باب دوستی کھول دیو

اسدمفتی

بھارت نال تعلقات دے حوالے نال اسلام آباد نے جہڑا نظام تشکیل دتا اے تے جو حکومت وقت دی رہنمائی کردا اے اوہدے مطابق بھارت دے حلقہ اثر وچ وادھا ہو رہیا اے ایس لئی ایہدا توڑ کرنا ضروری اے۔ بھارت دے نال قیام امن دی آواز بھاویں پاکستان وچ وی زور پھڑ رہی اے ایہداثبوت ایہ وی اے کہ پچھلے ورھے تقریباً سٹھ‘ ستر بندے واہگہ سرحد تے آ گئے سن جہناں نے زیروپوائنٹ تے موم بتیاں بال کے عداوت دے انھیرے نوں مار نسایا سی۔
کجھ چر پہلاں امریکی اخبار لاس اینجلس ٹائمز نے واہگہ اٹاری بارڈر تے قومی جھنڈا لاہن دے موقعے تے ہون والی پاک بھارت سرحدی راکھیاں دی جارحانہ پریڈ دے بارے اپنی اک رپورٹ وچ دسیا سی کہ قومی جھنڈا لاہن دی ایہ تقریب 65 ورھیاں توںہر شام باقاعدگی نال ہوندی اے۔ حساس ترین بارڈر تے دوہاں پاسے سینکڑوں تماشائی اپنے اپنے قومی ترانے سن دے نیں تے سرحدی راکھیاں نوں جارحانہ انداز وچ اپنے قومی جھنڈے نوں سلامی دیندے ویکھدے نیں۔ سورج ڈبن توں ادھا گھنٹہ پہلے تک جاری رہن والی ایہ دلچسپ پریڈ یاں تقریب دوہاں ملکا ںدے وچکار خیرسگالی‘ بھائی چارے‘ امن و دوستی نوں فروغ دین دی تھاں چھ دہائیاں توں ودھ جاری عداوت نوں برقرار رکھن وچ معاون و مددگار ثابت ہو رہی اے۔ واہگہ اٹاری بارڈر تے ہر شام تفریح لئی آن والے پاکستانی تے بھارتی لوکاں دی گنتی اکثر سینکڑوں توں ودھ کے ہزاراں تک جا اپڑدی اے اکثر اوقات تقریب وچ ہور رنگ بھرن لئی فلک شگاف نعرے بازی وی شامل کر لئی جاندی اے جہدے نال دنیا دا حساس ترین بارڈر ہور حساس ہو جاندا اے۔ ایہو نہیں سگوں بچے جہڑے سیاسی نہیں ہوندے اپنے ننھے مکے ہوا وچ لہراندے ہوئے جارحانہ ترانے گان لگدے نیں۔ میں اک واری نوعمر سکول دے اک بچے توں مکہ لہران دی وجہ پچھی کہ توں کنہوں مکا وکھا رہیا ایں اوس معصوم دا جواب سی میں سکول دی کتاب وچ اپنے وزیراعظم لیاقت علی خان دی اک فوٹو ویکھی سی جہدے وچ اوہ انڈیا نوں مکا وکھا رہے سن میں وی انڈیا نوں مکا وکھا رہیا واں۔ حب الوطنی دا ایہ مظاہرہ بچیاں نے اپنے وڈیاں توں سکھیا اے پر ب ارڈر تے اجہے مظاہریاں دوران کجھ ناخوشگوار واقعات وی جنم لے لیندے نیں۔ پچھلے دیہاڑیاں جدوں بارڈر دا گیٹ بند ہون دی تقریب توں کجھ چر پہلاں دہلی جان والی پاکستانی بس نوں سرحد پار کرن دی اجازت دتی گئی تے بھارتی تماشائیاں ولوں دہشت گردی روکو‘ دہشت گردی روکو دیاں آوازاں بلند ہون لگ پئیاں۔ بھارتی تماشائیاں ولوں سرحدی راکھیاں دی پریڈ دے انداز نوں جارحانہ قرار دتا جا رہیا اے ایہو گل کلدیپ نیئر وی کئی واری اپنے کالماں وچ لکھ چکے نیں۔ کلدیپ نیئر نے اک واری مینوں دسیا کہ واہگہ اٹاری بارڈر تے آن والے دہلی دے اک 22سالہ نوجوان نے پاکستان رینجرز تے بھارتی بارڈر سکیورٹی فوجاں دی جارحانہ پریڈ ویکھن دے بعد ایہ کہیا کہ ایہ پریڈ حب الوطنی دا جذبہ ابھارن دی تھاں بڑے جارحانہ جذبات دا تاثر قائم کردی اے۔ جارحانہ انداز دی ایس پریڈ دی تھاں دوہاں ملکاں نوں امن پسندی‘ خیرسگالی تے دوستی تے مبنی اجیہا سانجھا پروگرام ترتیب دینا چاہیدا اے جو دوہاں ملکاں دے وسنیکاں نوں اک دوجے دے نیڑے لیاوے۔
جانن والے جان دے نیں کہ واہگہ بارڈر تے تقریباً چالھی ورھے دے بعد جھنڈا لاہن دی تقریب دوران اک واری فیر سخت جذبات امڈ آئے نیں سرحدی راکھیاں دیاں اکھاں تے چہرہ سرخ وکھائی دین لگ پیا اے۔ پرویزمشرف دے دور وچ پاکستان تے بھارت وچکار کشیدہ صورتحال وچ کمی پاروں واہگہ بارڈر تے ہر شام نوں جھنڈا لاہن دی تقریب یاں سلامی دین دوران تقریباً 65 ورھیاں توں جاری کھردرے تے سخت جذبات وچ نرمی آئی سی تے کئی موقعے تے نہ صرف تحفے تحائف دا تبادلہ ہویا سگوں کجھ سماجی تقریبات وی منعقد کیتیاں گئیاں پر ممبئی حملیاں دے بعد پیدا ہون والی کشیدگی دا اثر واہگہ بارڈر تے کھڑے سرحدی راکھیاں تے وی ہویا تے ہن اک واری فیر جھنڈا لاہن دی تقریب دوران اک دوجے نوں غصیلی نظراں‘ چہرے تے تنائو‘ پیراں نال زمین پٹن دی نکام کوششاں نوں ویکھیا جا سکدا اے ایہ کوششاں باب آزادی دے سائے تھلے ہو رہیاں نیں جد کہ سانوں باب دوستی کھولنا چاہیدا اے۔
نہ چھوڑنے کا ارادہ نہ ساتھ چلنے کا
عجیب موڑ پہ آکر ٹھہر گئے دونوں