او آئی سی اجلاس تے مسلم دنیا دے مسائل
افغان عوام نوں 40 ورہے توں جنگ دے شعلیاں دا ساہمنا اے جس نال صنعت و زراعت نوں سخت نقصان ہویا اے تے پیداوار نہ ہون نال سامان تجارت گھٹ ہو گیا اے
تحریر حمیداللہ بھٹی
کیہ سارے مسلم ممالک واقعی آزاد تے خود مختار نیں؟ ایس سوال دے جواب توں پہلے اک ہور سوال زیادہ اہم اے کہ کیہ مسلم ممالک وچ کوئی اک وی انج دا ملک اے جیہڑا کسے عالمی طاقت دا فرمانبردار کسے عالمی بلاک دا حصہ نہیں ۔ ظاہر اے سارے اسلامی ملک کسے نہ کسے حوالے نال دھڑیاں وچ منقسم نیں کسے نوں امریکی خوشنودگی عزیز اے تے کوئی چینی بلاک دا حصہ بن کے خوش اے کسے نوں یورپی یونین دی الفت مارے جا رہی اے ظاہر اے انج دے حالات وچ آزادانہ فیصلے نہیں ہو سکدے کیوں جے عالمی طاقتاں دے ہمنوایا بلاک دا حصہ ملکان نوں مختلف نوعیت دے دبائو دا سامنا رہندا اے ایس ویلے سارے مسلم ملکاں نوں انج دی ای صورتحال درپیش اے جس دے بعد آزادی و خودمختاری دے سوال دا جواب تلاش کرن دی ضرورت ای نہیں رہندی تے فیر مسلم ملکاں دی نمائندہ تنظیم او آئی سی کیونکر آزادانہ فیصلے کر سکدی اے ایہہ وی فیصلے کردے ہوئے رکن ملکاں دی طرح گروپاں تے سرپرست عالمی طاقتاں دی اجازت پیش نظر رکھدی اے تے کسے انج دے فیصلے توں حتیٰ الامکان گریز کردی اے جس نال کسے عالمی گروپ، دھڑے یا طاقت دی ناراضگی دا خدشہ ہویا ایسے وجہ نال غیر اہم اے تے اسلامی دنیا نوں درپیش مسائل جوں دے توں برقرار نیں بظاہر آزاد پر مختلف جکڑ بندیاں دا شکار اسلامی ملکاں دی تنظیم او آئی سی دے فیصلیاں نوں ایسے لئی عالمی دنیا اہمیت نہیں دیندی بلکہ اجلاساں نوں محض اُٹھک بیٹھک دے طور تے ویکھدی اے۔
انتشار دا شکار مسلم دنیا وسائل دے اعتبار نال پس ماندہ نہیں بلکہ کافی خوشحال اے ستم ظریفی ایہہ کہ وسائل دے باوجود دنیا وچوں سب توں زیادہ غربت مسلم ملکاں وچ اے جس دی وڈی وجہ توانائی دے وڈے ذخائر نال مالا مال مسلم ملکاں دا اپنی دولت علم و ہنر دے فروغ دی بجائے غیر ملکی بینکاں وچ محفوظ کرانا اے ایہہ بینک عالمی طاقتاں دے کنٹرول وچ ہوندے نیں ایس لئی اکثر پابندیاں دی آڑ وچ جمع شدہ دولت یا تے منجمد کر دتی جاندی اے یا ضبط کر لئی جاندی اے انج دا کجھ لیبیا، ایران، عراق، سنے کئی ملکاں نال ہتھ ہو چکیا اصل وچ مسلم حکمران اپنے بُرے وقت لئی اپنی عوام دی افلاس دے باوجود ملکی دولت بیرون ملک لُکاندے نیں پر شاہ ایران ہوئے یا صدام حسین یا فیر کرنل قذافی ایہہ لُکائی دولت کسے دے کم نہیں آئی اج کل افغانسان نوں وی انج دی ای صورتحال دا ساہمنا اے صدر اشرف غنی دے فرار دے بعد اثاثے انج دے حالات وچ منجمد کر لئے گئے نیں جدوں ملک دی ادھی توں ودھ آبادی نوں غربت تے بھُک دا ساہمنا اے تے قحط جہے حالات بنن لگے نیں پر بے رحم دنیا افغان دولت نوں ا فغاناں نوں خوراک تے ادویات لئی وی جاری کرن توں انکار اے ایس طرح دولت ہون دے باوجود مسلم ملک شہریاں دے مسائل حل نہیں کر پاندے پر کیہ مستتقبل قریب وچ کجھ بہتری آثار ہو سکدے نیں افسوس انج نہیں ایس حوالے نال ایس ویلے تیکر کوئی وی یقینی طور تے ہاں وچ جواب نہیں دتا جا سکدا جدوں تیکر دیگر عالمی مالیاتی اداریاں دی طرح اسلامی ترقیاتی بینک صحیح معنیاں وچ فعال نہیں ہو پاندا خیر جدوں او آئی سی غیر فعال اے تے اسلامی ترقیاتی بینک توں فعال ہون دی امید کنج رکھی جا سکدی اے۔
