کہڑے ڈاکو منتخب کرنے نیں…

صوفیہ بیدار

بس وقت دے نال ایناں ہویا کہ ایوان زیریں و ایوان بالا دی ہر ہون والی کاروائی چشم تماشا ہون توں پہلاں ویکھ لیندی اے۔ شروع وچ ای تازہ غزل دا شعر پیش خدمت اے کہ شاعری کرن والے ہتھ جدوں نثر لکھدے نیں تے صرف تخلیق دا پیراہن ای بدلدا اے۔
نجومِ زندگی سیکھا ہے حفظ ماتقدم میں
ادا ہونے سے پہلے کارروائی دیکھ لیتے ہیں
ایہدے وچ معاملہ کاروائی دا ای اے جہدا مقام نجوم زندگی تے ہو سکدا اے اسمان توں نزول دے نذرانے نہیں اتردے نہیں تے کہندے…
سحر کے جاگنے والوں سے کچھ خفیہ نہیں رہتا
اذان سحر میں اذانِ خدائی دیکھ لیتے ہیں
زمین تے پیر واپس اتاردے ہوئے مالیاتی ضمنی بل‘ سٹیٹ بینک بل دوجے مفاداتی بل عددی قطار و شمار تے تریجی قوت دا تذکرہ کردے نیں جیویں متھے تے ہجر دے مضمون لگے ہوندے نیں ایسے طرح بلاں نے وی پاس ہونا ہوندا رولا کرن دی ڈیوٹی وی نبھائی جاندی اے ہر پاسے تریجی قوت دی طعنہ بازی ہوندی اے تے اینی ہوندی اے کہ تریجی قوت نے وی ہن جواب دینا تقریباً چھڈ دتا اے۔
اک واری مشرف صاحب (جہناں نوں احساس برتری دی وجہ نال) جھوٹ بولن دی نہ لوڑ سی تے نہ عادت فرمایا کہ ایہ ڈرامے بازی کیوں؟ ایہ فوجی انٹر ایکشن دے طعنے کس واسطے؟ اسیں موجود تے ہوندے ای آں تہاڈے منن یاں نہ منن نال کیہ فرق پیندا اے ایس توں علاوہ کہ رات نوں جو شکلاں میں ٹی وی تے ویکھنا واں تے ہسدا واں کہ ایہ سارے کون نیں؟ آئی ایم ایف ابووآل دوز۔ ہن مولانا فضل الرحمن نوں وی ’’منے کے ابا والا لطیفہ‘‘ بس کر دینا چاہیدا اے پوری دنیا وچ عسکری طاقت دی اپنی اہمیت ہوندی اے تے سیاسی طاقت دی اپنی پر اپنا اپنا وقار بنائے رکھنا یاں اپنے آپ نوں رسوا کرنا وی اپنے ہتھ وچ ہوندا اے۔ ویڈیوز دا راج چل نکلیا اے تے بدنامی دے بھبھکے دے بعد والی آسودگی دا اطمینان وی مل گیا اے خاص طور تے جج ارشد تے محمد زبیر دے پراعتماد رویاں نے ایہ تے ثابت کیتا کہ اجہیاں گلاں نال نہ گھر ٹٹدے نیں نہ سیاسی ساکھ وگڑدی اے اوہ کسے ماڑے شر دے کسے قصبے دی غریب کڑی دا محبت نامہ تھوڑی اے جہدے نال معاشرے دیاں بنیاداں ہل جان ایہ تے وڈے لوکاں دا فیشن بن گیا اے ایون فیلڈ دے محلات وچ رہ کے کون ٹکے ٹکے دے یوٹیوب توں آمدنی کمان والے وچارے چینلاں توں گھابرے‘ سیاستداناں‘ اوہناں دیاں عورتاں تے شوبز فیملی توں علاوہ خوشحال لوکاں نے نہ صرف کھل کے رقص و موسیقی شروع کر دتا اے سگوں ویڈیوز دی سنسنی نوں سرے توں ای ختم کر دتا اے مینوں تے بس افسوس