رہائش گاہ توں آخری آرام گاہ تیکر منیر نیازی
منیر نیازی مرحوم دی رہائش گاہ ماڈل ٹائون وچ اے، آپ 26 دسمبر 2006 نوں لہور وچ انتقال کر گئے
مرزا عثمان بیگ
ایڈیاں دردی اکھاں دے وچ ہنجو بھرن نہ دیواں
وس چلے تے ایس جہان وچ کسے نوں مرن نہ دیواں
اردو تے پنجابی دے نامور شاعر منیر نیازی دی برسی ہر سال 26 دسمبرنوں بوہت عقیدت و احترام نال منائی جاندی اے۔ اپنے منفرد لہجے تے سٹائل دی وجہ نال اوہ پوری دنیا وچ مشہور نیں۔ منیر نیازی 9 اپریل 1928 نوں خان پور ضلع ہوشیار پور مشرقی پنجاب انڈیا وچ پیدا ہوئے۔ ابتدائی تعلیم خان پور وچ ای حاصل کیتی تقسیم ہند دے بعد اپنے خاندان دے نال پاکستان دے شہر ساہیوال منتقل ہو گئے ۔ فیر ساہیوال توں ای میٹرک دا امتحان پاس کیتا، اوہناں نے اک میگزین دا آغاز وی ساہیوال توں ای کیتا۔ ساہیوال توں کئی نامور شاعراںم، ادیباں، دا تعلق رہیا جنہاں وچ طارق عزیز، مجید امجد، دلدار پرویز بھٹی تے منیر نیازی قابل ذکر نیں منیر نیازی نے بی اے دا امتحان دیال سنگھ کالج لہور توں پاس کیتا فیر لہور وچ ای مقیم رہے۔ منیر نیازی نے بے شمار پنجابی تے ا ردو کتاباں لکھاں جنہاں وچ چار چپ چیزاں””سفر دی رات ” رستہ دان والے تارے” جنگل میں دھنک” ماہ منیر” “تیز ہواتے تنہا پھول ” دشمنوں کے درمیان شام ” قابل ذکر نیں۔
منیر نیازی مرحوم نے دو شادیاں کیتیاں پہلی بیوی صغریٰ جنہاں دا انتقام ایہناں دی زندگی وچ ای ہو گیا سی ایہناں دی وفات دے بعد دوجی شادی ناہید نیازی نال کیتی۔ آپ اولاد دی نرینہ توں محروم سن۔ منیر نیازی نے شاعری دے علاوہ بے شمار فلمی گیت وی لکھے جنہاں وچ فلم ” خریدار “دا گیت (زندہ رہیں تو کیا ہے جو مر جائیں ہم تو کیا ) فلم شہید دا گیت (اس بے وفا کا شہر ہے اور ہم ہیں دوستوں ) فلم” تیرے شہر میں” دا گیت (کیسے کیسے لوگ ہمارے جی کو جلانے آ جاتے ہیں ) شامل نیں۔منیر نیازی اخبارات، ریڈیو تے میگزین وچ وی لکھدے رہندے سن۔ منیر نیازی دی شاعری نے 60 تے 70 دی دہائی وچ نویں نسل نوں اپنے سحر وچ گرفتار رکھیا اوہ نوجواناں دے مقبول ترین شاعر سن۔ منیر دے کجھ اشعار
اوس پرانے دن دے وچوں
کرکے یاد اک موقعے نوں
زور وی مسلے روک نہیں سکیا
اپنے دل دے ہوکے نوں
&٭٭٭
پیار کرن توں کافی پہلے
کنی سوہنی لگدی سی
اپنے مرنے توں کافی پہلے
کنی سوہنی لگدی سی
&٭٭٭
کجھ اونج وی راہواں اوکھیاں سن
کجھ گل وچ غم دا طوق وی سی
کجھ شہر دے لوک وی ظالم سن
کجھ مینوں مرن دا شوق وی سی
&٭٭٭
منیر نیازی دی پنجابی شاعری پنجاب یونیورسٹی دے ایم اے پنجابی دے نصاب وچ شامل اے۔ ایہناں دی ادب دی خدمات نوں ویکھدے ہوئے گورنمنٹ آف پاکستان نے ایہناں نوں پرائیڈ آف پرفارمنس تے ستارئہ امتیاز نال وی نوازیا۔
منیر نیازی مرحوم دی رہائش گاہ ماڈل ٹائون وچ اے۔ آپ 26 دسمبر 2006 نوں لہور وچ انتقال کر گئے۔ آپ نوں ماڈل ٹائون Kبلاک دے قبرستان وچ دفن کیتا اے گیا۔ ہر سال ماڈل وچ ایہناں دی رہائش گاہ اُتے فاتحہ خوانی تے برسی منائی جاندی اے۔ ایہناں دا کمرہ اج وی ایسے طرح ایہناں دی بیگم ناہید نیازی نے سجا رکھیا اے ایہناں دی یاداں نوں سنبھال رکھیا اے۔ ایہناں دی بیگم دی شدید خواہش اے کہ منیر نیازی صاحب دے ناں توں کوئی انڈر پاس یاں کسے روڈ دا ناں ایہناں دے ناں اُتے رکھیا جائے۔
