بابر‘ رضوان تے فاطمہ ایوارڈ دی دوڑ وچ شامل

حافظ محمد عمران

انٹرنیشنل کرکٹ کونسل نے سال دے بہترین ٹیسٹ کرکٹراں دی نامزدگی کردیاں ہویاں پاکستان دے شاہین آفریدی نوں حیران کن طور تے نظرانداز کیتا اے۔ شاہین آفریدی نوں نظرانداز کیتے جان تے پاکستان وچ شائقین کرکٹ خاصے حیران نیں۔ انٹرنیشنل کرکٹ کونسل ولوں ایس ایوارڈ لئی نامزد کیتے گئے کھیڈاریاں وچ شاہین آفریدی توں گھٹ وکٹاں لین والے کھیڈاری وی شامل نیں۔ شاہین آفریدی سال بھر بہترین بائولنگ کردے رہے۔ اوہ دنیائے کرکٹ وچ تیزی نال انپا مقام بنا رہے نیں۔ ہر طرحاں دی کرکٹ وچ بہترین بائولنگ کر رہے نیں۔ایہو وجہ اے کہ ماہرین اوہناں نوں اک وڈے تے کامیاب کھیڈاری دی حیثیت نال ویکھ رہے نیں۔ شاہین آفریدی دی دو ہزار کیس وچ ٹیسٹ وکٹاں دی گنتی 47اے لیکن اوہدے باوجود اوہ سال دے بہترین ٹیسٹ کرکٹر دے ایوارڈ دی دوڑ وچ شامل نہیں نیں۔ ایس فہرست وچ انگلینڈ دے کپتان جوروٹ‘ بھارت دے آف سپنر روی چندرن ایشون‘ نیوزی لینڈ دے کائیل جیمی سن تے سری لنکا دے ویمتھ کرونارتنے بھی شامل نیں۔ انگلینڈ دے کپتان روٹ نے چھ سینچریاںدی مدد نال پندرہ میچاں وچ 17سو توں ودھ سکور بنائے جد کہ ایشون اٹھ میچاں وچ 52کھیڈاریاں نوں آئوٹ کرن دے علاوہ 337سکور وی بنان وچ
کامیاب رہے۔ سری لنکا دے بیٹر ویمتھ کورونارتنے ست میچاں وچ 902 سکور بنا کے ایوارڈ دی دوڑ وچ شامل نیں۔ کیوی ال رائونڈر کائیل جیمی سن دی نامزدگی اتے وی سوال اٹھ رہے نیں کیوں جے جیمی سن صرف پنج میچاں دی کارکردگی اتے سال دے بہترین کھیڈاریاں دی دوڑ دا حصہ نیں۔ اوہناں نے 27وکٹاں حاصل کرن دے نال نال 105سکور وی بنائے۔ ایس فہرست وچ شاہین آفریدی دے نہ ہون توں نامزدگی اتے سوال اٹھ رہے نیں۔ شاہین آٰریدی تے میچاں وچ 47وکٹاں حاصل کرن دے باوجود نظر انداز ہوئے نیں۔ انٹرنیشنل کرکٹ کونسل نے ون ڈے لئی سال دے بہترین کھیڈاریاں وچ پاکستان دے کپتان بابراعظم‘ بنگلہ دیش دے شکیب الحسن‘ جنوبی افریقہ دے ینامن ملان تے آئرلینڈ دے پال سٹرلنگ نوں شامل کیتا اے۔ ٹونٹی ٹونٹی پلیئر آف دی ائیر دی نامزدگیاں وچ قومی ٹیم دے بیٹر محمد رضوان وی شامل نیں۔ا وہناں دے نال دوجے کھیڈاریاں وچ انگلینڈ دے جوز بٹلر‘ سری لنکا دے ہسارنگا تے آسٹریلیا دے مچل مارش نوں وی نامزد کیتا گیا اے۔ انٹرنیشنل کرکٹ کونسل ولوں وومن کرکٹر آف دی ائیر دی نامزدگیاں دا اعلان وی کیتا گیا اے۔ پاکستانی کرکٹر فاطمہ ثنا دے نال انگلینڈ دی بیونٹ‘ آسٹریلیا دی اوزیلی‘ ویسٹ انڈیز دی ہیلے میٹھیوز شامل نیں۔ شاہین آفریدی نوں نامزد نہ کیتے جان تے پاکستان کرکٹ ٹیم
