کولیسٹرول وَدھن توں روکو

حکیم حارث نسیم سوہدروی

کولیسٹرول اک مومی مادہ اے جیہڑا خون وچ موجود ہُندا اے۔ صحت مند جسم دے مطابق یعنی لوڑ دے مطابق ایہہ مومی مادہ خود تیار کردا اے جدوں اسیں غذائی اعتدالیاں دا سلسلہ بوہتا کر دینے آں تے بازاری روغنی شیواں پلائو‘ بریانی‘ نہاری وچ نلیاں دا گودا ‘ حلوہ پوڑی‘ انڈے‘ مکھن‘ کباب‘ گھیو والی غذاواں تے کیک پیسٹر ی مزے مزے نال بوہتا استعمال کرنے آں تے مومی مادہ کولیسٹرول دی سطح معمول توں ودھ جاندی اے۔ انسانی جسم متوازن غذا توں جہڑا ضروری مقدار وچ مومی مادہ تیار کردا اے اوہ ساڈے جسم دا نظام درست رکھدا اے۔ نظام ہضم نوں صحیح رکھدا اے ہار مونز تیار کردا تے جسم دی صحت نوں قائم رکھدا اے مگر جدوں غذائی بے اعتدالیاں پاروں مومی مادہ دی سطح ودھ جاندی اے تے خون دا دوران (ہائی بلڈ پریشر) ودھ جاندا اے تے حملہ قلب دا خطرہ ہو سکدا اے کیوں جے دوران خون دے نال ایہہ مومی مادہ گردش کردیاں ہویاں شریاناں دی سطح وچ جمن لگدا اے۔ ایہدی مثال ایس طرحاں اے کہ جدوں برتن دھون دے سنیک دے پائپ وچ برتناں توں اخراج شدہ چکنائی جم جاندی اے۔
جہڑے بندے شروع توں ای روغنی شیواں دا بوہتا استعمال کردے نیں تے اوہناں وچ مومی مادہ دی پیدائش بوہتی ہو کے شریاناں وچ جمن لگدی اے تے ایہہ نوجوانی وچ ہائی بلڈ پریشر دا شکار ہو کے امراض قلب وچ مبتلا ہو جاندے نیں جہدے پاروں حملہ قلب دا خطرہ ودھ جاندا اے۔ جے ایہہ مومی مادہ (کولیسٹرول) متوازن رہوے تے صحت جسم دا نظام درست رکھدا اے تے ایہناں امراضاں توں امکان حد تک بچیا جا سکدا اے۔ جدید میڈیکل سائنس دے مطابق دو سو ملی گرام تک مقدار نارمل اے۔ ایس توں ودھ جاوے تے فوری توجہ کرو تے نارمل رکھن دی تدابیر اختیار کرو۔
کولیسٹرول دی قسماں:
جسم انسانی وچ کولیسٹرول چکنائی تے مختلف قسم دے Lipo Proteins دی تشخیص لئی خون دا معائنہ کیتا جاندا اے جہدے لئی گھٹ توں گھٹ بارہ گھنٹے تک فاقہ ضروری ہوندا اے۔ ایس ٹیسٹ نوں Lipid Profileآکھیا جاندا اے جہدے وچ کولیسٹرول نارمل مقدار 120,200ملی گرام‘ایچ ڈی ایل 41 —52 ‘ایل ڈی ایل 108 –185جد کہ ٹراء گلیسرائیڈ 150 ملی گرام ہونی چاہیدی اے۔
