سادہ انسان سردار عثمان

شاق ایڈمنسٹریٹر دے طور اُتے ساہمنے آ رہے نیں

فیصل ادریس بٹ

ریاست پاکستان دا نظام چلان لئی فیصلہ ساز قوتاں نت نویں تجربے کردی رہندیاں نیں ، کدی سیاسی، کدی نیم سیاسی تے کدی فوجی سیٹ اپ بنا دتا جاندا اے، سیاسی تے نیم سیاسی سیٹ اپ لئی تھوڑے جہے فرق نال اک جہی مشق کیتی جاندی اے، عام انتخابات دا اعلان کر کے سیاسی جماعتاں نوں جلسے جلوس کرن تے عوام نوں نعرے لان دا موقع دتا جاندا اے، انتخابی مہم دے دوران سیاسی قیادت وی خوب دل دی بھڑاس کڈ دی اے، اک دوجے اُتے الزامات دی بوچھاڑ کیتی جاندی اے، سیاسی ورکرز دا جوش و خروش وی دیدنی ہوندا اے، فیر ووٹ پائے جاندے نیں، نتیجہ آن اُتے کجھ بھنگڑے پاندے نیں تے کجھ منہ لُکاندے پھر رہے نیں تے اپنی پسند دے امیدوار دی شکست دے جواز گھڑ رہے ہوندے نیں سیاست قیادت بہرحال پہلے توں وی تیار ہوندی اے کہ جے ہر گئے تے ساڈا بیان کیتا ہوئے گا، جے فتح ملی تے کس طرح اپنی عقلمبندی، پلاننگ تے مقبولیت دا ڈھنڈورا پیٹنا ہوئے گا، ایس سارے عمل دے دوران ہر پارٹی دے سینئر و جونیئر لوک جان دے نیں کہ ایہناں دی پارٹی جتن دی صورت وچ ملک دی حکمرانی دا تاج کس شخصیت دے سر اُتے رکھیا جائے گا، صوبیاں وچ وزارت اعلیٰ دے کیہڑے کیہڑے امیدوار نیں تے ایہناں وچوں کس دی پوزیشن سب توں بہتر تے مضبوط اے عموماً لوکاں دے اندازے درست ای ہوندے نیں، 2018ء دے انتخابات ہوئے تے مرکز تے پنجاب وچ پاکستان تحریک انصاف حکومت سازی دی پوزیشن وچ آ گئی وزارت عظمیٰ لئی پارٹی چیئر مین عمران خان دے علاوہ کوئی دوجی آپشن زیر غور وی نہیں سی، پر پاکستان دے سب توں وڈے تے اہم صوبہ پنجاب دی وزارت اعلیٰ اُتے پہلی وار عجب جہی بے یقینی ودھ گئی بوہت سارے امیدوار اپنے اپنے سی وی لئے بمع تجربہ دی سنداں دے وزارت اعلیٰ لئی انٹرویو دین لئی لائن وچ کھڑے نظر آئے، بوہت سوں دے کول سفارشی خطوط وی موجود سن، پر جدوں پنجاب دے وزیراعلیٰ لئی ناں سدیا گیا تے سب حیران بلکہ ہکا بکا رہ گئے کہ ایہہ عثمان بزدار نامی بندا کتھوں آ گیا، نہ کوئی سیاسی بیک گرائونڈ، نہ وزارت اعلیٰ یا اہم وزارتاں دا تجربہ ، حتیٰ کہ اسمبلی وچ داخل ہون دے آداب توں وی شاید پوری طرح توں آگاہی نہ ہوئے عثمان بزدار دے کول تے سفارش خط وی شاید نہیں سی، فیر وزارت اعلیٰ لئی کنج منتخب کر لیا گیا، پارٹی دے اندر تے باہر توں سخت تنقید شروع ہوئی، خدشات دا اظہار کیتا گیا، کہ پنجاب جہے اہم صوبے وچ پی ٹی آئی دی لٹیا ڈُب جائے گی، پی ٹی آئی دے ہمدرداں دے خدشات درست وی سن کہ عثمان بزدار نے تے کدی وزارت وی نہیں چلائی وزارت اعلیٰ کنج چلان گے، ناقدین نے فوری طور تے سابق وزیراعلیٰ شہباز شریف توں تقابلی جائزے پیش کرنا شروع کر دتے کہ کسان شہباز شریف تے کسان عثمان بزدار، ایہناں دی تے کوئی افسر گل وی نہیں سنے گا، ہوا وی کجھ انج دا ای کہ نومنتخب وزیراعلیٰ کیمرے دا ساہمنا کردے