مسیتاں دی تھاں پارکاں دی بحالی

جمیل احمد پال

سپریم کورٹ نے اک تواریخی فیصلا دتا اے۔ کراچی دیاں دو مسیتاں دی اساری دے اجازت منسوخ کردے ہویاں مسیتاں دی تعمیرات ختم کر کے پارکاں دی زمین بحال کرن دا حکم دتا اے تے شہری انتظامیانوں اک ہفتے وچ رپورٹ پیش کرن دا حکم دتا اے۔ فاضل چیف جسٹس ہوراں ریمارکس دتے کہ کسے نوں اختیار نہیں کہ پارک دی تھاں کسے نوں لیز اتے دیوے یاں فیر مسیت بنان دا لایسنس جاری کرے۔ اوہناں نے آکھیا کہ ایہ عبادت گاہواں نہیں رہایشاں نیں۔ نہ بجلی دا بل دیندے نیں نہ کوئی ہور بل۔ زمین اتے قبضا کرنا ہووے تاں قبر بنا کے جھنڈے لا دیندے نیں۔ ایس فیصلے پاروں ہل پارک دی الفتح مسجد تے طارق روڈ دی مدینہ مسجد دیاں اساریاں مکن گیاں۔
ایس تواریخی فیصلے دے نتیجے وچ نہ نرا پارک بحال ہوون گے سگوں سرکاری زمین اتے قبضے تے مل ماری دے ماڑے کارے نوں وی ڈھا لگے گی۔ دیس اندر زمیناں خاص کر سرکاری زمیناں اتے قبضے تے ملماری دا رحجان ودھدا جا رہیا اے۔ سرکاری زمین اتے قبضے لئی مذہبی طریقا ورتیا جاندا اے۔ جاہل لوکاں دی ذہنیت نوں ساہمنے رکھدے ہویاں یاں تے کوئی قبر تے مزار اسار دتا جاندا اے یاں فیر مسیت دی اساری کیتی جاندی اے۔ مرلا دو مرلے تھاں اتے قبضے دے بعد ایہ رقبا ودھدا چلا جاندا اے تے اک دن آوندا اے کہ کئی کنال جنی اتے قبضا ہو چکیا ہوندا اے۔ ایس قبضے نوں ختم کرانا حکومت دے وس دی گل نہیں ہوندی کیوں جے قبضے لئی مذہبی کارڈ ورتیا جاندا اے تے سرکاری رِٹ دی بحالی نوں مذہبی مسئلا بنا دتا جاندا اے۔ کئی واری لوک اجہی مل ماری تھاں اتے سرکار دے مقابلے اتے آ جاندے نیں تے قبضا کیتی رکھدے نیں۔
مذہب دی بنیاد ای اجہے استحصال دا خاتما اے پر بڑی دیدا دلیری نال غیر قانونی قبضے دی تھاں اتے مذہبی اساریاں کر کے مذہب دی روح نوں وی خراب کیتا جاندا اے۔ جہالت بھرے سماج اندر لوکائی نوں ایہ پتا ای نہیں کہ غیرملکیتی تے قبضا کیتی تھاں اتے مسیت دی اساری نرا غیر قانونی ای نہیں مذہبی طور اتے وی منع اے۔ انج مذہب دا ناں استعمال کر کے مذہب دے خلاف کم کیتا جاندا اے۔
ریلوے خاص کر اجہے قبضے دا نشانا بنی اے جہدیاں زمیناں اتے پورِیاں پورِیاں کالونیاں تے محلے اسارے جا چکے نیں تے بعض تھاواں اتے رجسٹریاں وی ہو گئیاں نیں۔ ایہدے وچ سیاسی پارٹیاں دے کجھ سیاستداناں دا وی ہتھ اے جہناں نے اپنے اقتدار سمے کچیاں وستیاں دے واسیاں نوں رجسٹریاں دے کے اپنے ووٹ بینک پکے کیتے۔
کجھ وی ہووے غیر قانونی قبضے دے رحجان نوں روکن لئی سختی نال نبڑنا بہت ضروری اے۔ سپریم کورٹ دے اپروکت فیصلے نال ایس معاملے وچ بہت مدد ملے گی۔ سرکار نوں وی ایس فیصلے نوں بنیاد بنا کے ہتھ پیر ہلانے چاہیدے نیں تے سرکاری زمیناں واگزار کرانیاں چاہیدیاں نیں۔ اوہناں سرکاری کارندیاں خلاف وی کارروائی ضروری اے جہڑے پیسے کھا کے اجہیاں اساریاں دی اجازت دے دیندے نیں۔٭٭