سردار عثمان بزدار ملک دے بہترین وزیر اعلیٰ قرار

تحریر: عامر رفیق بٹ

کسے وی ملک دی ترقی دا اندازہ اوس ملک وچ رہن والے لوکاں دے طرزبودوباش‘ رہائش‘ لائف سٹائل تے خوشحالی توں لایا جاندا اے۔ جہڑے ملک وچ معیشت مضبوط تے سارے لوک برسرروزگار ہون تے ملک واضح طور تے ترقی کردا وکھائی دیندا اے۔ ساڈی قوم نوں ہمیشہ توں ای وزیراعظم عمران خان دی قیادت اتے غیر متزلزل یقین تے مکمل اعتماد رہیا اے۔ وزیراعظم عمران خان نے اپنے عملی اقداماں توں ثابت کیتا کہ اوہناں نے وزیراعظم عمران خان دے وژن دے مطابق ہر طبقے دا سوچیا تے اوہناں دی تعمیرو ترقی لئی عملی اقدامات کیتے۔ صوبہ پنجاب وچ پاکستان تحریک انصاف دی حکومت نے تن سال دے دورانیے وچ بہترین نظم و نسق تے عوامی فلاح و بہبود لئی بہت سارے کم کیتے۔ وزیراعلیٰ پنجاب سردار عثمان بزدار نے حیران کن انداز وچ پنجاب دے معاملات نوں ایس طرحاں سدھاریا کہ ناقدین دے منہ بند ہو گئے تے صوبہ دے سیاسی تے انتظامی امور تے اوہناں دی گرفت مضبوط توں مضبوط تر ہوندی گئی۔ اوہناں فلاحی کماں دا اک تانتا جیا بنھ دتا اے۔ کجھ کم تے ایسے نیں جہڑے پچھلی حکومت اپنے دس سالہ دور وچ وی نہیں کر سکی مگر عثمان بزدار نے اقتدار سنبھالدے ای اوہدے وَل توجہ دتی۔
وطن عزیز وچ عوامی فلاح و بہبود تے عوامی مفاداں نوں ترجیح دین لئی موجودہ حکومت نے انقلابی اقدامات کیتے نیں۔ ملک دے سب توں وڈے صوبہ پنجاب دی گل کیتی جاوے تے اسیں ویکھدے آں کہ وزیراعلیٰ پنجاب عثمان بزدار اپنے عوام نوں ترقی و خوشحالی ول تیزی نال گامزن کیتے ہوئے نیں۔ وزیراعلیٰ عثمان بزدار دے مطابق ساڈا ایجنڈا صرف عوام دی خدمت اے۔ محکمیاں وچ اصلاحات کر کے عوام لئی آسانیاں پیدا کیتی گئیاں نیں۔ پنجاب دے بے مثال ترقیاتی پروگرام دے تحت ہر ضلع وچ ترقی دے ثمرات پہنچ رہے نیں جد کہ ترقیاتی فنڈز دی غیر منصفانہ تقسیم دے پچھلے کلچر نوں ختم کیتا اے۔ پچھلے دور وچ ترقیاتی فنڈز نوں ذاتی پسند تے ناپسند دے تحت خرچ کیتا گیا۔ نویں پاکستان وچ پائی پائی امانت سمجھ کے دیانت دے نال عوام اتے خرچ کر رہے آں۔ مخالفین ترقی دا سفر روکنا چاہندے نیں۔ تنقید برائے تنقید کرن والے عناصر ہر موقع تے نکام رہے نیں۔ اپوزیشن دے پیر اُکھڑ چکے نیں۔ وزیراعلیٰ عثمان بزدار نے آکھیا کہ ساڈی سمت درست تے نیت نیک اے۔ عوام دے مسئلیاں دے حل لئی دن رات اک کیتے ہوئے آں۔ وزیراعلیٰ پنجاب عثمان بزدار دی زیرسرپرستی شعبہ وچ برق رفتاری دے نال ترقی دی منزلاںطے کیتی جا رہیاں نیں۔ بنیادی ضرورتاں تے ترقیاتی منصوبیاں مگروں ہن وزیراعلیٰ پنجاب عثمان بزدار نے نوجواناں لئی سرکاری ملازمتاں دی فراہمی دے بوہے کھول دتے نیں۔ نال ای اوہناں نے سرکاری ملازمتاں لئی عمر دی حد وچ دو سال دی رعایت دین دا وی اعلان کیتا اے جہدا براہ راست نوجواناں نوں فیدہ پہنچے گا۔
وزیراعلیٰ پنجاب عثمان بزدار دے مطابق نوجوان ساڈا سرمایہ نیں۔ عمر وچ رعایت نال ہزاراں نوجواناں نوں پی ایم ایس دے امتحان وچ حصہ ملے گا۔ محکمہ اطلاعات‘ ڈی جی پی آر‘ پنجاب دے پربندھ ہیٹھ چیف منسٹر انٹرن شپ پروگرام دے تحت میڈیا گریجوایٹس وچ سرٹیفکیٹس تے چیک تقسیم کرن دی تقریب منعقد ہوئی۔ وزیراعلیٰ پنجاب سردار عثمان بزدار چیف منسٹر آفس وچ منعقدہ تقریب دے مہمان خصوصی سن۔وزیراعلیٰ عثمان بزدار نے چیف منسٹر انٹرن شپ پروگرام دے تحت میڈیا گریجوایٹس وچ سرٹیفکیٹس تے چیک تقسیم کیتے۔ وزیراعلیٰ عثمان بزدار نے چیف منسٹر انٹرن شپ پروگرام دی تقریب نال خطاب کردیاں ہویاں آکھیا کہ نوجواناں لئی اک لکھ ملازمتاں نوں ودھا کے ڈیڑھ لکھ تک لے جا رہے آں۔ باصلاحیت تے تعلیم یافتہ نوجواناں نوں میرٹ اتے ملازمتاں دیاں گے۔ پنجاب دے نوجواناں نوں ملازمتاں لئی عمر دی حد وچ 2سال دی رعایت دتی جاوے گی۔ پی ایم ایس دے امتحان وچ وی امیدواراں نوں عمر وچ 2سال دی رعایت دیاں گے۔اوہناں آکھیا کہ پنجاب دی تریخ وچ 740 ارب روپے دا سب توں وڈا ترقیاتی بجٹ دین دا اعزاز ساڈی حکومت نوں حاصل ہویا اے۔ تے روٹ لیول اتے ترقی دے ثمرات پہنچان لئی 360ارب روپے دا ڈسٹرکٹ ڈویلپمنٹ پیکج دتا اے۔ عوام دی بہتری لئی حکومت پوری طرح یکسو تے متحرک اے۔ چیف منسٹر انٹرن شپ پروگرام دا دائرہ کار ہور ودھاواں گے۔ کمیونیکیشن تے میڈیا توں متعلق جدید تکنیک‘ ابلاغی ماڈل تے ریسرچ نال آگاہی ضروری امر اے۔ چیف منسٹر انٹرنشپ پروگرام دا مقصد میڈیا گریجوایٹس نوں میڈیا تے کمیونیکیشن دے جدید تقاضیاں نال روشناس کرانا اے۔ پاکستان دے بالخصوص پنجاب دے نوجواناں دی خداداد صلاحیتاں دی پوری دنیا معترف اے۔ڈی جی پی آر دی ٹریننگ عملی زندگی وچ نوجواناں لئی مفید ثابت ہووے گی۔ وزیراعلیٰ عثمان بزدار نے آکھیا کہ محکمہ اطلاعات و ثقافت پنجاب وچ اطلاعاتی‘ صحافتی‘ تے ثقافتی اقدار دی ترویج تے ترقی وچ اپنا بھرواں کردار ادا کر رہیا اے۔ ڈی جی پی آر توں تربیت یافتہ میڈیا گریجوایٹس صحافتی تے اخلاقی اقدار نوں پیش نظر رکھدیاں ہویاں عملی زندگی وچ قدم رکھن گے۔