علامہ ملک جاوید اکبر ساقی رحمتہ اللہ علیہ

مفتی محمد شبیر انجم مدنی

امن دے حوالے نال اتحادی دے حوالے نال لوکاں اندر اخلاق تے اخلاص دے حوالے نال اک منفرد ناں اے۔ جنون دی حد تیکر محبت اہل بیت اطہار نال سرشار ملک جاوید اکبر ساقی دا عظیم الشان کردار اے۔ لہور وچ جس ویلے حالات حد توں زیادہ خراب سن۔ اک دُوجے اُتے کفر دے فتوے حد توں زیادہ ودھ گئے سن اک مسلک دا دُوجے مسلک دی مسجد وچ جانا موت نوں دعوت دین دے برابر سی بلکہ ایتھوں تیکر معاملہ ہو چکیا سی کہ دُوجے مسلک دا بندا کسے مسجد وچ داخل ہو جاندا تے مسجد نوں دھونا پیندا سی۔ ایسے عالم وچ رواداری، اتحاد، یگانگت، برداشت، اک دوجے دے حترام دا محبت بھریا پیغام لے کے اَگے ودھن والیاں وچ ملک جاوید اکبر ساقی مرحوم دا ناں صفحہ اَول اتے آندا اے۔ آپ نے انج دے خوبصورت پیرائے وچ وحدت دا درس دِتا اک دُوجے نوں برداشت کرن دا درس دتا، اپنا مسلک چھڈو نا، کسے دا مسلک چھیڑو نا جہیا عظیم الشان پیغا م عطا فرمایا۔ اِنج دا پُر تاثیر پیغام جس لئی سرزمین لہور عرصہ دراز توں ترس رہی سی ہر عالم دین دا پیغام بن گیا۔ خلوص ہوئے تے دعا وچ اثر وی آندا اے شجر ہرا ہوئے تے ایس اُتے ثمر وی آندا اے۔ پیکر خلوص پیکرِ وفا علامہ محمد جاوید اکبر ساقی صاحب رحمتہ اللہ علیہ انج دے باوفا ساتھی سن جنہاں دی یاداں ہجے وی مشام جاں نوں معطر کیتے ہوئے نیں۔
مرحوم علامہ جاوید اکبر ساقی صاحب منافقت نہیں کردے سن جس دے نال کھڑے ہوندے ڈنکے دی چو ٹ نال کھڑے ہوندے مینوں ہجے وی کئی انج دے واقعے یاد نیں کہ مرحوم علامہ جاوید اکبر ساقی رحمتہ اللہ علیہ استقامت نال کھڑے رہے تے فیر حالات بدل گئے۔ شیعہ سنی رواداری دے اندر آپ دا مرکزی کردار اے۔ آپ نے مسجداں وچ جا کے امام بارگاہواں وچ جا کے اتحاد تے امن دا درس دتا۔ بڑی دلیری دے نال امن دی فضا نوں ہموار کیتا۔ سارے مکاتب فکر دے جید علماء آپ دا وی بے حد احترام کردے سن انج دے لوکاںدی اج بوہت لوڑ اے۔ اللہ تعالیٰ مرحوم ملک جاوید اکبر ساقی دی تربت اُتے کروڑاں رحمتاں نازل فرمائے۔ ایسے مشن تے پیغام وحدت نوں لے کے ملک پرویز اکبر ساقی صاحب چل رہے نیںاللہ تعالیٰ ایہناں دی مدد فرمائے۔