ہوئے وی گھبرائے گھبرائے جہے لگن لگے، بیورو کریسی نے انج دی کجھ ہفتیاں دا مہمان وزیراعلیٰ قرار دے کے فائلاں لال فیتے دا شکار کرنا شروع کر دین، ایہناں لئی جیہڑی کابینہ منتخب کیتی گئی ایس دے بوہت سارے ارکان خود نوں مکمل خود مختار تے آزاد سمجھدے سن، وزیراعلیٰ عثمان بزدار نوں نااہل ثابت کرن لئی آپ وزراء نے ایہناں دے خلاف مہم چلانا شروع کر دتی، ہر دن نویں تاریخ آن لگی کہ وزیراعظم دے اگلے دورہ لہور وچ نویں وزیراعلیٰ دے ناں دا اعلان ہو جائے گا پارٹی دے اندر وزارت اعلیٰ دے حلقیاں دی اک دوڑ شروع ہو گئی اک غیر معروفتے دور دراز علاقے نال تعلق رکھن والے ایم پی اے نوں نہ جانے کیوں وزیر اعلیٰ بنا دتا گیا، سابق وزیراعلیٰ شہباز شریف دی طرح نہ تے اوہ بارش دے پانی وچ کھڑا ہو کے تصویراں بنوا سکدا اے نہ ایہنوں افسراں دی سرزنش کرنا آندی اے، صحافیاں دے سوالاں دے جوابات ڈھنگ نال دینے تے ایہنوں آندے نہیں، اپنی جماعت دی ساکھ اپنے صوبے وچ کنج بہتر کرے گا ایس دا پارٹی دے اندر کوئی اینا مضبوط گروپ وی موجود نہیں جیہڑا ایس دی وزارت اعلیٰ دا تحفظ کر سکے اوہ اک مسافر دی طرح وزارت اعلیٰ دے منصب اُتے فائز اے ایہنوں جدوں کہیا جائے گا اوہ اپنا بوریا بستر بنھ کے ڈی جی خان چلا جائے گا، جے ایس دے کول وی 40 یا 50 ایم پی اے ہوندے تے کسے نوں ایس دے خلاف گل کرن دی جرات وی شاید نہیں ہوندی، ایس دا کوئی وڈا ہائوسنگ پراجیکٹ چل رہیا ہوندا یا کسے وڈے صنعتکار مافیا نال ایس دا تعلق ہوندا تے اوہ سب ہر ولے ایس دی پشت پناہی کر رہے ہوندے، ایہناں نوں اپنے گروپ دے وزیراعلیٰ نوں بچان لئی ملک وچ اشیائے خوردونوش دی قلت کرنی پئی تے اوہ کردے اوہ آپ وی اپنی امیج پلاننگ لئی پیسہ پانی دی طرح بہاندا،میڈیا وچ ہر تھاں ایہنوں دنیا دا ذہین ترین تے پنجاب دا قابل ترین وزیراعلیٰ ثابت کرن وچ دن رات اک کر دتا جاندا پر انج کجھ وی نہیں ہو سکدا کیوں جے اوہ اک سادہ طبیعت دا مالک تے صرف کم اُتے یقین رکھن والا بندا اے عثمان بزدار دا ناں وزیراعلیٰ پنجاب دے طور تے ساہمنے آن توں پہلے تیکر اوہ اک غیر معروف بندا سی ایس دی شہرت صرف ایس دے اپنے علاقے تیکر محدود سی اوہ ایم پی اے منتخب ہویا ایہنوں شاید آپ وی نہیں پتا سی تے کوئی سوچ وی نہیں سکدا سی کہ ایہنوں پاکسان دے سب توں وڈے صوبے دا وزیراعلیٰ بنایا جائے گا پر ایہہ فیصلہ ہو چکیا سی ایس دے پارٹی چیئر مین عمران خان پنجاب دی بھاگ دوڑ سردار عثمان بزدار دے حوالے کرن دا فیصلہ شاید بوہت پہلے کر چکے سن، ایس دا کوئی وڈا گروپ نہیں ہوندا ایس دی غیر معروفیت، سادگی، کسے وڈے صنعتی مافیا دا حصہ نہ ہونا جہی خامیاں ای ایس دا میرٹ بن گئیاں پر اک گل ہور وی اے کہ اوہ اپنی پارٹی تے پارٹی قیادت توں مخلص تے وفادار وی اے، ایہناں نوں وزارت اعلیٰ سنبھالے تن سال لنگھن نوں نیں ایس دوران اوہناں نے ساری سازشاں نوں ہسدے مسکراندے اپنے دوالے توں