چیف منسٹر انٹرن شپ اپنی نوعیت دا پاکستان دی تریخ دا پہلا انٹرن شپ پراجیکٹ اے۔ ڈی جی پی آر دا دورہ حکومت دی کارکردگی نوں عوام تک پہنچان وچ قابل قدر کردار ادا کر رہیا اے۔ نوجوان میڈیا پرسنز نوں فرائض دی انجام دہی وچ معروضیت نوں نظرانداز کرنا چاہیدا اے۔ حقائق نوں من و عن پیش کرنا میڈیا پرسن دی بنیادی ذمہ داری اے۔ اوہناں نے آکھیا کہ ڈی جی پی آر دے پربندھ ہیٹھ انٹرن شپ پروگرام کامیابی نال مکمل کرن والے گریجوایٹس مبارکباد دے مستحق نیں۔
ایس موقع تے ترجمان حکومت پنجاب حسان خاور نے تقریب نال خطاب کردیاں ہویاں آکھیا کہ 2سالہ چیف منسٹر انٹرن شپ پروگرام لئی 6کروڑ 70لکھ روپے مختص کیتے گئے نیں۔وزیراعلیٰ عثمان بزدار دی ہدایت اتے ینگ میڈیا گریجوایٹس نوں 20ہزار روپے ماہانہ اعزازیہ دتا جا رہیا اے۔ چیف منسٹر انٹرن شپ پروگرام نوجواناں لئی پیشہ ورانہ تربیت تے ملازمت دے بوہے کھول دیوے گا۔ سیکرٹری اطلاعات راجہ جہانگیر انور نے آکھیا کہ چیف منسٹر انٹرن شپ پروگرام وچ 50فیصدکوٹہ طالبات تے 10فیصد ورکنگ جرنلسٹ دے بالاں لئی مختص اے۔ چیف منسٹر انٹرن شپ پروگرام لئی 7ہزار امیدوار سن۔ ہر ضلع توں میرٹ اتے 2طلبہ نوں منتخب کیتا گیا۔ تقریب وچ صوبائی وزیر رائے تیمور بھٹی‘پرنسپل سیکرٹری وزیراعلیٰ‘ ڈائریکٹر جنرل پبلک ریلیشنز‘ ڈائریکٹر کوآرڈینیشن ڈی جی پی آر‘ ڈائریکٹر پبلک ریلیشنز ملتان ڈویژن تے متعلقہ حکام نے رلت کیتی۔ دُجے پاسے ینگ میڈیا گریجوایٹس نے چیف منسٹر انٹرن شپ پروگرام شروع کرن تے وزیراعلیٰ پنجاب سردار عثمان بزدار نوں خراج تحسین پیش کیتا۔ میڈیا گریجوایٹس دے مطابق وزیراعلیٰ عثمان بزدار نے انٹرن شپ پروگرام نال ساڈے دل جت لئے۔ نوجواناں نوں بااختیار بنان لئی کاوشاں قابل قدر نیں۔ ڈی جی پی آر وچ ٹریننگ سودمند ثابت ہووے گی۔ وزیراعلیٰ عثمان بزدار دا شکریہ جنہاں نے صوبہ بھر دے نوجواناں دی آواز سنی۔ ینگ میڈیا گریجوایٹس نے آکھیا کہ پی ٹی آئی حکومت طلبہ دی فلاح و بہبود تے اوہناں دی ترقی اتے خصوصی توجہ دے رہی اے۔ انٹرن شپ پروگرام نال ساڈی پیشہ وارانہ صلاحیتاں وچ ہور نکھار آوے گا۔ ڈی جی پی آر وچ چیف منسٹر پنجاب انٹرن شپ پروگرام دے دوران بہت سکھیا۔ پرنٹ ، الیکٹرانک تے سوشل میڈیا بارے عملی تربیت حاصل ہوئی اے اوہ قابل فخر اے۔ پنجاب حکومت نے میرٹ دی بنیاد اتے یونیورسٹیاں توں فارغ التحصیل میڈیا گریجویٹس نوں پیڈ انٹرن شپ دا جہڑا موقع فراہم کیتا اوہدے اتے اسیں وزیراعلیٰ سردار عثمان بزدار دے تہہ دل توں شکرگزار آں۔
