طرزِ زندگی وچ تبدیلی دی لوڑ اے

شادیاں اتے فضول خرچی تے جہیز جہی لعنت توں چھٹکارا ضروری اے، ساہنوں سادگی اپنانی چاہیدی

شمع باسط

اساں لوکاں نے زندگی دے رہن سہن نوں ایس قدر اوکھا بنا لیتا اے تے بناوٹ نوں لوڑ توں بوہتا اہم کر لیتا اے کہ بس گل گل اتے ذہنی مسائل دا شکار ہو جانے آں۔ ڈپریشن وچ چلے جانے آں۔ ساڈی کوشش ہوندی کہ بس ہن کوئی سکون آور گولیاں ہون‘ اسیں کھائیے تاں جے سارے جھنجھڑاں توں جان چھڈا سکیے تے بیشمار لوکی ایہناں دوائیاں دا استعمال کردے نیں۔ تسیں یقین کرو کہ ایہناں دوائیاں دا استعمال دن بہ دن ودھ رہیا اے تے ساڈا موڈ مزاج تے چشم زدن انج خراب ہوندا اے جیویں موڈ اسیں چائینہ دا لگوایا ہووے۔ برداشت بالکل ناپید ہو گئی اے۔ ساڈا رویہ سانوں ویکھنا پووے گا کہ کیوں انج اے۔ کیوں اسیں کسے وڈے دی گل سنن نوں تیار نہیں آں تے کسے دی کامیابی تے کامرانی توں وی لوکی حسد دا شکار ہو جاندے نیں۔ کیہ اللہ دی تقسیم اتے وی ساڈا اعتقاد نہیں رہیا۔ سانوں وڈے دل نال ایس گل نوں قبول کرنا چاہیدا اے کہ رب دی دین اے اوہ جہنوں چاہوے نوازے مگر لوکی بلاوجہ حسد دی اگ وچ جلن لگدے نیں۔ دُجے دی قابلیت تے طاقت توں پریشانی وچ آ جاندے نیں تے جنہاں لوکاں دے کول اللہ دا دتا سب کجھ وافر اے اوہناں نوں وی چاہیدا اے کہ کسے حساب کتاب نال معاشرے وچ چلن۔ بے جا اسراف توں تے دولت دے دکھاوے توں دوجیاں دا جینا اوکھا تے حرام نہ کر دین۔ جیویں کہ ہن پاکستان وچ ڈینگی سیزن مگروں ویاواں دا سیزن اے تے ایہہ قوم جہڑی مہنگائی دا رونا روئے جا رہی اے ایس قوم دی تقریب ویاہ وچ جدوں تسیں شریک ہوو تے تہانوں باطریق احسن احساس ہو جاوے گا کہ ایس قوم نوں آلو خریددے ہوئے تے مہنگائی بہت زیادہ لگن لگدی اے جد کہ لکھاں روپے دے بے جا اسراف نال جدوں شادیاں دی تقریباں اتے انھے واہ پیسہ خرچ کردے نیں اودوں مہنگائی نہیں ہوندی۔ جدوں غریباں دی دھیاں نوں کھلے منہ تسیں لوکی ایہہ احساس دواندے او کہ امیر کیہ ہوندا تے غریب کیہ۔ مڈل کلاس طبقہ بیچارہ تے امیراں دے چونچلیاں وچ پھس گیا اے۔ ایس احساس کمتری نے لوکاں نوں ذہنی مریض بنا دتا اے۔ اج کل شریف خاندان دے ویاہ چرچا اے جہنوں وکھا وکھا کے سوشل میڈیا اتے ہر انسان نوں احساس کمتری دا شکار کیتا جا رہیا اے۔ ویسے تے ساریاں نوں ایس گل دا پتہ ای اے کہ چوری دا کپڑا ہووے تے گز وی ڈانگ دا ہوندا… شریف خاندان دی شادیاں تے انج ای سرانجام پائیاں‘ سمجھ تے گئے ہوو گے… مگر اسیں تے ایس گل دا ووٹ کاسٹ کردیاں ہویاں قوی امکان سی کہ ہن قنون برابر ہووے گا تے ہر پاسے یکساں رائج وی مگر سنیا اے کہ 32ڈِشاں پکیاں نیں۔ لیٹ نائٹ فنکشن جاری رہے تے کسے نے نہیں پچھیا پھڑیا۔ ہن اسیں بس ایہہ دعا کرنے آں کہ ہن تے چوتھا سال شروع اے‘ خان صاحب دی حکومت نوں ہن تک اللہ کرے کہ اوہناں نوں یقین آ جاوے کہ اوہ حکومت وچ نیں تے وزیراعظم وی تاں جے کوئی اک ادھا وعدہ تے پورا کرن جہڑا وزیراعظم بنن توں پہلے کیتا سی۔ تے خدارا جہیز اتے پابندی لائی جاوے۔ ایہ کینسر اوس غریب تے متوسط طبقے نوں پاگل کردیوے گا۔ جہیز غرب دی دھی دی خوشی کھا گیا اے۔ متوسط طبقیاں توں دھی ویان دے خوف پاروں ہاسے گواچ گئے نیں۔ جہڑی کڑی گھٹ جہیز لے کے جاندی اے اوہدا گھر نہیں وسدا۔ سسرال والے اوہدی جان تک لین توں گریز نہیں کردے۔ جہیز جئی شے اتے حکومت ولوں سخت پابندی ہونی چاہیدی اے تے خلاف ورزی اتے بھاری جرمانے تاںجے لوکاں نوں ایس گل دا احساس دوایا جا سکے کہ کڑیاں آپ وی قیمتی ہُندیاں نیں صرف قیمتی شیواں سامان تے سونا چاندی نال لیان اتے ای اوہناں نوں عزت نہ دیو۔ بطور انسان تے گھر دے فرد دی حیثیت نال وی اوہناں دی قدر کرنا سکھو۔ اک دھی دی اہمیت دا اندازا صرف اوہدے والدین ای نوں ہوندا اے کہا وہ کنی قابل اے۔ سسرال وچ تے بس اوہ شاید کم والی دی حیثیت نال ای جاندی اے ۔ایس رویے نوں بدلنا اے۔ اپنی بہو نوں وی انج ای اہمیت دیو جیویں دھی نوں دیندے او تے پتہ نہیں انج کیوں اے کہ ساڈے معاشرے وچ جہڑے گھر وچ کڑی جہیز نہیں لیاندی بعض اوقات اوہنوں کوئی مسئلہ نہیں ہوندا بلکہ محلے دار تے معاشرے والے منہ جوڑ جوڑ کہانیاں گھڑن لگدے نیں تے ایس طرحاں وی گھر ٹُٹن لگدے نیں تے والدین ویاہن مگروں فیر دھی نوں بسان وچ لگ جاندے نیں تے کیہ ای بہتر ہووے کہ اسیں دُجیاں نوں ویکھن دے بجائے اوہناں دی خامیاں اتے نظر رکھن دی بجائے اپنی اصلاح اتے توجہ دئیے تے جہڑے لوک شادیاں تے بے جا اسراف کردے نیں اوہناں نوں ویکھ کے پریشان یا غمگین ہون دی بجائے جو تہاڈے کول اے اوہدے مطابق رہنا سکھو۔ تسیں یقین کرو ہو سکدا اے کہ جہڑا تہاڈے کول اے اوہدے کول نہ ہووے۔ کیوں جے دنیا دکھاں دا گھر اے کسے دے ظاہری آرام و آسائش نال ایس گل دا اندازہ نہ لائو کہ ا وہ پرسکون وی اے تے خوش وی۔ ویسے وی پنجابی دی کہاوت اے (تسیں کسے اگے بک روو گے تے اگلا بندہ چھج رووے گا) تسیں اپنا احاطہ کرو تہانوں کیہ شے خوشی دیندی اے۔ اوہدے مطابق اپنے مزاج نوں آرام دہ رکھو۔ بیشک لوکی دکھاوا کرن نوں بہت اہمیت دیندے نیں۔ جدوں تعلیم تے تربیت دی کمی ہووے گی تے کوئی ہنر کوئی خوبی نہیں ہووے گی تے صرف جیب وچ پیسہ ای پیسہ ہووے گا تے فیر انسان ایہدا دکھاوا کرے گا۔ مطلب کہ جہدے کول جہڑی شے ہووے گی اوہ اوہدا ای دکھاوا کریگا لہٰذا اپنی خوشیاں نوں دلوں خوش ہو کے منائو تاں جے دوجیاں دے رحم و کرم اتے نہ چھڈ دیو۔ اج کل کسے ویاہ وچ ویکھ لو۔ شادی دی تقریب وی لاڑا ووہٹی لئی بناوٹ دے سوا کجھ نہیں رہی۔ سارے لوک لاڑے ووہٹی نوں اوس ویلے سلامی دینا پسند کردے نیں جدوں کیمرہ مین مووی بنا رہیا ہووے۔ ویاہ دی تقریب وچ لاڑا ووہٹی نوں مووی میکر تے کیمرہ مین دے رحم و کرم اتے چھڈ دتا جاندا اے۔ اوہ آکھدا اے کہ ہن ساہ لو تصویر بنانی اے۔ لاڑا تے ووہٹی ساہ لیندے نیں فیر اوہ حکم دیندا فلم بنانی ساہ روک لو۔ اوہ یار حد ہو گئی کیہ اے اہ سب… کیہ ساڈا کلچر ایہہ ہے ایہناں ساری فضولیات توں نکلو ‘ جوتہاڈا دل چاہوے اوہ کرو۔ تسیں یقین کرو کہ جہڑی زبانیاں عام حالات وچ گھر گھر جا کے لوکاں دی بہو دھیاں نوں اسلام دے درس دیندیاں نیں پردے دی اہمیت تے نامحرماں توں مکمل طور تے حجاب بارے آگاہی دیندیاں نیں اوہ سمجھان والے نوں کسے نہ کسے طرح ایہہ باور کرواندیاں نیں کہ اوہ تقریباً کافر ای نیں اوہ خود کیمرے دے اگے اگے رہندیاں نیں دوہرے معیار توں خدارا باہر نکلو تے اپنے تے دوجیاں لئی مخلص رہو ۔ ایہناں بناوٹی تے ویکھا ویکھی دی چمک دمک وچ نہ پوو اپنی زندگی نوں سادہ بنائو تاں جے تہاڈی وجہ نال کوئی دُجا احساس کمتری وچ مبتلا نہ ہو جاوے۔ تہاڈے ایس احسن اقدام توں نہ صرف تہاڈے لئی آسانیاں پیدا ہون گیاں بلکہ دوجیاں لئی وی تسیں مشعل راہ دا کم کرو گے تے بناوٹ جئے مرض توں سانوں جس قدر ہو سکے بچنا چاہیدا اے تاں جے اسیں اپنی اصل نوں پہچان سکیے۔ حقیقی خوشی سکون قلب ہوندی اے۔ جھوٹی بیکار تے دکھاوے دی مسرت سوائے پریشانی دے کجھ نہیں دیندیاں نیں لہٰذا خود نوں پہچانو تے بطور انسان اپنے حصے دی حقیقی دلی تے دماغی خوشیاں سمیٹو۔