’’گر تو برا نہ مانے……‘‘

ظفر اقبال حسن

پچھلے دناں سانوں معروف شوبز رپورٹر اینکر عزیزی سید ساجد یزدانی دی دعوت اتے اک فلمی نشست وچ جان دا اتفاق ہویا جتھے فلم انڈسٹری دے لیجنڈز موجود سن جنہاں وچ ہدایت کار الطاف حسین‘ ہدایت کار مسعود بٹ‘ مصنف فلم ساز ہدایتکار ادیب محمد پرویز کلیم‘ فلم ساز میاں طارق‘ فلم ایڈیٹر زیڈ اے زلفی وی موجو د سن۔ ایہ سارے لیجنڈز نگارخاناں نوں ’’شہر خموشاں‘‘ دی صورت اختیار کرن اتے نوحہ کناں سن۔ ایہ نویں فلماں شروع کرن اتے زور دے رہے سن مگر نگار خانیاں دی تباہی دے کارن اتے غوروفکر نہیں کر رہے سن۔ یقینا اوہناں نوں چاہیدا سی کہ فلم انڈسٹری دی بربادی دے عوامل اتے غور کر کے آئندہ ایہدی راہواں مسدود کرن دے عزم دا اظہار کردے۔
پاکستان فلم انڈسٹری دی تباہی دے بہت سارے اسباب سن جنہاں وچ فرسودہ فلمی کہانیاں سینما ہالز دی گندگی جدید تکنیک نوں نہ اپنانا جدکہ پوری دنیا وچ فلم میکنگ دی پوری تکنیک بدل چکی اے۔ اسیں اج وی ’’لالی وڈ‘‘ وچ سنگل سکرین سینما لئی
فلماں بنا رہے۔ فلم وچ موجودہ دور وچ وی اوہی گروپ بندی تے مناپلی چل رہیاے۔ منشی ٹائپ لکھاری ٹرپل ایکس شاعری والے شاعر بک کیتے جا رہے نیں حالاں کہ ساڈے لیجنڈز نوں آن والے چیلنجاں دا ادراک کر لینا چاہیدا سی۔ اج پاکستان دے کروڑاں فلم بیناں دی جیب وچ مکمل سینما دی سہولت موبائل فون دی صورت موجود اے جتھے اوہ جدوں چاہن جہڑے ملک دی چاہن فیچر فلم ویکھ سکدے نیں۔ اوہناں دی تکنیک کہانی اداکاراں دی پرفارمنس شاعر موسیقاراں‘ گلوکاراں دی کارکردگی اتے نگاہ رکھے ہوئے نیں تے جدوں اوہ اپنی فلم کہانی شاعری چربہ دھن مشینی گلوکار ویکھدے نیں اک طرحاں دی کہانی اک طرحاں دی ایکٹنگ اک طرحاں دے لچر گانے تے وطن عزیز دا فلم بین متنفر ہو جاند اے۔ اگرچہ کراچی دے جوانسال پرعزم نوجوان فلم میکرز فلماں تے بنا رہے نیں مگر اوہ مکمل فلمی ماحول وچ فلم نوں ڈھال نہیں سکے۔ اگرچہ تکنیکی اعتبار نال اوہناں نے بہت ترقی کیتی اے مگر اجے تک اوہ ڈرامہ تے فلم نوں وَکھرا نہیں کر پا رہے۔ لوڑ ایس امر دی اے کراچی دی تکنیک لہور دا تجربہ اکٹھا کیتا جاوے تے ڈرامے دے چنگل توں فلم نوں کڈیا جاوے۔ سکھن تے پڑھن یعنی علم حاصل کرن دی کوئی عمر دی حد مقرر نہیں ہوندی۔ لہور دے تجربہ دا فلم میکراں نوں کراچی دے جدید جوانسال ہنرمنداں دے نال رَل بیٹھنا ہوویگا فیر ای حکومت اوہناں دی طاقت تسلیم کر کے فلم انڈسٹری نوں باقاعدہ صنعت من کے ایہدی ترقی لئی اگے آوے گی۔ فلم نگری وچ پڑھے لکھے لوکاں دے آن نال بزنس مین طبقہ وی انوسٹمنٹ کرے گا۔ فلم انڈسٹری نوں سپانسرز تے فنانسر ملن گے تے ایہ کم فلم انڈسٹری دا اوہ پڑھیا لکھیا نوجوان کرے گا جہڑا تجارتی اداریاں نوں پبلسٹی دے نال نال مناسب تجارتی شیئر وی آفر کرے گا۔
پاکستان فلم انڈسٹری دے کرتا دھرتا نوں منشی ٹائپ لکھاریاں تے لچر فحش گوئی والے شاعراں اتے تن حرف بھیجنے ہون گے۔ ساڈے لوک گیت لکھن والے لاتعداد ادبی شاعر نیں جنہاں دے گیتاں نے مقبولیت تے قبولیت دی ایسی سند حاصل کیتی اے کہ اپنے پرائے سارے من گئے نیں۔ اوہناں دا نام تے ہمیشہ ادبی تے کمرشل گیتاں دی تریخ وچ سنہری حروف نال لکھیا جاوے گا جہدے لکھے گیتاں نے گلوکاراں نوں حقیقی کروڑ پتی بنا دتا۔ اوہناں دے فارم ہائوساں اتے نویں نویں گڈیاں دا
پورا فلیٹ کھڑا اے۔ اوہ شاعر ایسا اے جہڑے وی گلوکار دے سر تے بیٹھیا اوہنوں زمین توں اسمان دی بلندیاں تے لے گیا۔ لوک گلوکاراں ‘ صوفی سنتاں تے گوانڈی ملک دے پنڈتاں نے وی اوہدے لکھے گیت اپنے اپنے اندا زوچ گائے۔ 99.9فیصد اوہدی ای بنائی دھناں اتے طبع آزمائی کیتی گئی۔ میری مراد افضل عاجز نال اے۔ افضل عاجز اتے اک وکھرا مضمون لکھن والے آں۔ فی الحال ایہ اوہناں دا انٹرو سمجھ لو۔
فلم انڈسٹری والے جے واقعی اپنے مشن نال مخلص نیں تے اوہناںنوں روایتی فرسودہ موضوعات طوائف بدمعاش تے پلس دے ٹرائیکا نوں خیبراد کہنا ہووے گا۔ چنگے نویں اوریجنل لکھن والیاں نوں لے کے آنا ہووے گا۔ جدید کیمریاں دے نال سپیشل ایفیکٹس استعمال کرنا ہون گے۔ یو ایس بی توں جان چھڈا کے کارڈ اتے آنا ہووے گا۔پریس نال رابطے مضبوط کر کے اپنی تحریک نوں حکومت تے کاروباری طبقہ دے نال نال بنکاں دی توجہ وی حاصل کرنا ہووے گی فیر کدھرے جا کے ناراض فلم بیناں نوں فلم وَل مائل کر پاواں گے۔
ہار دینا نہ ہمت کہیں
ایک ساوقت رہتا نہیں