2022نواں سال، نویں چیلنج، نویں اہداف

افضل افتخار

نویں سال 2022ایس امید دے نال شروع ہو چکیا اے کہ ایس سال ملک وچ کھیڈاں نوں اگے ودھایا جاوے گا۔کھیڈاں نال جڑی اعلیٰ شخصیات ایس حوالے نال اچے اچے دعوے تے کر رہی اے مگر عملی طور تے نتیجہ کیہ رہندا اے ایہ تے ویلا ای ثابت کرے گا۔ قومی کھیڈ ہاکی‘ فٹ بال‘ ٹینس‘ بیڈمنٹن‘ باکسنگ‘ سوئمنگ‘ ٹیبل ٹینس سنے دوجی فیڈریشناں وی نویں سال نویں عزم دے نال میدان وچ عمدہ پرفارمنس دین لئی تیار نیں تے اپنے اپنے کھیڈاں دی ترقی لئی دعوے کر رہیاں نیں۔ ہن ویکھنا ایہ اے کہ ایس سال ایہناں کھیڈاں دی ترقی لئی جہڑے دعوے کیتے گئے نیں اوہناں دی حقیقت کیہ اے تے کیہ ایہ سال ایہناں کھیڈاں دی ترقی لئی چنگا ثابت ہووے گایا فیر پچھلے سال وانگوں اس واری وی کجھ ہتھ نہیں آوے گا۔ نواں سال نواں جذبہ تے عزم بہت چنگی گل اے مگر ایہدے نال نال عملی طور تے وی اقدامات بہت ضروری نیں جد کہ پاکستان کرکٹ بورڈ نے ایس سال پاکستان سپرلیگ دا مکمل انعقاد پسکتان وچ کرن دا اعلان کیتا اے تے کورونا دا چیلنج وی درپیش اے۔ دوجے پاسے 22سال مگروں آسٹریلوی کرکٹ ٹیم دا دورہ پاکستان وی ایس سال دا وڈا ہدف اے۔ آسٹریلوی ٹیم جے پاکستان دا دورہ شیڈول دے مطابق کردی اے تے ایس توں پاکستان کرکٹ نوں ایس سال وڈی کامیابی حاصل ہووے گی۔ نیوزی لینڈ تے ویسٹ انڈیز دی ٹیماں نے وی ایس سال پاکستان آن دی حامی بھری اے جد کہ 2021 وج پاکستان نے 29ٹونٹی انٹرنیشنل میچ کھیڈے نیں جنہاں وچ 20جتے 6وچ اوہناں نوں شکست دا سامنا کرنا پیا تے 3نامکمل رہے۔ محمد رضوان نے 2021دا اختتام ٹی ٹونٹی انٹرنیشنل وچ سب توں ودھ 1326سکور نال کیتا جہدے وچ اک سنچری تے 12ادھی سنچریاں شامل نیں۔ بابر اعظم ایس سال ٹی ٹونٹی انٹرنیشنل وچ سب توں ودھ سکور کرن والے بیٹسمیناں وچ دوجے نمبر اتے رہے نیں۔ اوہناں دا سکور 939اے جنہاں وچ اک سنچری تے 9ادھی سنچریاں شامل نیں جد کہ پاکستان دے فواد عالم نے 571‘اظہر علی نے 549 تے رضوان نے 451تے بابر اعظم نے 416 سکور بنائے نیں۔ اک روزہ کرکٹ وچ وڈے نام پچھے رہ گئے۔ آئرلینڈ دے پال سٹرلنگ 705 سکور دے نال ٹاپ اتے نیں۔ جنوبی افریقہ دے جانی وچ میلان 509‘ بنگلہ دیش دے تمیم اقبال 405 تے پاکستان دے بابر اعظم 405 کرن وچ کامیاب ہو سکے۔ ٹیسٹ کرکٹ وچ صرف 483سکور کرن والے ویرات کوہلی اک روزہ فارمیٹ وچ نکام ہو گئے۔ ٹی 20وچ وی صرف 299سکور جمع کر سکے۔ بغیر سنچری دے اک سال ہور گزر گیا۔ ٹی 20وچ پاکستان دا غلبہ سی۔ محمد رضوان 20میچاں وچ 1326دے نال کلے نمبر ون بنے۔ 939سکور کر کے بابراعظم دا دور نمبر رہیا۔ اتفاق ویکھو کہ ٹیسٹ وچ 906سکور کرن والے روہت شرما ٹی 20وچ 425 سکور تے کر گئے لیکن مجموعی سکور بنان وچ رضوان توں پچھے رہے۔ بائولنگ وچ بھارت دے روی چندرن ایشون 8میچاں وچ 52 وکٹ دے نال پہلے نمبر تے آئے۔ شاہین آفریدی 9میچاں وچ 47تے حسن علی 8میچاں وچ 41وکٹاں دے نال دنیا بھر وچ ٹاپ تھری دا حصہ بنے۔ ٹی 20بائولنگ وچ سری لنکا دے ڈی سلوا تے جنوبی افریقہ دے تبریز شمی 36‘ 36 وکٹاں دے نال پہلے نمبر تے آئے۔ پاکستان دے حسن علی تے حارث رئوف نے 25تے 25 وکٹاں لیاں جد کہ انٹرنیشنل کرکٹ کونسل نے ون ڈے انٹرنیشنل کرکٹ ایوارڈ لئی پاکستان دے کپتان بابر اعظم سنے چار کھیڈاریاں دی نامزدگیاں دا اعلان کر دتا اے۔ سال 2021دے اختتام تے آئی سی سی ولوں پلیئر آف دی ائیر دی مختلف کیٹیگریز وچ کھیڈاریاں نوں شارٹ لسٹ کرن دا سلسلہ جاری اے۔ تاہم بابر اعظم تے محمد رضوان چھائے ہوئے نیں۔ ٹی ٹونٹی کرکٹر آف دی ائیر فارمینز‘ ٹیسٹ کرکٹر آف دی ائیر تے ویمنز پلیئر آف دی ائیر دی نامزدگیاں مگروں انٹرنیشنل کرکٹ کونسل نے ون ڈے پلیئر آف دی ائیر لئی نامزدگیاں کیتیاں نیں۔ بابر اعظم دے علاوہ بنگلہ دیشی ٹیم دے آل رائونڈر شکیب الحسن‘ افریقی بیٹسمین جانے من ملان‘ آئرلینڈ دے پال اسٹرلنگ دے ناماں نوں نامزد کیتا گیا اے۔ آئی سی سی ویمنز ٹی ٹونٹی پلیئر آف دی ائیر لئی آئرلینڈ دی گیبی لوئس‘ انگلینڈ دی ٹیمی بیماونٹ تے بھارت دی سمریتی مندھنا تے انگلینڈ دی نیٹ سکیورنا نامزد ہوئیاں نیں۔ بابر اعظم نے سال
2021دے دوران 6ون ڈے انٹرنیشنل میچ کھیڈے جنہاں وچ اوہناں نے 2سنچریاں پاروں 67.50 دی اوسط نال 405رنز سکور کیتے۔ شکیب الحسن نے اک سال دے دوران 9میچ کھیڈے جنہاں وچ اوہناں نے دو ادھی سنچریاں دی مدد نال 277رنز تے بحیثیت بائولر 17وکٹاں حاصل کیتیاں۔ آئی سی سی ولوں ہر سال تیرہ مختلف کیٹیگریز دے ایواڑداں دا اعلان کیتا جاندا اے۔ دوجے پاسے پاکستان کرکٹ بورڈ کیلنڈر ائیر 2021وچ 267 ڈومیسٹک میچاں داانعقاد کرن وچ کامیاب رہیا اے۔ کیلنڈر ائیر 2020وچ پی سی بی نے 182ڈومیسٹک میچز منعقد کیتے سن۔ ایہ 267میچ مجموعی طور تے 10مختلف ٹورنامنٹس وچ کھیڈے گئے۔ ایہناں ٹورنامنٹس وچ پاکستان کپ 2021‘ ایچ بی ایل پی ایس ایل 6‘ کرکٹ ایسوسی ایشنزٹی 20‘ نیشنل ٹی 20‘ کرکٹ ایسوسی ایشنز چیمپئن شپ‘ نیشنل انڈر 19چیمئپن شپ‘ نیشنل انڈر 19کپ‘ کرکٹ ایسوسی ایشنز چیلنج‘ پاکستان ویمنز کپ تے پریمیئر ڈومیسٹک ٹورنامنٹ‘ قائداعظم ٹرافی شامل نیں۔ فائنل سنے 31میچاں اتے مشتمل قائداعظم ٹرافی 20اکتوبر توں 29دسمبر تک جاری رہی جتھے ایونٹ دے فائنل وچ خیبر پختوانخوا نے نادرن نوں 169 سکوراں توں شکست دے کے ٹائٹل اپنے نام کر لیا۔ نیشنل سٹیڈیم کراچی وچ کھیڈیا گیا ایونٹ دا ایہ فائنل گلابی گیند نال کھیڈیا گیا سی۔ ٹورنامنٹ دی فاتح ٹیم نوں اک کروڑ روپے جد کہ رنرز اپ نوں 50 لکھ روپے دا انعام دتا گیا۔ ناردرن دے مبصر خان نوں ٹورنامنٹ دا بہترین کھیڈاری‘ اوپنر محمد حریرہ نوں ایونٹ دا بہترین بیٹر جد کہ روحیل نذیر نوں بہترین وکٹ کیپر قرار دتا گیا۔ فائنل وچ سنچری تے 2وکٹاں حاصل کرن تے خیبر پختوانخوا ہ دے کپتان افتخارا حمد نوں پلیئر آف دی فائنل جد کہ ٹورنامنٹ وچ عمدہ کارکردگی اتے سدرن پنجاب دے علی عثمان نوں بہترین بائولر دا انعام دتا گیا۔ رواں سال دا آغاز پاکستان کپ نال ہویا۔ جنوری وچ منعقدہ ایس ایونٹ وچ کل 33میچ کھیڈے گئے۔ تن مختلف وینیوز اتے کھیڈے گئے ایونٹ دا فائنل اسٹیٹ بینک سٹیڈیم کراچی وچ منعقد ہویا جتھے خیبر پختوانخوا نے سینٹرل پنجاب نوں ست وکٹاں نال شکست دے کے ٹرافی اپنے نام کیتی۔ سینٹرل پنجاب دے طیب طاہر نے ایس ٹورنامنٹ وچ سب توں ودھ سکور بنائے۔ اوہناں نے 12میچاں وچ 60.55 دی اوسط نال 666 رنز بنائے۔ خیبر پختوانخوا دے آصف آفریدی ٹورنامنٹ دے بہترین بائولر قرار پائے۔ ایہدے مگروں ایچ بی ایل پی ایس ایل 6کھیڈی گئی جہدا فائنل ابوظہبی دے شیخ زید سٹیڈیم وچ منعقد ہویا جتھے ملتان سلطانز نے محمد رضوان دی قیادت وچ پشاور زلمی نوں 47 رنز توں شکست دے کے ٹائٹل پہلی واری اپنے نام کیتا۔ پاکستان دے کپتان تے کراچی کنگز دے اوپنر بابر اعظم بیٹنگ چارٹ وچ سرفہرست نیں۔ اوہناں نے 11میچاں وچ 69.25 دی اوسط نال 554رنزبنائے۔ فاسٹ بائولر شاہنواز دھانی نے ملتان سلطانز دی نمائندگی کردیاں ہویاں 11میچاں وچ 20وکٹیاں حاصل کیتیاں۔ فیر بگٹی سٹیڈیم کوئٹہ نے 15توں 22ستمبر تک 15میچاں اتے مشتمل کرکٹ ایسوسی ایشنز ٹی ٹونٹی ٹورنامنٹ دی میزبانی کیتی۔ ٹورنامنٹ وچ اپنے 5وچوں 4میچ جتن والی سندھ نوں فاتح قرار دتا گیا۔ خیبر پختوانخوا دے عامر عظمت چار میچاں وچ 242رنز بنا کے ٹاپ سکور ر رہے۔ ناردرن نال تعلق رکھن والے 20سالہ زمان خان 9وکٹاں حاصل کر کے ٹاپ وکٹ ٹیکر رہے۔ نیشنل ٹی ٹونٹی 23ستمبر توں 13اکتوبر تک راولپنڈی تے لہور وچ منعقد ہویا۔ ایونٹ دا فائنل قذافی سٹیڈیم لہور وچ کھیڈیا گیا۔
