علاج ساریاں دا حق
سمیر احمد
بدقسمتی نال ترقی پذیر ملک ہون دے ناطے پاکستانی عوام نوں کدی صحت دی اوہ سہولتاں میسر نہیں آئیاں جہڑیاں اوہناں دا حق ہونا چاہیدیاں سَن۔ صحت مند زندگی گزارنا غریب تے امیر ساریاں دا حق اے۔ گھٹ وسائل ‘ غذائی قلت‘ آمدن وچ کمی‘ غریباں دے بیماریاں دا شکار ہون دے امکانات نوں ہور ودھا دیندا اے۔ پاکستان وچ 40فیصد عوام غربت دی لکیر توں تھلے زندگی گزار رہے نیںتے جے اوہناں دے گھراں وچ جھات پائیے تے 33فیصد بال غذائی قلت دا شکار ہو کے چھوٹے قد رہ جاندے نیں۔ 44فیصد بالاں دی سٹنڈ گروتھ ہوندی اے۔ 50فیصد بالاں وچ خون دی کمی ہوندی اے تے تقریباً ہر چوتھا بال آئرن دی کمی دا شکار ہوندا اے۔ خدا نے اشرف المخلوقات نوں صبرو ہمت تے بہت ساری قوتاں نال نوازیا اے لیکن ایہو انسان جدوں غربت دے امتحان دا سامنا کردا اے تے اوہدی صبر جئی قوت بکھرنا شروع ہو جاندی اے تے جے غربت دے نال جے بیماری وچ کوئی خاندان دا بندا مبتلا ہو جاوے تے اوہدے لئی آزمائش سخت ہو جاندی اے۔ غریب دے گھر وچ بیماری نہ ہووے تے اوہ غربت دا سامنا کر سکدا اے لیکن بیماری غریب دی کمر ای توڑ دیندی اے۔
پاکستان اتے مسلط جنے وی حکمران آئے جے اوہناں دے چنگے پہلوواںنوں زیر غور لیایا جاوے تے ہر حکومت نے کسے نہ کسے شعبے وچ عوام دے معیار زندگی نوں بلند کرن تے فلاح لئی کاوشاں کیتیاں ہون گئیاں۔ جے اک حکومت نے روٹی‘ کپڑا تے مکان دا نعرہ لایا تے دُجی حکومت نے سڑکاں تے پل بنا کے انسان دی زندگی آسان کرن دی کوشش کیتی۔ گل ویژن تے ترجیحاں دی اے۔ ایہ ساڈی عوام دی خوش قسمتی اے کہ ساڈے وزیراعظم نے صحت دے شعبے نوں دُجے شعبیاں اتے ترجیح دتی۔ ایہدا تجربہ اوہناں دے کول شوکت خانم ہسپتال دی صورت وچ پہلے توں موجود سی۔ لہور‘ پشور تے کراچی وچ ایس ہسپتال دا بہترین انتظام ایس گل دا منہ بولدا ثبوت اے کہ اوہناں دی نیت صحت دے میدان وچ اک انقلاب دا سنگ بنیاد رکھن دی اے تے اوہ ملک نوں اک فلاحی ریاست بنائون گے۔ موجودہ حکومت دی صحت دے شعبے نوں ترجیح دین دا اندازہ اسیں وزیراعظم عمران خان دے قوم نال اپنے پہلے خطاب توں لا سکنے آں جہدے وچ اوہناں دے ہتھ وچ اک غذائی قلت تے سٹنڈ گروتھ دا شکار بالاں دا ایکسرا موجود سی جہڑا کہ پاکستان وچ موجودہ وصورتحال دی منظرکشی کردا اے۔ حکومت دے تن سال گزرن مگروں جے اسیں صحت دے میدان وچ کارکردگی دا جائزہ لئیے تے اک اہم انقلابی قدم ’’نیشنل صحت کارڈ‘‘ دا متعارف کروانا اے۔ قومی صحت کارڈ ہولڈر پاکستان وچ چار سو توں ودھ پرائیویٹ ہسپتال وچ اپنا مفت علاج کروا سکدا اے جہڑے صحت سہولتاں پروگرام دے پینل اتے موجود نیں۔ ہن تک 70لکھ خانداناں نوں قومی صحت کارڈ جاری ہو چکے نیں۔ وزیراعظم پاکستان دی ہدایت تے ڈاکٹر فیصل سلطان دی زیر قیادت یونیورسل ہیلتھ کوریج نوں یقینی بنان لئی مربوط تے موثر اقدامات نوں یقینی بنایا جا رہیا اے۔
ایس پروگرام دا بنیادی مقصدگھٹ آمدنی والے عوام نوں صحت دی معیاری سہولتاں دی فراہمی نوں یقینی بنانا سی تے اوہناں نوں ہور غربت دے انھیریاں وچ جان توں بچانا اے۔ ہن ایہہ فیدہ ملک دے ہر خاندان لئی اے تے ہر خاندان لئی نیشنل ہیلتھ کارڈ دی فراہمی نوں یقینی بنایا جا رہیا اے۔ اوہدے تحت ساری وڈی بیماریاں دا علاج ہن قومی صحت کارڈ دے ذریعے ممکن اے۔ اک کارڈ وچ علاج لئی خاندان لئی دس لکھ تک دا علاج مفت کیتا جا سکدا اے۔ ہن کسے وی غریب انسان نوں علاج لئی دربدر دی ٹھوکراں نہیں کھانیاں پین گئیاں۔ ملک دے قریباً90 اضلاع وچ قومی صحت کارڈ دے ذریعے علاج دی مفت سہولتاں فراہم کیتی جا رہیاں نیں۔ قومی صحت کارڈ ہولڈر پاکستان وچ چار سو توں ودھ پرائیویٹ ہسپتال وچ اپنا مفت علاج کروا سکدا اے جہڑے صحت سہولتاں پروگرام دے پینل اتے موجود نیں۔ ہن تک 70لکھ خانداناں نوں قومی صحت کارڈ جاری ہو چکے نیں۔ وزیراعظم پاکستان دی ہدایت تے ڈاکٹر فیصل سلطان دی زیر قیادت یونیورسل ہیلتھ کوریج نوں یقینی بنان لئی مربوط تے موثر اقدامات نوں یقینی بنایا جا رہیا اے۔ خیبر پختوانخوا ہ دی ساری آبادی نوں ہیلتھ کارڈ دتے جا چکے نیں جہڑے نادرا توں رجسٹرڈ نیں۔ اوہدے علاوہ خواجہ سرا جہڑے نادرا دے کول رجسٹرڈ نیں تے پاکستان دے شہری نیں۔
اہلیت دا طریقہ کار جانن دا وی آسان طریقہ اے۔ کوئی وی بندا اپنی اہلیت جانن لئی موبائل نمبر توں اپنا شناختی کارڈ 8500 اتے مسیج بھیجے اوہدا جواب لمحیاں وچ وصول ہو جاوے گا۔ ایس ضمن وچ پینل اتے درج ہسپتالاں وچ اندراج تے ایس سلسلے وچ شکایتاں لئی خاندان ٹول فری نمبر900-908000 اتے رابطہ کر سکدے نیں۔ صحت دے شعبے وچ ایہناں اصلاحاتاں پاروں پاکستان چھیتی فلاحی ریاست بن جاوے گا۔
