اے ایس پی سلمان ایاز خان شہید
تحریر: (عبدالغفار قیصرانی، ڈی آئی جی ویلفیئر، 30 کامن)
17جنوری 2006دی سویر راولپنڈی دے تھانہ ائیرپورٹ دی حدود توں اک بال اغوا ہوندا اے جہدے تاوان لئی اک کروڑ روپے دا مطالبہ کیتا جاندا اے۔ پلس مقدمہ درج کر کے اے ایس پی صدر سلمان ایاز خان دی قیادت وچ بال دی بازیابی تے ملزمان دی گرفتاری لئی کوششاں شروع کر دیندی اے۔ پلس تے اغوا کاراں دا پہلا آمنا سامنا راولپنڈی دے علاقہ ویسٹرج وچ ہوندا اے جتھے فائرنگ دا تبادلہ ہوندا اے۔ ملزمان اپنی گڈی چھڈ کے نسن وچ کامیاب ہو جاندے نیں۔ اے ایس پی سلمان ایاز خان دی قیادت وچ راولپنڈی پلس ملزماں دا پچھا کردی اے۔ ملزمان راولپنڈی دے اک پنڈ کوہالہ خورد پہنچ کے اک مکان وچ پناہ لے لیندے نیں۔ پلس مکان دا گھیرائو کر لیندی اے تے ملزماں نوں سرنڈر ہون دا آکھدی اے۔ ایتھے اک واری فیر پلس تے ملزماں دے درمیان فائرنگ دا تبادلہ ہوند ااے۔ ملزماں دا اک فائر پلس ٹیم دی قیادت کرن والے نوجوان اے ایس پی سلمان ایاز خان دے سینے وچ لگدا اے جتھے اوہ شدید زخمی ہو جاندے نیں۔ اوہناں نوں فوری طور تے ڈسٹرکٹ ہیڈ کوارٹر ہسپتال راولپنڈی منتقل کیتا جاندا اے۔ ڈاکٹراوہناں دی جان بچان دی سر توڑ کوشش کردے نیں مگر اوہ رات 11وجے دے کول اپنے خالق حقیقی نال جا ملدے نیں۔
میں اوس ویلے ڈیرہ اسماعیل خان وچ اے ایس پی تعینات سی۔ 18تے 17جنوری دی درمیانی رات 2وجے دے کول میرے سٹاف نے مینوں جگا کے میرے بیچ میٹ سلمان ایاز خان دی شہادت دی خبر دتی۔ اپنے کناں اتے یقین نہیں آ رہیا سی کہ سلمان سانوں ہمیشہ ہمیشہ لئی چھڈ کے چلا گیا اے۔ سچی گل تاں ایہ اے کہ ایس اچانک خبر نے اوسان خطا کر دتے۔ اوس ویلے اپنے کجھ ہور بیچ میٹاں نوں فون کیتا کہ شاید خبر دین والے نوں غلطی ہووے مگر ہر پاسیوں ایہو جواب کہ سلمان ہن ساڈے وچ نہیں رہے۔میں اوسے ویلے اپنے ڈی آئی جی ذوالفقار چیمہ نوں نیندر توں جگا کے ایہ خبر دتی تے جنازہ وچ رلت لئی ٹوپی ضلع صوابی جان دی اجازت طلب کیتی۔ تھوڑی ای دیر وچ میں راولپنڈی لئی روانہ ہو گیا کہ باقی دوست وی اوتھے پہنچ رہے سن تے اوتھوں جنازہ مگروں شہید دے جسد خاکی نوں ٹوپی ضلع صوابی لے کے جانا سی۔ڈرائیور نوں گڈی احتیاط نال چلان دی ہدایت دے کے میں اکھاں بند کیتیاں کہ یاداں دا اک لامتناہی سلسلہ شروع ہو گیا۔
سلمان ایاز خان دا تعلق ٹوپی ضلع صوابی دے اک معزز تے پڑھے لکھے خاندان نال سی۔ سلمان دا ا ک چھوٹا بھراں تے دو بھیناں نیں۔ سلمان ایاز خان دے والد محمد ایاز خان پاک فوج وچ بریگیڈیئر دے عہدہ توں ریٹائر ہوئے۔ سلمان نے شروع دی تعلیم پاکستان توں حاصل کیتی تے بیچلر ڈگری آسٹریلیا دی اک چنگی یونیورسٹی توں لیتی سی۔ شہادت ویلے سلمان خان دی عمر بمشکل 31سال سی۔ سلمان دے والدین اپنے پتر دے ویاہ دی منصوبہ بندی کر رہے سن کہ سلمان انج ساری گیم خراب کر کے اچانک چلا گیا جیویں کوئی بال لڈو کھیڈدے ہوئے اچانک ساری گوٹیاں لڈو دے بورڈ تھلے سٹ کے گیم خراب کر کے اچانک کمرے توں باہر نکل جاندا اے۔
