لوکاں دی حفاظت دی ذمہ داری کہدی اے

غلام شبیر عاصم

دکھ،فِکر تے خوف ایہ کوئی گملیاں تے پیلیاں وچ اگن والی شے نہیں۔تے ناں ای ایہ کھمبیاں طرحاں دھرتی وچوں نِکل آوندے نیں۔ ایہ انسان دے اندروں پھٹدے نیں،تے اندر ای اندر بوٹا، جھاڑی، رکھ تے پھر بہت وڈا رکھ تے پھر جھنگھی بن جاندے نیں۔انسان دے اندر اک طرحاں ایہ جنگل بیلا پسر جاندا اے۔تے اجیہے جنگل بیلے دے اگن تے پسرن دی وجہ انسان دے آل دوالے دے معاشرتی حالاں نال جڑی ہوئی کسے وی طرحاں دی مایوسی تے بے حسی بن دی اے۔ایہدے وچ کئی واری بھیڑے ملکی حالاں،حکومت دی لاپرواہی تے بے دھیانی وی وجہ بن دی اے۔اِنج وی ہندا اے کہ ملک وچ جدوں مہنگیائی تے بے روزگاری ودھدی اے،تے سماج اندر بھکھ ننگ دی وی انتہا ہو جاندی اے۔تے سماج وچ ایسے حالاں وجہوں جرم تے اخلاقی برائیاں دا جنم بڑی تیزی نال ہون لگ پیندا اے۔بھکھ تے بے روزگاری ہتھوں مردے ہوئے لوک چوریاں ڈکیتیاں تے ہور طرحاں دے کئی جرم تے بھیڑ کرن لگ پیندے نیں۔اللہ معاف کرے،بھکھوں مردِیاں کئی جنانیاں دھندہ تے پیشہ کرن لگ پیندیاں نیں۔چوریاں ڈکیتیاں تے ایہناں وارداتاں وچ قتلاں دا سلسلہ وی شروع ہوجاندا اے۔تے لوکاں نوں اپنے گھراں وچ وی خوف دی وجہوں ساری ساری رات نیند نہیں آوندی۔ایس سارے خوف دی وجہ تے قصوروار ویلے دی سرکار ای خیال کیتی جاسکدی اے۔
لوک اپنے گھراں وچ وی اپنے آپ نوں غیر محفوظ خیال کرکے خوف دے پالے ٹھردے ذہنی مریض ہوجاندے نیں۔جس حکومت دے دور وچ لوک اپنے گھراں وچ وی اپنے آپ نوں غیر محفوظ خیال کرن،سچی گل اے اوہ حکومت عوام دی مجرم تے رعایا دی دیندار اے۔الیکٹرانک،پرنٹ تے سوشل میڈیا دیاں خبراں موجب اجکل جرائم بہت ودھ چکا اے۔رستے وچ آوندے جاندے لوکاں نوں اسلحہ وکھا کے لٹن دیاں کئی وارداتاں سامنے آ رہیاں نیں۔گلیاں محلیاں وچ بڑے نویں نویں تے عجیب طریقیاں نال لوکاں نوں لٹ لیا جاندا اے۔تھانے رپٹ وی درج ہوجاندی اے۔پر فیدا کوئی نہیں ہندا۔چِٹے دن لوکی راہواں تے محلیاں وچ لٹے جارہے نیں۔کوئی پچھن والا نہیں،نہ لٹے جان والیاں نوں ناں لٹن والیاں نوں۔انسان دے اندر ایس خوف نوں باہر دے حالات پیدا کردے نیں۔ایس حالت وچ تے اپنے گھردیاں کندھاں توں وی خوف آوندا اے۔اج سماج دا ہربندا ڈریا تے ترٹھا پیا اے۔رات نوں اکھاں نِیند نال دکھنے آجاندیاں نیں،پر انسان آپ ای نیندر نوں اکھاں توں پراں پراں ترنڈ رہیا ہندا اے۔بندا خیال کردا اے کِدھرے نیندر نہ آجاوے۔اوہنوں پتہ اے کہ جے کِتے نیندر آگئی تے کسے ویلے وی کوئی انہونی ہوسکدی اے۔کوئی چور ڈکیت کندھ ٹپ کے،جندرا توڑ کے کنڈی مروڑ کے اندر آن کے اسلحہ تان کے سب کچھ لٹ کے لے جاسکدا اے۔لوک اپنے گھراں وچ ستے وی خیال کردے نیں کہ جیویں کِسے چورستے وچ کھلہے اسمان ہیٹھاں ستے پئے نیں۔لوک ایہ سوال کررہے نیں کہ عوام دی حفاظت کرنا کس دی ذمہ واری اے۔
سال2021وچ جرائم دی شرح وچ 57 فیصد وادھے نال لاہور شہر وچ جرائم دی گنتری سطح 2 لکھ توں وی ودھ گئی اے۔اک رپورٹ موجب 2020 وچ صوبائی دارالحکومت دے 84 تھانیاں وچ اک لکھ 33 ہزار 222 مقدمے درج کیتے گئیے۔جیہڑے سال 2021 وچ 2 لکھ 3 ہزار 452 تک اپڑ گئے۔بوہت سارے واقعے اجیہے وی ہے نیں،جیہڑے کِسے نہ کِسے تھاں تے ہو گزردے نیں۔پر اوہ کسے گِنتری یا رپورٹ وچ نہیں آوندے۔کئی اجیہے شریف تے حالاں توں ڈرے ہوئے وی لوک ہے نیں،جنہاں نال کوئی واقعہ یا انہونی تے واپر جاندی اے پر عزت بیعزتی تے دشمنی دے ڈر توں واقعہ گھٹ نپ جاندے نیں۔دشمنی تے تھانے کچہری دے چکراں توں ڈردے مقدمہ بازی دے چکراں وچ نہیں پیندے۔سماج دے لوکاں نوں بے علاج وہم ورگے اندر دے دکھ توں بچاون لئی ڈر تے خوف توں آزاد کرنا بہت ضروری اے۔تے ایہ صرف سرکاری اداریاں خاص کر پلس اتے عوام دا یقین تے بھروسہ یقینی بناون نال ممکن ہوسکے گا۔٭٭

اپنا تبصرہ گھلو