PESSI دے آغاز توں 52 سال یعنی 2018 تیکر پنجاب وچ 14 سوشل سکیورٹی ہسپتال سن۔ اسیں صرف تن سال وچ 9 نویں ہسپتال بنائے۔ ہن صوبے وچ 23 سوشل سکیورٹی ہسپتال نیں جتھے ہر رجسٹرڈ مزدور تے محنت کش نوں مفت علاج معالجے دی بہترین سہولتاں میسر نیں۔ ’’نیا پاکستان سب کے لئے‘‘وزیر اعظم عمران خان دا ریاست مدینہ دے قیام ولوں اک احسن اقدام اے۔ انشاء اللہ وزیراعظم عمران خان دے ویژن نوں عملی جامہ پہنائواں گے۔ صوبائی وزیر صحت یاسمین راشد نے تقریب نال خطاب کردے ہوئے کہیا کہ سرکاری شعبے دے علاوہ پرائیویٹ سیکٹر وی ایس کارخیر وچ ودھ چڑھ کے حصہ لے رہیا اے تے شہراں دے علاوہ پنڈاں وچ ہسپتال تعمیر ہو رہے نیں تاکہ اوہ وی حکومت دا ہتھ بٹا سکن۔ ایہناں دا کہنا سی کہ نہ صرف پاکستان بلکہ دیگر وڈے وڈے ملکاں وچ وی صحت کارڈ جہی سہولت نہیں ۔ اوہناں نے کہیا کہ ایہہ پہلا قطرہ اے جیہڑا دریا بنے گا۔ انشاء اللہ تحریک انصاف دی حکومت لوکاں نوں غربت دی سطح نال اُتے لے کے آئے گی۔ صوبائی وزیر نے کہیا کہ صحت کارڈ دے اجراء دے سلسلے وچ وزیراعلیٰ پنجاب سردار عثمان بزدار نے ہر مرحلہ اُتے نہ صرف رہنمائی فرمائی اے بلکہ ہر ممکن تعاون کیتا اے۔ صحت عامہ دی سہولت دے کے اسیں سرخرو ہو گئے آں تے تحریک انصاف نے جیہڑے وعدے کیتے سن ایس دی تکمیل ہو رہی اے۔ انشاء اللہ لہور ڈویژن توں آغاز کیتا جا رہیا اے تے ایس دے بعد راولپنڈی سنے پنجاب دے سارے خانداناں نوں صحت کارڈ فراہم کر دتے جان گے۔ اوہناں نے کہیا کہ اوہ ویلا دور نہیں جدوں حقیقی معنیاں وچ عام بندا ریلیف محسوس کرے گا۔
نیا پاکستان کارڈ دے ذریعے کسان بلاسود قرضے، بے گھر افراد بلاسود ہوم فنانسنگ تے نوجوان مفت ٹیکنیکل ٹریننگ حاصل کر سکن گے۔ ایس دے علاوہ نکے کاروبار لئی 5 لکھ تیکر قرضے لئے جا سکن گے۔ دالاں، آٹا تے چینی مارکیٹ توں 30 فی صد گھٹ ریٹ اُتے حاصل کرن لئی ایہو کارڈ استعمال ہوئے گا۔ نیا پاکستان صحت کارڈ اوہ فلاحی منصوبہ اے جس دے بارے وچ ماضی دی حکومتاں نے سوچیا تیکر نہیں عام بندا تے ایس دے خاندان نوں ایس کارڈ دے ذریعے علاج معالجہ دی جدید تے معیاری سہولتاں ملن گیاں تے ایہہ صرف اک کارڈ نہیں بلکہ عام بندے دی مشکلات دے احساس تے ایہناں دے حل دا جامع پروگرام اے۔