مہنگائی دا طوفان!غریب‘ مزدور تے تنخواہ دار آخر کتھے جان

روزمرہ استعمال دی ہر شے دی قیمت وچ ہوشربا وادھا ،مزدور دی اجرت وچ آخر کون وادھا کرے گا؟

تحریر۔ پروفیسر حکیم سید عمران فیاض

اے رات مجھے ماں کی طرح گود میں لے لے
دن بھر کی مشقت سے بدن ٹوٹ رھا ھے
وطن عزیز وچ ناقص تے مضر صحت اشیا انتہائی مہنگے ریٹ تے فروخت ہون لگیاں نیں تے فوڈ اتھارٹی لگدا اے کہ اپنے مقصد وچ بری طرحاں نکام وکھائی دیندی اے۔ گٹراں دے پانی لگی سبزیاں تے مصالحہ لگے پھل عوام وچ بیماریاں وَنڈن لگے۔ عوام دا کون مداوا کرے گا۔ وطن عزیز وچ ایس ویلے ہر پاسے مہنگائی دا دور دورہ اے۔ غریب تے مستوط طبقہ نوں اپنی زندگی دے دِنان نوں گزارنا اوہناں لئی جوئے شیر لیان دے مترادف ہو گیا اے۔ اشیائے خوردونوش انتہائی مہنگے مُل لبھ رہیاں نیں تے جو مل رہیاں نیں اوہ انتہائی ناقص‘ عوام جہڑے کہ پہلے ای مہنگائی دی چکی وچ پس چکے نیں اوہناں لئی اپنی زندگی دا چلہاجلانا شدید مشکلات نال دوچار ہو چکیا اے۔ امیر لوکی جہڑے کہ اپنی امارت دے نشے وچ ایس قدر مدہوش ہوندے نیں کہ اوہناں نوں ایہ مہنگائی نظر نہیں آندی۔ بعض فیکٹریاں‘ کمپنیاں‘ ادارے‘ دکاناں دے مالکان دی نظر وچ ایہ ملازم اک مزراع دی حیثیت رکھدے نیں۔اوہ اوہناں دے حقوق تے ضروریات نوں محسوس تک کرنا گوارا نہیں کردے۔ جے اوہ مہنگائی دے حساب نال اپنی تنخواہ وچ وادھے دی گل کردے نیں تے ایہ سرمایہ دار‘ جاگیرداراوہناں دی گل سننا ای گوارا نہیں کردے۔ حالانکہ ایہناں ملازماں لئی وی ضابطہ اخلاق بننا چاہیدا اے تے جس طرحاں مالک مکان ہر سال کرایہ وچ وادھا کردے نیں اوسے طرحاں ملازماں دی تنخواہاں وچ وی وادھا ہونا چاہیدا اے تاں جے اوہ اپنی ضروریات زندگی نوں احسن طریقے نال پورا کر سکن۔ملک وچ لیبر ایکٹ تے محکمہ لیبر وی موجود اے لیکن مالکان نال ملی بھگت دے کارن ملازماں دے حوالے نال اقدامات نہیں ہُندے۔
مہنگائی دی ہفتہ وار جاری کردہ رپورٹ دے مطابق مہنگائی دی شرح 0.40فیصد وادھے نال 19.83فیصد دی سطح اتے پہنچ گئی۔ ماہانہ 17ہزار تک کمان والیاں لئی مہنگائی 22فیصد ہو گئی۔ رواں ہفتے دے دوران 23شیواں دی قیمتاں وچ وادھا ہویا۔ ایل پی جی دا گھریلو سلنڈر 2345توں ودھ کے 2463 روپے دا ہو گیا اے۔ ٹماٹر فی کلو 5روپے 42پیسے مہنگے ہوئے‘ چینی دی فی کلو قیمت وچ 1روپے 32پیسے دا وادھا ہویا۔ انڈیاں وچ فی درجن 5روپے 3پیسے وادھا ہویا‘ دال ماش دی قیمت وچ 3روپے 47پیسے‘ دال مسور 3روپے 47پیسے‘ دال مونگ 12پیسے‘ دال چنا 50پیسے فی کلو مہنگی ہوئی جد کہ لکڑی دی فی من قیمت وچ 3روپے 43 پیسے دا ودھا کیتا گیا۔ بیف دو روپے‘ مٹن 6روپے 23پیسے مہنگا ہویا جد کہ اک ہفتے وچ چکن‘ لہسن‘ کیلے‘ تازہ دُدھ دہی دی قیمتاں وچ وی وادھا ہویا اے۔ ایہ انتہائی تشویشناک امر اے کہ جس طرحاں روزانہ دی بنیاد اتے مہنگائی وچ وادھا کیتا جا رہیا اے ایس نال عام آدمی حقیقی طور تے زندہ درگور ہو چکیا اے۔ عام بندے لئی دو ویلے دی روٹی دا حصول پہلے ای مشکل ترین ہو گیا اے۔ ایہدے تے دال سبزیاں دے ریٹس وچ وادھا اوہدے منہ توں آخری نوالہ کھون دے مترادف اے۔ دو ہفتے پہلے وفاقی وزیر اسد عمر نے دعویٰ کیتا سی کہ پندرہ دناں وچ عوام نوں مہنگائی توں چھٹکارا مل جاوے گا لیکن پچھلے پندرہ دناں دے دوران بجلی دے نرخاں تے عام استعمال دی گھریلو شیواں دے نرخاںوچ ہوشربا وادھا کر کے غریب عوام دے کمزور موہنڈھیاں اتے ہور بوجھ پا دتا گیا۔ وزیراعظم نوں ودھدی مہنگائی دا فوری نوٹس لینا چاہیدا اے۔ عوام دے صبر دا پیمانہ لبریز ہون توں پہلے مہنگائی اتے قابو پا کے اوہناں نوں ریلیف دین دا سوچو تے ترجیحی بنیاداں اتے سبزی ترکاری جئی روزمرہ استعمال دی شیواں دے ریٹس وچ کمی کر کے اوہناں لئی دو ویلے دی روٹی دا حصول آسان بنان۔
اٹھو میری دنیا کے غریبوں کو جگا دو
کاخ امراء کے در و دیوار ہلا دو
اشیائے صرف تے اشیائے ضروریہ اتے دن بدن ودھدے طوفانی مختلف ٹیکسز عوام لئی وبال جان ثابت ہو رہے نیں۔ ہور ایہ کہ موٹرسائیکلاں تے گڈیاں اتے لگن والے ٹیکساں نے عوام دی رہی سہی کسر وی پوری کردتی تے اوہناں دی منجھی وچ برسراقتدار حکومتی ٹولہ نے آخری کِل ٹھوک دتا۔ سبزیاں نیں تے اوہ گندے نالیاں دے پانی والی تے پھل نیں تے اوہ وی مصالحہ لگے۔ پنجاب فوڈ اتھارٹی وی ایہناں ملاوٹ مافیا دے سامنے بری طرحاں نکام ہو چکی اے۔ مہنگائی ختم کرن دے حکومتی دعوے بری طرحاں نکام ہوچکے نیں تے مہنگائی دن بدن گھٹ ہون دے بجائے ودھدی جا رہی اے۔
دست صنعت آفریں کو مزد یوں ملتی رہی
اہلِ ثروت جیسے دیتے ہیں غریبوں کو زکوٰۃ
خدارا حکومت عوام دی حالت زار اتے رحم کھائے ورنہ جے ایہو صورتحال رہی تے عوام خودکشیاں اتے مجبور ہو جاوے گی کیوں جے ملک وچ مہنگائی دا جن بے قابو ہو چکیا اے۔ ہر پاسے مہنگائی دا دور دورہ اے۔ پرائس کنٹرول کمیٹیاں شاید اکھاں بند کیتے ہوئے نیں۔ دکاندار اپنے من چاہے ریٹس وچ بڑی ڈھٹائی دے نال اشیائے خوردونوش فروخت کر رہے نیں۔ سرکاری نرخاں اتے اشیائے خوردونوش ویچنا اپنی توہین گرداندے نیں۔ ضلعی ادارے عوام نوں ریلیف دین وچ بری طرحاں نکام ہوچکے نیں۔ دکاندار حضرات عوام نوں لٹنا اپنا پیدائشی حق گرداندے نیں۔ عوام دی حکومتی ایواناں تے اداریاں نوں اپیل اے کہ وہ غریب تے تنخوادار طبقہ دے دُکھ نوں سمجھن تے اوہناں دی تکلیفاں دے ازالہ لئی کوئی ٹھوس تے موثر اقدام کرن تاں جے اوہناں نوں تے اوہناں دے بالاں نوں اشیائے ضروریہ میسر آ سکن۔
تو قادر و عادل ہے مگر تیرے جہاں میں
ہیں تلخ بہت بندہ مزدور کے اوقات
مزدور دیہاڑی دار طبقہ دی محنت دا پورا معاوضہ دینا مالکان لئی جوئے شیر لیان دے مترادف ہوندا اے۔ اوہ ساری شیواں دی قیمتاں تے ازخود 200توں 500فیصد تک ودھا دیندا اے لیکن مزدور دی تنخواہ وچ وادھا کرنا اوہدے لئی شاید لوہے دا چنا ثابت ہوندا اے۔ کیہ مزدور دی کوئی زندگی نہیں‘ کیہ اوہدی فیملی نہیں؟۔ حکومت وقت نوں اپیل اے کہ اوہ مزدور طبقہ لئی وی موجودہ قنون اتے وی عملداآمد کرائے تے جس طرحاں مہنگائی وچ وادھا ہویا اوسے شرح نال مزدور دی تنخواہ وچ وی وادھا کرنا ضروری قرار دتا جاوے۔ نال ای مزدور طبقہ دے حقوق دا وی احترام کیتا جاوے تے لیبر ایکٹ اتے سختی نال عملدرآمدکروایا جاوے۔
غریبوں کا مقدر پستیاں ہیں
امیروں کی علیحدہ بستیاں ہیں
ابھی تک اپنے پاکستان ہیں دو
کہیں غربت کہیں خرمستیاں ہیں