جتھے خیبر پختوانخوا نے سنٹرل پنجاب نوں ست وکٹاں نال شکست دے کے ٹرافی حاصل کیتی۔ خیبر پختوانخوا دے صاحبزادہ فرحان نے ایس ٹورنامنٹ وچ سب توں ودھ 442سکور بنائے۔ اوہناں دی ٹیم دی نمائندگی کرن والے عمران خان 16وکٹاں لے کے بائولنگ دے شعبے وچ سرفہرست رہے۔ کرکٹ ایسوسی ایشنز چیمپئن شپ تن روزہ ایونٹ دا انعقاد 29ستمبر توں 14نومبر تک پنجاب دے مختلف مقامات تے ہویا۔ 30میچاں تے مشتمل ایہ ٹورنامنٹ سندھ نے جتیا۔ بلوچستان دے عظیم گھمن 10میچاں وچ 890 رنز بنا کے بیٹنگ چارٹ وچ سرفہرست رہے جد کہ خیبر پختوانخوا دے زوہیب خان نے 9میچاں وچ 30وکٹاں حاصل کیتیاں۔ 15 میچاں اتے مشتمل کرکٹ ایسوسی ایشنز چیلنج سندھ نے جتیا۔ پنجاب دے تن مختلف مقامات اتے کھیڈے جان والے ایس ٹورنامنٹ وچ وی خیبر پختوانخوا دے عامر عظمت نے سب توں ودھ رنز بنائے۔ اوہناں نے 5میچاں وچ 67 دی اوسط نال 335رنز بنائے۔ بائولنگ دے شعبے وچ سینٹرل پنجاب دے محمد عرفان جونیئر نے 5جونیئر نے 5میچاں وچ سب توں ودھ 9وکٹاں حاصل کیتیاں۔ پاتھ وے کرکٹ وچ 12ٹیماں اتے مشتمل نیشنل انڈر19چیمپئن شپ تن روزہ ایونٹ 10اکتوبر توں 19نومبر تک ملک دے مختلف حصیاں وچ کھیڈی گئی۔ چار روزہ فائنل پنڈی کرکٹ سٹیڈیم وچ کھیڈیا گیا۔ سدرن پنجاب انڈر19وائٹس نے سنٹرل پنجاب انڈر19بلیوز نوں 2وکٹاں توں ہرا کے ٹائٹل اپنے نام کیتا۔ سدرن پنجاب وائٹس دے محمد شہزاد نے چھ میچاں وچ 92.11 دی اوسط نال 829 رنز سکور کیتے۔ سینٹرل پنجاب انڈر19بلیوز دے ارحم نواب نے 6میچاں وچ 30وکٹاں حاصل کیتیاں۔ قومی انڈر19کپ 14اکتوبر توں 14نومبرتک ملک دے مختلف حصیاں وچ کھیڈیا گیا۔ ایونٹ دا فائنل پنڈی کرکٹ سٹیڈیم وچ کھیڈیا گیا جتھے خیبر پختوانخوا انڈر 19بلیوز نے خیبر پختوانخوا انڈر 19وائٹس نوں 43رنز نال شکست دتی۔ ایتھے سنٹرل پنجاب انڈر19وائٹس دے اذان اویس نے 5میچاں وچ 78.25 دی اوسط نال 313رنز بنائے۔ سندھ انڈر19بلیوز دے خواجہ محمد حفیظ نے ٹورنامنٹ وچ 5میچاں وچ 16وکٹاں حاصل کیتیاں۔ پاکستان ویمنز کپ 9توں 21ستمبر تک کراچی وچ کھیڈیا گیا۔ ایونٹ دا ڈے اینڈ نائٹ فائنل پی سی بی چیلنجاں نے جتیا۔ پی سی بی ڈائنامائٹس دی عالیہ ریاض نے ست میچاں وچ 60.67 دی اوسط نال 364رنز بنائے۔ پی سی بی بلاسٹرز دی آف سپنر ندا ڈار بائولنگ چارٹ میں سرفہرست نیں۔ اوہناں نے 7میچاں وچ 14وکٹاں حاصل کیتیاں۔