سانحہ مری:نوازشہباز واپس کرو!
حناپرویزبٹ
وَین کراں یاں ہاڑا پاواں‘ سینہ پٹاں یاں ماتم دا جھنڈا لہراواں۔ ایہ دل دے لہو نال لکھیا نوحا اے کہ اجہے ظالماں نال واہ پیا اے جہناں نوں غیرمتوقع موت دے منہ وچ جان والیاں دے پیاریاں دی اذیت دا نہ ذرا بھر اندازا اے تے نہ ای کوئی دکھ۔ سانحہ مری پاکستان دی تریخ دا اوہ خوفناک ترین سانحہ اے جو سراسر انسانی نااہلی دا نتیجہ اے۔ ایناں کجھ ہو جان دے بعد وی پھکڑ بیاناں نال لوکاں دے پھٹاں تے لون چھڑکیا گیا۔ مری وچ چار ہزار گڈیاں دی گنجائش پوری ہون تے ریڈ الرٹ جاری کرن دی تھاں نااہل وزیر اک لکھ گڈیاں دا ڈھول کٹ رہے سن کوئی لمحہ اجیہا نہیں آیا جدوں کوئی نہ کوئی انسانی پیدا کردہ آفت ملک تے وارد نہ ہوئی ہووے۔ سانحہ والی سڑک نوں صاف رکھنا انتظامیہ دی ذمہ داری سی افسوس انتظامیہ مشینری سنے غایب رہی‘ دسیا گیا اے کہ علاقے دیاں سڑکاں دی مرمت دا کم وی پچھلے دو ورھے توں نہیں سی ہویا۔
2022ء وچ بیلچیاں نال برف ہٹان تے یاد آیا کہ نوازشریف دور وچ خریدیاں گئیاں اسنوریموور مشیناں کتھے گئیاں؟ ایس واری اک وی اسنوریموور مشیناں کم کردیاں وکھائی نہ دتیاں کھڑی مشین دے اپریٹر توں پچھیا کہ تسیں برف کیوں نہیں ہٹا رہے؟ اوہنے کیہا میرے کول ڈیزل ای نہیں کنٹینر تے کھڑے ہو کے ڈیزل ڈیزل پکارن والے دے لاڈلے اسنوریموور مشیناں دا ڈیزل ای پی گئے۔ میں تے کہنی آں اوہدا الزام وی نوازشریف تے پا دیئے۔ افسوس میڈیا مری وچ غیرمتوقع موتاں تے چیک رہیا سی جد کہ جہلمی وزیر شہبازشریف نوں جیل گھلن دا اعلان کر رہیا سی ایتھے ایہ سوال وی پیدا ہوندا اے کہ انتظامیہ نے مدد لئی فوج تے پولیس نوں ویلے سر کیوں نہیں سدیا؟ مری نوں آفت زدہ قرار دے کے تے سانحہ مری تے انکوائری کمیٹی بنا کے مت سمجھیا جاوے کہ معاملہ ٹل جاوے گا۔ اوہناں 22 جاناں نوں کیہ پتہ سی کہ مری سیر تے نہیں سفر آخرت تے جا رہے او۔ عوام کیویں ایہ منن گے کہ اوہناں دی موت طبی سی‘ اوہ تے اپنیاں اپنیاں گڈیاں وچ راہ کھلن دے انتظار وچ راہی عدم ہو گئے۔
اوہناں دے ورثاء برملا کہہ رہے نیں کہ ساڈے عزیز فرات کنڈھے پئے بھکھے کتے تے بالکل وی نہیں سن کہ اینی تکلیف دہ موت ا وہناں دا مقدر بنا دتی جاندی‘ اوہ تے ریاست مدینہ دے وسنیک سن تے اپنے خرچ تے سیر کرن گئے سن نہ مری نے اوہناں نوں ماریا‘ نہ برف باری نے اوہناں نوں ماریا‘ ایہ تے شدید ترین لیول دی انتظامی نااہلی سی۔ خواب خرگوش ویکھدی حکومت پنجاب نے جاگدیاں ای حاتم طائی دی قبر تے لت ماردے ہوئے مرن والیاں دے لواحقین نوں 8 لکھ روپیے فی کس دین دا اعلان کیتا اے جو امید اے اوہدے منہ تے مار دتے جان گے۔
عمل توں ثابت ہو گیا اے کہ ریسکیو دا مطلب اے صرف اشرافیہ تے امرا دی جان بچانا جہدے لئی ہر ویلے ہیلی کاپٹر یاں دوجی مدد دا انتظام ہو جاندا اے جد کہ لوکاں دے ریسکیو اپریشن دا مطلب اے صرف لاشاں چکنا‘ کناں خوفناک ہووے گا جدوں کوئی اک نہیں دو نہیں تن تن پیاریاں دے جنازے اکٹھے اٹھائے جان گے۔
چھلنی جگر‘ اتھرو اتھری اکھاں لے کے رندھی آواز وچ لواحقین سانحہ مری دعا گو نیں کہ اے ساڈے رب ساڈے تے سراسر ظلم ہویا اے اسیں ایہدا معاملہ تیرے حوالے کرنے آں تے بے شک تیرے انصاف وچ کوئی جھول نہیں۔ سانحہ مری دے بعد ہر پاسیوں اک ای آواز مسلسل ابھر رہی اے ساڈے نواز شہباز واپس کرو‘ پرانا پاکستان لوٹا دیو۔٭٭
