میر پنجابی میلہ2021

میلے دے دونویں دیہاڑاں وچ وَکھو وَکھ سیشنز کرائے گئے تے لوکائی نے بھرویں رَلت کیتی900

پروفیسر علی ارشد میر فاؤنڈیشن اتے پیلاک،لاھور دی چھتر چھاویں پنجاب انسٹیٹیوٹ آف لینگوئج آرٹس اینڈ کلچر ،لاھور وِچ مِیر پنجابی میلہ 2021 منایا گیا۔ پِچھلے ورھے دے آخری اتے نویں سال دے پہلے دیہاڑ نوں ایس دو دیہاڑ دے میلے نے خوب رونق لائی۔ مِیر پنجابی میلہ اک اجہی روایت بن گیا اے جو پنجاب اتے پنجابی ثقافت دا عکاس پیا جاپدا اے۔ ورھے وار منعقد ہون والے ماں بولی دے ایس وڈے میلے وِچ ایس سال ہنر کدہ سکول آف وِیّوول اینڈ پرفارمنگ آرٹ، لاہور نے فوٹوگرافی، پورنے کاری اتے چِتر کاری راہی مہان شاعر پروفیسر علی ارشد مِیر ہوراں دے کلام، پنجابی رہتل اتے محنت کش وسنیکاں دے جتن نوں اُجاگر کیتا۔ ایس توں علاوہ مختلف فنکاراں دے نمونے پیش کیتے گئے جنہاں وچ عبد المتین، اکرم وڑائچ، نعمان ہاشمی اتے عمر بٹ ہوراں دے فن پاریاں دی نمائش کیتی گئی۔فوٹوگرافی، پورنے کاری اتے چِتر کاری راہی پنجاب دے محنت کش وسنیکاں اتے پروفیسر علی ارشد مِیر ہوراں دے فن نوں اُجاگر کَرن تے سید فصیح الرحمان، عالی جاہ دُرانی، علیزہ، عبد الحفیظ، زینب، عصرہ، عمارہ، اور کرن اسلم نوں ’’پروفیسر علی ارشد مِیر میڈل‘‘ بھینٹ کیتے گئے۔
کتاب دوستی اتے ماں بولی دی پُستکاں دے پرچار لئی ماں بولی دی کتاباں دے سٹالز دا آہر وی کیتا گیا۔ بابا فرید بک فاونڈیشن، سانجھ پبلکشنز اتے پنجابی بال ادب بورڈ، لاہور دی کتاباں نمائش لئی پیش کیتی گئیاں۔
پنجابی ادب دی مختلف اصناف وِچ لکھی کتاباں لئی ماں بولی دے مستند ایوارڈ ’’پروفیسر علی ارشد مِیر پُرسکار‘‘ دا آہر کیتا گیا۔ 2021 وِچ چھاپے چڑھی پُستکاں نوں ایس پُرسکار لئی سدا دِتا گیا سی۔ اخباراں اتے سوشل میڈیا راہی لکھاریاں نوں آگاہ کیتا گیا۔ کتاب نوں تِن سوجھواناں دے صلاح مشورے بعد دوجی پوڑی وِچ شامل کیتا گیا اور فیصلہ آن مگروں سبھے پُستکاں نوں لائیبریریز وِچ گھل دِتا گیا۔ پستک ستکار دا ایس طرح دا سلاہن جوگ آہر ہور کِدھرے وی نظر نہیں آندا۔ ایس سال ’’پروفیسر علی ارشد مِیر پُرسکار 2021‘‘ وِچ ایہناں لکھاریاں دی کتاباں نوں نوازیا گیا۔ پنجابی نثری ادب وِچ صابر علی صابر دی کتاب دا چون کیتا گیا۔ کھوج پرکھ کھیتر وِچ صفدر وامق اور پنجابی اُلتھا کھیتر وِچ شاہد شبیر دی کتاباں دے ناں ساہمنے آئے۔ پنجابی شعری ادب (مجموعہ متفرق اصناف) وِچ زاہد جرپالوی اور پنجابی شاعری (غزل) کھیتر لئی رفعت وحید دی کتاباں چون ہوئیاں۔ پنجابی بال ادب لئی تجیندر ہرجیت ہوراں دی پُستک دا انتخاب ہویا ایس کتاب دی اُلتھا/لپی انتر سُہیل اشرف ہوراں نے کیتی سی۔دینی ادب کھیتر وِچ ڈاکٹر محمد ایوب دی رچنا دا انتخاب کیتا گیا۔ ایس توں اڈ پرائڈ آف پرفارمنس یافتہ مشہور گائیک ”شوکت علی (مرحوم)” ہوراں دے فن دا آدر کردے ہوئیاں اوہناں نوں ”پروفیسر علی ارشد مِیر سیوک پُرسکار‘‘ نال نوازیا گیا۔
دو دیہاڑ تے پھیلے مِیر پنجابی میلے وِچ پنجابی زبان و ثقافت اتے ادب دے حوالے نال مختلف وچار وٹاندرا بیٹھکاں دا بندوبست کیتا گیا۔ پہلے دیہاڑ ہوون والی اہم ادبی بیٹھکاں وچ فاروق ندیم، عمار شاہ کاظمی، ڈاکٹر عادل عزیز، اظہر وِرک اتے مشتاق قمر نے اپنے وچار سانجھے کیتے۔’’نظام لوہار دی حیاتی تے پچھوکڑ‘‘ وِچ اظہر وِرک ہوراں نے گل بات کیتی۔ ایس دے مگروں عمار شاہ کاظمی (صدر پنجاب نیشنل موومنٹ) نے ’’پنجابی شناخت اُپر دوجی لسانی اکائیاں دا بیانیہ‘‘ اور ’’انسانی حقوق دیاں تنظیماں دا پنجابی نال دھرو‘‘ دے سرناویاں نال ہوون والے سیشنز وِچ اپنے وچار سانجھے کیتے۔ ڈاکٹر عادل عزیز ہوراں نے ’’پنجابی تھیٹر دی لوڑاں تھوڑاں‘‘تے گل بات کیتی۔ مرحوم عوامی شاعر اور علی ارشد مِیر بیٹھک، چشتیاں دے موڈھی عاشق انجم ہوراں بارے مشتاق قمر ہوراں نے گل بات کیتی۔ ’’ضلع بہاولنگر دی ادبی خدمات تے سرکاری بے حسی‘‘ دے ناں نال ہوون والے سیشن وچ فاروق ندیم اتے مشتاق قمر نے وچار سانجھے کیتے۔پروفیسر علی ارشد مِیر ہوراں دی شعری پرتاں تے چانن پان لئی مقالے وی پڑھے گئے۔ فاروق ندیم ہوراں نے ’’جاتی واد تے پروفیسرعلی ارشد مِیر دی شاعری‘‘ جد کہ ریاض دانشور ہوراں ’’پروفیسر علی ارشد مِیر دی شاعری وچ تہذیب عناصر دا تجزیاتی مطالعہ‘‘ دے ناں ہیٹھ اپنے مقالے پیش کیتے۔
دوسرے دن ہوون والی اہم ادبی بیٹھکاں وِچ ڈاکٹر عطا اللہ عالی، مدثر اقبال بٹ، ریاض دانشور، فاروق ندیم، حمید رازی، عائشہ نادر اتے اشرف سُہیل ہوراں نے وچار سانجھے کیتے۔ ’’عالمی وبا بعد مقامی زباناں دا مستقبل‘‘ سرناویں ہیٹھ امجدسلیم منہاس نے گل بات کیتی۔ جنید اکرم یاد وچ منائی گئی اِک بیٹھک وِچ سُہیل اشرف ہوراں نے گل بات کیتی۔ ایس دے مگروں اوہناں ’’بال ادب دی اوکڑاں‘‘ بارے وی وچار سانجھے کیتے۔ ’’پنجابی ترجمے دی لوڑاں تھوڑاں‘‘ دے ناں نال ہوون والے سیشن وچ حمید رازی ہوراں نے اپنی گل ساہمنے رکھی۔ ’’سرکاری و ثقافتی ادارے اتے پنجابی دا مقدمہ‘‘ اُپر مدثر اقبال بٹ ہوراں نے اپنے وچار سانجھے کیتے۔ مشہور لکھاری ڈاکٹر عطا اللہ عالی ہوراں نے ’’پنجابی سنیما دی لوڑاں تھوڑاں‘‘ تے چانن پایا۔ ’’کرنل نادر دے ناں اک شام‘‘ ناں دے آخری سیشن وِچ اوہناں دی سُپتری عائشہ نادر ہوراں نے اپنے مہان باپ دے وچار سانجھے کیتے۔ پروفیسر ڈاکٹر سرمدفروغ ارشد، ریاض دانشور اتے فاروق ندیم نے ایہناں بیٹھکاں دی میزبانی کیتی۔

معروف دانشور اتے پروفیسر علی ارشد مِیر ہوراں دے مِتر عابد عمیق ہوراں دے چلانا کَرن خبر اُتے حاضرین نے اپنیاں نشستاں توں کھڑ ے ہوکے اظہار افسوس کیتا تے خاموشی اختیار کیتی۔
مِیر پنجابی میلے وِچ کہانی دربار دی بیٹھکاں دا وی پربندھ کیتا گیا جو دو دِن جاری رہیا۔ پروفیسرعلی ارشد مِیر ایوارڈ یافتہ کہانی کار احمد شہباز خاور (مرحوم) دی کہانی ڈاکٹر سرمدفروغ ارشد ہوراں نے پیش کیتی۔ ایس توں اڈ کہانی بیٹھکاں وچ فاروق ندیم، حمید رازی،، زبیر احمد، صابر علی صابر، نصیر کوی، ڈاکٹر اعجاز، عمیر واثق نے اپنی کہانیاں پیش کِیتاں۔ رانا آصف اتے فاروق ندیم ہوراں نے ایس سیشنز دی میزبانی کیتی۔ ترنجن ناٹک منڈلی،تنویر اتے ندیم عباس نے ناٹک،لوک رقص اتے صوفی رقص پیش کر کے حاضرین کولوں ڈھیر داد وصول کیتی۔ میلے وِچ کُل پنجاب مشاعرہ دا آہر وی کیتا گیا۔ جس دی پردھانگی مشہور شاعر بابا نجمی ہوراں کیتی۔ مشاعرے وِچ صابر علی صابر، رائے ناصر، ارشد منظور، عدل منہاس لہوری، مرلی چوہان، فقیر کامل، یوسف پنجابی، صفیہ حیات،زاہد جرپالوی، طاہرہ سرا، نصیر کوی، نسیم گلفام، سرفراز صفی، اور پروفیسر ڈاکٹر سرمدفروغ ارشد اجہے نامور شعراء نے اپنی شاعری نال پروفیسر علی ارشد مِیردی شعری روایت نوں زندہ کیتا۔ میلے دے دوران مختلف ویلیاں وچ چاہ، سوپ، اُبلے انڈے اتے بریانی نال مہماناں دے کھاون پیون دا پربندھ وی کیتا گیا۔
میلے دے آخری دن کلام مِیر، قوالی، اتے لوک گائیکی دا پربندھ کیتا گیا جس اندر مشہور لوک فنکار نوراں لعل، مسلم شگن، مبینہ اکرم، نعمان حیدر، شیراز اور گوشی طالب نے حاضرین کولوں ڈھیر داد وصولی۔ مِیر میلے وِچ لوکائی دی بھرویں رلت نے ثابت کیتا کہ اوہ ماں بولی دے ایس مہان شاعر ’’پروفیسر علی ارشد مِیر‘‘ ہوراں نوں تیرہ ورھے پہلے چلانا کَرن مگروں وی نہیں بُھلے۔ پروفیسر علی ارشد مِیر فاونڈیشن نے ماں بولی دے ایس عظیم وشان اور وڈے میلے نوں سوشل میڈیا تے لائیو کَرن دا آہر وی کیتا جس نوں پنجابی پرچارکاں نے خوب سلاہیا۔