اسیں پاکستانی کہندے کیہ آں

مطلوب ورائچ

پچھلے دیہاڑیاں قومی سطح تے دو اہم پیش رفت ہوئیاں اک تے حکومت ولوں لوکاں دی ناپسندیدگی دا حامل منی بجٹ منظور کر لیا گیا جہدی اپوزیشن ولوں ڈاڈھی مخالفت کیتی جا رہی سی تے آس دوائی جا رہی سی کہ منی بجٹ کسے وی طرح منظور نہیں ہون دتا جاوے گا۔ بجٹ منظور ہون دی صورت وچ حکومت دے سدھا گھر جان دے دعوے کیتے جا رہے سن پر حکومت ناپسندیدہ بجٹ منظور کران وچ کامیاب ہو گئی جو منظوری دے بعد لاگو وی ہو گیا۔ ایس بجٹ دی منظوری نال آئی ایم ایف دیاں شرطاں پوریاں ہو گئیاں نیں۔ اک دم نال درجناں شیواں دیاں قیمتاں ودھ گئیاں۔ مہنگائی دے جاری طوفان وچ ہور وادھا ہو رہیا اے تے ایہ طوفان واقعی ہن سونامی بن گیا۔ عمران خان شاید ایہدی خوش خبری سناندے رہندے سن۔ وزراء حضرات نوں دیکھو بجٹ پاس ہون تے خوش نیں۔ اپوزیشن وی اندروں قہقہے لا رہی اے۔ شرم دوہاں نوں نہیں آندی۔ اپوزیشن ایس لئی تاڑیاں مار رہی اے کہ حکومت نوں منی بجٹ دے نفاذ دے بعد عوامی نفرت دا ہور سامنا کرنا پوے گا۔ وزراء تے حکومت حمایتیاں نوں مہنگائی توں پریشانی گھٹ تے اپوزیشن دی ہار تے خوشی زیادہ اے۔
دوجی پیش رفت قومی سلامتی پالیسی دا اجرا اے جہدی اپوزیشن ولوں مخالفت برائے مخالفت کیتی جا رہی اے۔ ہو سکدا اے اپوزیشن دے تنقید نگاراں ولوں ایس پالیسی دا جائزہ تک وی نہ لیا گیا ہووے۔ ماہرین موجب ایہ قومی پالیسی بہترین ملکی مفاد وچ اے۔ لوک پچھدے نیں ایہدا لوکاں نوں کیہ فائدہ ہووے گا۔ پاکستان مضبوط ہووے تے ایہدا لوکاں نوں کیہ فائدہ؟ پاکستان نے ایٹم بمب بنایا تے لوکاں نوں کیہ فائدہ؟ جو وی پالیسی بنی اوہنوں روٹیاں دے نال نہیں تولیا جا سکدا۔ اج پاک فوج تے حکومت اک پیج تے نیں ایہدیاں کئی لوکاں نوں بڑی ڈھڈ پیڑ اے۔ اوہناں ولوں قومی سلامتی پالیسی تے سوال اٹھائے جاندے نیں۔ معیدیوسف جو پالیسی ساز نیں۔ وزیراعظم عمران خان تے آرمی چیف جنرل باجوہ ایہنوں بہترین قومی مفاد دس چکے نیں۔ اوہناں دے کہن تے کجھ لوکاں نوں اعتبار نہیں پر پاکستان دشمن بھارتی صحافی شیکھر گپتا تے ایس پالیسی نوں بھارت دے حق وچ قرار دتا اے۔ ایہدا یقین کیتی بیٹھے نیں۔ جے ایہ بھارت دے حق وچ اے تے ن لیگ دے تے دل دی گل کیتی گئی اے۔ ایتھے نوازشریف صاحب بھارت دے نال تعلقات بہتر بنان لئی تہیہ طوفان کیتی رکھدے سن آخری واری اقتدار توں گئے تے شاید ایس رویے دا وی ہتھ سی تے بھارت دے تعلقات دی خواہش ای اوہناں دے اقتدار نوں ڈوب گئی۔ عمران خان حکومت دے آخری دو ورھے شروع ہو چکے نیں پر عوام مسلسل ریلیف توں محروم تے مہنگائی دی چکی وچ پس رہے نیں۔ بحران در بحران وی حکومت نوں سامنے نیں۔ اک بحران ملدا اے تے دوجا آ جاندا اے۔ ایہ مس مینجمنٹ دی وجہ نال نیں یاں کوئی سازش اے۔ ہر دو صورتاں وچ حکومتی اہلیت تے سوال اٹھدا اے۔ اپوزیشن اینی مضبوط تے اوہدی بیوروکریسی وچ اج وی جڑاں کھلریاں ہوئیاں نیں۔ اوہ حکومت تے بڑی کامیابی نال نکامی دا الزام لاندی تے ثابت وی کردی اے۔
حکومت بھاویں اجہے الزامات نوں نہیں مندی پر اپنے عمل تے کردار نال ایہناں نوں غلط ثابت کرن توں قاصر رہی اے۔ عمران خان دے سپورٹرز دے کول اوہناں دے دفاع وچ کہن نوں وی ہن گھٹ ای رہ گیا اے۔ اپوزیشن مضبوط اے بیورو کریسی تعاون نہیں کردی۔ اج دے مسئلیاں دی ذمہ داری اج دی اپوزیشن جماعتاں نیں۔ حکومت دا بدستور ایہو موقف اے عام بندہ وی سوال کردا اے کہ تہانوں لوکاں نے ووٹ ایس لئی دتا سی کہ تسیں سب کجھ ٹھیک کرن دے دعویدار سی۔ تن ورھیاں وچ تے ایسی کوئی خاص تبدیلی ویکھن نوں نہیں ملی جہدے توں لوک مطمئن ہون ہن ایس پاسے آ جائو تے کجھ کرکے وکھائو۔ مضبوط اپوزیشن تے اپنی تھاں حکومت نوں اپنے اندروں اپوزیشن ورگے کرداراں دا سامنا اے۔ پاکستان وچ پہلے وی مخلوط حکومتاں بن دیاں رہیاں نیں پر کدی انج نہیں ہویا کہ اتحادی کابینہ دے اجلاس توں بائیکاٹ کرکے اٹھ جان انج اج وی نہیں ہو رہیا پر انج ضرور ہویا کہ حکومت دے لوک تنقید کردے ہوئے اجلاس دا بائیکاٹ کر گئے۔ ایہ سیاسی اختلاف نہیں رعونت تے تکبر اے۔ پرویزخٹک کسے ہور پارٹی توں تحریک انصاف وچ آئے اج اوہ اپنے آپ نوں پارٹی دا تخلیق کار سمجھ رہے نیں۔ کے پی کے وچ تحریک انصاف جتی تے اوہناں نوں وزیراعلیٰ بنایا گیا۔ کے پی کے وچ دوتہائی اکثریت عمران خان دی پالیسیاں تے شخصیت دی وجہ نال ملی۔ اوہناں دے نال تے اوہناں دا خاندان وی نہیں۔ شاید کے پی کے وچ بلدیاتی انتخابات دے دوجے مرحلے پاروں چپ نیں پر میں جس عمران خان نوں جاننا واں اوہ کدی مصلحت دا غلام نہیں رہیا۔
دوستو! اسیں پاکستانی بڑے بے صبرے واقع ہوئے آں تے پنج ورھے تک اپوزیشن دے بنچاں تے بیٹھنا ساڈی قوم لئی بڑا صبرآزما تے ناممکن جہی گل اے۔ ایس لئی ملک وچ دوجے کامیاب ترین ملک وانگوں صدارتی نظام لاگو کرکے صدر تے پارلیمنٹ دا دورانیہ چار ورھے کر دتا جاوے۔ ایہ اک وکھرا موضوع اے انشاء اللہ کسے اگلے کالم وچ اپنے ایس ویژن دی خوبصورت تشریح کراں گا۔ ٭٭