سلمان ایاز خان ساڈے تیسویں کامن بیچ دا بلاشبہ سب توں خوبرو تے حسین جوان سی۔ چھ فٹ دے کول قد‘ گوراچٹا رنگ‘ سمارٹ‘ چوڑا سینہ تے ست رنگی اکھاں۔ کئی واری اسیں بیچ میٹ سلمان نوں چھیڑدے ساں یار تو پلس وچ کتھوں آ گیا تینوں تے ماڈلنگ کرنی چاہیدی سی یا کسے فلم دا ہیرو ہونا چاہیدا سی۔ سلمان ساڈے کامن دا لالہ سی۔ سارے اوہنوں لالہ کہہ کے مخاطب کردے سن۔ اپنے دوستاں تے بیچ میٹاں لئی ہمیشہ اوہناں وچ پیار سی‘ محبت سی تے گرمجوشی سی۔ نیشنل پولیس اکیڈمی وچ دوران ٹریننگ جدوں کسے ویک اینڈ اتے سانوں گھر جان دی اجازت نہیں ملدی سی تے اسیں اکثر بیچ میٹس رات گئے تک میس وچ بیٹھ کے گلاں کردے ساں تے اوہناں محفلاں وچ سلمان خان دے قہقہے بہت دور تک سنائی دیندے سن۔چونکہ سلمان اپنے والدین دا بہت ای فرمانبردار بچہ سی ایس لئی جدوں وی انکل بریگیڈیئر ایاز خان دا فون آندا تے سلمان دی ’’جی بابا‘‘ دی تکرار کثرت نال سنن نوں ملدی سی۔ کئی واری منڈے سلمان نوں چھیڑن لئی اوہنوں ’’بابا کا بیٹا‘‘ کہہ کے بلاندے سن جنہوں سلمان آپ وی بہت انجوائے کردا سی۔ نیشنل پولیس اکیڈمی وچ سلمان ایاز خان نے بہت محنت تے دلجمعی نال اپنی ٹریننگ پوری کیتی سی۔ ٹریننگ دے اختتام تے ’’بیسٹ ان پریڈ‘‘ تے ’’بیسٹ ان شوٹنگ‘‘ دا اعزاز وی سلمان ایاز خان دے حصہ وچ آیا سی۔
سفر دے دوران میں سوچدا رہیا کہ جے سلمان ریڈ اتے آپ نہ جاندا تے اپنی ٹیم بھیج دیندا مگر شاید اوہدے لئی ممکن نہیں سی۔ اوہ اپنی ٹیم نوں فرنٹ توں لیڈ کرن دا قائل سی۔ اوہ زندگی وچ وی ساڈے توں بہتر سی۔ ساڈا دکھ تے غم اپنی جگہ مگر اوہدا سفر آخرت وی منفرد کہ اوہ شہادت دا رتبہ پا گیا۔ ایہناں خیالاں وچ گواچہ میں راولپنڈی پولیس لائنز پہنچ گیا جتھے سلمان ایاز خان دا جنازہ ہونا سی۔ کم و بیش سارے بیچ میٹس تے وڈی تعداد وچ سینئر افسر تے شہری اوتھے موجود سن۔ ہر اکھ اشکبار سی۔ سارے دوست احباب غم نال نڈھال خموش بیٹھے سن۔ کسے دی ہمت نہیں ہو رہی سی کہ دوجے نال کوئی گل کر سکے کہ ڈر سی کدھرے گل کردیاں ہویاں ضبط دے بندھن نہ ٹٹ جان۔ سمجھ نہیں آ رہی سی کہ اسیں سلمان خان دے والد تے بھراواں دی ڈھارس بندھائیے یا کوئی آ کے سانوں حوصلہ دیوے۔ کول کھڑے بیچ میٹ اے ایس پی بلال خان (جنہاں نے آپ کجھ عرصہ مگروں گلگت بلتستان وچ جام شہادت نوش کیتا) میرے کول آئے تے صرف اینا کہہ سکے ’’لالہ اب ہم میں نہیں رہے‘‘ تے فیر اسیں دونویں اپنے اتھرو لکان دی نکام کوشش کرن لگے۔ راولپنڈی وچ نماز جنازہ مگروں سلمان ایاز خان شہید دا جسد خاکی لے کے ٹوپی ضلع صوابی روانہ ہو گئے۔ اتھے دوبارہ جنازہ پڑھیا گیا۔ فیر سارے دوستاں تے فیملی ممبراں نے اپنے ہتھاں نال اپنے پیارے نوں قبر وچ اتاریا۔ اگرچہ بہت اوکھا کم سی مگر انپے ہتھاں نال قبر اتے مٹی پا کے سپردخاک کیتا۔ پلس دے چاک وچوبند دستے دے نال اسیں وی نم اکھاں دے نال شہید نوں سیلوٹ کر کے خدا حافظ آکھیا تے بوجھل قدماں‘ بھاری دل دے نال قبرستان توں واپسی دی راہ لیتی۔ بس صرف اک یقین دا حوصلہ سی کہ بے شک شہید زندہ ہوندے نیں مگر سانوں اوہناں دی زندگی دا شعور نہیں ہوندا۔
