مہنگائی تے انیندرا

جمیل احمد پال

لوکائی نال سوال جواب سیشن وچ جتھے وزیر اعظم نے دسیا کہ اوہ حکومت توں نکلن دے بعد زیادا خطرناک ہوون گے اوتھے ایہ وی دسیا کہ مہنگائی اوہناں نوں راتاں نوں جگا دیندی اے۔نال ایہ ڈراوا وی دے چھڈیا کہ گیس تے کھاد بحران کارن کھاون وستاں دے مل ودھ سکدے نیں موئے دی کنڈ اتے سو کوڑے ہور ماردیاں پٹرول دا مل ودھن دا دھڑکو وی دس دتا۔ گویا ایس سیشن وچ لوکاں دی جان چنگی طرحاں کڈھ ماری۔
مہنگائی یاں لوکاں دے مسائل پاروں حکمراناں دی پریشانی نوں اک ذمے واری سمجھ کے صرف خلفائے راشدین دے دور وچ نبھایا گیا۔ بعد دے دور وچ تاں حکمران دی نیندر حرام ہونا فیشن بن گیا۔ خاص کر کجھ بادشاہ تاں ایس سلسلے وچ باقاعدا اپنے فوٹو سیشن نہ سہی خبری سیشن ضرور کرواندے رہے۔ مغل بادشاہ اورنگزیب جو بقول کجھ سیانیاں دے ٹوپیاں سی کے گزارا کردا سی لوکائی ورگے ای مسائل دا شکار سمجھیا جا سکدا اے۔ یاں فیر پاکستانی تواریخ وچ سارے ای آمر خاص کر جنرل ضیا جہناں نے اعتراف کیتا سی کہ اوہناں دے دور وچ رشوت دا ریٹ بہت ودھ گیا اے۔ ایہ سارے اکبر الہ آبادی دے شعر دے مطابق بہت غمگین تے دکھی لوک سن جہناں نوں لوکائی دا غم لے کے بہ گیا۔
وڈے سراں دیاں پیڑاں وی ہوندیاں نیں حکمراناں دے غم تے پیڑاں وی نویکلی قسم دے ہوندے نیں جہناں اتے قابو پاون لئی اوہناں نوں وکھری ٹایپ دے شغل وی اختیار کرنے پیندے نیں۔ اک زمانے وچ حکمران رعایا دا حال جانن لئی بھیس وٹاون دی لوڑ محسوس کردے سن۔ اج دے دور وچ نرا میڈیا ای ایس کم لئی کافی ہو رہندا اے۔ البتا ایہدے واسطے حکمران کول اینا ویلا ہوناضروری اے کہ اوہ اخبار پڑھ سکے یاں فیر میڈیا ویکھ سکے۔
اجوکے وزیر اعظم ہوراں نوں ایہ وڈیائی حاصل اے کہ اک پاسے اوہناں دے مطابق پاکستان دنیا دا سبھ توں سستا دیس اے۔ پر ایس سستے ترین دیس اندر وی مہنگائی اینی اے کہ حکمران نوں انیندرے دا روگی بنا سکے۔ ایہدے توں ایہ وی اندازا کیتا جا سکدا اے کہ جے دنیا دے سبھ توں سستے دیس اندر مہنگائی دی ایہ شرح اے تاں مہنگے دیساں اندر تاں حکمران نفسیاتی روگی بن چکے ہوون گے۔
البتا ایہ گل ضرور اے کہ مہنگائی دا کارن حکمران یاں اوہناں دیاں پالیسیاں اکا نہیں سگوں کرونا پاروں ایہ عذاب لوکائی اتے نازل ہویا اے۔
سانوں اپنے ہردل عزیز وزیر اعظم دی سیوا وچ اک تاں شکریا عرض کرنا چاہیدا اے تے نال نال ایہ وی دسنا چاہیدا اے کہ اسیں وی اوہناں دے غم فکراں وچ برابر دے شریک آں۔ جویں مہنگائی نے تہاڈیاں نیندراں اڈائیاں ہوئیاں نیں اوویں ای پوری قوم دیاں نیندراں وی ایسے مہنگائی پاروں اڈیاں ہوئیاں نیں۔٭٭