اللہ پاک سانوں آفتاں توں محفوظ رکھے!

طلعت عباس خان

دوستاں دا کجھ دیہاڑ پہلاں مل بیٹھن دا پروگرام بنیا‘ اٹھ جنوری نوں ڈنر دا پربندھ سابق صدر راولپنڈی چیمبر آف کامرس راجا عامراقبال نے کیتا ہویا سی جہدے وچ سابق ایئرچیف مارشل سہیل امان خاص طور تے شرکت کرن لہوروں آئے سن پر مری حادثے دے منظر دن بھر ویکھن نال دل بجھیا بجھیا جیہا سی۔ ہمت نہ ہوئی کہ ڈنر وچ شرکت کردا دوستاں نال گپ شپ لاندا۔ اوس رات کھانا کھائے بناں سُتا۔ اللہ انج دے حادثات توں ہر کسے نو ںمحفوظ رکھے۔ (آمین)
مری تے اک سیاحتی مقام سی فیر موت دا ناچ کنہے کرایا؟ سارے اداریاں نوں برف دے طوفاناں دی خبر پہلے توں سی پر سُتے رہے۔ محکمہ موسمیات نے دس دن پہلاں دس دتا سی کہ مری وچ کدوں برف دا طوفان آوے گا۔ ایس لئی مری دے ایس موجودہ حادثے نوں قدرتی آفت نہیں کہیا جا سکدا۔ ایہ حادثہ سراسر انسانی لاپرواہی تے آہلکس دا نتیجہ اے۔ ایہ تے دسدے رہے کہ مری وچ اک لکھ پنجاہ ہزار کاراں برف باری دا نظارہ کرن داخل ہو چکیاں نیں اوہناں نو ںایہ خوش خبری سناندے ہوئے کیہ ہوش نہیں سی کہ مری وچ کاراں دی گنجائش چھ ہزار توں ودھ دی نہیں۔ ایہدے تے حفاظتی پربندھ کر لئے جاندے فیر کجھ لوک وی انج نیں جہڑے کسے دی نہیں سن دے۔ کسے دی کوئی پرواہ نہیں کردے۔ بس سوچیا تے بچیاں دے نال برف ویکھن ٹر پئے۔ نہ ایہ قنون توں ڈردے نیںایس لئی نہیں ڈردے کہ قنون ہے کتھے؟ مری وچ جو کجھ ہویا اوہدے وچ ساڈے اکثر ادارے قصوروار نیں پر اجے تک کسے نے استعفیٰ نہیں دتا جیویں کجھ ہویا ای نہیں۔ ہن اینیاں موتاں دے ہو جان دے بعد پھرتیاں وکھان دا کیہ فائدہ۔ دو دن بعد دسیا گیا کہ مری دی روڈ کھل چکی اے پر وزیراعلیٰ ہیلی کاپٹر تے مری دا فضائی جائزہ لیندے رہے۔ جے روڈ کلیئر سن تے سڑک راہیں جائزہ لین مری جاندے پر فضائی چکر لان دے بعد اعلان کیتا کہ مرن والیاں نوں فی کس اٹھ لکھ روپیے دتے جان گے۔ اک کمیٹی وی تشکیل دے دتی گئی جو اک ہفتے وچ رپورٹ پیش کرے گی کہ ایہ واقعہ ہویا کیویں۔ اعلان ایہ وی کیتا کہ مری ہن پنجاب دا ضلع ہووے گا حالاں کہ راولپنڈی دی تحصیلاں وچ کسے تحصیل دا ضلع بننا چاہیدا سی تے اوہ تحصیل گوجرخان سی۔ مری نوں ضلع بنان دا فیصلہ کرنا ویلے دی اجے لوڑ نہیں سی۔ ایتھے ٹرانسپورٹ دا نظام ٹھیک کردے‘ سڑکاں دی حالت ٹھیک کردے‘ ایتھے ٹرین چلاندے‘ سرکاری بساں چلان دا اعلان کردے۔ ہوٹلاں تے دکاناں تے پرائز لسٹ لان دا کہندے۔ اوہناں نوں سزاواں دین دا اعلان کردے جہدے پاروں ایہ واقعہ پیش آیا۔ بابا کرمو نے کہیا مینوں وزیراعلیٰ توں امید سی کہ اوہ ایہ کہن گے کہ ایس حادثے دے قصوروار اوہ لوک نیں جہناں نے مری نوں شہر بنایا۔ سب توں پہلاں قصوروار اوہ لوک نیں جہڑے ایتھے آباد ہوئے۔ فیر قصوروار اوہ نیں جہناں نے ایتھے گھر شاپس تے ہوٹل بنائے۔ قصور والیاں وچ ن لیگ دے دو س ابق وزرائے اعظم میاں نوازشریف تے خاقان عباسی وی نیں جہناں نے اپنے دور حکومتاں وچ ایس شہر دی بہتری لئی کم کرائے جہدے توں لوکاں نے گرمیاں تے سردیاں وچ آنا جانا شروع کیتا۔ اج جو رش مری وچ ویکھیا جا رہیا اے ایہدے قصور وار ایہو ماضی دے حکمران نیں۔ ایہدے بعد تھوڑا جیہا قصور حکومت دا وی اے جو اکثر تہواراں تے مری وچ دن گزارن آندے نیں پرآندے جاندے ہیلی کاپٹر توں نیں۔ جے ایہ زمینی راہ توں آندے جاندے تے زمینی راہواں والے الرٹ رہندے۔ روڈز دا خیال رکھدے ایتھوں دے اداریاں نوں پتہ سی کہ کسے وی وی آئی پی نے بذریعہ روڈ مری دا چکر نہیں لاناایس لئی سارے ریلکس رہے۔بابا کرمو نے کہیا شکر اے وزیراعلیٰ بزدار صاحب نے انج دیاں گلاں نہیں کیتیاں۔
ایہ حقیقت اے کہ مری دی ترقی شریف فیملی دی مرہون منت اے میاں شہباز شریف جدوں وزیراعلیٰ سن تے برف کلیئر کرن دیاں مشیناں لے کے دتیاں سن سڑکاں نوں کھلا کیتا سی۔ مری نوں خوبصورت شہر بنایا سی جہدے نال سیاحت وچ وادھا ہویا۔ حقیقت ایہ وی اے کہ مری وچ جان والے سیاح اوہ لوک نیں جہڑے ٹیکس فائلر نیں۔ ہر چیز تے ٹیکس دیندے نیں گڈی خریدی ٹیکس دتا‘ پٹرول ڈلوایا ٹیکس دتا‘ روڈ تے ٹول ٹیکس دتا‘ سیاحواں نے تے اک ذمہ دار شہری ہون دا ثبوت دتا پر اداریاں نے غیرذمہ دار ہون دا ثبوت دتا۔ دوجے لفظاں وچ ایہو ادارے ایہناں موتاں دے ذمہ دار نیں جہناں نے اکھاں بند کیتی رکھیاں۔ یاد رہوے مری وچ ہر ادارے دے اپنے گیسٹ ہائوسز تے بہترین ان کاسٹ اپ موجود اے‘ دفتر نیں پر اوہناں نوں پتہ ای نہیں کہ اوہناں دا ذمہ داریاں کیہ نیں؟ کیہ کم نیں۔ ایس لاعلمی تے لاپرواہی دی وجہ نال مری وچ بے گناہواں دی زندگی پرخطر ہوئی۔ ایہ وی سچ ثابت ہویا کہ مری وچ پولیس پٹرولنگ نہیں سی کردی۔ کیہ ناکیاں دا مقصد صرف پیسے اکٹھا کرنا اے۔ کیہ ایہ لاعلم سن کہ مری وچ کنیاں گڈیاں دی گنجائش اے تے کنیاں جا چکیاں نیں۔ اوہناں نوں روک لیا جاوے‘ کیہ کسے نے چیک کیتا کہ برف نوں ہٹان لئی مشینری ورکنگ وچ سی۔ کم کرن والے ادارے کیہ الرٹ سن۔ لگدا ایہو اے سارے ادارے چادر تان کے ستے پئے سن۔ ایس لئی ایس موسم وچ مری وچ اک انڈا پنج سو روپیے‘ پانی دی بوتل ہزار روپیے‘ کمرے دا کرایہ پنجاہ ہزار‘ کمرے دا ہیٹر اک ہزار فی گھنٹہ‘ ٹائر تے زنجیر چڑان دا پنج ہزار‘ کار نوں دھکا لان دے تن ہزار دا ریٹ مقرر رکھیا سی۔ پٹرول پمپ دے واش روم خراب‘ مسجداں نوں جندرے کہ بناں نمازی دے کوئی نہ وڑے۔ ایس ایریا دے رہن والے بزنس کرن والے سب دے مسلمان۔ ایہدے باوجود ایس مشکل گھڑی وچ مسافراں نوں کھان پین‘ رہن‘ سر چھپان وچ اوکڑاں دا سامنا کرنا پیا۔ آٹے وچ لون دے برابر مقامی لوکاں نے مدد کیتی ہووے گی۔ اسلام آباد توں مری دا سفر تریہہ منٹ د ا اے ہوائی سفر پنج منٹ پر اسلام آباد پولیس دا اے ایس آئی سنے مرن والے ایہ لوک تریہہ گھنٹے تک برف وچ پھسے رہے تے مدد نوں پکاردے رہے۔ فیر ساریاں نے تڑپ تڑپ کے جان دے دتی تے اوہناں دی مدد نوں کوئی نہ اپڑیا۔٭٭

اپنا تبصرہ گھلو