لنگھن دتا جے ایہناں نوں کم نہیں آندا تے اوہناں نے کم سکھ لیا ایہناں نوں ہن گل بات کرنا وی آ گئی اے، سب توں وڈی گل ایہناں نوں اپنی مشینری توں کم لینا وی آ گیا اے، آئندہ اک سال دے دوران ساڈے ساہمنے جیہڑا سردار عثمان ہوئے گا اوہ اک شاق ایڈمنسٹریٹر عثمان بزدار ہوئے گا ایہنوں اپنے سیاسی حریفاں نال نمٹنا وی آندا ہوئے گا نویں مالی سال دے دوران بیورو کریسی ہن وزیراعلیٰ عثمان بزدار دے اشاریاں اُتے تھرکتی ہوئی نظر آئے گی، وزیراعلیٰ دا اک بوہت وڈا جرم ایہہ وی اے کہ ایس نے فنڈز دا بہائو جنوبی پنجاب ول موڑ دتا اے اوہ انج کیوں کر رہیا اے اوہ تے اک پسماندہ علاقے نال تعلق رکھن والا قبائلی اے کیہ ایس دے اہل علاقہ تے ایس دے قبیلے والے ایس دا ایہہ جرم معاف کر دین گے؟
پاکستان وچ سرداری نظا اُتے بوہت تنقید کیتی جاندی رہی اے۔ عام شہری دے ذہن وچ ایس نظام متعلق کوئی چنگا تاثر نہیں۔ ایہناں دی رائے درست وی ہو سکدی اے کیوں جے اسیں ویکھنے آں، بلوچستان، سندھ تے پنجاب دے علاوہ خیبر پختونخواہ دے قبائلی علاقیاں وچ سرداری نظا اج وی پوری طاقت دے نال ملکی قوانین دا منہ چڑاندا اے قبیلیاں دی اپنی عدالتاں، اپنی جیلاں تے وکھری وکھری سماجی نظام ہر ملکی قانون تے ضابطیاں توں بالا تر اے۔ ایہناں قبیلیاں دے عوام سردار عے ہر حکم نوں صرف آفر تے ایس دی اطاعت نوں فرض سمجھدے نیں شاید ایس دی وجہ ایہناں قبیلیاں دے معاشی مسائل ہون، سردار ایہناں نوں اپنا تابع رکھن لئی ایہناں دے آمدنی دے ذرائع نوں ای محدود رکھدے نیں، قبیلیاں اُتے اپنی حاکمیت برقرار رکھن لئی ایہناں اُتے ہر طرح دے ظلم دی شکایتاں وی عام نیں جس دی کسے تھاں شکایت ہو سکدی نہ داد رسی دا کوئی موقع فراہم کیتا جاندا اے۔ سردار اپنے علاقیاں وچ سکول تیکر نہیں کھلن دیندے اوہ ایہہ سمجھدے نیں کہ تعلیم کدھرے ایہناں دی رعایا نوں گمراہ نہ کر دیوے، اپنے علاقیاں وچ سڑکاں نہیں بنن دتی جاندیاں، کدھرے کوئی انڈسٹری نہ لگ جائے جے انڈسٹری لگ گئی تے لوکاں نوں روزگار وی مل سکدا اے جس خاندان دے بچے نوں نوکری مل گئی تے اوہ معاشی طور تے سردار دی محتاجی توں نکل گیا تے سرداری خطرے وچ پین دا خدشہ پیدا ہو جاندا اے ، ساڈے ملک دے بوہت سارے علاقیاں دی پسماندگی غربت تے محرومی دی بوہت وڈی وجہ ایہہ سرداری ای اے پر اک سردار ایس ویلے پنجاب دی وزارت اعلیٰ اُتے وی فائز اے پر ایہہ عجب سردار اے جنہوں سکول کالج یونیورسٹیاں بنان، ڈسپنسریاں ہسپتال قائم کرن، اپنے علاقیاں وچ سڑکاں بنوان لوکاں نوں روز گار دین اپنی سرداری خطرے وچ جاندی محسوس نہیں ہوندی لوکاں دی تنقید اُتے ایس دی پیشانی اُتے کوئی شکن وی نہیں آندی بلکہ الٹا مسکراندا رہندا اے، اپوزیشن دے الزامات اُتے وی ایہناں دی زبان وچ جواب دین نوں غیر اخلاقی سمجھدا اے، جی ہاں میں پنجاب دے وزیراعلیٰ سردار عثمان بزدار دی ای گل کر رہیا واں، پنجاب دے بوہت سارے لوک سمجھدے نیں