صوفی شاعر میاں محمد بخش سیمینار

ایس سیمینار دا پربندھ اوہناں دی 115 ویں برسی دے حوالے نال کیتا گیا

رپورٹ:عبدالرحمن ارشد

پنجابی مجلس (گورنمنٹ عبدالحق اسلامیہ ایسوسی ایٹ کالج جلالپورجٹاں)،صوفی شاعرمیاں محمد بخشؒ دی 115ویں برسی دے سلسلہ وچ سیمینار ہویا جس دی پردھانگی پروفیسرکلیم احسان بٹ(پرنسپل) نیں کیتی جد کہ اچیچے پروہنے پنجابی سیوک،پرائیڈآف پنجاب ڈاکٹرمحمد افضل راز،بابائے سیف الملوک چودھری اسماعیل چیچی تے اُچ پدھر ثناء خواں عارف شاہد گوندل سن۔کالج (شعبہ پنجابی)دے ودیارتھی حافظ محمد حبیب اللہ نیں اللہ دے حضورتلاوت کلام پاک پیش کیتی تے نعت رسول مقبول دا نذرانہ محمد عدن(شعبہ پنجابی)نے پیش کیتا۔کالج(شعبہ پنجابی ) دے دو طالب علم حافظ احمد حنیف تے حمزہ منیر ہاشمی نیں پنجابی دے وکھ وکھ دو لیکھ پیش کیتے جہدے وچ میاں محمد بخشؒ دی حیاتی نوں شعراں دے تناظر وچ پیش کیتا نالے مثالاں نال حاضرین نوں میاں محمد بخشؒ دے آفاقی سنیہے نوں اگے ودھان دی گل کیتی تے بڑے سوہنے انداز وچ اپنے اپنے لیکھ نوں اگے ٹوریا۔فیر حاضرین(طالب علم)کولوں میاں محمد بخشؒ بارے سوال پچھے گئے جہدے وچ ودیارتھیاں نیں بھرواں حصہ لیا تے ورلڈپنجابی فورم تے روزن ادبی فورم ولوں طالب علماں نوں انعام وچ اک اک کتاب تے اک اک پنجابی قاعدہ وی دتا گیا۔
سیمیناروچ چودھری محمد اسماعیل چیچی نیں اپنے خطاب و چ دسیا کہ اجوکے دور دی ’’سیف الملوک‘‘ وچ کتھے کتھے رَلے سْ تے ایہناں ساریاں گلاں دے ذمہ دار کون سن،اوہناں ایہہ وی دسیا کہ اج تیک کسے نیں دلیل نال گل نئیں کیتی سگویں رٹے رٹائے خیال پیش کر دیندے نیںتے ناں اپنی کسے دلیل دی وضاحت کردے نیں،اوہناں دسیا کہ ایس کم وچ میرے بانہہ بیلی پروفیسرخالد ہمایوں،رانا منصورتے ڈاکٹرافضل راز سن،جنہاں پرانیاں کتاباں وی مہیا کیتیاں تے نالے ایس کتاب دے سودھن وچ سگویں مدد کیتی، اوہناں آکھیا میری ایس محنت نوں سب توں پہلاں گورنمنٹ پوسٹ گریجوایٹ کالج میر پور آزاد کشمیر نیں اپنی رفیع الدین ریسرچ چیئرولوں چھاپیا تے آزاد کشمیر دی ہر لائبریری نالے ہر اچیچی تھاں تے پہنچایا،ایس توں بعد پنجاب انسٹی ٹیوٹ لینگوئج آرٹ اینڈ کلچردی ڈی جی صغراصدف نیں اپنی ریسرچ کمیٹی توں پاس کرا کے ’’پلاک‘‘ولوں اس نوں چھاپے چاڑھیا۔پلاک دی چھپی کتاب نال فرہنگ وی موجود اے ،اس دا اک نسخہ چودھری اسماعیل چیچی ولوں پرنسپل پروفیسر کلیم احسان بٹ نوں وی پیش کیتا گیا ،چودھری اسماعیل چیچی نیں اپنیاں دوجیاں کتاباں وی لائبریری نوں دان کیتیاں۔’’ٹاکرا‘‘چودھری اسماعیل دی او کتاب اے جہدے وچ اوہناں رَلے نوں مذید نکھیڑ دتا اے،اصلی تے جعلی شعراں نوں آمنے سامنے رکھ کے چھاپ دتا اے،تاں جے ددھ دا ددھ سامنے آسکے ،اوہناں اس کتاب نوں سودھن بارے وی دسیا کہ میں ایہہ کم کیوں چھوہیا تے بزرگاں دی شفقت نالے اللہ دے کرم پاروں اس کم نوں مکمل کیتا تے اجکل میں اس دا ’’اردو ترجما‘‘کر رہیا دعا کرو کہ ایہہ کم وی سرے جا لگے،تہاڈا بہت شکریہ۔

