کرونا وائرس تے وفاقی حکومت دی تیاری

لکھت: اعجازعلی ساغر

دسمبر 2019وچ کرونا وائرس دی تشخیص ہوئی ایسے وجہ توں ایہنوں ’’ناول کرونا وائرس2019‘‘ دا ناں دتا گیا اے ووہان صوبے توں شروع ہون والے ایس وائرس نوں عالمی میڈیا نے ایناں اچھالیا کہ محسوس ہوندا اے کہ آئندہ سب توں ودھ موتاں کرونا وائرس نال ای ہون گیاں۔ چین توں شروع ہون والے کرونا وائرس نے پورے چین نوں ہلا کے رکھ دتا تے کجھ ای دن وچ ایس وائرس نال 270بندے مر گئے ایس وائرس نے چائنہ سنے پوری دنیا وچ دہشت پھیلا دتی اے ایہدا دائرہ کار 22ملکاں تک اپڑ چکیا اے جہدی وجہ توں دنیا دے کافی ملکاں نے چائنہ لئی اپنی ایڈوائزری تبدیل کر دتی اے خاص کر امریکہ، برطانیہ تے روس ایہدے وچ پیش پیش نظر آندے نیں ایہ وائرس جانوراں توں شروع ہویا ایہدی ابتدا چائنہ دے صوبے ووہان توں شروع ہوئی جہڑی ویکھدیاں ای ویکھدیاں پوری دنیا وچ پھیل گئی۔ دسمبر 2019 وچ شروع ہون والے ایس وائرس دی جیویں ای تشخیص ہوئی تے پوری دنیا الرٹ ہو گئی ایس حوالے نال پاکستان نے وی ہنگامی اقدامات کردیاں ہوئیاں چائنہ توں آن والے شہریاں دی تشخیص شروع کر دتی تے ایئر پورٹاں تے وکھرے سنٹرز قائم کر دتے گئے ایس حوالے نال وزیراعظم پاکستان عمران خان نے معاون خصوصی ڈاکٹر ظفر مرزا نوں ساریاں صلاحیتاں تے وسائل بروئے کار لیاندیاں ہوئیاں پاکستانیاں نوں ایس وائرس توں بچان دی ہدایت کیتی ڈاکٹر ظفر مرزا نے ایس حوالے نال بیک ٹو بیک پریس کانفرنساں کردیاں ہوئیاں پوری قوم نوں بریف کردیاں ہوئیاں قوم نوں ایہ خوشخبری دتی کہ وزیراعظم ولوں ہنگامی بنیاداں تے اقدامات کرن دے بعد الحمد للہ پاکستان وچ ایس وائرس دا کوئی مریض ساہمنے نہیں آیا چین وچ 500توں 800دے وچکار پاکستانی موجود نیں ایہناں وچوں چار پاکستانیاں وچ ایس وائرس دی تشخیص ہو گئی اے۔ وزیراعظم پاکستان عمران خان دی ہدایت دے بعد اوہناں دی فیملیاں نال رابطہ کیتا گیا تے اوہناں نوں تسلی دتی گئی تے یقین دہانی کرائی گئی کہ وزیراعظم پاکستان تہانوں کلیاں نہیں چھڈن گے چائنہ وچ تعینات سفیر نوں اوتھے موجود پاکستانیاں دی ہر ممکن مدد دی ہدایتاں وی دتی گئیاں نیں معاون خصوصی برائے صحت ظفر مرزا نے میڈیا توں اپیل کیتی کہ جہڑے پاکستانیاں وچ ایس وائرس دی تشخیص ہوئی اے اوہناں دی شناخت نوں ظاہر نہ کیتا جاوے تے جے کسے نوں اوہناں دا یاں اوہناں دے خاندان دا پتہ لگ وی جاوے تے اوہناں نوں پبلک نہ کیتا جاوے ایس حوالے نال مشیر صحت نے دسیا کہ ایس وائرس توں احتیاط دی لوڑ اے کرونا وائرس دی علامتاں دے حوالے نال وی آگاہ کیتا گیا ایہدی علامتاں نزلہ ، زکام، کھانسی، فلو تے بخار دی صورت وچ ظاہر ہوندی اے ایہدے متاثرہ بندے نوں تیز بخار ہوندا اے تے کپکپی طاری ہو جاندی اے ایس لئی ایہدے توں بچاؤ لئی احتیاط ضروری اے ایسے طرح ایہدے نال رلدا ملدا بخار نائیجیریا وچ وی ظاہر ہویا اے جہدے نال 42بندے مرے تے 307بندے ایہدے توں متاثر ہوئے نیں ایس بخار نوں لاسا بخار دا ناں دتا گیا اے کرونا وائرس پھیلدیاں پھیلدیاں عرب ریاستاں تک اپڑ چکیا اے۔ متحدہ عرب امارات وچ وی کرونا وائرس دے 11مریض ساہمنے آ گئے نیں امریکہ تے روس سنے وڈے ملکاں نے چین نال اپنی سرحداں بند کر دتیاں نیں۔ اک محتاط اندازے دے مطابق چین وچ 12ہزار توں ود ھ بندیاں وچ کرونا وائرس دی تصدیق ہو چکی اے چائنہ نے ایس وائرس دے خلاف ڈھیر فائٹ کیتی اے تے کجھ ای دن وچ کرونا وائرس دے مریضاں لئی اک وکھرا ہسپتال بنا دتا اے تے ہور ہسپتال بنان وچ وی مصروف اے ایس وائرس دے خلاف سوشل میڈیا تے وی ٹاپ ٹرینڈ بن چکے نیں تے افواہواں دا وی بازار گرم اے۔ مغربی میڈیا دی ویکھا ویکھی پاکستانی میڈیا وی ایس شورش نوں ہوا دے رہیا اے تے اوہ مغربی میڈیا دا ماتھ پیس بنیا ہویا اے ایس حوالے نال وکھو وکھ آرا ساہمنے آ رہیاں نیں۔ اک برطانوی پادری رک وائلز جو کہ امریکی ریاست فلوریڈا وچ اک چرچ دے پادرے تے اک نیوز چینل (ٹرونیوز) دے بانی نیں، نے ایس وائرس نوں چائنہ تے اللہ دا عذاب آکھیا اے ایسے طرح ایہ گل وی ساہمنے آ رہی اے کہ چونکہ چینی لوک چوہے تے چمگادڑاں وغیرہ زندہ کھا جاندے سن تے سی فوڈز دا زیادہ استعمال ایس وائرس دے پھیلن دی وجہ بنیا اے۔ اک تحقیق دے مطبق چمگادڑ تے چوہے وچ ایس وائرس دی تشخیص ہوئی اے۔ ایس حوالے نال پھیلائی گئی گلاں دا براہ راست فائدہ کِنوں ہووے گا ایہ پوری دنیا توںلُکیا نہیں اے۔ امریکہ، برطانیہ تے روس سنے سارے مغربی ملکاں نوں اپنی اجارہ داری خطرے وچ نظر آ رہی اے کیوں جے چائنہ نے اپنی بے پناہ ترقی دی وجہ توں سارے مغربی ملکاں نوں مات دے دتی اے چائنہ نے ون بیلٹ ون روڈ بنا کے کئی ملکاں نوں آپس وچ جوڑ دتا اے تے چائنہ دا ناں بے پناہ ترقی دی وجہ توں اگلی سپر پاور دے طور تے لیا جا رہیا اے تے ایہ گل امریکہ بادشاہ نوں بھلا ہضم ہو سکدی اے کہ دنیا دی بادشاہت مغرب توں مشرق منتقل ہووے تے چائنہ ورگا ملک سپر پاور بنے ایس لئی قیاس آرائیاں کیتی جا رہیاں نیں کہ شاید ایہ امریکہ تے مغربی ملکاں دی کارستانی ہو سکدی اے۔ مشیر صحت تے وزارت خارجہ نے ایس حوالے نال دسیا اے کہ چائنہ وچ ایس وائرس دا بہترین علاج ہو رہیا اے ایس لئی ایس حوالے نال جلدی بازی نہیں کراں گے اوتھے موجود سارے پاکستانی اوتھے رہن گے تے پاکستانی سفارتخانہ چینی حکام دے نال لمحہ بہ لمحہ اوتھے موجود پاکستانیاں نال رابطے وچ رہوے گا تے پوری قوم نوں وی ایہدے توں آگاہ رکھیا جاوے گا، ایس حوالے نال اک حدیث مبارکہ دا ذکر وی کراں گا کہ جہڑی تھاں کسے بیماری یاں وباء دا احتمال ہووے تے اوتھے نہ جاؤ جے اوتھے موجودہووے تے فیر اوتھوں نہ نکلو۔ پاکستان کرونا وائرس دے حوالے نال ساری احتیاطی تدابیر دے پیش نظر جے کوئی وی چائنہ توںپاکستان آوے گا تے اوہناں نوں 14دن انڈر ابزرویشن رکھیا جاوے گا تے جدوں تک اوہناں دے حوالے نال تسلی نہیں ہو جاندی اوہناں نوں باہر نہیں جان دتا جاوے گا۔ وزیراعظم عمران خان نے واضح طور تے آکھیا اے کہ اوہ اپنے منشور تے قوم نال کیتے ہوئے وعدیاں دے مطابق ہر پاکستانی دے جان ، مال تے صحت دے ضامن نیں تے ایہ ریاست ہر پاکستانی دا ایس طرح خیال رکھے گی جیویں اک ماں اپنے بالاں دا خیال رکھدی اے ۔ وزیراعظم پاکستان عمران خان تے تحریک انصاف اپنے ویژن نوں نہیں بُھلن گے ایہدے علاوہ اسیں چین دے نال کھڑے آں ۔ ایس حوالے نال مشیر اطلاعات نے دسیا کہ پاکستان چین دے نال موڈھے نال موڈھا ملا کے کھڑا اے تے سانوں خدشہ اے کہ ایہ چائنہ دے خلاف بائیو لوجیکل جنگ اے جہدے وچ پاکستان ہر طرح نال چائنہ دی حمایت کرے گا۔ چونکہ چائنہ نے پوری دنیا دی معیشت تے ٹیکنالوجی نوں مات دے دتی اے مغربی میڈیا بشمول ساڈے میڈیا دے چائنہ وچ پھیلے ایس وائرس نوں ایس طرح اچھال رہیا اے جیویں ایہ سب توں وڈا وائرس ہووے تے ایس لئی لاک ڈاؤن دا لفظ استعمال کر رہیا اے۔ لاک ڈاؤن دا مطلب کہ جتھے ہنگامی حالات ہون امن دی صورتحال خراب ہووے تے تھاں تھاں فوج تعینات ہووے پر جے کدھرے وباء پُھٹ جاوے تے ایہدے لئی قرنطینہ دا لفظ استعمال کیتا جاندا اے جہدا مطلب ہوندا اے کہ اوہ تھاں جتھے وباء پھوٹی اے ایہنوں سیل کر دتا جاوے تاں جے ایہدے توں کوئی دوجا متاثر نہ ہووے۔ ہن تسیں آپ سمجھ لوو کہ لاک ڈاؤن تے قرنطینہ دے لفظ وچ کناں فرق اے۔ دسمبر وچ امریکہ وچ انفلوئنزا (فلور دی زکام دی اک قسم) دی وباء نے پورے امریکہ وچ تباہی مچا دتی ایس بیماری نال 11ملین بندے متاثر ہوئے تے 882بندے مرے۔ مغربی میڈیا سی این این تے بی بی سی نوں اوہ 882بندے تے نظر نہیں آ رہے پر ایہ 270بندے نظر آ گئے جہدے تے واویلا مچایا جا رہیا اے ایہنوں بائیو وار دا وی ناں دتا جا رہیا اے بائیو وار دا مطلب اے کہ کسے وی علاقے یاں ملک وچ وباء پھیلا دتی جاوے تے فیر اوہدی ویکسین بنا کے پیسے کمائے جان ایس طرح پچھلے ادوار وچ جدوں کسے نوں کمزور کرنا ہوندا تے اوہناں دے پانی وچ زہر ملا دتا جاندا یاں اوہناں دی فوج وچ وباء پھیلا دتی جاندی جہدے نال اوہ دشمن کمزور ہو جاندا پر بعد وچ اک عالمی معاہدے دے تحت اجہے ہتھکنڈیاں توں روک دتا گیا۔ جدوں توں ایہ وائرس پھیلیا اے سوشل میڈیا وچ طوفان برپا ہو گیا ساڈی قوم پولیو دے ایس وجہ توں خلاف اے کہ ایہدے نال مردانہ طاقت گھٹ ہو سکدی اے حالاں جے ہر تیجی دیوار تے مردانہ کمزوری دا اشتہار لگیا ہوندا اے جیویں پوری چینی قوم لڑ رہی اے ایسے طرح سانوں وی اک قوم بننا اے ساڈی ووہان دی اک یونیورسٹی وچ ایم بی بی ایس دے طالب رضوان ارشد نال گل ہوئی اوہنے دسیا کہ پاکستانی حکومت، سفارتخانہ تے چینی حکومت ساڈے نال پورا تعاون کر رہی اے۔ سانوں کٹس تے تھرما میٹر دتے گئے نیں ساڈا ٹمپریچر روزانہ چیک کیتا جاندا اے تے لیکچرز دتے جاندے نیں یونیورسٹی دے باہر دو دکاناں کھلوائی گئیاں نیں جتھوں اسیں سودا سلف تے سبزیاں لینے آں میں سارے پاکستانیاں نوں کہنا چاہنا آں کہ پاکستانی حکومت سانوں ہر طرح دی سہولتاں فراہم کر رہی اے ایس لئی تسیں سارے مطمئن رہو۔ ایسے طرح باقی کجھ طالب علماں نال وی گل ہوئی تے اوہناں نے وی وفاقی حکومت تے اسپیشلی عمران خان دا شکریہ ادا کیتا کہ ایس مشکل دی گھڑی وچ ساڈے وزیراعظم نے سانوں کلیاں نہیں چھڈیا تے سانوں ہر طرح دی سہولتاں فراہم کیتیاں۔ پاکستان وی ایس کرونا وائرس دے خلاف الرٹ اے وزیر صحت نے واضح طور تے آکھیا اے اسیں مکمل طور تے تیار آں کٹس وغیرہ وی منگوا لئیاں نیں تے وکھرے توں ایس وائرس لئی سنٹرز قائم کر دتے نیں تے کسے وی ممکنہ وباء یاں بیماری دی صورت وچ وفاقی حکومت پوری طرح تیار اے۔