لوکاں دا بھلیکھا نکل گیا اے

غلام شبیر عاصم

پنجابی بولی کوئی چھوٹی جہئی تے پھڑی تڑی دے لفظاں دی منڈلی یاں اکھراں دی کھِچڑی دا ناں نئیں۔دنیا دی 9 ویں وڈی بولی اے، تے پاکستان وچ 60 فیصد لوکاں دی ماں بولی تصور کیتی جاندی اے۔پاکستان وچ ایہ تقریبا 12 کروڑ لوکاں دی بولی اے۔تے ہورناں ملکاں وچ بولی تے سمجھی جاندی اے۔ایہ ان پڑھاں دی بولی نہیں،صوفیاں، دانشوراں تے سادھوواں سنتاں دی گیان بھری بولی اے۔ایہ تصووف تے فقر دا سہرا اے۔اینا کچھ ہون دے باوجود وی لوکیں ایس نوں کچھ علاقیاں تیک ای محدود تے عام جہئے ان پڑھ لوکاں دی بولی خیال کردے نیں۔بوہت سارے لوکی ایہدے علاقائی تے وسیب حوالیوں کھلار پسار دا اندازہ نہیں رکھدے۔پنجابی زبان دی اک وڈی بد قسمتی ایہ وی اے کہ انگریزی رواجاں نال جڑے ہوئے ساڈے کچھ”انگریزی طوطے” ایہنوں نِکی بولی سمجھدے تے ایہدے محدود ہون دی جھوٹھی شاہدی دیندے نیں۔اصل وچ اوہ اپنی عِلمی سستی تے کمتی پاروں آپ انھے تے اکھوں بے نورے نیں۔اوہناں نوں آپ کاسے شے دا تھوہ پتہ نہیں۔انگریزی اکھراں دا چونگا چنگن والی تے گلابی اردو وچ مہان ساڈی نویں نسل پنجابی بولی دے عِلمی ادبی تے تخلیقی قد بت توں باالکل ان جان اے۔ساڈے وسیب دے کچھ لوک جدوں کدھرے پنجابی اخبار ویکھدے نیں تے اوہناں دے مونہہ تے اک عجیب جہئی حیرانی تے مسکان ویکھن والی ہندی اے۔جیویں اوہناں نے کوئی عجیب جہئی شے ویکھ لئی ہووے۔اوہ کدی کہہ وی دیندے نیں،نہ وی کہن تے اوہناں دا چہرا آکھ رہیا ہندا اے کہ،اخبار پنجابی وچ وی ہوسکدا اے؟۔ایہ مشاہدہ کئی واری ہویا اے۔اِنج لگدا اے جیویں اوہناں دی کوئی غلط فہمی دور ہوگئی ہووے۔جیویں اوہناں نوں کوئی بھلیکھا سی تے پنجابی اخبار ویکھ کے اوہ نِکل گیا ہووے۔
مدثر اقبال بٹ جی نے واقعی پنجابی روزنامہ بھلیکھا اخبار کڈھ کے لوکاں دا بھلیکھا کڈھ دتا اے کہ اخبار پنجابی وچ وی ہوسکدا اے۔کالم پنجابی وی لکھے جاسکدے نیں۔اردو صحافت دی طرحاں پنجابی وچ وی فیچر،انٹرویو،مضمون تے خبراں ہو سکدیاں نیں۔لوکاں نوں ایہ گل سمجھاون تے بھلیکھا کڈھن لئی روزنامہ بھلیکھا پِچھلے 30 تِیہاں ورہیاں توں مسلسل ایہ جہاد کررہیا اے۔تے پنجاب دھرتی تے پنجابی دا مِینہ پارہیا اے۔ایہ اخبار اپنے ڈھنگ تے طریقے نال پنجابی بولی دی سیوا کر رہیا اے۔پنجابی بولی،ادب تے رہتل دی پریرنا تے پرچار وچ رجھا ہویا اے۔کچھ ہفتہ وار تے مہینہ وار پنجابی پرچے ہور وی ہے نیں۔پر اوہ بھلیکھا جِناں پندھ نہیں کرسکے،چھیتی تھک گئے۔مدثر اقبال بٹ جی پورے گوہ لگن،ادم تے جتن نال بھلیکھا اخبار روز کڈھن وچ جٹے ہوئے نیں۔اوہناں دی ہمت کسے وڈی قربانی توں گھٹ نہیں۔اوہناں دا جیہڑا خواب اے چنگی طرحاں پورا نہیں ہورہیا۔اوہ پنجابی بولی نوں سرکاری پدھر تے لازمی مضمون دے طور تے پڑھتا دا حصہ وی ویکھنا چاہندے نیں،تے پِنڈوپِنڈ گلی گلی پنجابی اخبار اپڑاونا چاہندے نیں پر ایس وڈے کم لئی بھلیکھا اخبار دے سرتے پنجاب سرکار دا ہتھ ضروری اے۔
بھلیکھا جہئے اخبار نوں تے سرکار ولوں دل کھول کے سرکاری اشتہار یاں نقدی امداد ملنی چاہیدی اے۔کیونکہ پنجابی بولی،ادب تے رہتل لئی ایہ وڈی پدھر تے کم کررہیا اے۔سبھناں سرکاری لائبریریاں وچ ایس اخبار دی ہوند ضروری بنائی جاوے۔پنجاب سرکار نوں اپنی پدھر تے آپ ایہنوں دھکا لاونا چاہیدا اے۔چپ وٹ کے بلکہ پاسا وٹ کے ایہنوں دھکانہیں دینا چاہیدا۔دھکے ٹھیڈے کھاندیاں نیں اوہ قوماں جیہڑیاں اپنی بولی تے وسیب نوں بھل جاندیاں نیں۔دھن حوصلہ اے مدثر اقبال بٹ ہوراں دا جیہڑے چنگے ماڑے حالاں وچ ایس اخبار نوں چلائی جارہے نیں۔تے ہون تے اوہناں پنجاب ہاوس بنا کے پنجابیاں نوں جِسراں سِر کجن لئی تھاں دے دتی اے۔ایتھے پنجابی بولی،ادب تے وسیب نال جڑے کئی پروگرام وی دھوم دھام نال ہندے رہندے نیں۔پنجابی ادب تے ثقافت نوں سمجھن سمجھاون تے اگے ودھاون لئی،ہون ایتھے گرمکھی بولی وی آہر نال پڑھائی جارہی اے۔تاں جے لہندے تے چڑھدے پنجاب وچکار ادب دے چڑھے ہوئے دریا توں آسانی نال اپنی علمی تے ادبی تریہہ لاہی جاسکے۔
گھٹو گھٹ پنجاب دی پدھر اتے تے بھلیکھا اخبار نوں اردو اخباراں دے برابر کھلوتا ہونا چہیدا اے۔پنجاب سرکار نوں مدثر اقبال بٹ جی دے موڈھے نال موڈھا لاکے پنجابی دے ودھاوے لئی ٹِل لاونا چاہیدا اے۔وزیر اعلی پنجاب سردار عثمان بزدار جی نوں ایہ پرانا میہنا دھو دینا چاہیدا اے۔تاں جے بھلیکھا چار رنگاں تے کِیہ ستاں رنگاں وچ بلکہ سارے رنگاں وچ چھپ کے روز بھنگڑا پاوندا پورے پنجاب دی ہر وِتھے جا اپڑے۔تے ہر پاسے بھلیکھا بھلیکھا تے پنجابی،پنجابی ہوجائے۔