او آئی سی دے ایس ویلے دنیا وچ 57 مسلم ملک ممبر نیں ایس تنظیم دے موجود سربراہ سعودی عرب دی تجویز اُتے اسلامی تعاون تنظیم دے وزرائے خارجہ دا موجودہ اجلاس اسلام آباد ہویا اے جیہڑا موجودہ حالات وچ بوہت اہمیت دا حامل اے پاکستان دی میزبانی وچ ہون والے ایس اجلاس دا واحد ایجنڈا بحرانی صورتحال نال دو چار افغانستان لئی ٹھوس عملی اقدامات سی، اسلامی ملک افغانسان دی امداد اُتے متفق تے گئے نیں سعودی عرب نے اک ارب ریال امداد دا وعدہ وی کیتا اے پر ہون والے فیصلیاں اُتے عملدرآمد ہوئے گا یا حالیہ اجلاس بیٹھن ، گل کرن تے واپسی دے راہ لین اُتے منتج ہوئے گا حتمی طور اُتے ایس لئی کجھ کہنا مشکل اے کیوں جے ماضی وچ وی او آئی سی اپنی قرار داداں اُتے عمل کران وچ ناکام رہی اے بھارت جہے کئی ملک تے ایس تنظیم دے فیصلیاں نوں اہمیت ای نہیں دیندے تے جے کدی کدھار ایس تنظیم ولوں کشمیریاں بھراواں دی ہمدردی وچ دو چار لفظ بول دتے جاندے نیں تے بھارت نہ صرف مذمت کردا اے بلکہ اندرونی معاملات وچ مداخلت قرار دے کے مسترد کر دیندا اے فیر وی اسلامی ملک کشمیر دے حوالے نال کوئی متفقہ فیصلہ کرن توں قاصر نیں کیہ ہن افغانستان دے بارے وچ ہون والے فیصلے وی کشمیریاں دے حق وچ بیان جاری کرن دی طرح ای ثابت ہون گے اسلامی قیادت نوں ایس بارے سوچنا ہوئے گا۔
افغان عوام نوں 40 ورہے توں جنگ دے شعلیاں دا ساہمنا اے جس نال صنعت و زراعت نوں سخت نقصان ہویا اے تے پیداوار نہ ہون نال سامان تجارت گھٹ ہو گیا اے جد کہ بیرونی بینکاں وچ پئے ارباں ڈالر امریکہ نے روک رکھے نیں ایہہ طالبان دی عبوری حکومت نوں انج دا جھٹکا اے جس توں اوہ سنبھل نہیں پا رہی تے نہ صرف تنخواہواں دی ادائیگی مشکل ہو گئی اے بلکہ ملک انسانی المیے دے دہانے اُتے اپڑ چکیا اے پر عالمی طاقتاں دی سنگ دلی وچ کمی نہیں آئی ہونا تے ایہہ چاہیدا سی کہ موجودہ حالات دا ذمہ دار امریکہ اگے ودھدا پر لائے زخماں اُتے مرہم رکھن دی بجائے الٹا مالی مسائل ودھان وچ دلچسپی لے رہیا اے جس نال درپیش انسانی مسائل تے معاشی مشکلات وچ مزید وادھا ہوندا جا رہیا اے حالیہ اجلاس وچ او آئی سی دے رکن ملکاں دے وزرائے خارجہ دے علاوہ، اقوام متحدہ سنے کئی مالیاتی اداریاں، امریکہ، فرانس دی وکجھ اہمیت بن جائے پر عالمی طاقتاں دی موجودگی نال آزادانہ فیصلیاں دی وقع پوری نہیں ہو سکدی جے عالمی طاقتاں مسائل حل کرن وچ سنجیدہ ہوندیاں تے مسائل گھمبیر کیوں ہوندے ہن وی خوراک تے دوائیاں دی فراہمی دے نال افغانستان نوں تکنیکی معاونت فراہم کرن اُتے توجہ دتی جائے تے افغانستان دی کئی ٹریلین ڈالر دی معدنیات کڈ کے افغاناں دی بھُک و افلاس مستقل بنیاداں اُتے ختم ہو سکدی اے ایس حوالے نال روس تے امریکہ دے جیالوجیکل سروے رہنائی لئی موجود نیں پر ایہہ کم اودو ہو سکدا اے جدوں آزادانہ فیصلے کیتے جان جے فیصلے کردے ہوئے وی عالمی طاقتاں دے اشارہ ابرو دا انتظار کرنا اے تے حالیہ اجلاس وی نتائج دے حوالے نال دو دن دے میلے دے سوا کجھ نہیں۔
