پاکستان توں دو فون کالاں

خالد مسعود خان

میں کاغذ قلمچک کے اجے کالم لکھن ای لگا سی کہ پاکستان توں آصف مجید دا فون آ گیا۔ پچھلے اک مہینے دوران آصف مجید نال صرف دو واری گل بات ہوئی ایہ وکھری گل اے کہ اسیں پاکستان وچ تقریباً روزانہ گھنٹوں اکٹھے گزاردے سی تے نالے مہینے وچ صرف دو واری گل بات ہووے۔ خیر خیریت پچھن تے ایدھر امریکہ وچ میرے بچیاں دا حال چال پچھن دے بعد گل میرے سرفراز شاہد مرحوم تے لکھے ہوئے کالم دے حوالے نال اوہناں دیاں یاداں تک چلی گئی پر فیر اوہو ہویا جو اسیں پاکستانی دس پندراں منٹ دی گل بات دے بعد کرنے آں۔ گل پاکستانی سیاست تے آ گئی اج کل صرف اک ای گرما گرم موضوع اے تے اوہ میاں نوازشریف دی پاکستان واپسی دی اڈدی ہوئی خبر اے جو ہر تھاں زیربحث اے۔ آصف مجید میرے توں پچھن لگا میرا کیہ خیال اے۔ نوازشریف واپس آن گے یاں نہیں آن گے تے جے آئے تے پاکستانی سیاست تے کیہ اثرات پین گے؟ میں آصف مجید دا سوال سکون نال سنیا تے جواباً اوہدے اگے سوال کیتا کہ کیہ میاں صاحب دے پاکستان آن یاں نہ آن نال اوہدے یاں میرے معاملات زندگی تے کوئی فرق پوے گا؟ جواباً اوہ کہن لگا ایس سوال توں کیہ مراد اے؟ کیہ اسیں پاکستان دے حالات توں لاتعلق ہو جائیے؟ میں کہیا اللہ نہ کرے میں لاتعلق رہن لئی تے نہیں کہہ رہیا‘ صرف ایناں پچھ رہیا واں کہ کیہ میاں صاحب دی آمد نال میری یاں تہاڈی زندگی دے معاملات تے کوئی فرق پوے گا؟ دوجی گل ایہہ وے کہ ایس سلسلے وچ تسیں یاں میں کوئی کردار ادا کر سکنے آں؟ آصف چپ ہو گیا۔
میں اوہنوں اک کہاوت سنائی کہ کسے نے گھوڑے نوں کہیا کہ اج رات اوہنوں چور کھول کے لے جان گے۔ گھوڑے نے بڑے اطمینان نال کہیا کہ اوہ ایتھے وی ریڑھا کھچدا اے تے پٹھے کھاندا اے تے چور وی اوہدے توں ریڑھا ای کھچوان گے تے پٹھے تے پان گے ای۔ مطلب ایہ کہ گھوڑا بھاویں اپنے مالک دے تھان تے ہووے یاں چوراں دے تھان تے اوہدی زندگی دے بنیادی معالات انج دے انج ای رہن گے۔ ایہو حال ساڈا اے میں تے تسیں اپنی حیاتی دا ریڑھا ہن وی اوسے طرح کھچنا اے جیویں میاں صاحب دی ایتھے موجودگی وچ کھچنا سی۔ ہن اوہناں دے لندن ٹر جان دے بعد تے اوہناں دی واپسی اوہ وی جے ہوئی تے‘ فیر وی ایہ ریڑھا اوسے طرح کھچیا جاوے گا پر ساڈے وچ تے گھوڑے وچ فرق ایہہ وے کہ اوہنوں پٹھے مالک یاں چوراں وچوں کسے نے پانے نیں جد کہ اسیں اپنے کھانے لئی پٹھیاں دا آہر وی آپ ای کرنا اے۔
فیر میں آصف مجید نوں ہس کے کہیا کہ تسیں میاں نوازشریف دی محبت وچ گوڈے گوڈے ڈبے ہون دے باوجود ایس گل دا اقرار نہیں کردے پر تہاڈے دل وچ دبی ہوئی خواہشات توں بھلا اسیں لوک کس طرح لاعلم ہو سکنے آں؟ بے شک تسیں ایہدا اقرار نہیں کردے پر تہاڈی ساری گل بات وچ جو گل تہاڈے توں چھپائے نہیں چھپ ریہ اوہ ایہ وے کہ تسیں سمجھدے او نوازشریف واپس پاکستن آن گے تے شاید اوہ زمین اسمان نوں الٹا کے رکھ دین گے یاں پاکستان دی سیاست دا رخ موڑ کے رکھ دین گے تے تہاڈے لئی دو بھیڑیاں خبراں نیں۔ پہلی اوہ آ ای نہیں رہے۔ دوجی جے اوہ آ وی گئے تے ملکی سیاست وچ کسے قسم دی وقتی ہلچل تے جی ٹی روڈ تے جلسہ جلوس تے اک عدد بے نتیجہ قسم دے نام نہاد لانگ مارچ توں علاوہ ہور کجھ وی نہیں کر سکن گے۔ اجے معاملات اوتھے کھڑے نیں جتھے اوہناں دی روانگی توں پہلاں سن تے ملک دے معاملات نوں کنٹرول کرن والیاں طاقتاں تے اوہناں دے وچکار طاقت دا آپسی توازن پہلے ورگا اے تے جدوں ایس توازن وچ کوئی فرق نہیں آیا تے بھلا حالات وچ کیہ فرق آ سکدا اے؟ اوہناں دا مقابلہ صرف عمران خان نال نہیں کہ تہاڈے کے پی کے وچ بلدیاتی انتخابات دے پہلے مرحلے دے نتیجے نوں بنیاد بنا کے میاں نوازشریف دی پاکستان آمد دے بعد دے حالات بارے خوش فہمی دا شکار ہو جائیے۔ میں آصف مجید توں پچھیا کہ کیہ اوہدے خیال وچ مقتدر حلقیاں دے نال میاں نوازشریف دے معاملات طے ہو گئے نیں؟ جواباً اوہ کہن لگا: بظاہر ایسا کوئی امکان نہیں۔ فیر میں پچھیا کیہ فریقین وچکار طاقت دے آپسی توازن وچ کوئی قابل ذکر تبدیلی آئی اے؟ ایہ جواب وی انکار وچ سی فیر میں پچھیا کہ جے تعلقات وچ وگاڑ وی حسب سابق والا اے تے طاقت دا توازن وی تقریباً اوہو ای اے تے فیر میاں صاحب آ کے کیہ توپ چلا لین گے؟ ساڈے دوست پرویز رشید دی دلی خواہشات صرف اوہناں دے چاہن نال تے پوری ہون توں رہی۔ ایہ کہ کے میں آصف نوں کہیا کہ میرے لئی تے خوشی تے اطمینان دا کارن ایہ گل اے کہ ایس واری گھٹو گھٹ میاں نوازشریف برطانیہ وچ اپنے خرچے تے ٹھہرے ہوئے نیں۔ ہن بھاویں اگلے دس ورھے وی لندن دیاں ہواواں دے مزے لیندے رہن مینوں کوئی اعتراض نہیں۔ آصف مجید نے میری گل نوں شرپسندی دے زمرے وچ پایا تے جواب دین دی تھاں فون بند کر دتا۔
اجے آصف دا فون بند ای کیتا سی کہ شوکت گجر دا فون آ گیا۔ ایہ صرف اتفاق توں علاوہ ہور کیہ ہو سکدا اے کہ شوکت نے وی حال چال پچھن دے بعد اوہو سوال جڑ دتا۔ میں اوہنوں دسیا کہ اجے تھوڑی دیر پہلے ای آصف مجید نے ایہو سوال کیتا سی۔ شوکت گجر نے چسکے لین دی غرض نال پچھیا کہ فیر تسیں کیہ جواب دتا۔ میں کہیا میں تے میاں نوازشریف دے لندن قیام تے خوشیدا اظہار کیتا کہ شکر اے ایس واری اوہ اوتھے اپنے خرچے تے رہندے نیں نہیں تے اینے لمے عرصے لئی سرکار نوں خرچہ کرنا پیندا تے ملک ویلے توں پہلاں ای دیوالیہ ہو جاندا۔
شوکت گجر اجہے موقعیاں تے بھولا جیہا بن کے تفصیل پچھن لگ جاندا اے۔ مقصد صرف مزے لینا ہوندا اے پچھن لگا: ایہ اپنے خرچے تے ٹھہرن دا کیہ قصہ اے؟ میں کہیا جدوں میاں صاحب وزیراعظم سن تے اپنے علاج لئی لندن آئے سن تے پہلے پہل تے اوہناں دے طبلچیاں نے مشہور کیتا کہ میاں صاحب اپنے ذاتی خرچے تے گئے‘ بعد وچ تفصیلاں آئیاں تے پتہ لگا کہ سارا خرچہ سرکار دا سی تے چوداں طبق روشن ہو گئے۔ شوکت مچلا بن کے پچھن لگا کناں خرچہ آیا سی؟ میں کہیا‘ اک منٹ ٹھہرو فون دے نوٹس توں پڑھ کے دسدا واں کہ مورخہ 22مئی 2016ء توں 9جولائی 2016ء تک کناں خرچ ہویا سی۔ وفد دے ارکان نوں ڈیلی الائونس دی مد وچ 30 ہزار ڈالر دے نیڑے ادائیگی کیتی گئی جہاز دے آن جان تے دو ہفتے ہیتھرو تے کھڑے رہن تے اٹھ لکھ ڈالر کرایہ بنیا۔ جدوں جہاز فیر آیا تے فیر ہور 56 ہزار ڈالر ادا کیتے گئے۔ گڈیاں دے کرائے دی مد وچ 39 ہزار ڈالر لگے۔ عارضی دفتر لئی خریدے گئے کمپیوٹرز وغیرہ تے چھ ہزار دے نیڑے رقم لگی۔ موبائل فونز دا خرچہ تن ہزار ڈالر سی۔ دل دے مریض دے پرہیزی کھانیاں دا خرچہ 28 ہزار ڈالر توں ودھ سی۔ ہسپتال دے کمریاں دا بل اک لکھ ستر ہزار ڈالر توں ودھ سی حالاں کہ اخبار وی سرکاری خرچ تے منگوائے جہدے تے اک سو پینٹھ ڈالر لگ گئے۔ علاج تے جہاز دا خرچہ ملا کے 11لکھ ڈالر توں ودھ بل بنیا۔ ایہ صرف ڈیڑھ مہینے دے علاج دا خرچہ سی۔ جے ہن دی واری سرکاری علاج دی سہولت ہوندی تے نومبر 2019ء توں اج تک دو ورھے دو مہینے دے علاج تے دوجے خرچیاں دی مد وچ گھٹو گھٹ ڈیڑھ کروڑ ڈالر لگ چکے ہوندے۔ ہن ماشاء اللہ اوہ ذاتی خرچے تے ٹھہرے ہوئے نیں۔ پچھلے دس ورھے اوتھے رہن گھٹو گھٹ مینوں تے کوئی فکر نہیں۔ شوکت کہن لگا: میرے پیسے پورے ہو گئے نیں‘ میں فون بند کرنا واں۔ ایہ کہہ کے ہسدے ہوئے اوہنے فون بند کر دتا۔٭