دے پچھلے کپتان سلمان بٹ آکھدے نیں کہ ’’سال بھر بہترین کرکٹ کھیڈن تے وکٹاں حاصل کرن دے باوجود شاہین آفریدی دا ناں نامزد نہ ہونا حیران کن اے۔ جہناں کھیڈاریاں دے نام سامنے آئے نیں اوہناں نوں ویکھدیاں ہویاں ایہ آکھیا جا سکدا اے کہ ایس طریقہ کار وچ بہترین دی گنجائش موجود اے۔ ایس حوالے نال گل کردیاں ہویاں دلائل دتے جا سکدے نیں۔ ایہ درست اے کہ نیوزی لینڈ نے ورلڈٹیسٹ چیمپئن شپ دا فائنل کھیڈیا۔ جے معیاری کرکٹ یا فیر میچ وننگ پرفارمننس نوں بنیاد بنایا جاندا اے تے فیر جوروٹ دی نامزدگی اتے سوال اٹھے گا کیوں جے انگلینڈ دی کارکردگی آسٹریلیا وچ نہایت خراب رہی‘ اوہ ہارتے رہے ایسے طرحاں انگلینڈ نوں اپنے میداناں اتے بھارت دے خلاف وی نکامی دا سامنا کرنا پڑا۔ ایہدے وچ کجھ شک نہیں کہ جوروٹ بہترین کرکٹر نیں۔ اوہناں نے بہت سکور کیتے نیں۔ جے بوہتے سکور معیار نیں تے فیر شاہین آفریدی دی بوہتی وکٹاں نوں وی ایسے پیمانے اتے ویکھیا جانا چاہیدا اے۔ جے پاکستان نوں نسبتاً مضبوط ٹیماں دے خلاف ٹیسٹ کرکٹ کھیڈن دا موقع نہیں لدا تے ایہدے وچ ساڈے کرکٹراں دا کیہ قصور اے۔ پاکستان نوں جتھے کرکٹ ملدی اے‘ جیسی کرکٹ ملدی اے۔ ساڈے کرکٹرز اپنی صلاحیتاں دا لوہا منوا رہے نیں۔ ایس حوالے نال کم کرن دی لوڑ اے۔ ایوارڈاں دی نامزدگی لئی پالیسی واضح ہونی تے ایہدے وچ کوئی ابہام نہیں ہونا چاہیدا اے۔ کوئی وی طریقہ کار ہووے وضاحت دے نال کھیڈاریاں‘ ماہراں تے شائقین نوں علم ہونا چاہیدا اے کہ کہڑی ٹیم دے خلاف بہتر کھیڈ کے کیہ پوائنٹس اے۔ میچ وننگ کارکردگی دے پوائنٹس کیہ ہون گے تے کسی کھیڈاری دی انفرادی کارکردگی نال ٹیم نوں فیدہ نہیں ہوندا تے ایہنوں کس انداز نال ویکھیا جاوے گا۔ شاہین آفریدی دی وکٹاں وی گھٹ نہیں نیں جد کہ حسن علی دی وکٹاں دی گنتی نوں وی نظرانداز نہیں کیتا جا سکدا۔ سپورٹس اینکر مرزا اقبال بیگ آکھدے نیں کہ ماضی وچ وی آئی سی سی ایوارڈز وچ پاکستانی کھیڈاریاں نوں نظرانداز کیتا جاندا رہیا اے۔ تاثر ایہ وی اے کہ پاکستان دے انٹرنیشنل کرکٹ کونسل دے نال تعلقات چنگے نہیں نیں۔ تعلقات دی خرابی دی وجہ نال ایوارڈز دے معاملے وچ پاکستانی کھیڈاریاں نوں نقصان ہوندا اے۔ ہن رمیز راجا آئے نیں۔ ویکھنا ایہ اے کہ اوہناں دی آمد نال آئی سی سی وچ پاکستان دے تعلقات بہتر ہوندے نیں یا نہیں۔ شاہین آفریدی دی کارکردگی نوں ویکھیا جاوے تے اوہناں نوں چار کھیڈاریاں وچ ضرور شامل ہونا چاہیدا سی۔ شاہین نے سارا سال بہترین بائولنگ کیتی۔ کائیل جیمی سن دی ورلڈ ٹیسٹ چیمپئن شپ بائولنگ نوں ویکھ کے برتری ضرور دتی جا سکدی اے لیکن شاہین آفریدی دی وکٹاں دی گنتی جیمی سن توں بوہتی اے۔ صرف ایہ کہہ دینا وی مناسب نہیں کہ اسیں نسبتاً کمزور ٹیماں دے خلاف کھیڈے نیں۔ ایہدے وچ شاہین آفریدی دا تے کوئی قصور نہیں‘ شاہین آفریدی نے تے ٹونٹی ٹونٹی ورلڈکپ وچ بھارت دے ٹاپ آرڈر نوں اڑا دتا سی۔ جے موقع ای نہ ملے تے کھیڈاری کیہ کر سکدا اے‘‘۔
آئی سی سی دے ایوارڈز دی بہرحال اپنی اہمیت اے۔ ایہدے وچ بعض اوقات تعلقات دا عمل دخل وی ہوندا اے۔ ایس پہلو نوں نظرانداز نہیں کیتا جا سکدا لیکن ساری شیواں نوں اک پاسے رکھدیاں ہویاں گل کیتی جاوے تے کوئی شک نہیں کہ پاکستان کھیڈاریاں دا اپنا اک منفرد مقام اے۔ اوہ دنیا بھر دے شائقین نوں کھیڈ تے میدان ول کھچن دی خداداد صلاحیتاں دے مالک نیں۔ ایہ صلاحیتاںکوئی بورڈ کوئی عالمی تنظیم نہیں دے سکدی۔