کجھ دناں پہلے انسٹی ٹیوٹ آف پبلک اوپین (IPOR) نے نویں سروے رپورٹ جاری کیتی۔ جہدے مطابق پنجاب دے 45فیصد رائے دہندگان نے کارکردگی دے لحاظ نال سردار عثمان بزدار نوں بیسٹ وزیراعلیٰ قرار دتا۔ وزیراعلیٰ پنجاب سردار عثمان بزدار نے تعلیم تے صحت دی سہولتاں دی فراہمی تے ڈویلپمنٹ دے لحاظ نال دوجے وزرائے اعلیٰ نوں پچھے چھڈ دتا۔ سروے وچ اکثریت نے وزیراعلیٰ پنجاب سردار عثمان بزدار دے حق وچ رائے دتی جہدے وچ 86 فیصد رائے دہندگان نے وزیراعلیٰ پنجاب سردار عثمان بزدار دی قیادت وچ حکومت دے تعلیم دی سہولتاں دے اقداماں اتے اطمینان دا اظہار کیتا۔
ایسے طرحاں وزیراعلیٰ پنجاب سردار عثمان بزدار دی قیادت وچ پنجاب حکومت صحت دی بنیادی سہولتاں دی فراہمی وچ وی بازی لے گئی۔ پنجاب دے 72فیصد رائے دہندگان صحت دی بنیادی سہولتاں دی فراہمی دے حوالے نال پنجاب حکومت دے کیتے گئے اقدامات نوں سراہیا۔ وزیراعلیٰ پنجاب سردار عثمان بزدار دے ترقیاتی کماں دے حوالے نال وی سروے کیتا گیا جہدے مطابق ڈویلپمنٹ دے لحاظ نال پنجاب وچ 51فیصد وزیراعلیٰ پنجاب سردار عثمان بزدار دی کارکردگی توں مطمئن وکھائی دتے۔
وزیراعلیٰ پنجاب سردار عثمان بزدار سروس ڈلیوری دے لحاظ نال وی نمایاں رہے‘ پنجاب دے 61 فیصد رائے دہندگان سرکاری محکمیاں وچ سروس ڈلیوری اتے وزیراعلیٰ پنجاب سردار عثمان بزدار دے اقدامات توں خوش نیں۔موجودہ صوبائی حکومت دی کارکردگی ہر اعتبار نال پچھلی حکومتاں دے دوراقتدار دے مقابلے وچ بہتر رہی اے۔ حکومتی پالیسیاں دے نتیجے وچ عوام نوں ریلیف حاصل ہویا اے تے علاقائی ترقی دے مقاصد دے حصول لئی لاتعداد ترقیاتی سکیماں مکمل ہوئیاں نیں جد کہ متعددسکیماں اتے ترقیاتی کم تکمیل دے مختلف مرحلے وچ نیں جنہاں نوں چھیتی توں چھیتی مکمل کیتاجا رہیا اے۔ غیر جانبدار مبصرین تے ادارے وی پنجاب حکومت دی کارکردگی نوں تسلی بخش قرار دے رہے نیں تے اوہناں دے مطابق صوبے وچ اصلاحات دا عمل جاری کیتا گیا۔ ایہدے بہتر نتیجے حاصل ہوئے۔ اداریاں وچ بہتری لیان لئی جس طرحاں طریقہ کار نوں بہتر بنایا گیا‘ آن لائن سسٹم متعارف کرائے گئے اداریاں دی کارکردگی دی مانیٹرنگ د انظام وضع کیتا گیا اوہدے تحت ترقی تے بہتر سروس دے مطلوبہ اہداف دے حصول وچ مدد ملی۔ خدمت تہاڈی دہلیز اتے جیویں جدید آئی ٹی ٹیکنالوجی دے حامل منصوبیاں دی تکمیل نال عوامی مسئلیاں دے حل وچ مدد ملی۔ ریکارڈ تعداد وچ عوامی شکایتاں دا ازالہ ممکن ہویا۔ انصاف میڈیسن کارڈ دی فراہمی توں یونیورسل ہیلتھ کیئر پروگرام دے ثمرات نال صوبے دے عوام نوں مستفید کیتا گیا تے ہیلتھ کارڈ دی تقسیم دا سلسلہ تیز رفتاری نال مکمل کیتے جان دے پروگرام اتے وی عملدرآمد تیز تر کیتا گیا۔ اعلیٰ تعلیم دے فروغ لئی صوبے وچ 21یونیورسٹیاں دے قیام دے نال نال 86 ایسوسی ایٹ کالجز تے 8630 سکولاں دی اپ گریڈیشن کیتی گئی۔
سردار عثمان بزدار نے اک لکھ خالی آسامیاں اتے بھرتی لئی منظوری دے کے یقینا عوام دے دل جت لئے نیں۔ ایس خبر نے عوام دے مرجھائے چہریاں اتے رونق پیدا کردتی اے۔ تفصیلات دے مطابق 5 جنوری 2022نوں پنجاب حکومت نے سرکاری محکمیاں وچ اک لکھ آسامیاں اتے بھرتی دا فیصلہ کیتا اے جہڑا صرف تے صرف میرٹ تے موجودہ تعلیمی قابلیت دی بنا تے ریکروٹمنٹ پالیسی دے مطابق ہون گیاں۔ ایہ بھرتیاں میرٹ‘ تعلیم تے تجربے دی بنا اتے کیتیاں جان گئیاں۔ وزیراعلیٰ پنجاب نے ایڈہاک ڈاکٹراں دی تنخواہاں دی ادائیگی وچ حائل رکاوٹاں نوں فوری طور تے دور کرن دا حکم دیندیاں ہویاں ہدایت کیتی اے کہ آئندہ ایڈ ہاک ڈاکٹراں دی تنخواہاں وچ کسے قسم دی تاخیر نہیں ہونی چاہیدی اے۔ دُجے پاسے پاکستان دی تریخ وچ روزگار دی فراہمی لئی سب توں وڈے پروگرام پنجاب روزگار سکیم دا وزیراعلیٰ پنجاب عثمان بزدار نے آغاز کیتا۔ جہدے تحت پنجاب سمال انڈسٹریز کارپوریشن تے بینک آف پنجاب دے اشتراک نال سکیم دے تحت 30ارب روپے توں ودھ دے قرضے آسان شرطاں اتے فراہم کیتے جا رہے نیں۔ ایہ سکیم سمال اینڈ میڈیم انٹر رپرائز ڈویلپمنٹ تے کورونا نال متاثرہ کاروبار دی بحالی لئی ممدومعاون ثابت ہو رہی اے۔ سکیم دے تحت نویں کاروبار یا موجودہ کاروبار لئی آسان شرطاں اتے قرضہ فراہم کیتا جاوے گا۔ مرد تے زنانیاں دے نال خواجہ سرا وی قرضہ سکیم توں استفادہ حاصل کر رہے نیں۔
بلاشبہ‘ موجودہ دور وچ عوام نوں ریلیف دین والی حکومتاں ای اپنا وجود برقرار رکھدیاں نیں۔ جمہوری حکومتاں اپنے شہریاں دا معیار زندگی تے اوہناں نوں روزگار دے مواقع فراہم کرن لئی ہر ویلے سرگرم عمل رہندیاں نیں۔ حکمراناں نوں پتہ ہوندا اے کہ ا وہناں نے عوامی فلاح و بہبود دے کماں پاروں اپنے شہریاں نوں جوابدہ ہونا اے جہدی بنیاد اتے اوہناں دے آئندہ اقتدار وچ رہن دا رستہ ہموار ہوندا اے۔