ایل ڈی ایل مضر قلب مادہ اے ایہدے توں خون دی رگاں وچ تھکے بنن توں رکاوٹاں پیدا ہوندیاں نیں جہدے پاروں صحت تے قلب دے مسئلے جنم لیندے نیں۔ ایچ ڈی ایل نوں مفید قلب مادہ قرار دتا جاندا اے۔ ایہدا ودھ جانا کسے نقصان دا کارن نہیں بلکہ قلب لئی مفید ہوندا اے جد کہ ایل ڈی ایل دا ودھنا کورونری ہارٹ ڈذیز دا کارن بن سکدا اے۔ ایل ڈی ایل دا مادہ جسم وچ مختلف حصیاں تک پہنجاندے نیں تے جگر وچ جا کے صفرا وغیرہ بنان دے کم آندا اے ایہدی زیادتی جسم وچ وریداں تے شریاناں وچ جا کے اوہناں نوں تنگ کردیوے گی جہدے نتیجے وچ دوران خون ودھے گا جہڑا حملہ قلب دا خطرہ پیدا کر سکدا اے۔ جے ایسا بندا تمباکو نوشی دا اسیر اے تے فیر ایہہ خطرہ ہور ودھ جاندا اے جد کہ ٹرائی گلیسرائیڈ خون وچ CLOTبنا کے حملہ قلب دا کارن بن جاندا اے۔ خون وچ کولیسٹرول دی زیادتی دی وڈی وجہ چکنائی تے مرغن غذاواں نیں۔ کولیسٹرول خون دی شریاناں نوںتنگ کر کے دوران خون نوں متاثر کردا اے جہدی وجہ نال امراض قلب دا امکان ودھ جاندا اے ۔ایس لئی ایہدا خون وچ ودھنا خطرناک اے تے حملہ قلب دی صورت موت دی وادی وچ لے جا سکدا اے۔ موٹاپا تے آرام طلبی ایہدا وڈا کارن اے۔ اک اندازہ ایہہ ہے کہ معیاری وزن توں ہر کلوگرام زیادہ وزن لئی جسم نوں تقریباً 22ملی گرام بوہتا کولیسٹرول پیدا کرنا پیندا اے ۔ جے معیاری وزن توں کسے دا وزن دس کلو بوہتا اے تے ایہدا جسم 220ملی گرام بوہتا کولیسٹرول بناوے گا۔
کولیسٹرول نوں کنٹرول رکھن لئی تدبیراں
٭ طرز زندگی وچ تبدیلی جہڑی فطرت دے کول ہو
٭چکنائی والی غذاواں توں مکمل اجتناب کرو
٭سبزیاں تے پھل بوہتا استعمال کرو
٭گوشت تے انڈیاں دا استعمال گھٹ توں گھٹ کرو البتہ انڈے دی سفیدی لے سکدے او
٭ مچھی دا استعمال کرو
٭ بیکری دی شیواں کریم مکھن تے دیسی گھیو توں پرہیز کرو
٭ گردے کلیجی مغز تے نہاری توں احتیاط کرو
٭موٹاپا نہ ہون دیو
٭تمباکو نوشی توں پرہیز کرو
٭روزانہ غذا وچ پھل تے سبزیاں بوہتیاں استعمال کرو ایہناں وچ کولیسٹرول نہیں ہُندا‘ ایہہ صحت لئی بوہتی مفید تے قدرتی غذا نیں
٭گاجراں بہت مفید نیں
٭چکنائی والی غذاواں گھٹ توں گھٹ کھائو کیوں جے ایہہ چربی بناندیاں نیں جہدے توں کولیسٹرول ودھدا اے۔
٭غیر سیر شدہ تیل مثال دے طور تے مکئی سویابین یا زیتون تے مونگ پھلی دا تیل فیدہ مند اے
٭غذا وچ تبدیلی کر کے تسیں کولیسٹرول نوں کنٹرول رکھ کے صحت مند زندگی گزار کے امکانی حد تک ہائی بلڈ پریشر تے حملہ قلب توں محفوظ رہ سکدے او۔ طر ززندگی تے غذائی عادتاں وچ تبدیلی نال تسیں کولیسٹرول دے ودھن توں بچ سکدے او۔
علاج:گارلینا صبح تے شام‘ غذا دو دو گولیاں پہلے تن مہینے تک استعمال بہت موثر ثابت ہویا اے۔