چھیتی کجھ ہون دا وڈا دعویٰ
تحریر حمیداللہ بھٹی
وطن عزیز دی سیاست کیہ رخ اختیار کرے گی؟ وثوق نال کجھ آکھنا ممکن نہیں‘ اج کل ملک وچ نواز شریف دے آن دی بحث بڑی ہو رہی اے‘ سیاستدان‘ صحافی تے حکومتی حلقے اندازے لا رہے نیں ۔ وجہ ایہ اے کہ تاحیات نااہلی دے باوجود اوہناں دا ووٹ بینک برقرار اے جہڑا جت دی سیاست کرن والے سیاستداناں لئی بہت پرکشش اے کیوں جے جت دی سیاست کرن والے انتخابی میدان وچ اترن توں پہلاں کسی مشہور جماعت دا ٹکٹ لین دی کوشش کردے نیں۔ پنجاب دے کئی ضمنی انتخابات جتن توں ایس خیال نوں مضبوطی ملی اے کہ موجودہ حکمراناں توں ودھ پچھلی حکمران جماعت دا ٹکٹ بہتر اے۔انتخابات توں پہلاں نواز شریف جے ملک واپس نہیں آندے تے پچھلی حکمران جماعت ن لیگ دی انتخابی مشکلاں واچ وادھا ہو سکدا اے۔ وجہ ایہ اے کہ جت دی سیاست اتے یقین رکھن والے سیاستدان کیوں جے کامیابی مگروں حکومتی منصب دی وی تمنا کردے نیں مگر ایہ تمنا مریم نواز دی قیادت وچ پوری نہیں ہو سکدی ایس لئی موجودہ حکمران جماعت دا ٹکٹ جت دی سیاست اتے یقین رکھن والیاں لئی اہم ہووے گا۔ جے نواز شریف ملک وچ آ جاندے نیں جہدا کجھ امکان اے تے چاہے اوہ انتخابی جلسیاں وچ شریک نہ ہون بلکہ پردے دے پچھے رہن تے مستقبل دی سیاست وچ چھیتی کجھ وڈا ہون دے دعوے اتے یقین کیتا جا سکدا اے کیوں جے بھلے حکومتی منصب نہ ملے مگر جت دی سیاست اتے یقین رکھن والیاں نوں مشہور جماعت دا ٹکٹ اپنے ول کھچ سکدا اے جہدے توں پنجاب دی حد تک کجھ وڈا ہون دا امکان ودھ سکدا اے۔
لندن توں واپس پلٹن والے ایاز صادق نے جدوں چھیتی کجھ وڈا ہون دا دعویٰ کردیاں ہوئیاں آکھیا اے کہ جو ہووے گا اوہ دھماکہ ہووے گا‘ حکومت بے سکون اے۔ خیر سیاستدان دا اپنے کارکناں نوں ایسی تسلیاں دینا نویں گل نہیں مگر وزیراعظم عمران خان ولوں نواز شریف دی نااہلی ختم کران دے رستے کڈن دی گل کرنا کجھ وڈا ہون دے دعوے نوں اہم بنا دتا۔ عمران خان نے سزا یافتہ مجرماں نوں چھڈنا ای اے تے جیلاں دے بوہے کھول دین دی گل کردیاں ہویاںحیرانگی ظاہر کیتی تے عوام الناس کولوں پچھیا کہ تن واری ملک دا وزیراعظم رہن والا اک سزا یافتہ بندا کیویں چوتھی واری ملک دا وزیراعظم بن سکدا اے؟ ممکن اے عمران خان نے پچھلے وزیراعظم دی نااہلی ختم کران دا سنیہہ موجودہ سپریم کورٹ بار ایسوسی ایشن دے صدر احسن بھون دے ایس بیان توں لیا ہووے جہدے وچ اوہناں نے آکھیا کہ کسی عدالت نوں ایہ حق حاصل نہیں کہ اوہ کسی نوں تاحیات نااہل کرے۔ بقول اوہناں دے ایس حوالے نال اوہناںنے چیف جسٹس سپریم کورٹ نال گل کرلیتی اے۔ اوہناں نے تاحیات نااہلی اتے نظرثانی دی درخواست دائر کرن دا وی عندیہ دتامگر عمران خان نوں کیہ ہو گیا اے کہ اک گل توں ای ہتھ پیر پھل گئے نیں۔ ویسے شاید اوہناں نوں پتہ ہووے کہ وطن عزیز وچ کجھ وی ناممکن نہیں۔ ذوالفقار علی بھٹو دے دور حکومت وچ نیشنل عوامی پارٹی نوں کالعدم قرار دے کے سارے وڈے عہدیداراں نوں گرفتار کر لیتا گیا جہدی سپریم کورٹ نے وی تائید تے تصدیق کیتی فیر سیاسی حالات تبدیل ہووے تے گرفتار سارے سیاسی رہنما نہ صرف جیلاں وچوں رہا ہووے بلکہ کجھ تے ضیاء الحق دی کابینہ وچ وزیر وی بنے۔ اجے حال ای وچ توڑ پھوڑ دی بنا تے کالعدم ہون والی ٹی ایل پی نوں قومی دھارے وچ لیان دی آڑ وچ حکومت نے نہ صرف بطور سیاسی جماعت تسلیم کیتا بلکہ اتحاد بنان لئی سلسلہ جنبانی وی شروع کر رکھیا اے مگر عمران خان حریف جماعتاں دی قیادت بارے انتہائی سخت رویہ رکھدے نیں‘ اوہناں دا سخت رویہ ای اپوزیشن نوں متحد رکھن دی وڈی وجہ اے۔