ڈاکٹرافضل راز نیں سیمینار وچ اپنے وچار کجھ انج بیان کیتے کہ پرنسپل پروفیسر کلیم احسان بٹ نیں جدوں ایہہ دس پائی کہ ساڈے کالج وچ پنجابی دے چار سو طالب علم نیں ایہہ اک خبر سی ،اس نوں سُن کے جی بڑا راضی ہویا تے کہیا میرے ذمے جو حکم لائو میں حاضر آں ،اوہناں آکھیا میاں محمد بخشؒ دی برسی آرہئی اے۔اسیں اک سیمینار رکھنا چاہنیں آں ،میں کہیا ضرور رکھو تے جتھے میری ضرورت محسوس کرو دسنا ں میں حاضر آں،بچیاں نوں اوہناں دسیا کہ میاں محمد بخشؒ ساڈے علاقے دے من کھچویں صوفی شاعر نیں اوہناں ددھیالی پنڈ ’’چک براہم ‘‘اے ،ایتھوں اوہناں دے وڈھکے ہجرت کر کے کھڑی شریف جا وسے سن،ڈاکٹرمحمد افضل راز نے کہیا کہ اوہناں دیاں ستاراں کتاباں دی دس پیندی اے جس وچ اک فارسی دی سی،اس دا ناں’’تذکرہ مقیمی ‘‘سی۔اوہناں دا کلام ہر محفل (غمی ،خوشی)وچ پیش کیتا جاسکدا اے۔اوہناں دے کلام وچ اخلاق دا درس تھاں تھاں تے مل دا اے ،تے اوہ بندہ دنیا وچ تے نالے آخرت وچ سرخرو ہووے گا جہدے اخلاق پکے تے پیڈے ہون گے،اخلاق ،اسلام دیاں بنیاداں شنگارن لئی اخلاق دی تعلیم دا اک طالب علم لئی جاننا ضروری اے۔اخلاق ہے کیہ؟ ایہہ نِکیاں نِکیاں اوہ گلاں نیں جنہاں نوں اپنی زندگی دا حصہ بنالیا جاوے تے اپنی تے دوجے دے جیون نوں اسیں سؤکھا بنا سکنے آں،میاں محمد بخشؒ دی کتاب ’’سفرالعشق‘‘دے معنیاں تے غور کرئیے تے ساہنوں پتا چلدا اے کہ اوہناں دسیا اے کہ عشق دا مطلب کیہ ہوندا اے اس دے معنے جدوجہد دے ہوندے نیں تے ایہہ اک مسلسل عمل دا ناں اے۔ایہہ سفر تہاڈی زندگی نوں آسان نالے مشکل نال کھہینا سکھاندا اے تے جے تسیں مشکل نال کھہہ گئے فر زندگی تہاڈے آسان ہو جاندی اے ۔زندگی نوں زندگی دے مفہوم وچ لے کے چلنا چاہی دا اے،پنجابی ساڈی اپنی زبان اے تے اس نوں اپس وچ بولنا چاہی دا تے دوجیاں نوں اس دی پریرنا دینی چاہی دی اے۔ڈاکٹرمحمد افضل راز نیں پرنسپل پروفیسر کلیم احسان بٹ تے شعبہ پنجابی دے انچارج عابد اعوان(لکچررپنجابی) دا شکریہ ادا کیتا نالے مبارکباد پیش کیتی کہ ایہہ سیمینار میاں محمد بخشؒ دد شان دے مطابق سی ،طالب علماں دا وی شکرگزار آں کہ اوہناں بڑی توجہ نال ہر مقررنوں سُنیا تے نال نال داد وی دتی۔
ٹی وی ریڈیو دے مقبول ثناء خوان رسولﷺ عارف شاہد گوندل نیں سیمینار وچ میاں محمد بخشؒ دا کلام سنا کہ ٹھٹھ بن دتا ،حاضرین نیں اوہناں خوب داد دتی،تے اوہناں بیمار ہون دے باوجود سیمینار وچ کلام سنا کے اپنا حصہ پایا نالے حاضرین نوں محظوظ کیتا۔
پروفیسرکلیم احسان بٹ(پرنسپل) نیںسارے پروہنیاں دا شکریہ ادا کیتا تے ادارے دے سربراہ عابد حسین اعوان(شعبہ پنجابی)نوں کامیاب سیمینار کران تے مبارکباد پیش کیتی،تے پروہنیاں نوں شیلڈاں پیش کیتیاں نالے طالب علماں وچ انعام وی تقسیم کیتے ۔اوہناں وعدہ کیتا کہ اس کالج وچ پنجابی دے ہور وی پروگرام کیتے جان گے کیوں جے طالب علماں دیاں اکھاں وچ کجھ کرن دا عزم
ویکھیا اے۔اوہناں اس گل دا وی اعتراف کیتا کہ مینوں اس کالج وچ ساڑھے تن سال ہون نوں آئے نیں اس سیمینار وچ مینوں کجھ نئیں کرنا پیا سب طالب علماں تے اوہناں استاداں نیں کیتا اے۔کوئی سیمینار ،پروگرام دا کریڈٹ اک بندے نوں نئیں جاندا بلکہ ایہہ اک ٹیم ورک دا نتیجہ ہوندا اے۔

اوور لائن
پنجابی مجلس دی چھتر چھاویں