سی پیک دے مغربی روٹ دا افتتاح

asad ullah ghalib pic

اسداللہ غالب

پچھلے ہفتے وزیراعظم عمران خان نے ڈیرہ اسماعیل خان توں گزرن والے سی پیک دے مغربی روٹ دا افتتاح کیتا۔ ایس موقع تے تقریب نال خطاب کردیاں ہویاں اوہناں نے آکھیا کہ سی پیک اک گیم چینجر اے تے ایہدی تکمیل اتے ملک وچ زبردست انقلاب برپا ہووے گا۔ اوہناں نے آکھیا کہ پچھلی حکومت نے سارا زور سی پیک دے مشرقی روٹ اتے لگایا تے مغربی روٹ نوں نظرانداز کیتا گیا جہدی وجہ نال ملک دے مغربی علاقے پسماندہ دے پسماندہ رہے تے ملک دے مشرقی علاقے جہڑے پہلے ای کم ترقی یافتہ نہیں سن اوہناں وچ نویں صنعتاں تے نویں منصوبیاں دا جال وچھا دتا گیا۔وزیراعظم نے آکھیا کہ معاشی ترقی دا بنیادی اصول مساوات اتے مبنی اے۔ ایہدا مطلب ایہ ہے کہ پورے ملک نوں مساوی طور تے ترقی دتی جاوے تے ایسا نہ ہووے کہ ملک دے امیر علاقے ہور امیر ہو جان تے غریب علاقیاں دی غربت وچ وادھا ہو جاوے۔ ماضی دی حکومت نے ایس مساوات نوں نظرانداز کیتا تے مغربی روٹ نامکمل رہیا جہداے اک حصے نوں ہن حکومت دے لوکاں نے اگے ودھن دا موقع فراہم کیتا ۔ ہن ایس روٹ دے کھلن مگروں ایس علاقے وچ جدید تعلیمی ادارے تے جدید ہسپتال قائم ہون گے تے لوکاں نو ہر کم لئی لہور دے گھنٹہ گھر دا رخ نہیں کرنا پووے گا۔
پاکستان تے چین اک دوجے دے آزمودہ دوست نیں۔ اوہناں دے تعلقات دی قربت دا مقابلہ ہمالیہ دی بلندی نال کیتا جا سکدا اے۔ چین نے ون بیلٹ ون روڈ دے منصوبے دے ذریعے دنیا دے تن براعظماں نوں تجارتی رابطے وچ استوار کرن دا منصوبہ بنایا تے ایہدی بنیاد سی پیک اتے رکھی گئی۔ سی پیک اوہ شاہراہ اے جہڑی صدیاں توں مشرق تے مغرب دے درمیان تجارت لئی کم آ رہی اے۔ تریخی طور تے ایہنوں سلک روٹ یا شاہراہ ریشم وی آکھیا جاندا اے۔ ہن سی پیک دا مرکزی نقطہ گوادر دی بندرگاہ نوں بنایا گیا اے جہڑی آسے پاسے دے پورے خطے وچ ڈُنگے پانیاں دی واحد بندرگاہ اے۔ گوادر دی تعمیرو ترقی نال نہ صرف مقامی طور تے انقلاب آوے گا بلکہ پورے ملک نوں مجموعی طور تے ایس توں مستفید ہون دا موقع ملے گا۔ بدقسمتی نال نون لیگ نے پنجاب وچ اپنی حکومت دی وجہ نال اپنے علاقے نوں ترقی و تعمیر دا محور بنایا جہدی وجہ نال سندھ دے اندرونی حصے تے پنجاب دا ڈی جی خان تے خیبر پختوانخوا دے ڈیرہ اسماعیل خان تے قبائلی علاقے پسماندگی دا شکار رہے۔ ایہناں علاقیاں دے منصوبیاں نوں ترجیحی طور تے مکمل نہ کیتا گیا۔ نون لیگ دی حکومت دا خاتمہ ہویا تے اوہنے پروپیگنڈا شروع کر دتا کہ پی ٹی آئی دی حکومت نے سی پیک نوں رول بیک کر دتا اے۔ ایس ضمن وچ اک وفاقی وزیر دے بیان دا وی حوالہ دتا گیا کہ سی پیک نوں تن سالاں لئی پس پشت پایا جاوے گا۔ نون لیگ نے موجودہ حکومت دے اک ہور بیان نوں اچھالیا کہ سی پیک منصوبیاں اتے ازسر نو مذاکرات کر کے نظرثانی کیتی جاوے گی۔ حکومت نے ہر چند اں الزاماں دی تردید کیتی تے ایس تاثر نوں زائل کرن دی کوشش کیتی مگر کورونا دی وبا پھنکار رہی سی۔ لوک موت دے چنگل وچ جا رہے سن۔ حکومت دے مثبت پروپیگنڈے اتے کسی نے کن نہیں دھرے۔ نون لیگ نے ایتھوں تک پروپیگنڈا کیتا کہ چینی حکومت بدظن ہو کے اپنی تعمیراتی کمپنیاں نوں واپس لے جا چکی اے۔ ایس دوران ایک ڈیم اتے کم کرن والے چینی انجینئراں دے خلاف اَت گردی نے وی بَلدی اتے تیل دا کم کیتا تے چین نے امن و امان دی صورتحال یقینی بنان تک وقتی طور تے کم روک دتا۔ اک بدقسمتی ایہ وی اے کہ ملکی اپوزیشن چیخ و پکار اینی زیادہ کردی اے کہ حکومت نوں اپنے مثبت کماں دی تشہیر دا موقع وی نہیں ملدا۔ اپوزیشن ہر دن کوئی نواں فتنہ کھڑا کردی۔ کدی لانگ مارچ‘ کدی دھرنا‘ کدی مہنگائی مارچ‘ کدی آڈیو ویڈیو لیکس‘ اپوزیشن دے ڈرامیاں دا سرکس لگیا ہویا اے تے حکومت نوں کجھ پتہ نہیں چلدا کہ اوہ اپنے چنگے کارنامیاں دی تشہیر کرے یا اپوزیشن دے الزاماں دی صفائی پیش کرے یا الٹا اپوزیشن اتے بلیم گیم دی یلغار کردیوے۔ ایس ساری صورتحال وچ میرے جئے شخص نوں گہرے غوروخوض مگروں ایہ پتہ چلان وچ کامیابی ہوندی اے کہ حکومت دے ہتھوں چنگے کم وی انجام دتے جا رہے نیں۔ سی پیک دے مغربی روٹ دا افتتاح کوئی معمولی کارنامہ نہیں۔ ایس توں صاف ظاہر ہوندا اے کہ نہ تے سی پیک نوں پیک کیتا گیا اے تے نہ چینی کمپنیاں بوریا بستر لپیٹ کے واپس چلی گئیاں نیں۔ صاف ظاہر اے کہ سی پیک اتے کم معمول دے مطابق جاری اے تے جہڑی کمی بیشی ماضی دی حکومت نے چھڈی سی اوہدی تکمیل لئی ہر ممکن کوشش جاری اے۔
سی پیک ساڈی زندگی تے موت دا سوال اے۔ سی پیک چین لئی وی زندگی تے موت دا سوال اے۔ سی پیک مکمل ہووے گا تے انشاء اللہ ہووے گا تے چین دا عظیم الشان منصوبہ جہدے توں تن براعظم تجارتی رابطے وچ استوار ہو سکدے نیں اوہدے وی مکمل ہون دا امکان نظر آوے گا۔ دنیا ایس ویلے تجارتی جنگاں وچ الجھی ہوئی اے۔ سی پیک دے مقابلے وچ امریکہ تے یورپ نے وی متبادل منصوبہ بندی کر رکھی اے جہدے توں صاف ظاہر ہوندا اے کہ ایس منصوبے دی اہمیت کنی وڈی اے کہ ایہدے مقابلے لئی امریکہ تے یورپ نوں میدان وچ اترنا پیا مگر صد افسوس کہ ا مریکہ تے یورپ ٹرین نکلن مگروں ریلوے سٹیشن تے اپڑے۔ چین اپنے منصوبے نوں پایۂ تکمیل تک پہنچان دے کول اے تے امریکہ تے یورپ اجے شروعات وچ الجھے ہوئے نیں۔ اوہناں دی ایہ وی کوشش اے کہ سی پیک دے خلاف شکوک و شبہات پیدا کیتے جان تے لوکاں نوں ایس توں مایوس کر دتا جاوے۔ بھارت وی مغربی ملکاں وانگوں سی پیک دا سب توں وڈا دشمن اے۔ اوہنے سی پیک منصوبیاں نوں نکام بنان لئی ات گردی دا بازار گرم کر رکھیا اے۔ ایس ضمن وچ کلبھوشن دا ات گردی دا نیٹ ورک رنگے ہتھی پھڑیا جا چکیا اے۔ بلوچستان لبریشن آرمی علی الاعلان بھارت توں ات گردی دی ٹریننگ لے رہی اے۔ ستم ظریفی ایہ اے کہ پاکستان دی سیاسی جماعتاں صرف حکومت دی دشمنی وچ سی پیک دے خلاف بیانات دے رہیاں نیں۔ مناسب تے ایہ سی کہ ساڈی اپوزیشن سیاسی جھگڑے وکھ رکھدی تے ملک تے عوام دی معاشی ترقی دے منصوبیاں اتے کوئی حرف نہ آن دیندی۔

اپنا تبصرہ گھلو