کہ ایہہ غیر معروف جہیا بندا شاید کسے سفارش نال وزیراعلیٰ بنیا اے ایہنوں نہ کم کرنا ااندا اے نہ بولنا آندا اے ایہہ شاید دور دراز علاقے دا اک ان پڑھ جہیا بندا اے انج سوچن والے بوہت وڈی غلط فہمی دا شکار نیں، ڈیرہ غازی خان دی تحصیل تونسہ جنہوں یونان صغیر دے ناں توں وی جانیا جاندا اے اپنے حریت پسنداں دی وجہ نال خاص شہرت رکھدا اے تونسہ نوں یونان صغیر کوہ سلیمان اُتے وسن والے سارے قبائل دے مقابلے وچ زیادہ تعلیم یافتہ تے مہذب ہون دی وجہ نال کہیا جاندا اے تونسہ دا بلوچ بزدار قبیلہ انگریزاں دے خلاف جدوجہد تے مزاحمت دی وجہ نال وی خاص شہرت رکھدا اے بلوچ قبیلے دے جدامجد میر چاکر خاں رند نیں میر چاکر خاں، رند قبائلی جنگ و جدل توں بیزار ہو کے اوکاڑہ دے نواح وچ جا بسے سن، ایہناں دا مزار ست گرا وچ موجود اے۔ لاہور، کینال روڈ اُتے اک انڈر پاس دا ناں وی ایہناں دے ناں اُتے وے ایس قبیلے دے سردار خان بہادر پائنڈ خاںوی بوہت معروف سن۔ ایہناں دے پتر سردار عاشق خاں دے بعد سردار دوست محمد نے قبیلے دا نظم و نسق سنبھالیا سردار دوست محمد خاں نوں گہ بارتھی وچ پہلا ہائی سکول تے تونسہ ہائی وے توں بارتھی تیکر سڑک بنوان دا اعزاز وی حاصل اے۔ 1981 وچ سردار دوست محمد خان دی وفات دے بعد فیصلے دی دستار سردار فتح محمد خاں دے سر اُتے سجی، سردار فتح محمد خاں بزدار 1981 وچ مجلس شوریٰ دے رکن رہے۔ 1985ء، 2002ء تے 2005 وچ رکن پنجاب منتخب ہوئے سردار فتح محمد خان ہمیشہ اپنے لوکاں دی ترقی تے خوشحالی لئی فکر مند رہے پر شاید محدود اختیارات تے دور دراز علاقے نال تعلق دی وجہ نال تخت لہور وچ ایہناں دی خواہشات دے مطابق شنوائی نہ ہو سکی۔ پر ایہناں دی ایہناں خواہشاں نوں عملی جامہ پہنان لئی قدرت نے ایہناں دے پتر سردار عثمان بزدار نوں تخت لاہور اُتے بٹھا دتا تے فیصلیاں دا اختیار وی آپ ایہناںدے اپنے ہتھ وچ دے دتا، بزدار قبیلے دے ماضی دا احوال سنان دا صرف ایہہ مقصد سی کہ سردار عثمان بزدار اک وڈے قبیلے دے سربراہ ہون دے علاوہ اعلیٰ تعلیم یافتہ وی نیں سرداراں دے حوالے نال لوکاں دے ذہناں وچ جیہڑا تاثر اے عمومی طور تے ٹھیک ہو سکدا اے پر سردار عثمان بزدار اُتے ایہناں دے سارے اندازے غلط ثابت ہو جاندے نیں۔ قبائلی علاقیاں وچ خواتین دی تعلیم اُتے عام طور تے حوصلہ شکنی کیتی جاندی اے پر دلچسپی دی گل ایہہ وے کہ سردار عثمان بزدار دی اہلیہ وی نہ صرف اعلیٰ تعلیم یافتہ نیں بلکہ اوہ تدریس دے شعبے نال وی جڑیاں نیں، پاکستان دے سردار ی نظام دے حوالے نال لوکاں دے ذہناں وچ جنہے سوال موجود نیں سردار عثمان اُتے آ کے ایہناں سب دے جواب نفی وچ آ ندے نیں سردار عثمان بزدار اک روایت شکن سردار دے طور تے دنیا دے ساہمنے آندے نیں ایہناں دے فیصلیاں تے کماں توں محسوس ہو رہیا اے کہ پاکستانیاں وچ سرداراں دے حوالے نال جیہڑا تاثر اہ اوہ تبدیل ہو جائے گا پنجاب وچ 15 یونیورسٹیاں دے قیام اعلان کر کے سردار عثمان بزدار نے نہ صرف پنجاب وچ تعلیمی انقلاب دی بنیاد رکھ دتی اے بلکہ سردار نظام دے خلاف علم بغاوت وی بلند کر دتا اے۔ صوبیاں توں محرومیاں دا شکار جنوبی پنجاب جتھے وزرائے اعلیٰ بن دے رہے وزارت اعظمیٰ اُتے وی ایس علاقے دے قائدین نوں فائز رہن دا موقع ملیا ایتھوں تیکر کہ ایوان صدر وچ وی جنوبی پنجاب دی حکمرانی رہی پر عام بندے دی قسمت نہ بدل سک سردار عثمان بزدار نے وزارت اعلیٰ سنبھالدے ای فوکس جنوبی پنجاب اُتے کر رکھیا اے۔ جنوبی پنجاب سیکرٹریٹ دا قیام تے ایہنوں جس تیزی دے نال فعال کیتا جا رہیا اے اوہ ایس دی سنجیدگی تے انتظامی امور دے حوالے نال سمجھ بوجھ ثابت کرن لئی کافی اے جنوبی پنجاب وچ سڑکاں دا جال وچھایا جا رہیا اے جیہڑی ترقی دے نویں رستے کھول دیوے گا جنوبی پنجاب دے سرداریاں دے بوجھ تھلے عوام نوں روزگار دے کے سسٹم دے خلاف اک ہور بغاوت کر رہے نیں، 21 ویں صدی وچ جتھے انسان تے جانور اک ای ٹوبے توں پانی پیندے ہون، ایہنوں ایہناں لوکاں دی بدقسمتی تے ایہناں دے نمائندیاں دی سنگدلی ای کہیا جا سکدا اے پر عثمان بزدار نے پورے جنوبی پنجاب وچ صاف پانی منصوبہ شروع کر دتا اے۔ جنوبی پنجاب وچ سیاحتی معیشت نوں فروغ دین لئی سیاحتی مقامات دی ترقی لئی فنڈز مختص کر دتے نیں جنوبی پنجاب وچ دو ڈیم وی بنائے جا رہے نیں جیہڑے بارشاں دے پانی نوں نہ صرف فصلاں دی آبیاری لئی محفوظ بنان گے بلکہ سارا سال پین دے پانی دی قلت وی پیدا نہیں ہون دین گے ایہناں دونواں ڈیماں اُتے فوری طور تے کم شروع کیتا جا رہیا اے وزیراعلیٰ عثمان بزدار جان دے نیں کہ ایہناں ڈیماں دی تعمیر ایہناں دی موجودہ وزارت اعلیٰ دے دور وچ شاید مکمل نہ ہو سکے پر اوہ چاہندے نیں کہ ایہہ کم ایہناں دے دور وچ اینا ضرور ہو جائے کہ کوئی وی آن والا ایہنوں نامکمل چھڈن دی جرات نہ کر سکے۔ سردار عثمان بزدار دے خلاف پراپگینڈہ کرن والیاں دی اکھاں کھل جانیاں چاہدیاں نیں کہ اوہ نہ تے کوئی غیر معروف نہ ان پڑھ تے نہ ای انتظامی صلاحیتاں توں محروم اے اوہ بڑے دل دے انسان نیں جیہڑے اپنے عوام دی فلاح و بہبود تے بہتری لئی کجھ کرنا چاہندے نیں اوہ اک انقلابی سردار نیں انج پورے پاکستان دے سرداری نظام دا ایہناں دے خلاف صف آرا ہو جانا کوئی حیرانگی دی گل نہیں اوہ پاکستان دے دوجے علاقیاں وچ وسن والے سرداراں نوں اپنی اپنی عوام دی زندگی وچ آسانیاں پیدا کرن لئی عملی اقدامات چکن اُتے مجبور کر دین گے۔ پنجاب تے پنجاب دے عوام نوں کسے شاطر عیار تیز ترار وزیراعلیٰ دی نہیں عثمان بزدار جہے درویش تے عام بندے لئی ہمدردی رکھن والے، وزیراعلیٰ دی ای لوڑ سی، ایہناں نوں انج دے وزیراعلیٰ دی لوڑ سی جیہڑا ایہناں دے بالاں نوں زیور تعلیم نال آراستہ کرن دا بندوبست کرے ایہناں نوں علاج معالجے دی سہولتاں دیوے ایہناں لئی روزگار دا بندوبست کرے تے ایہناں دے جان و مان دا تحفظ یقینی بنا سکے۔