مولانا ملک محمد اکبر ساقی رحمتہ اللہ علیہ
سفیر امن، داعی اتحاد بین المسلمین تے عظیم سکالر دی چوتھی برسی دے موقعے اُتے اُچیچی اشاعت
صاحبزادہ پرویز اکبر ساقی
سروں سے کھینچ لیا وقت نے وفا کا لحاف
وہ پردے اٹھ گئے جو تعینات رہتے تھے
بچھڑ گیا ہے وہ سنگین موسموں میں کہیں
ہمارے سر پہ سدا جس کے ہاتھ رہتے تھے
مولانا جاوید اکبر ساقی رحمۃ اللہ علیہ 21ستمبر 1970ء نوں جمعیت علمائے پاکستان دے مرکزی رہنما و بانی تحریک وحدت اسلامی پاکستان مولانا ملک محمد اکبر ساقی رحمتہ اللہ علیہ دے ویہڑے وچ پھُل بن کے کھِڑے۔ اتراء آپ دا آبائی پنڈ اے۔ تحصیل قائد آباد ضلع خوشاب آپ نے اپنی ابتدائی تعلیم گورنمنٹ ہائی سکول گنجیال توں حاصل کیتی جیہڑا اوس ویلے مڈل سکول سی۔
میٹرک آپ نے گورنمنٹ ہائر سکینڈری سکول قائد آباد توں حاصل کیتا۔ ایف اے آپ نے لہور توں کیتا۔ دنیاوی تعلیم دے نال نال آپ نے دینی تعلیم نوں وی جاری رکھیا۔ آپ نوں بچپن توں ای تقریر دا شوق سی۔ سکول ٹائم توں تقریری مقابلیاں وچ حصہ لیندے تے ڈویژن و ضلع وچ اول پوزیشن حاصل کردے۔ آپ نے انجمن طلبا اسلام وچ تے دیگر مذہبی تنظیماں وچ ودھ چڑھ کے حصہ لیا۔ والد بزرگوار مولانا محمد اکبر ساقی ؒدی ناگوار طبیعت پاروں آپ لہور تشریف لے آئے۔ شوگر نے والد بزرگوار دیاں اکھاں اُتے اٹیک کیتا جس دی وجہ نال نظر ویک ہو گئی۔ والد بزرگوار مولانا محمد اکبر ساقیؒ دی زندگی دے آخری کجھ سال مولانا جاوید اکبر ساقیؒ نے اوہناں دی بہت خدمت کیتی۔
اللہ تعالیٰ محمد و آل محمد دے صدقے والد بزرگوار نوں جنت الفردوس وچ اعلیٰ مقام عطا فرمائے۔ آپ 27ویں شب لیلۃ القدر نوں 31مارچ تے یکم اپریل دی وچکارلی رات 1992ء نوں اپنے خالق حقیقی نال جا ملے۔ایہناں دی ناگہانی وفات دے بعد ساری ذمے داریاں مولانا جاوید اکبر ساقی اُتے آن پئیاں۔
انتہائی کٹھن ویلا سی جدوں ملک پاکستان نوں فرقہ واریت نے چارے پاسے توں لپیٹ رکھیا سی۔ مولانا جاوید اکبر ساقیؒ ملک امن و سلامتی لئی بھرپور کوشاں رہے۔ جانشین ساقی ملت نے پورے ملک توں سارے مسالک دے جید علمائے کرام، مشائخ عظام تے ہر شعبہ ہائے زندگی نال تعلق رکھن والی شخصیات نوں تحریک وحدت اسلامی دے پلیٹ فارم اُتے جمع کیتا تے ملک پاکستان وچ فرقہ واریت دی اگ نوں بجھان دی بھرپور کوشش کیتی تے میدان وچ آ گئے۔
تحریک وحدت اسلامی دے پلیٹ فارم توں اوہناں نے پورے ملک وچ پروگرام کیتے مسیتاں وچ، امام بارگاہواں وچ ہوٹلاں وچ مدرسیاں وچ۔
ایس لئی کہ اسیں سارے مسلمان آں بیرونی طاقتاں سانوں لڑا کے اپنا مقصد حاصل کرنا چاہندیاں نیں۔ اندرونی طور تے کمزور کرنا چاہندیاں نیں تاکہ اسلامی جمہوریہ پاکستان دا دنیا دے نقشے اُتے نام و نشان نہ رہے پر ایہناں نوں پتہ نہیں سی کہ جدوں تیکر مولانا جاوید اکبر ساقی رحمتہ اللہ علیہ جنہوں لیڈر، ورکر پاکستان وچ موجود نیں پاکستان دا کوئی کجھ نہیں وگاڑ سکدا۔
مولانا جاوید اکبر ساقی نوں ایس دوران بوہت دھمکیاں تے وارننگ دتی گئی کہ ایس مشن توں ہٹ جائو پر قربان جاواں مولانا جاوید اکبر ساقیؒ اُتے جیہڑے نہ وِکے، نہ جھکے نہ ای ڈرے بلکہ اپنے مشن اُتے دن رات محنت کر کے سارے مسالک نوں تحریک وحدت اسلامی دے پلیٹ فارم اُتے اکٹھا بٹھا دتا۔ مولانا جاوید اکبر ساقیؒ نوں ایس ملک وچ امن، محبت تے بھائی چارے دی فضا نوں برقرار رکھن والے کم اُتے مختلف تنظیماں نے ایوارڈ نال نوازیا۔ اک گل دسنا ضروری تے فرض سمجھنا واں ایس لئی کہ میں خاکسار نے وی مولانا جاوید اکبر ساقیؒ دی زندگی دے آخری کجھ سال ایہناں دے نال لنگھائے۔ میں جتھے ایہناں نوں ہمیشہ امن، محبت تے بھائی چارے لئی کم کردے ویکھیا اوتھے جدوں دراہل بیت دے مقام و مرتبہ دی واری آندی تے اوہ بے قانو ہو جاندے۔
مولانا جاوید اکبر ساقی رحمۃ اللہ علیہ ہمیشہ فرماندے نیں کہ میں اپنی زندگی دراہل بیت ؐ دے ناں وقف کر دتی اے جدوں وی پاک بی بی‘ طاہرہ‘ عابدہ‘ زاہدہ‘ خاتون جنت سیدہ فاطمۃ الزہرا سلام اللہ علیہ دا ناں آندا‘ آپ دیاں اکھاں توں اتھرواں دی جھڑی لگ جاندی،آپ کسے محفل وچ ہوندے یا جلسے وچ آپ نے ہمیشہ عظمت اہل بیت ؐ تے حرمت اہل بیت لئی کم کیتا۔
آپ 30دسمبر 2017ء دی صبح 10 وجے اپنے خالق حقیقی نال جا ملے۔ اناللہ وانا الیہ راجعون۔
مولانا جاوید اکبر ساقی رحمۃ اللہ علیہ دی رحلت دے بعد تحریک وحدت اسلامی دی باگ ڈور احباب نے میرے ناتواں موہڈھیاں اُتے پا دتی۔ میں اپنے سارے اکابرین دا شکریہ ادا کرنا واں جیہڑے ہمیشہ ہر ویلے میرے نال تعاون کردے نیں تے موہڈھے نال موہڈھا ملا کے کھڑے رہندے نیں۔ تے آخر وچ میری دعا اے کہ اللہ تبارک و تعالیٰ مولانا جاوید اکبر ساقیؒ نوں محمدؐ و آل محمدؐ دے صدقے جنت الفردوس وچ اعلیٰ مقام عطا فرمائے۔آمین۔