ایس گھٹن زدہ ماحول وچ اک ٹیلی فون کال اک ادھ تصویر تے اک دوجے دا ہتھ چھوہ لین تے طلاقاں ہو جان والے معاشرے دا اے وڈے لوکاں دے رقص گانے عورتاں دے نال خلوتاں منہ چڑاندیاں نیں سانوں غریباں نوں ایہ لوک صحیح بے وقوف سمجھدے نیں اوہ سب کرکے وی گھر ای چلا رہے نیں حکومتاں وی چہرے تے عرق انفعال دا اک قطرہ وی نہیں ہوندا سیاستدان عورتاں یاںاوہناں دے گھراں دیاں عورتاں دے گھریلو شادیاں تے رقص نوں کیہ کیہ لکھیا جاندا اے چینلز کجھ عرصہ اخلاقی حدود نہ ہون پاروں کمان گے آخر انگریز ای اوہناں دی نتھ کھچن گے۔ انج لگدا اے دولت دے سامنے رسوائی دی کوئی حیثیت نہیں۔ آخر عزت دار گھرانیاں نے ماڈلنگ دے زمرے وچ وی تے دھیاں دیاں فوٹواں نوں چوکاں وچ بل بورڈ تے لا کے ڈیفنس وچ کوٹھیاں بنا لئیاں نیں۔
اج پاکستان دے زیادہ تر طبقے دا یمان ایہو ہو چلیا اے کہ نہ الیکشن پاکستان وچ بناں پیسے توں جتیا جا سکدا اے تے نہ کسے دا دل… زندگی دے جہڑے چار وڈے دکھ نیں مینوں وی اوہناں وچ کرنسی نوں ویکھ کے اپنا خوش ہونا بقاعدہ المیہ لگا کہ اوہ دن کتھے گئے جدوں رنگریز نال دوپٹہ رنگوا کے چہرے تے حیا دے رنگ کھلر جاندے سن دل ونگاں دی میچنگ کردے کردے کنے ہلکورے لیندا سی اج ایہ ساری اصل دولت گنوا کے کرنسی نوں ویکھ کے خوشی ہوئی تے شاید ایس لئی کہ ہن صرف ساہ لین لئی کرائے دینے پیندے نیں۔
عمران خان واقعی سمجھ چکے نیں کہ پاکستان نوں تبدیل تے کیہ کرنا اے اگلا الیکشن کیویں لڑنا اے پچھلی اے ٹی ایم تے گئی کہ کرپشن فری وزیراعظم دا ٹھپہ جدوں تک چلے کیہ قباحت اے کردار دا اصل فیصلہ تے سیٹ توں اترن دے بعد ہوندا اے مسلم لیگ ن تے بتیری واری کہہ چکی اے کہ ایناں ای کرو جناں سہہ سکو… باندر ونڈ تے عوامی تماشا وچ اوپن واریاں لگدیاں نیں جہناں وچ معاوضے دے طور تے 15 دن توں لے کے تن مہینے والے ابلائجڈ وزیراعظم وی اپنی خدمات دے صلے وچ لیائے جاندے نیں چوہدری شجاعت والی آس مولانا فضل الرحمن نوں وی اے ساریاں نوں اپنی اپنی حیثیت اپنی اپنی ممکنہ بلیک میلنگ تے نتیجے وچ حصہ داری دا پتہ اے ایس حوالے نال شیخ رشید وی گھٹ داد دے مستحق نہیں کہ اوہناں نے ہر دور وچ نہ صرف اپنی تھاں بنائی رکھی سگوں نہ اپنے سخت ترین جملیاں تے شرمندہ ہوئے تے نہ دوجیاں دے اوہناں دے بارے چپڑواسی والے ای ریمارکس دا مائنڈ… سیاست دا موجودہ چلن وی ایہو اے جیویں مسلم لیگ ن والے مدتاں توں ووٹ نوں عزت دیو تے ڈیل ایمپائر ریفری وچ تفاوت دی گل کردے رہے ہن بھاویں شرارت بازی ای سہی پر ایازصادق ورگے سنجیدہ سیاستدان دے منہ چوں دبی چھپی ڈیل دیاں گلاں طشت از بام کروائیاں گئیاں ایہ وی ٹھیک اے کہ تحریک شروع ہوندی اے پر کدھرے وچکار ای کمند ٹٹ جاندی اے پر بار بار گنڈھ لا کے آخر کار پکا بندوبست ہو ای جاندا اے۔
