عاشق رسولﷺ و اہلبیت۔۔ علامہ ملک جاوید اکبر ساقی ؒ

اوہ اپنی درخشاں یاداں دی آباد دنیا جیہڑی اپنے پچھے چھڈ گئے نیں ہمیشہ اپنے چاہن والیاں دی اپنی موجودگی دا احساس دلاندے رہن گے

تبسم نواز وڑائچ

انسان دی شخصیت دے اجزائے ترکیبی وچ ایس معاشرے دے اثرات کلیدی کردار دے حامل ہوندے نیں تے معاشرہ انساناں دے مختلف کرداراں نال مل کے ترتیب پاندا اے جس وچ والدین مدرسہ اساتذہ، دوست احباب رشتہ دار خاندان برادری ہم جماعت علماء ، دانشور، شاعر، ادیب، خطیب، اسکالرز، پروفیشنلز، اہل صنعت و حرفت رسوم و روایات میڈیا وغیرہ دا بنیادی کردار ہوندا اے پر ایہناں سب وچ جنہا کوئی کسے دے یڑے ہوندا اے اینا ای ایس دی شخصیت دی تشکیل و ترتیب وچ اوہ دخیل ہوندا اے تے دوست ہوئے اہل فن ہوئے والدین یا رشتہ دار ہون جدوں اوہ ایس جہان فانی توں رخصت ہو جان تے انسان ایہناں دے جسد خاکی نوں لحد وچ نہیں اتاردا بلکہ اپنی ای زندگی تے شخصیت دے ایس حصے نوں قبر وچ اتار رہیا ہوندا اے جس اُتے ایہناں دا راج سی گویا اوہ اپنے قریبیاں دی میتاں دفن کردا بلکہ ایہناں دی قبراں وچ جزو جزو ہو کے آپ ساری زندگی قسطاں وچ مر مر کے دفن ہوندا رہندا اے۔ ایسے لئی کسے نے اپنے دوست دی وفات دے صدمے کرب اذیت دکھ تے غم و حزن دی شت نال کہیا سی کہ
خوش مرگے کہ ماتمِ یاراں نہ دیدہ ای
تے لیجنڈ شاعر سیف الدین سیف نے وی ایسے کیفیت نوں اِنج لفظاں دا پیرہن دِتا سی ۔۔
یہ بات یاد رہے دوستوں کو میری موت کے بعد
کہ سیف دفن ہوا تھا ہزار قبروں میں
علامہ ملک جاوید اکبر ساقی دے نال وی میرا اک انج دا ای اٹوٹ رشتہ تے دائمی تعلق سی کہ جس وچ محبت وی سی شفقت وی سی ارادت وی سی قرابت وی سی تے قربت وی سی ، اوہ برادر مہربان عہد ساز خطیب عالم بے بدل سفیر وحدت اسلامی علمبردار اتحاد بین المسلمین صاف و شفاف سیاستدان ممتاز اسکالر تے دانشور جناب ملک محمد اکبر ساقی اتراء مرحوم دے نقش حسیں تے وارث و امین سن تے راقم الحروف دے بہترین دوست جناب ملک حبیب اللہ اتراء دے بھتیجے سن تے ایسے نسبت نال میرے وی بھتیجے سن تے ایسے تعلق دا اوہناں نے تاحیات احترام کیتا تے پوری زندگی ایہنوں نبھایا مرحوم جاوید اکبر ساقی دنیا لئی اک علامہ خطیب دانشور شعلہ بیاں مقرر تے سنجیدہ فکر مدبر سن پر میرے لئی صرف نکے بھرا جاوید اکبر سن ہمیشہ دل دی گل شیئر کرن والے تے نال لے کے چلن والے برادر عزیز سن مان سمان دین والے دوست سن احترام کرن والے دوست تے محبتاں وَنڈن والے عزیز سن ،دوستاں دے دوست تے دشمناں دے کھلے دشمن سن منافقت توںبہت دور اک سچے مخلص تے کھرے انسان کہ جیہڑا حق گوئی دی خاطر وڈی توں وڈی دشمنی مول لین توں وی کدی نہیں گھبرائے، جیہڑی گل تنہائی وچ کیتی اوہنوں منبر اُتے وی اوسے شدت تے گھن گرج دے نال بیان کیتا۔ ملک محمد اکبر ساقی دے نسلی وارث تے ہے ای سن پر ملک جاوید اکبر ساقی اپنے والد گرامی دی معنوی خوبیاں تے صفتاں دے وی بدرجہ اُتم وارث سن تے اپنے والد دی وفات دے بعد اوہناں نے جس کمال فہم و دانش جرات و استقامت شہامت و صلابت نال ایہناں دے خلا نوں پُر کیتا تے ایہناں دی کمی محسوس نہ ہون دتی ایہہ گھٹ ای ویکھن نوں ملدا اے اکثر وڈے درختاں دے سائے وچ پروان چڑھن والے پودے بونے ای رہ جاندے نیں تے اپنی قدرتی قدوقامت نوں نہیں اپڑ پاندے پر علامہ جاوید اکبر ساقی نے منبر خطابت ہوئے یا علم و حکمت دے نور دی معاشرے وچ تقسیم یا جذبہ حب الوطنی دے فروغ دے حوالے نال کردار یا معاشرے وچ اتحاد بین المسلمین دی جہت نال اک بھرپور نشر و اشاعت یا تحریک وحدت اسلامی دے پلیٹ فارم توں توانا کردار یا علی زیب فائونڈیشن راہیں فلاحی تے رفاہی مشن دی تکمیل۔ ایہناں سب مضبوط و مربوط تے مبسوط جہتاں نال ایہناں دی شخصیت اک محبوب تے ہر دلعزیز حیثیت دی حامل رہی تے اوہناں نے اپنی زندگی دے ہر لمحے نوں مقصدیت و افادیت دا حامل تے ابنائے وطن دی سچی پرخلوص خدمت گزاری نال معمور بنائے رکھیا گو علامہ جاوید اکبر ساقی بہت جلدی ساڈے توں وِچھڑ گئے پر ایہناں دے افکار دی خشبو کردار دی مہک تے شیرینی گفتار تے موت ساڈے توں نہیں گواچی، اوہ اپنی درخشاں یاداں دی آباد دنیا جیہڑی اپنے پچھے چھڈ گئے نیں ہمیشہ اپنے چاہن والیاں دی اپنی موجودگی دا احساس دلاندے رہن گے جے اسیں اج ایہناں دی یاداں نوں تازہ کردے ہوئے ایہناں دی زندگی دے ایس توانا و بلند آہنگ کردار دا تذکرہ نہ کریئے تے گویا اسیں ایہناں دی شخصیت دا حاطہ کرن وچ کلیدی گل بات چھڈ د تی تے اوہ سی ایہناں دا عشق محمد و آل محمد علیہم السلام نال سرشار ہونا اوہناں نے اپنے علمی و تبلیغی سفر وچ مؤدتِ اھلبیت دے مستعد و توانا مبلغ دا کردار ادا کرن وچ زندگی بھر کوئی دقیقہ فرد گزاشت نہیں کیتا بلکہ بھرپور طریقے نال جتھے اوہناںدے فضائل و مناقب دا پرچار کیتا اوتھے دشمنان اہلبیت دے ظلم و ستم مکروفریب تے مکارانہ و عیارانہ ہتھکنڈیاں نوں وی جرات نال بے نقاب کیتا تے ایسے وجہ نال اوہ سارے مکاتب فکر وچ یکساں طور تے مقبول سن ایہہ احساس قابل اطمینان اے کہ علامہ مرحوم دے برادر خورد صاحبزادہ ملک پرویز اکبر ساقی وی ایس مقدس مشن دی تکمیل وچ اپنے مرحوم بھرا وانگوں ایسے جذبے تے احساس دے نال ایہہ گراں بارذمہ داری بوہت کامیابی نال نبھا رہے نیں ناچیز ایہناں دی کامیابی لئی دعاگو اے تے مرحوم علامہ جاوید اکبر ساقی دے درجات دی بلندی لئی بارگاہ الٰہی وچ دستِ دعا بلند کیتے ہوئے اے۔