موجودہ حکومت ایسی کجھ خاص کارکردگی دا مظاہرہ نہیں کر سکی جہنوں کجھ وڈا ہون نال تعبیر کر سکیے مگر کیہ واقعی واپوزیشن کجھ وڈا کرن دی وپزیشن وچ اے؟ جے نواز شریف دی ملک وچ آمد دے حوالے نال جواب دیے تے نواز شریف دا فوری طور تے آنا ممکن نہیں حالانکہ برطانیہ وچ رہائش دی توسیع واسطے دتی گئی درخواست مسترد ہو چکی ہون مگروں ہن اپیل زیر سماعت اے جہدے بارے اکثر قنونی ماہرین دا آکھنا اے کہ اپیل وی مسترد ہون دا قوی امکان اے جہدے مگروں ملک واپسی دے سوا چارہ نہیں۔ دوجا ایہ کہ نواز شریف دے پاسپورٹ دی مدت جنوری وچ ختم ہو رہی اے جہدے وچ توسیع یا نویں دے اجرا دے امکان وی گھٹ اے۔ ایس صورت وچ کسی ہور ملک وچ جانا وی محال اے۔ ایسے لئی واپسی دی خبراں وچ صداقت نہ ہون دے باوجود پوری طرحاں جھٹلایا وی نہیں جا سکدا۔ جتھوں تک پی پی تے ن لیگ ولوںڈیل دا شور اے۔ آصف زرداری نے ایہ کہہ کے فارمولے والے ملک نوں موجودہ بھنور توں کڈن لئی اوہناں کولوں مدد لین آئے سن جہدے اتے اوہناں نے پہلے عمران خان نوں کڈن دی شرط رکھی اے۔ ڈیل دے تاثر نوں ودھایا مگر عملی طورتے اجے ایسا کجھ نہیں۔ ویسے ایتھے سوال ایہ اے کہ کیہ عمران خان کولوں سارے خوش نیں؟ ظاہر اے نہیںدے سوا کوئی ہور جواب ہو ای نہیں سکدا۔ جہدے ذمہ دار وزیراعظم دے سوا کوئی ہور نہیں مگر ڈیل یا ڈھیل دی گلاں فی الحال بعیدالقیاس نیں۔
باخبر ہون دے دعویدار سلیم صافی نے حال ای وچ سماجی رابطے دی ویب سائٹ ٹویٹر اتے اعلان دی صورت وچ خبر لائی: اک ضروری اعلان سنئے نواز شریف جنوری وچ پاکستان آن دا منصوبہ بنا رہے نیں۔ منصوبے دے مطابق واپسی اتے جیل جان گے۔ فیر عدالتاں کولوں ریلیف تے پچھلی سزاواں دے خاتمے دی اپیلاں ہون گئیاں۔ اوہناں نے ڈی جی نیب لہور دے تبادلے نوں ایسے سلسلے دی کڑی قرار دیندیاں ہوئیاں لکھیا اے کہ نواز شریف وی سکرپٹ کولوں مطمئن نیں۔ اعلان ختم ہویا: مگر دل اتے ہتھ رکھ کے دسو کیہ ایہ اینا ای آسان اے؟ ویسے اعلان کرن والے صحافی تے آصف زرداری دی اسلام آباد وچ ہون والی ملاقاتاں نوں وی ڈیل دا حصہ آکھ چکے نیں مگر کجھ حلقیاں دی گلاں دے دوران موجود کڑواہٹ توں ایس طرحاں دے دعویاں اتے یقین کرن نوں دل نہیں مندا۔
منی بجٹ دی صورت وچ حکومت نوں جہڑا چیلنج درپیش اے ڈیل توں ودھ ایس توں کجھ کی کافی کجھ وڈا ہون دا امکان اے کیوں جے حکومت لئی پارلیمنٹ کولوں منظور لینا اوکھا ہووے گا۔ وزیر خزانہ شوکت ترین 12جنوری توں پہلے عالمی مالیاتی ادارے آئی ایم ایف نال کیتے وعدے پورے کرن لئی پرعزم نیں مگر انتخابات دی منزل کول ہون توں کوئی سیاستدان مہنگائی ودھان وچ حصہ دار بن کے ووٹراں نوں ناراض کرن دا متحمل نہیں ہو سکدا۔ ایس لئی 28دسمبر نوں حکومت ترمیمی فنانس بل قومی اسمبلی وچ پیش کرے تے ممکن اے کجھ اتحادی سیاسی راہواں وکھ کر لین۔ حکومت نے اک رب پنج کروڑ دی قسط دے عوض کافی سخت شرطاںتسلیم کیتیاں نیں جہناں دا کسی صورت دفاع نہیں کیتا جا سکدا کیوں جے 350 ارب ٹیکس چھوٹ دے خاتمے نال ملک وچ مہنگائی داطوفان آ جاوے گا جہدے توں عوام سیاسی اشرافیہ اتے غضبناک ہو سکدی اے۔
اسمبلی اراکین‘ وزیراں‘ مشیراں تے دوجے حکومتی عہدیاں اتے فائز شخصیات دی مراعات قائم رکھدیاں ہویاں سارا بوجھ براہ راست عوام نوں منتقل کرنا دانشمندانہ فیصلہ نہیں۔ پچھلی حکومتاں نے وی قرضے لیتے مگر کسی نے وی اسٹیٹ بینک نوں عالمی ادارے دے تابع نہیں بنایا۔ موجودہ حکومت نے ایہ حماقت وی کردتی جہدے مگروں وی ایہ توقع رکھنا کہ حکومت دے خلاف کجھ وڈا نہیں ہو سکدا حالات توں چشم پوشی دے مترادف ہووے گا۔