زیادہ تر صحافیاں تے تجزیہ کاراں دا ایہو کہنا اے کہ پچھلے چھ مہینے وچ اجہی کوئی قیامت نہیں سی آ گئی کہ سٹیٹ بینک دی آزادی گروی رکھ دتی جاندی انھیریاں وچ ڈبے ملک وچ آخر بجلی دے میگاواٹ وی تے اینے شامل ہوئے کہ ہن ملک انھیریاں توں روشنی وچ اے۔ مہنگائی نوں پنجاب وچ کنٹرول کرن لئی گورنر چوہدری سرور نے 14 رکنی کمیٹی بنائی اے جو وزیراعلیٰ بزدار دی زیرنگرانی اے قنوناً سارے صوبے دے محکمے وزیراعلیٰ دے تھلے ای ہوندے نیں اوہ اکثر دے پیٹرن چیف وی ہوندے نیں ایہ وی پہلی واری سنن وچ آیا اے کہ کمیٹی گورنر ترتیب دیوے تے پھٹی وزیراعلیٰ دی لا دیوے زیادہ تر وزیراعلیٰ دی خاموشی کدی بے بس تے کدی کم آمیزی دے زمرے وچ پائی جاندی اے پر حقیقت ایہو اے کہ محبوبیت لئی نہ تے کسے دلیل دی لوڑ ہوندی اے تے نہ ای کسے بہانے دی‘ ماں نوں وی اپنا نالائق بچہ سارے لائق بچیاں توں چنگا لگدا اے۔
بزدار صاحب دی ایہ خوش قسمتی اے کہ دوجے صوبیاں دے وزرائے اعلیٰ بالکل ای زیر زمین چلے گئے نیں سندھ دا وکھرا کلچر تے پیپلزپارٹی دی اجارہ داری اک رونق جہی بنائی رکھدی اے پر زرداری دی شخصیت کسے اک صوبے وچ مقید رہن والی نہیں۔ بے نظیر دی المناک وفات تے اوہناں دا پاکستان کھپے دا نعرہ تے شدید ترین خرابی صحت وچ پاکستان رہنا نہیں برے آدمیاں وچ وڈا آدمی ہون دا اعزاز اے وڈے آدمی صرف چنگے آدمیاں وچ ای نہیں ہوندے سگوں اکثر تے شریف ترین لوک اینے چھوٹے ہوندے نیں کہ اوہناں توں ڈر وکھرا لگدا اے تے اعتبار کسے گل تے نہیں آندا۔ جد کہ پنجاب دی تریخ گواہ اے ڈاکو شرفاء توں بہتر ثابت ہوئے نیں ہن فیصلہ لوکا ںدے ہتھ وچ ہووے گا۔ اوہناں نے اگلے انتخابات وچ کہڑے ڈاکو پسند کرنے نیں۔ ایتھے آئیڈیالوجی دی گلاں کون کرے روز روز قائداعظم پیدا نہیں ہوندے سو سالہ فرنگی حکمرانی مغل بادشاہ و امراء دی بے بسی نے کدھرے انیہویں صدی کے وسط وچ جا کے وڈے لیڈراں نوں جنم دتا سی ایہدے پچھے قلعہ بند بادشاہ دی بے بسی نویں دنیا دے قنون تے اپنی ای رعایا رہ چکی قوماں دا انتقام سی ہن تے وکھرے ملن والے ٹکڑے دے وی ٹکڑے ہو چکے نیں جو کجھ ہے سامنے اے بنارس دے ٹھگ اپنانے نیں کہ پنجابی ڈاکو سندھی والے کہ کے پی والے چوائس تہاڈی اپنی اے۔٭٭